၁။ ယေဟောဝါအကြောင်း စဉ်းစားလိုက်ရင် စိတ်ထဲ ဘာပေါ်လာသလဲ။

 ယေဟောဝါ ဘယ်လို ဘုရားမျိုးလဲလို့ စိတ်ကူးကြည့်ဖူးသလား။ ဆုတောင်းတဲ့အခါ စိတ်ထဲ ဘာပေါ်လာသလဲ။ ယေဟောဝါကို မမြင်နိုင်ပေမဲ့ ကျမ်းစာမှာ အမျိုးမျိုး ပုံဖော်ထားတယ်။ “နေမင်း၊” “ဒိုင်းလွှား၊” “လောင်ကျွမ်းစေတဲ့ မီး” လို့ ခေါ်ထားတယ်။ (ဆာ. ၈၄:၁၁။ ဟီ. ၁၂:၂၉) နီလာကျောက်လို သဏ္ဌာန် ရှိတယ်၊ တောက်ပနေတဲ့ သတ္တု၊ ရောင်ခြည် ဖြာထွက်နေတဲ့ သက်တံနဲ့ တူတယ်လို့ ဖော်ပြတယ်။ (ယေဇ. ၁:၂၆-၂၈) ယေဟောဝါနဲ့ပတ်သက်ပြီး အဲဒီလို ဖော်ပြထားလို့ အံ့ဩမှင်တက်မိနိုင်တယ်။ ဒါမှမဟုတ် ရှိန်သွားနိုင်တယ်။

၂။ ယေဟောဝါ ချစ်တယ်ဆိုတာ တချို့ ဘာကြောင့် ယုံရ ခက်နေနိုင်သလဲ။

^၂ ကိုယ့်ကို ဘုရား ချစ်တယ်ဆိုတာ တချို့ ယုံရ ခက်ကြတယ်။ ဘုရားကို မမြင်ရလို့၊ ဖခင်မေတ္တာ မခံစားဖူးလို့၊ ဘဝ မလှခဲ့လို့ ဖြစ်နိုင်တယ်။ ဘာကြောင့်၊ ဘယ်လို ခံစားရတယ်ဆိုတာ ယေဟောဝါ နားလည်တယ်။ မိမိ ဘယ်လို ဘုရားမျိုးလဲဆိုတာ ကျမ်းစာကတစ်ဆင့် ဖော်ပြတယ်။

၃။ ယေဟောဝါရဲ့ မေတ္တာအကြောင်း ဘာကြောင့် အသေးစိတ် လေ့လာသင့်သလဲ။

^၃ ယေဟောဝါအကြောင်း ဖော်ပြဖို့ အကောင်းဆုံး စကားလုံးကတော့ ချစ်ခြင်းမေတ္တာပါ။ (၁ ယော. ၄:၈) ယေဟောဝါဟာ ချစ်ခြင်းမေတ္တာ ဖြစ်တယ်။ လုပ်သမျှ မေတ္တာပါတယ်။ မိမိကို မချစ်သူတွေကိုတောင် ချစ်နိုင်တဲ့အထိ မေတ္တာ အားကြီးတယ်။ နွေးထွေးတယ်။ (မ. ၅:၄၄၊ ၄၅) ဒီဆောင်းပါးမှာ ယေဟောဝါဘုရားအကြောင်း၊ ဘုရားမေတ္တာအကြောင်း အသေးစိတ် လေ့လာကြမယ်။ ဘုရားအကြောင်း သိလေ ချစ်လေ ဖြစ်လာမယ်။

ကျွန်တော်တို့ကို ယေဟောဝါ သိပ်ချစ်

၄။ ယေဟောဝါ ကြင်နာယုယစွာ ချစ်ပေးလို့ သင် ဘယ်လို ခံစားရသလဲ။ (ရုပ်ပုံကိုလည်း ကြည့်ပါ။)

