စာတန် ဦးဆုံးလိမ်လည်ခဲ့ချိန်ကစပြီး ဒီကမ္ဘာပေါ် မကောင်းမှု စတင်လာခဲ့ပါတယ်။ အစပိုင်းမှာ စာတန်က စုံလင်တဲ့ ကောင်းကင်တမန်ဖြစ်ပေမဲ့ သူဟာ “အမှန်တရား၌ မတည်မနေ” ခဲ့ပါဘူး။ (ယောဟန် ၈:၄၄) သူဟာ ဘုရားသခင်သာ ပိုင်ဆိုင်ထိုက်တဲ့ ကိုးကွယ်မှုကို ရယူလိုစိတ်ပြင်းပြလာခဲ့တယ်။ ဒါနဲ့ ဧဝကို လိမ်ညာပြောဆိုပြီး ဘုရားသခင်ရဲ့စကားကိုမဟုတ်ဘဲ သူ့စကားကို နားထောင်ဖို့ ဖြားယောင်းခဲ့တယ်။ အာဒံလည်း ဧဝနဲ့ပေါင်းပြီး ဘုရားသခင်ရဲ့စကားကို နားမထောင်ခဲ့ဘူး။ အာဒံရဲ့ ဆုံးဖြတ်ချက်ကြောင့် ဆင်းရဲဒုက္ခနဲ့ သေခြင်း ဖြစ်ပေါ်လာခဲ့ရတယ်။—ကမ္ဘာဦး ၃:၁-၆၊ ၁၉ ကိုဖတ်ပါ။

ဘုရားသခင်ရဲ့စကားကို နားမထောင်ဖို့ ဧဝကို စာတန် အကြံပေးခဲ့တုန်းက တကယ်ဆိုရင် သူဟာ ဘုရားသခင်ရဲ့အုပ်ချုပ်ပိုင်ခွင့်ကို ဆန့်ကျင်နေတာဖြစ်ပါတယ်။ လူအများစုကလည်း စာတန်ဘက်ပါသွားပြီး ဘုရားသခင်ကို သူတို့ရဲ့အုပ်စိုးရှင်အဖြစ် လက်မခံကြတော့ပါဘူး။ ဒီလိုနဲ့ စာတန်ဟာ “ဤလောကကို အစိုးရသောမင်း” ဖြစ်လာပါတယ်။—ယောဟန် ၁၄:၃၀; ၁ ယောဟန် ၅:၁၉ တို့ကိုဖတ်ပါ။

ဘုရားသခင် ဖန်ဆင်းထားတဲ့အရာအားလုံးမှာ ချို့ယွင်းချက် လုံးဝမရှိပါဘူး။ ဘုရားသခင် ဖန်ဆင်းထားတဲ့ လူသားတွေနဲ့ ကောင်းကင်တမန်တွေဟာ ကိုယ်တော့် စကားကို အပြည့်အဝ နာခံနိုင်စွမ်းရှိကြတယ်။ (တရားဟောရာ ၃၂:၄၊ ၅) ကောင်းတာလုပ်မလား၊ ဆိုးတာလုပ်မလားဆိုတာကို လွတ်လပ်စွာရွေးချယ်နိုင်စွမ်းနဲ့ ကျွန်ုပ်တို့ကို ဖန်ဆင်းထားတယ်။ အဲဒီစွမ်းရည်ကြောင့် ဘုရားသခင်ကို ကျွန်ုပ်တို့ ချစ်မြတ်နိုးကြောင်း ဖော်ပြခွင့်ရရှိကြတယ်။—ယာကုပ် ၁:၁၃-၁၅; ၁ ယောဟန် ၅:၃ တို့ကိုဖတ်ပါ။

ဘုရားသခင်ဟာ သူ့ရဲ့အကြွင်းမဲ့ပိုင်သအုပ်စိုးမှုကို ဆန့်ကျင်တဲ့သူတွေကို ချက်ချင်း အရေးမယူဘဲ အတိုင်းအတာတစ်ခုအထိ ခွင့်ပြုထားခဲ့တာ ဘာကြောင့်လဲ။ ဘုရားသခင်မပါဘဲ အုပ်ချုပ်ဖို့ ကြိုးစားမှုမှန်သမျှဟာ အချည်းနှီးဆိုတာ ဖော်ပြချင်လို့ပါပဲ။ (ဒေသနာ ၇:၂၉; ၈:၉) လူ့သမိုင်း နှစ်ပေါင်း ၆,၀၀၀ ကြာပြီးတဲ့ နောက်မှာ အဲဒီအချက်က ပိုပြီးထင်ရှားလာတယ်။ လူ့အုပ်စိုးရှင်တွေဟာ စစ်၊ ရာဇဝတ်မှု၊ တရားမမျှတမှုနဲ့ ရောဂါတွေကို မဖယ်ရှားပေးနိုင်ခဲ့ကြပါဘူး။—ယေရမိ ၁၀:၂၃; ၂ ပေတရု ၃:၇-၉ တို့ကိုဖတ်ပါ။

