၁။ နာ​မည်​ကျော်​တဲ့ ဘယ်​ဆုတောင်း​ချက်​အကြောင်း အခု လေ့​လာ​ကြ​မလဲ။

ကောင်း​ကင်​အဖ ဒါ​မှ​မဟုတ် သခင့်​ဆုတောင်း​ချက်​ဆို​တဲ့ နာ​မည်​ကျော် ဆုတောင်း​ချက်​ကို လူ​သန်း​ပေါင်း​များ​စွာ သိ​ကြ​တယ်။ ယေရှု​က အဲဒီ​နည်း​အတိုင်း ဆုတောင်း​ဖို့ တ​ပည့်တွေ​ကို သင်​ပေး​ခဲ့​တယ်။ ယေရှု ဘာ​အတွက် ဆုတောင်း​ခဲ့​သလဲ။ အဲဒီ​ဆုတောင်း​ချက်​က ကျွန်​တော်​တို့​အတွက် ဘာ​ကြောင့် အရေး​ကြီး​တာ​လဲ။

၂။ အရေး​ကြီး​တဲ့ ဘယ်​အချက်​သုံး​ချက်​အတွက် ဆုတောင်း​ဖို့ ယေရှု သင်​ပေး​ခဲ့​သလဲ။

^၂ “ဒီ​နည်း​အတိုင်း ခင်​ဗျား​တို့ ဆုတောင်း​ရ​မယ်– ‘ကောင်း​ကင်​မှာ စံ​မြန်း​တဲ့ ကျွန်​တော်​တို့​ရဲ့​အဖ၊ နာ​မတော် သန့်​ရှင်း​မြင့်​မြတ်​ပါ​စေ။ နိုင်​ငံ​တော် လာ​ပါ​စေ။ အလို​တော်​ဟာ ကောင်း​ကင်​မှာ ပြည့်​စုံ​သလို ကမ္ဘာ​မြေမှာ​လည်း ပြည့်​စုံ​ပါ​စေ’” လို့ ယေရှု​ပြော​တယ်။ (မဿဲ ၆:၉–၁၃ ကို​ဖတ်​ပါ။) ဒီ​အချက်​သုံး​ချက်​အတွက် ဆုတောင်း​ဖို့ ယေရှု ဘာ​လို့ သင်​ပေး​ခဲ့​တာ​လဲ။—ရှင်း​လင်း​ချက် ၂၀ ကို​ကြည့်​ပါ။

၃။ ဘု​ရား​သခင့်​နိုင်​ငံ​တော်​အကြောင်း ဘာ​တွေ​သိ​ဖို့ လို​သလဲ။

^၃ ဘု​ရား​သခင့်​နာ​မည်​ဟာ ယေဟောဝါ​ဖြစ်​မှန်း ကျွန်​တော်​တို့ သိ​ခဲ့​ကြ​ပြီ။ လူ​သား​တွေ​နဲ့ ကမ္ဘာ​မြေအတွက် ဘု​ရား​အလို​တော်​ကို​လည်း လေ့​လာခဲ့​ပြီ။ ဒါ​ဆို​ရင် “နိုင်​ငံ​တော် လာ​ပါ​စေ” လို့​ပြော​တဲ့​အခါ ယေရှု ဘာ​ကို​ဆိုလို​တာ​လဲ။ ဘု​ရား​သခင့်​နိုင်​ငံ​တော်​ဆို​တာ ဘာ​လဲ၊ နိုင်​ငံ​တော်​က ဘာ​လုပ်​ပေး​မှာ​လဲ၊ နာ​မတော်​ကို ဘယ်​လို သန့်​ရှင်း​မြင့်​မြတ်​စေ​မှာ​လဲ ဆို​တဲ့​အကြောင်း လေ့​လာ​ကြ​စို့။

၄။ ဘု​ရား​သခင့်​နိုင်​ငံ​တော်​ဆို​တာ ဘာ​လဲ၊ နိုင်​ငံ​တော်​ဘု​ရင်​ဟာ ဘယ်​သူ​လဲ။

^၄ ယေဟောဝါ​က ကောင်း​ကင်​မှာ အစိုး​ရ​တစ်​ခု ဖွဲ့​စည်း​တည်​ထောင်​ပြီး ဘုရင်​အဖြစ် ယေရှု​ကို ရွေး​ချယ်​တယ်။ အဲဒီ​အစိုး​ရ​ကို ဘု​ရား​သခင့်​နိုင်​ငံ​လို့ ကျမ်း​စာ​မှာ ခေါ်​ထား​တယ်။ ယေရှု​ဟာ “ဘု​ရင်​တ​ကာ​တို့​ရဲ့ ဘု​ရင်၊ သခင်​တ​ကာ​တို့​ရဲ့ သခင်​ပဲ။” (၁ တိမောသေ ၆:၁၅) ယေရှု​က ဘယ်​လူ​သား​အုပ်​စိုး​ရှင်​ထက်​မဆို ပို​ကောင်း​အောင် စွမ်း​ဆောင်​နိုင်​တယ်။ လူ့​အုပ်​စိုး​ရှင်​အားလုံး​ရဲ့ အစွမ်း​တန်ခိုး​ကို ပေါင်း​လိုက်​ရင်​တောင် ယေရှု​ရဲ့​အစွမ်း​တန်ခိုး​ကို မမီ​ဘူး။