^၄ “ယေဟောဝါဟာ အလွန် ချစ်ခင်စာနာ” တယ်။ (ယာ. ၅:၁၁) မိမိကိုယ်ကိုယ် ကြင်နာယုယတဲ့ မိခင်နဲ့ ကျမ်းစာမှာ နှိုင်းထားတယ်။ (ဟေရှာ. ၆၆:၁၂၊ ၁၃) ကြင်နာယုယစွာ ကလေး ထိန်းနေတဲ့ မိခင်ကို မြင်ယောင်ကြည့်ပါ။ ကလေးကို ပေါင်ပေါ်မှာ မြှောက်ချည် ချချည် ဆော့ကစားပေးတယ်။ လေသံအေးအေးလေးနဲ့ ချော့မြှူတယ်။ ကလေး ငိုရင်၊ နာသွားရင် ဘာကြောင့်လဲ သိအောင် လုပ်တယ်။ လုပ်စရာ ရှိတာ လုပ်ပေးတယ်။ ကျွန်တော်တို့လည်း နာကျင်ခံစားရချိန်မှာတောင် ယေဟောဝါ ချစ်တယ်ဆိုတာ စိတ်ချနိုင်တယ်။ “စိုးရိမ်စိတ်တွေ သိပ်များနေတဲ့အခါ ကိုယ်တော် နှစ်သိမ့်ပေးပြီး စိတ်သက်သာရာ ရစေတယ်” လို့ ဆာလံကျမ်းရေးသူ ပြောတယ်။—ဆာ. ၉၄:၁၉။

၅။ ယေဟောဝါရဲ့ မေတ္တာ ခိုင်မြဲတဲ့အတွက် သင် ဘာအကျိုး ရသလဲ။

^၅ ယေဟောဝါရဲ့ မေတ္တာဟာ ခိုင်မြဲတယ်။ (ဆာ. ၁၀၃:၈) ကျွန်တော်တို့ အမှား လုပ်မိရင်တောင် မေတ္တာ မပျက်ဘူး။ ဥပမာ၊ ယေဟောဝါ စိတ်ပျက်အောင် အစ္စရေးလူမျိုး ခဏခဏ လုပ်တယ်။ ဒါပေမဲ့ နောင်တ ရတဲ့အခါ မေတ္တာမပျက် ချစ်ပေးတယ်။ “မင်းဟာ ငါ့အတွက် တန်ဖိုးရှိတယ်။ ဒါကြောင့် မင်းကို ဂုဏ်တင်ခဲ့တယ်၊ ချစ်ခဲ့တယ်” လို့ ပြောတယ်။ (ဟေရှာ. ၄၃:၄၊ ၅) ကျွန်တော်တို့ကိုလည်း အဲဒီလို အချစ်မျိုးနဲ့ ဘုရား ချစ်တယ်။ ဒါကို အမြဲ စိတ်ချနိုင်တယ်။ ကြီးလေးတဲ့ အပြစ် လုပ်မိရင်တောင် မေတ္တာ မပျက်ဘူး။ နောင်တ ရပြီး ပြန်လာတဲ့အခါ ဘုရား ချစ်နေဆဲပဲဆိုတာ တွေ့ရမယ်။ “အကြွင်းမဲ့ ခွင့်လွှတ်” မယ်လို့ ကတိပေးထားတယ်။ (ဟေရှာ. ၅၅:၇) ဘုရားခွင့်လွှတ်မှု ခံစားရတာဟာ “လန်းဆန်းစေတဲ့ အချိန်ကာလ ရောက်” သွားသလိုပဲလို့ ကျမ်းစာမှာ ဖော်ပြတယ်။—တ. ၃:၁၉။

