အခြေခံကျမ်းစာသွန်သင်ချက်တွေကို သုံးသပ်ခြင်းက ယေဟောဝါဘုရားသခင်ကို ချစ်တဲ့ သင့်ရဲ့မေတ္တာကို ခိုင်မြဲစေမှာ သေချာပါတယ်။ အဲဒီမေတ္တာကို ဆက်ပြီးပြုစုပျိုးထောင်ပေးနေဖို့ လိုပါတယ်။ (၁ ပေတရု ၂:၂) သင့်ရဲ့ထာဝရအသက်မျှော်လင့်ချက်က ကျမ်းစာကို လေ့လာပြီး ဘုရားသခင်နဲ့ ရင်းနှီးသည်ထက် ရင်းနှီးအောင် သင် ပြုလုပ်နေတယ်၊ မနေဘူးဆိုတဲ့အချက်အပေါ် မူတည်တယ်။​—ယောဟန် ၁၇:၃; ယုဒ ၂၁ တို့ကိုဖတ်ပါ။

ဘုရားသခင်နဲ့ပတ်သက်တဲ့ အသိပညာ တိုးများလာတဲ့အခါ သင့်ရဲ့ ယုံကြည်ခြင်းကလည်း ခိုင်ခံ့လာမှာဖြစ်တယ်။ ယုံကြည်ခြင်းက သင့်ကို ဘုရားသခင့်စိတ်တော်နဲ့တွေ့အောင် ကူညီပေးပါလိမ့်မယ်။ (ဟေဗြဲ ၁၁:၁၊ ၆) ဒါ့အပြင် နောင်တယူပြီး သင့်ဘဝလမ်းစဉ်ကို ပြုပြင်ပြောင်းလဲဖို့ လှုံ့ဆော်ပေးပါလိမ့်မယ်။​—တမန်တော် ၃:၁၉ ကိုဖတ်ပါ။

တခြားသူတွေကို သင် သိရှိခဲ့တဲ့ အကြောင်းအရာတွေ ပြောပြချင်မှာပဲ။ သတင်းကောင်းဆိုရင် ကျွန်ုပ်တို့အားလုံး ပြောပြချင်ကြပါတယ်။ ကျမ်းစာကို သင် ဆက်လေ့လာနေရင်း ယေဟောဝါဘုရားသခင်နဲ့ သတင်းကောင်းကို သင် ယုံကြည်ရတဲ့အကြောင်း ရှင်းပြဖို့ ကျမ်းစာကို ဘယ်လိုအသုံးပြုရမယ်ဆိုတာ သိရှိလာပါလိမ့်မယ်။​—ရောမ ၁၀:၁၃-၁၅ ကိုဖတ်ပါ။

လူအများစုက ဆွေမျိုးတွေ၊ မိတ်ဆွေတွေကို အစပြုပြီး သတင်းကောင်း ပြောပြကြတယ်။ လိမ္မာပါးနပ်မှုရှိပါ။ သူတို့ရဲ့ ယုံကြည်ချက်တွေက မှားနေတယ်လို့ မပြောဘဲ ဘုရားသခင်ရဲ့ကတိတွေအကြောင်း ပြောပြပါ။ ဒါ့အပြင်၊ လူတွေက သင်ပြောတဲ့အရာတွေထက် သင့်ရဲ့ ထောက်ထားစာနာတဲ့ အပြုအမူတွေကို ပိုစွဲမှတ်တတ်တယ်ဆိုတာ သတိရပါ။​—၂ တိမောသေ ၂:၂၄၊ ၂၅ ကိုဖတ်ပါ။

ကျမ်းစာကို လေ့လာတာက သင့်ကို ဘုရားသခင်နဲ့ ပိုပြီး ရင်းနှီးလာစေပါလိမ့်မယ်။ နောက်ဆုံးမှာ ဘုရားသခင်နဲ့ အထူးဆက်ဆံရေး ရှိလာပြီး ဘုရားသခင့်မိသားစုဝင်အနေနဲ့အပြင် ကိုယ်တော့်ပိုင်ဆိုင်ရာပါ ဖြစ်လာပါလိမ့်မယ်။​—၂ ကောရိန္သု ၆:၁၈ ကိုဖတ်ပါ။

ကျမ်းစာကို ဆက်လေ့လာသွားခြင်းအားဖြင့် တိုးတက်နိုင်ပါတယ်။ (ဟေဗြဲ ၅:၁၃၊ ၁၄) သမ္မာကျမ်းစာ အမှန်တကယ်သွန်သင်ရာက ဘာလဲနဲ့ ကျမ်းစာလေ့လာဖို့ ယေဟောဝါသက်သေတစ်ယောက်ကို တောင်းဆိုပါ။ ကျမ်းစာအကြောင်း သင် ပိုသိရှိလာလေ ပိုပျော်ရွှင်လာလေဆိုတာ စိတ်ချပါ။​—ဆာလံ ၁:၁-၃; ၇၃:၂၇၊ ၂၈ ကိုဖတ်ပါ။

သတင်းကောင်းဟာ ပျော်ရွှင်တဲ့ဘုရားသခင် ယေဟောဝါဆီကနေ လာပါတယ်။ ဘုရားသခင်ကို ဝတ်ပြုတဲ့သူတွေနဲ့ သင် ရင်းနှီးလာမယ်ဆိုရင် ကိုယ်တော်နဲ့လည်း ရင်းနှီးလာပါလိမ့်မယ်။ (ဟေဗြဲ ၁၀:၂၄၊ ၂၅) ဘုရားသခင့်စိတ်တော်နဲ့ တွေ့အောင် သင် ဆက်ကြိုးစားမယ်ဆိုရင် ထာဝရအသက် ရရှိပါလိမ့်မယ်။ ဘုရားသခင်နဲ့ရင်းနှီးအောင်လုပ်တာက သင် လုပ်နိုင်သမျှထဲမှာ အကောင်းဆုံး လုပ်ဆောင်ချက်ပါပဲ။​—၁ တိမောသေ ၁:၁၁; ၆:၁၉ ကိုဖတ်ပါ။