၅။ ဘု​ရား​သခင့်​အစိုး​ရ​ဟာ ဘယ်​က​နေ အုပ်​ချုပ်​မလဲ။ ဘာ​ကို အုပ်​ချုပ်​မလဲ။

^၅ ယေရှု ရှင်​ပြန်​ထ​မြောက်​ပြီး​နောက် ရက်​လေး​ဆယ်​အကြာ​မှာ ကောင်း​ကင်​ကို ပြန်​တက်​သွား​တယ်။ နောက်​ဆုံး၊ ယေရှု​ကို နိုင်​ငံ​တော်​ဘု​ရင်​အဖြစ် ယေဟောဝါ ခန့်​အပ်​လိုက်​တယ်။ (တမန်​တော် ၂:၃၃) ဘု​ရား​သခင့်​အစိုး​ရ​ဟာ ကောင်း​ကင်​က​နေ ကမ္ဘာ​မြေကို အုပ်​ချုပ်​မယ်။ (ဗျာဒိတ် ၁၁:၁၅) ဒါ​ကြောင့် ဘု​ရား​သခင့်​နိုင်​ငံ​ကို “ကောင်း​ကင်​နိုင်​ငံ” လို့ ကျမ်း​စာ​ခေါ်​ထား​တယ်။—၂ တိမောသေ ၄:၁၈။

၆၊ ၇။ ယေရှု​ဟာ လူ့​အုပ်​စိုး​ရှင်​တွေ​ထက် ဘာ​ကြောင့် သာ​သလဲ။

^၆ ယေရှု​ဟာ “မသေနိုင်​တဲ့​အဖြစ်​ကို ရ​ထား” တဲ့​အတွက် ဘယ်​လူ့​အုပ်​စိုး​ရှင်​ထက်​မဆို ကြီး​မြတ်​တယ်​လို့ ကျမ်း​စာ​ပြော​တယ်။ (၁ တိမောသေ ၆:၁၆) လူ့အုပ်​စိုး​ရှင်​တိုင်း တစ်​နေ့​နေ့​တစ်​ချိန်​ချိန်​မှာ သေဆုံး​ကြ​ရ​ပေမဲ့ ယေရှု​ဟာ ဘယ်​တော့​မှ မသေဘူး။ ကျွန်​တော်​တို့​အတွက် ယေရှု​လုပ်​ပေး​မယ့် ကောင်း​မှု​အားလုံး ထာ​ဝ​စဉ် တည်​မြဲနေ​မှာ​ပါ။

^၇ ယေရှု​ဟာ တ​ရား​မျှ​တ​တဲ့၊ သနား​စာ​နာ​တတ်​တဲ့​ဘု​ရင် ဖြစ်​မယ်​ဆို​ပြီး ကျမ်း​စာ​မှာ ဒီ​လို​ကြို​ဟော​တယ်– “ယေဟောဝါ​ရဲ့ စွမ်းအား​တော်​က သူ့​အပေါ်​မှာ တည်​နေ​မယ်။ ဒါ​ကြောင့် သူ​ဟာ ဉာဏ်​ပညာ​နဲ့ ပြည့်​စုံ​ပြီး သိ​နား​လည်​နိုင်​စွမ်း ကြွယ်​ဝ​မယ်။ အကြံ​ဉာဏ်​ကောင်း​တွေ ပေး​နိုင်​တဲ့​သူ၊ အစွမ်း​ခွန်​အား​ကြီး​တဲ့​သူ၊ အသိ​ပညာ​ကြွယ်​တဲ့​သူ၊ ယေဟောဝါ​ကို ကြောက်​ရွံ့​ရို​သေတဲ့​သူ ဖြစ်​လိမ့်​မယ်။ ယေဟောဝါ​ကို ကြောက်​ရွံ့​ရို​သေရ​တာ ပျော်​မွေ့​မယ်။ အပြင်​ပန်း​ကို​ပဲ ကြည့်​ပြီး တ​ရား​မစီ​ရင်​ဘူး။ ကြား​တဲ့​စကား​ကို​ပဲ မူ​တည်​ပြီး ဆုံးမ​မှာ မဟုတ်​ဘူး။ [ဆင်း​ရဲ] နိမ့်​ကျ​သူ​တွေ​ကို မျှ​မျှ​တ​တ တ​ရား​စီ​ရင်​မယ်။” (ဟေ​ရှာ​ယ ၁၁:၂-၄) အဲဒီ​လို ဘု​ရင်​မျိုး​ကို လို​ချင်​တယ် မဟုတ်​လား။