ဘုရားသခင့်အုပ်ချုပ်မှုကို လက်ခံတဲ့သူတွေက အကျိုးကျေးဇူးတွေ ခံစားရမှာဖြစ်ပါတယ်။ (ဟေရှာယ ၄၈:၁၇၊ ၁၈) မကြာခင် လူ့အုပ်ချုပ်မှုမှန်သမျှ ဖယ်ရှားခံရပါတော့မယ်။ ဘုရားသခင့်အုပ်ချုပ်မှုကို လက်အောက်ခံတဲ့သူတွေပဲ ဒီကမ္ဘာမှာ နေထိုင်ရပါလိမ့်မယ်။—ဟေရှာယ ၁၁:၉။—ဒံယေလ ၂:၄၄၊ ၄၅ ကိုဖတ်ပါ။

လူသားတွေ ယေဟောဝါဘုရားသခင်ကို ဝတ်ပြုတာ ကိုယ်ကျိုးကြောင့်ဆိုပြီး စာတန် အခိုင်အမာပြောထားတယ်။ အဲဒီကလိမ်ကျတဲ့စကား မှားတယ်ဆိုတာ သင် သက်သေပြနိုင်ပါသလား။ သက်သေပြနိုင်ပါတယ်။ ဘုရားသခင့်အုပ်ချုပ်မှုနဲ့ လူ့အုပ်ချုပ်မှု ဘယ်အရာကို နှစ်သက်သလဲဆိုတာ ဘုရားသခင်ရဲ့စိတ်ရှည်မှုကြောင့် ကျွန်ုပ်တို့ ဖော်ပြခွင့်ရကြတယ်။ ကျွန်ုပ်တို့ရဲ့ဘဝလမ်းစဉ်က ကျွန်ုပ်တို့ရဲ့ရွေးချယ်မှုကို ဖော်ပြမှာဖြစ်တယ်။—ယောဘ ၁:၈-၁၂; သုတ္တံ ၂၇:၁၁ တို့ကိုဖတ်ပါ။

ကျမ်းစာအပေါ် အခြေခံတဲ့ ဝတ်ပြုရေးအမှန်ကို ရှာဖွေပြီး အဲဒီဝတ်ပြုရေးမှာ ပါဝင်ခြင်းအားဖြင့် ရွေးချယ်နိုင်ပါတယ်။ (ယောဟန် ၄:၂၃) ယေရှုလုပ်ခဲ့တဲ့အတိုင်း နိုင်ငံရေး၊ စစ်မှုနဲ့ ကင်းကင်းရှင်းရှင်း နေခြင်းအားဖြင့် စာတန်ရဲ့အုပ်ချုပ်မှုကို ပြတ်ပြတ်သားသား ငြင်းပယ်နိုင်ပါတယ်။—ယောဟန် ၁၇:၁၄ ကိုဖတ်ပါ။

စာတန်ဟာ သူ့ရဲ့အစွမ်းတန်ခိုးကို အသုံးပြုပြီး အကျင့်ယိုယွင်းမှုနဲ့ ဘေးဖြစ်စေတဲ့ အမူအကျင့်တွေကို အားပေးနေပါတယ်။ အဲဒီလိုအကျင့်ဆိုးတွေကို ကျွန်ုပ်တို့ ရှောင်ကြဉ်တဲ့အတွက် မိတ်ဆွေတချို့နဲ့ ဆွေမျိုးတချို့က ကဲ့ရဲ့နိုင်တယ် ဒါမှမဟုတ် ဆန့်ကျင်နိုင်ပါတယ်။ (၁ ပေတရု ၄:၃၊ ၄) ဒါကြောင့် ကျွန်ုပ်တို့ ရွေးချယ်ရတော့မှာဖြစ်တယ်။ တကယ်လို့ ဘုရားသခင်ကို ချစ်မြတ်နိုးသူတွေနဲ့ ပေါင်းသင်းဖို့၊ ဘုရားသခင်ရဲ့ ပညာရှိပြီး မေတ္တာပါတဲ့ ပညတ်တွေကို လိုက်လျှောက်ဖို့ ရွေးချယ်မယ်ဆိုရင် အခက်အခဲကြုံလာတဲ့အခါ ဘယ်သူမှ ဘုရားသခင်ပြောတဲ့အတိုင်း လုပ်မှာမဟုတ်ဘူးဆိုတဲ့ စာတန်ရဲ့လိမ်လည်မှုက မှားတယ်ဆိုတာ သက်သေထူနိုင်မှာဖြစ်တယ်။—၁ ကောရိန္သု ၆:၉၊ ၁၀; ၁၅:၃၃ ကိုဖတ်ပါ။

ဘုရားသခင်ဟာ လူသားတွေကိုချစ်တဲ့အတွက် မကောင်းမှုနဲ့ ဆင်းရဲဒုက္ခတွေကို ဖယ်ရှားပေးမယ်ဆိုပြီး အာမခံတယ်။ ဘုရားသခင်ရဲ့ကတိစကားကို ယုံကြည်ကြောင်း လုပ်ရပ်နဲ့ တင်ပြသူတွေဟာ ဒီကမ္ဘာပေါ် ထာဝစဉ်အသက်ရှင်ကြရမှာ ဖြစ်တယ်။—ယောဟန် ၃:၁၆ ကိုဖတ်ပါ။