၈။ ယေရှု​နဲ့​အတူ အုပ်​ချုပ်​မယ့်​သူ​တွေ​ရှိ​မယ်​ဆို​တာ ဘယ်​လို​သိ​ရ​သလဲ။

^၈ ဘု​ရား​သခင်​က ကောင်း​ကင်​နိုင်​ငံ​မှာ ယေရှု​နဲ့​အတူ အုပ်​ချုပ်​မယ့်​သူ​တ​ချို့​ကို ရွေး​ချယ်​ထား​တယ်။ ဥပမာ၊ တမန်​တော်​ပေါလု​က “ငါ​တို့ ဆက်​ပြီး​ခံ​ရပ်​မယ်​ဆို​ရင် ခ​ရစ်​တော်​နဲ့​အတူ ဘု​ရင်တွေ​အဖြစ် အုပ်​စိုး​ရ​လိမ့်​မယ်” လို့ တိမောသေကို ပြော​တယ်။ (၂ တိမောသေ ၂:၁၂) ယေရှု​နဲ့​အတူ အုပ်​စိုး​မယ့်​သူ ဘယ်​နှစ်​ယောက်​ရှိ​သလဲ။

၉။ ယေရှု​နဲ့​အတူ အုပ်​စိုး​မယ့်​သူ ဘယ်​နှစ်​ယောက်​ရှိ​သလဲ။ ဘယ်​အချိန်​က​စ​ပြီး သူတို့​ကို ဘု​ရား ရွေး​ချယ်​သလဲ။

^၉ အခန်း ၇ မှာ လေ့​လာခဲ့​တဲ့​အတိုင်း တမန်​တော် ယောဟန်​က ကောင်း​ကင်​မှာ ဘု​ရင်​ယေရှု​နဲ့​အတူ ၁၄၄,၀၀၀ လည်း ဘု​ရင်တွေ​အဖြစ် ရှိ​နေ​တာ​ကို မြင်​တယ်။ ၁၄၄,၀၀၀ ဟာ ဘယ်​သူ​တွေ​လဲ။ ‘[ယေရှု]နာ​မည်​နဲ့ အဖဘု​ရားရဲ့ နာ​မည်​ကို န​ဖူး​ပေါ်​မှာ ရေး​ထား​တဲ့​သူ​တွေ၊’ “သိုး​သငယ်[ယေရှု] သွား​လေ​ရာ တ​ကောက်​ကောက် လိုက်​သူ​တွေ၊ . . . လူ​သား​တွေ​ထဲ​က​နေ ဝယ်​ယူ​ထား​သူ​တွေ ဖြစ်​တယ်” လို့ ယောဟန် ပြော​ပြတယ်။ (ဗျာဒိတ် ၁၄:၁၊ ၄ ကို​ဖတ်​ပါ။) ၁၄၄,၀၀၀ ဟာ ယေရှု​နဲ့​အတူ “ဘု​ရင်​အဖြစ် ကမ္ဘာ​မြေကို အုပ်​စိုး” ဖို့ ဘု​ရား​ရွေး​ချယ်​ထား​တဲ့ သစ္စာ​ရှိ​ခ​ရစ်​ယာန်တွေ ဖြစ်​တယ်။ သူတို့​သေဆုံး​တဲ့​အခါ ကောင်း​ကင်​အသက်​တာ​ကို ရှင်​ပြန်​ထ​မြောက်​ကြ​တယ်။ (ဗျာဒိတ် ၅:၁၀) ပထမရာ​စု​က​စ​ပြီး ၁၄၄,၀၀၀ အဖွဲ့​ဝင် သစ္စာ​ရှိ​ခ​ရစ်​ယာန်တွေ​ကို ယေဟောဝါ ရွေး​ချယ်​တယ်။

၁၀။ လူ​တွေ​ကို အုပ်​ချုပ်​ဖို့ ယေရှု​နဲ့ ၁၄၄,၀၀၀ ကို ယေဟောဝါ စီ​စဉ်​ပေး​တာ ဘာ​ကြောင့် မေတ္တာ​ပါ​တဲ့​အစီ​အစဉ် ဖြစ်​သလဲ။

^၁၀ ယေဟောဝါ​က ကျွန်​တော်​တို့​ကို အလွန်​ဂရု​စိုက်​တဲ့​အတွက် ယေရှု​နဲ့​အတူ လူ​တွေ အုပ်​ချုပ်​ဖို့ စီ​စဉ်​ပေး​ခဲ့​တယ်။ ယေရှု​ဟာ မင်း​ကောင်း​တစ်ပါး​ဖြစ်​မှာ သေချာ​တယ်။ ကျွန်​တော်​တို့​ကို နား​လည်​ပေး​တဲ့​အပြင် လူ့​ဘဝ​ဟာ ဘယ်​လို​မျိုး​လဲ၊ ဘာ​ဒုက္ခတွေ ကြုံရ​သလဲ​ဆို​တာ​ကို​ပါ သိ​တယ်။ ယေရှု​ဟာ ‘ကျွန်​တော်​တို့​ရဲ့ အား​နည်း​ချက်​တွေ​ကို စာ​နာ​နိုင်​တဲ့​သူ၊’ “ကျွန်​တော်​တို့​လို​ပဲ အဘက်​ဘက်​မှာ စမ်း​သပ်​ခံ​ရ​တဲ့​သူ” ဖြစ်​တယ်​လို့ ပေါလု​ပြော​တယ်။ (ဟီ​ဘ​ရူး ၄:၁၅။ ၅:၈) ၁၄၄,၀၀၀ က​လည်း လူ့​ဘဝ​ဟာ ဘယ်​လို​မျိုး​လဲ​ဆို​တာ သိ​တယ်။ လူ့​အား​နည်း​ချက်​တွေ၊ အဖျား​အနာ​တွေ​နဲ့ ရုန်း​ကန်​လှုပ်​ရှားခဲ့​ဖူး​တယ်။ ဒါ​ကြောင့် ယေရှု​နဲ့ ၁၄၄,၀၀၀ ဟာ ကျွန်​တော်​တို့​ရဲ့ ခံစား​ချက်​ကို​သာ​မက ကြုံ​နေ​ရ​တဲ့ ပြဿ​နာ​တွေ​ကို​ပါ နား​လည်​ပေး​မယ်​ဆို​တာ စိတ်​ချ​နိုင်​တယ်။

၁၁။ ဘု​ရား​အလို​တော် ကောင်း​ကင်​မှာ ပြည့်​စုံ​ဖို့ တ​ပည့်တွေ​ကို ယေရှု ဘာ​လို့ ဆုတောင်း​ခိုင်း​တာ​လဲ။

^၁၁ ဘု​ရား​အလို​တော် ကောင်း​ကင်​မှာ ပြည့်​စုံ​ဖို့ တ​ပည့်တွေ​ကို ယေရှု ဘာလို့​ဆုတောင်း​ခိုင်း​တာ​လဲ။ ယေဟောဝါ​ကို စာ​တန်​မာ​ရ်​နတ် ဆန့်​ကျင်​ပုန်​ကန်​တဲ့​အကြောင်း အခန်း ၃ မှာ သိ​ခဲ့ရ​တယ်။ အဲဒီ​လို​ပုန်​ကန်​ပြီး​နောက် ယေဟောဝါ​က စာ​တန်၊ သစ္စာ​မဲ့​တဲ့ ကောင်း​ကင်​တ​မန်​တွေ ဒါ​မှ​မဟုတ် နတ်​ဆိုး​တွေ​ကို ကောင်း​ကင်​မှာ ခ​ဏ​တော့ နေ​ခွင့်​ပြု​ခဲ့​တယ်။ ဒါ​ကြောင့် ကောင်း​ကင်​မှာ​ရှိ​သူ​တိုင်း ဘု​ရား​အလို​တော် ဆောင်​တာ မဟုတ်​ဘူး။ အခန်း ၁၀ မှာ စာ​တန်​နဲ့ နတ်​ဆိုး​တွေ​အကြောင်း ပို​သိ​ရ​မယ်။

၁၂။ ဗျာဒိတ် ၁၂:၁၀ မှာ အရေး​ပါ​တဲ့ ဘယ်​ဖြစ်​ရပ်​နှစ်​ခု​ကို ဖော်ပြထား​သလဲ။

^၁၂ ယေရှု​ဟာ ဘု​ရား​သခင့်​နိုင်​ငံ​တော် ဘု​ရင်​အဖြစ် ခန့်​အပ်​ခံ​ရ​ပြီး မကြာ​ခင်​မှာ စာ​တန်​နဲ့​တိုက်​ခိုက်​တယ်​လို့ ကျမ်း​စာ​ဖော်ပြတယ်။ (ဗျာဒိတ် ၁၂:၇–၁၀ ကို​ဖတ်​ပါ။) အခန်း​ငယ် ၁၀ မှာ သိပ်​အရေး​ပါ​တဲ့ ဖြစ်​ရပ်​နှစ်​ခု​ကို ပြော​ထား​တယ်။ ဘု​ရား​သခင့်​နိုင်​ငံ​မှာ ဘု​ရင်​အဖြစ် ယေရှု​ခ​ရစ် စတင်​အုပ်​ချုပ်​ပြီ။ စာ​တန်​ဟာ မြေကြီး​ပေါ် ပစ်​ချ​ခံ​ရ​ပြီ။ ပြည့်​စုံ​ခဲ့​ပြီး​သား အဲဒီ​ဖြစ်​ရပ်​နှစ်​ခု​ကို လေ့​လာ​ကြ​မယ်။

၁၃။ စာ​တန် ပစ်​ချ​ခံ​ရ​ပြီး​နောက် ကောင်း​ကင်​မှာ ဘာ​ဖြစ်​ခဲ့​သလဲ။

^၁၃ စာ​တန်​နဲ့ နတ်​ဆိုး​တွေ ကောင်း​ကင်​က ပစ်​ချ​ခံ​ရ​ပြီး​နောက် သစ္စာ​ရှိ​ကောင်း​ကင်​တ​မန်​တွေ ဝမ်း​သာ​နေ​ကြ​တယ်​လို့ ကျမ်း​စာ​မှာ ပြော​တယ်။ “ကောင်း​ကင်​နဲ့ ကောင်း​ကင်​မှာ နေ​ထိုင်​သူတို့၊ ဝမ်း​မြောက်​ကြ​ပါ” လို့​ဖတ်​ရ​တယ်။ (ဗျာဒိတ် ၁၂:၁၂) အခု​ဆို​ရင် ကောင်း​ကင်​မှာ ဘု​ရား​အလို​တော်​ဆောင်​သူ​တွေ​ချည်း​ပဲ ရှိ​နေ​လို့ အပြည့်​အဝ ငြိမ်သက်​စည်း​လုံး​နေ​ပြီ။

၁၄။ စာ​တန် ကောင်း​ကင်​က ပစ်​ချ​ခံ​ရ​ပြီး​နောက် မြေကြီး​မှာ ဘာ​ဖြစ်​ပျက်​သလဲ။

^၁၄ မြေကြီး​ပေါ်​မှာ​တော့ လုံး​ဝ အခြေ​အနေ​မကောင်း​ဘူး။ ‘မာ​ရ်​နတ်​က သူ့​အချိန်​နည်း​နည်း​ပဲ ကျန်​တော့​မှန်း​သိ​လို့ ဒေါသ​တ​ကြီး ဆင်း​လာ’ တဲ့​အတွက် လူ​တွေ အဖြစ်​ဆိုး​ကြုံ​နေ​ရ​တယ်။ (ဗျာဒိတ် ၁၂:၁၂) စာ​တန် ဒေါ​သူပုန်​ထ​နေ​တယ်။ ကောင်း​ကင်​က ပစ်​ချ​ခံ​ရ​ပြီး မကြာ​ခင် ဖျက်​ဆီး​ခံ​ရ​တော့​မယ်​ဆို​တာ သူ​သိ​တယ်။ ဒါ​ကြောင့် တစ်​ကမ္ဘာ​လုံး ပြဿ​နာ​တွေ၊ ဒုက္ခ​ဝေ​ဒ​နာ​တွေ ပြည့်​နေ​အောင် နည်း​မျိုး​စုံ​နဲ့ လုပ်​တော့​တယ်။

၁၅။ ကမ္ဘာ​မြေအတွက် ဘု​ရား​အလို​တော်​ဟာ ဘာ​လဲ။

^၁၅ ကမ္ဘာ​မြေအတွက် ဘု​ရား​အလို​တော်​က​တော့ ပြောင်း​လဲ​မသွား​ပါ​ဘူး။ ပြည့်​ဝ​စုံလင်​သူ​တွေ​ကို မြေကြီး​ပရ​ဒိ​သု​မှာ ထာ​ဝ​စဉ်​အသက်​ရှင်​စေ​ဖို့ အလို​ရှိ​နေ​တုန်း​ပဲ။ (ဆာလံ ၃၇:၂၉) အဲဒီ​လို​ဖြစ်​ဖို့ ဘု​ရား​သခင့်​နိုင်​ငံ​က ဘယ်​လို​လုပ်​ပေး​မှာ​လဲ။

၁၆၊ ၁၇။ ဒံယေလ ၂:၄၄ က​နေ ဘု​ရား​နိုင်​ငံ​တော်​အကြောင်း ဘာ​သိ​ရ​သလဲ။

^၁၆ “အဲဒီ​ဘု​ရင်တွေ​လက်​ထက်​မှာ ကောင်း​ကင်​အုပ်​စိုး​ရှင် ဘု​ရား​သခင်​က ဘယ်​တော့​မှ မပျက်​စီး​မယ့် နိုင်​ငံ​တစ်​ခု​ကို တည်​ထောင်​လိမ့်​မယ်။ အဲဒီ​နိုင်​ငံ​ဟာ တ​ခြား​လူ​တွေ​လက်​ထဲ ရောက်​မှာ မဟုတ်​ဘူး။ အထက်​မှာ​ပြော​ခဲ့​တဲ့ နိုင်​ငံ​အားလုံး​ကို ခြေ​မွှ​ဖျက်​ဆီး​လိမ့်​မယ်။ ပြီး​တဲ့​နောက် အဲဒီ​နိုင်​ငံ​တစ်​ခု​ပဲ ထာ​ဝ​စဉ် တည်​တံ့​နေ​မယ်” လို့ ဒံယေလ ၂:၄၄ မှာ ပြော​တယ်။ အဲဒီ​ကြို​ဟော​ချက်​က​နေ ဘု​ရား​နိုင်​ငံ​တော်​အကြောင်း ဘာ​သိ​ရ​သလဲ။

^၁၇ ပထ​မအနေ​နဲ့၊ ဘု​ရား​သခင့်​နိုင်​ငံ​က “အဲဒီ​ဘု​ရင်တွေ​လက်​ထက်​မှာ” စတင်​အုပ်​ချုပ်​မယ်​ဆို​တာ သိ​ရ​တယ်။ ဘု​ရား​သခင့်​နိုင်​ငံ စတင်​အုပ်​ချုပ်​ချိန်​မှာ ကမ္ဘာ​ပေါ်​မှာ တ​ခြား​အစိုး​ရတွေ ရှိ​နေ​သေး​တယ်​ဆို​တဲ့​သဘော​ပဲ။ ဒုတိ​ယ၊ ဘုရား​သခင့်​နိုင်​ငံ ထာ​ဝ​စဉ်​တည်​မယ်၊ တ​ခြား​ဘယ်​အစိုး​ရ​က​မှ အနိုင်​ယူ၊ အစား​ထိုး​မှာ မဟုတ်​ဘူး။ တ​တိ​ယ၊ ဘု​ရား​သခင့်​နိုင်​ငံ​နဲ့ လော​က​တိုင်း​နိုင်​ငံ​တွေ စစ်​ဖြစ်​မယ်။ ဘု​ရား​သခင့်​နိုင်​ငံ အောင်​ပွဲ​ခံ​ပြီး အဲဒီ​နိုင်​ငံ​တစ်​ခု​တည်း​ပဲ တစ်​ကမ္ဘာ​လုံး​ကို အုပ်​ချုပ်​မယ်။ အဲဒီ​အခါ အကောင်း​ဆုံး အစိုး​ရ​လက်​အောက်​မှာ လူ​တွေ နေ​ထိုင်​ရ​မယ်။

၁၈။ ဘု​ရား​သခင့်​နိုင်​ငံ​နဲ့ လော​က​အစိုး​ရတွေ တိုက်​မယ့် နောက်​ဆုံး​စစ်​ပွဲ​ကို ဘယ်​လို​ခေါ်​သလဲ။

^၁၈ ဘု​ရား​သခင့်​နိုင်​ငံ​နဲ့ လော​က​အစိုး​ရတွေ တိုက်​ခိုက်​မယ့် နောက်​ဆုံး​စစ်​ပွဲ​ကို အာ​မဂေဒုန်လို့ ခေါ်​တယ်။ အဲဒီ​စစ်​ပွဲ မတိုင်​ခင် နတ်​ဆိုး​တွေ​ဟာ “လူ​နေ​ထိုင်​ရာ မြေတစ်​ပြင်​လုံး​မှာ​ရှိ​တဲ့ ဘု​ရင်တွေ” ကို လှည့်​ဖြား​ပြီး ‘အနန္တ​တန်ခိုး​ရှင် ဘု​ရား​သခင်​ရဲ့​နေ့​ကြီး​မှာ တိုက်​မယ့် စစ်​ပွဲ​အတွက် သူတို့​ကို စု​ရုံး​စေ​မယ်။’ လူ့​အစိုး​ရတွေ​က ဘု​ရား​သခင့်​နိုင်​ငံ​ကို တိုက်​ခိုက်​ကြ​လိမ့်​မယ်။—ဗျာဒိတ် ၁၆:၁၄၊ ၁၆။ ရှင်း​လင်း​ချက် ၁၀ ကို​ကြည့်​ပါ။

၁၉၊ ၂၀။ ဘု​ရား​သခင့်​နိုင်​ငံ ဘာ​ကြောင့် လို​အပ်​တာ​လဲ။

^၁၉ ဘု​ရား​သခင့်​နိုင်​ငံ ဘာ​ကြောင့် လို​အပ်​တာ​လဲ။ အနည်း​ဆုံး၊ အကြောင်း​ရင်း သုံး​ခု​ရှိ​တယ်။ ပထ​မ၊ ကျွန်​တော်​တို့​ဟာ အပြစ်​သား​တွေ​ဖြစ်​လို့ ဖျား​နာ​ပြီး သေဆုံး​ကြ​ရ​တယ်။ ဘု​ရား​သခင့်​နိုင်​ငံ အုပ်​ချုပ်​တဲ့​အခါ​ကျ​ရင်​တော့ ထာ​ဝ​စဉ် အသက်​ရှင်​ရ​မယ်​လို့ ကျမ်း​စာ​က ပြော​တယ်။ “ဘု​ရား​သခင်​က လူ့​လော​က​ကို အလွန်​ချစ်​တယ်။ ဒါ​ကြောင့် မိမိ​ရဲ့​သား​ကို ယုံ​ကြည်​သက်​ဝင်​သူ​တိုင်း ဖျက်​ဆီး​မခံ​ရ​ဘဲ ထာ​ဝ​ရ​အသက် ရ​နိုင်​ဖို့ အဲဒီ​တစ်ဦး​တည်း​သော သား​ကို​တောင် ပေး​အပ်​ခဲ့​တယ်” လို့ ယောဟန် ၃:၁၆ မှာ ပြော​တယ်။

^၂၀ ဘု​ရား​သခင့်​နိုင်​ငံ လို​အပ်​ရ​တဲ့ ဒုတိ​ယ​အကြောင်း​ရင်း​က​တော့ နေ​ရာ​တိုင်း​မှာ လူ​ဆိုး​တွေ ရှိ​နေ​လို့​ပဲ။ က​လိမ်​က​ကျစ်​လုပ်​တဲ့​သူ​တွေ၊ အကျင့်​ပျက်​သူ​တွေ အများ​ကြီး​ပဲ။ အဲဒီ​လူ​တွေ​ကို ကျွန်​တော်​တို့ ဖယ်​ရှား​နိုင်​စွမ်း မရှိ​ပေမဲ့ ဘုရား​က​တော့ ဖယ်​ရှား​ပေး​မယ်။ မကောင်း​တာ​ကို လုပ်​မြဲလုပ်​နေ​သူ​တွေ​ဟာ အာ​မဂေဒုန်​မှာ ဖျက်​ဆီး​ခံ​ရ​မယ်။ (ဆာလံ ၃၇:၁၀ ကို​ဖတ်​ပါ။) ဘု​ရား​သခင့်​နိုင်​ငံ လို​အပ်​ရ​တဲ့ တ​တိ​ယ​အကြောင်း​ရင်း​က​တော့ လူ့​အုပ်​စိုး​ရှင်​တွေ​ဟာ ရက်​စက်​တယ်၊ အကျင့်​ပျက်​ခြစား​တယ်၊ မလုပ်​ပေး​နိုင်​တာ​တွေ ရှိ​နေ​လို့​ပဲ။ ဘု​ရား​သခင်​ကို လူ​တွေ နာ​ခံ​အောင် ကူညီ​ပေး​ချင်​စိတ် မရှိ​ကြ​ဘူး။ “လူ​လူ​ချင်း အုပ်​ချုပ်​တာ​ဟာ ထိ​ခိုက်​နစ်​နာ​စ​ရာတွေ​ပဲ ဖြစ်​စေ​တယ်” လို့ ကျမ်း​စာ​ပြော​တယ်။—ဒေ​သနာ ၈:၉။

၂၁။ ဘု​ရား​သခင့်​နိုင်​ငံ​ဟာ ကမ္ဘာ​မြေပေါ်​မှာ အလို​တော်​ကို ဘယ်​လို ပြည့်​စုံ​စေ​မလဲ။

^၂၁ အာ​မဂေဒုန်​ပြီး​တဲ့​နောက် ဘု​ရား​သခင့်​နိုင်​ငံ​ဟာ ကမ္ဘာ​မြေပေါ် အလို​တော် ပြည့်​စုံ​စေ​ပါ​လိမ့်​မယ်။ အဲဒီ​နိုင်​ငံ​ဟာ စာ​တန်​နဲ့ နတ်​ဆိုး​တွေ​ကို ဖယ်​ရှား​ပေး​မယ်။ (ဗျာဒိတ် ၂၀:၁-၃) ဘယ်​သူ​မှ ဖျား​နာ​မှာ၊ သေဆုံး​မှာ မဟုတ်​ဘူး။ ရွေး​ဖိုး​ကြောင့် သစ္စာ​ရှိ​လူ​သား​တွေ ပရ​ဒိ​သု​မှာ ထာ​ဝ​စဉ် အသက်​ရှင်​ရ​မယ်။ (ဗျာဒိတ် ၂၂:၁-၃) ဘု​ရား​သခင့်​နိုင်​ငံ​ဟာ နာ​မတော်​ကို သန့်​ရှင်း​မြင့်​မြတ်​စေ​မယ်။ ဘာ​ကို ဆိုလို​တာ​လဲ။ ကမ္ဘာ​မြေပေါ်​မှာ ဘု​ရား​အစိုး​ရ အုပ်​ချုပ်​တဲ့​အခါ ယေဟောဝါ​ရဲ့​နာ​မည်​ကို လူ​အားလုံး ဂုဏ်​တင်​ချီး​မွမ်း​ကြ​မယ်​ဆို​တဲ့ အဓိပ္ပာယ်​ပဲ။—ရှင်း​လင်း​ချက် ၂၁ ကို​ကြည့်​ပါ။

၂၂။ ယေရှု မြေကြီး​ပေါ် ရှိ​နေ​ချိန်​မှာ ဒါ​မှ​မဟုတ် ရှင်​ပြန်​ထ​မြောက်​ပြီး​တာ​နဲ့ ဘု​ရင် မဖြစ်​သေး​ဘူး​ဆို​တာ ဘယ်​လို သိ​ရ​သလဲ။

^၂၂ “နိုင်​ငံ​တော် လာ​ပါ​စေ” လို့​ဆုတောင်း​ဖို့ တ​ပည့်တွေ​ကို ယေရှု သင်​ပေး​တုန်း​က ဘု​ရား​သခင့်​နိုင်​ငံ မလာ​သေး​ဘူး​ဆို​တာ သိ​သာ​တယ်။ ယေဟောဝါ​က ကောင်း​ကင်​အစိုး​ရ​ကို အရင် တည်​ထောင်​ပြီး ယေရှု​ကို ဘု​ရင်​အဖြစ် ခန့်​အပ်​ရ​ဦး​မယ်။ ကောင်း​ကင်​ကို ပြန်​ရောက်​တာ​နဲ့ ယေရှု ဘု​ရင်​ဖြစ်​ပြီလား။ မဖြစ်​ပါ​ဘူး။ စောင့်​နေ​ရ​သေး​တယ်။ ယေရှု ရှင်​ပြန်​ထ​မြောက်​ပြီး​နောက် အချိန်​အတန်​ကြာ​တဲ့​အခါ ပေတရု​နဲ့ ပေါလု​က ဆာလံ ၁၁၀:၁ မှာ​ပါ​တဲ့ ကြို​ဟော​ချက်​ဟာ ယေရှု​ဆီ​မှာ ပြည့်​စုံ​တယ်​လို့ ပြော​ခဲ့​တာ​ကို ကြည့်​ရင် အဲဒီ​လို​စောင့်​ခဲ့ရ​မှန်း သိ​နိုင်​တယ်။ ကြို​ဟော​ချက်​မှာ ယေဟောဝါ​က “ရန်​သူ​တွေ​ကို မင်း​ရဲ့​ခြေ​အောက်​မှာ မချ​ခင်​အထိ ငါ့​ညာ​ဘက်​မှာ ထိုင်​နေ​ပါ” လို့​ပြော​ခဲ့​တယ်။ (တမန်​တော် ၂:၃၂-၃၅။ ဟီ​ဘ​ရူး ၁၀:၁၂၊ ၁၃) ဘု​ရင်​အဖြစ် ယေဟောဝါ ခန့်​အပ်​မှာ​ကို ယေရှု ဘယ်​လောက်​ကြာ​ကြာ စောင့်​ခဲ့ရ​သလဲ။

၂၃။ (က) နိုင်​ငံ​တော်​ဘု​ရင်​အဖြစ် ဘယ်​အချိန်​မှာ ယေရှု စတင်​အုပ်​စိုး​သလဲ။ (ခ) နောက်​အခန်း​မှာ ဘာ​အကြောင်း လေ့​လာ​ကြ​မလဲ။

^၂၃ ကျမ်း​စာ​ကြို​ဟော​ချက်​အရ ၁၉၁၄ ခု​နှစ်​ဟာ အရေး​ပါ​တဲ့​နှစ် ဖြစ်​မယ်​ဆို​တာ အဲဒီ​နှစ်​မတိုင်​ခင် နှစ်​ပေါင်း​များ​စွာ​က​တည်း​က စိတ်​ရင်း​မှန်​တဲ့ ခ​ရစ်​ယာန်​တစ်​စု နား​လည်​ခဲ့​ကြ​တယ်။ ၁၉၁၄ က​စ​တဲ့ ကမ္ဘာ့​အဖြစ်​အပျက်​တွေ​က သူတို့​ရဲ့​နား​လည်​မှု မှန်​တယ်​ဆို​တာ သက်​သေထူ​တယ်။ အဲဒီ​နှစ်​မှာ ဘု​ရင်​အဖြစ် ယေရှု စတင် အုပ်​စိုး​တယ်။ (ဆာလံ ၁၁၀:၂) သိပ်​မကြာ​ခင်​မှာ​ပဲ စာ​တန်​ဟာ မြေကြီး​ပေါ် ပစ်​ချ​ခံ​ခဲ့ရ​တယ်။ “သူ့​အတွက် အချိန်​နည်း​နည်း​ပဲ ကျန်​တော့​တယ်။” (ဗျာဒိတ် ၁၂:၁၂) အဲဒီ​အချိန်​အတွင်း​မှာ ကျွန်​တော်​တို့ အသက်​ရှင်​နေ​တယ်​ဆို​တဲ့ အထောက်​အထား​တွေ​ကို နောက်​အခန်း​မှာ လေ့​လာ​ကြ​မယ်။ မကြာ​ခင် ဘု​ရား​သခင့်​နိုင်​ငံ​ဟာ ကမ္ဘာ​မြေပေါ် ဘု​ရား​အလို​တော် ပြည့်​စုံ​စေ​မယ့်​အကြောင်း​ကို​လည်း လေ့​လာ​ကြ​မယ်။—ရှင်း​လင်း​ချက် ၂၂ ကို​ကြည့်​ပါ။