၆။ ယေဟောဝါအကြောင်း ဇာခရိ ၂:၈ ကနေ ဘာသိရသလဲ။

^၆ ဇာခရိ ၂:၈ ကို ဖတ်ပါ။ မျက်လုံးဟာ နူးညံ့ပြီး အထိခိုက်မခံတဲ့ အဖိုးတန် အစိတ်အပိုင်း ဖြစ်တယ်။ ဒါကြောင့် ကျွန်တော်တို့ကို မျက်ဆန်နဲ့ ဘုရား နှိုင်းတာဟာ ‘မင်းတို့ကို ထိရဲ ထိကြည့်။ ထိတဲ့သူဟာ ငါ တန်ဖိုးထားရတဲ့အရာကို ထိတဲ့သူပဲ’ လို့ ပြောလိုက်သလိုပါပဲ။ ကျွန်တော်တို့ကို ဘုရား သိပ်ချစ်လို့ ဘာခံစားနေရသလဲ တန်းသိတယ်။ ကာကွယ်ပေးချင်တယ်။ ကျွန်တော်တို့ နာကျင်ခံစားရင် ဘုရားလည်း နာကျင်ခံစားရတယ်။ ဒါကြောင့် “ကိုယ်တော်ရဲ့ မျက်ဆန်လို ကျွန်တော့်ကို ကာကွယ်ပေးပါ” လို့ ရဲရဲ ဆုတောင်းနိုင်တယ်။—ဆာ. ၁၇:၈။

၇။ ယေဟောဝါ ချစ်တယ်ဆိုတာ ယုံကြည်စိတ်ချအောင် လုပ်ဖို့ ဘာကြောင့် လိုနိုင်သလဲ။

^၇ အချစ်ခံရတယ်လို့ သင့်ကို ယေဟောဝါ ခံစားစေချင်တယ်။ ဒါပေမဲ့ ဘဝ မလှခဲ့လို့ ကိုယ့်ကို ဘုရား ချစ်ပါ့မလားလို့ တွေးမိနိုင်တယ်။ လောလောဆယ် အခက်အခဲတွေ ကြုံနေရလို့ ဘုရား ချစ်ရဲ့လားလို့ သံသယ ဝင်လာနိုင်တယ်။ ဒါကြောင့် ယေဟောဝါ ချစ်တယ်ဆိုတာ ယုံကြည်စိတ်ချအောင် လုပ်ဖို့ လိုတယ်။ ဘာက စိတ်ချစေမလဲ။ ယေရှုကို၊ ဘိသိက်ခံတွေကို၊ ကျွန်တော်တို့အားလုံးကို ချစ်ကြောင်း ယေဟောဝါ ဘယ်လို ပြသလဲ လေ့လာခြင်းပါပဲ။

ယေဟောဝါ မေတ္တာ ပြပုံ

၈။ ဖခင် ချစ်တယ်ဆိုတာ ယေရှု ဘာကြောင့် စိတ်ချသလဲ။

^၈ နှစ်သန်းပေါင်းများစွာအတွင်း ယေဟောဝါနဲ့ ချစ်သားရဲ့ မေတ္တာနှောင်ကြိုး သိပ်ခိုင်မာလာတယ်။ စကြဝဠာမှာ သက်တမ်းအကြာဆုံး နှောင်ကြိုးပဲ။ ယေရှုကို ချစ်တယ်လို့ မဿဲ ၁၇:၅ မှာ ယေဟောဝါ ရှင်းရှင်းလင်းလင်း ပြောထားတယ်။ ‘ဒါ ငါ့စိတ်နဲ့ တွေ့သူပဲ’ လို့ ရိုးရိုးလေး ပြောလို့ ရတယ်။ ဒါပေမဲ့ ယေရှုကို ဘယ်လောက် ချစ်မှန်း ကျွန်တော်တို့ကို သိစေချင်လို့ “ငါ့ရဲ့ ချစ်သား” လို့ ပြောတယ်။ ယေရှုအတွက် ယေဟောဝါ သိပ်ဂုဏ်ယူတယ်။ အထူးသဖြင့်၊ မကြာခင် လိုလိုလားလား အသက်စွန့်တော့မှာမို့ ဂုဏ်ယူတယ်။ (ဧ. ၁:၇) မိမိကို ဖခင် ချစ်တယ်ဆိုတာ ယေရှု သံသယ မရှိဘူး။ လုံးဝ စိတ်ချတယ်။ ဒါကြောင့်လည်း မိမိကို အဖ ချစ်တယ်လို့ ယုံကြည်စိတ်ချမှုအပြည့်နဲ့ ထပ်ခါထပ်ခါ ပြောတာ။—ယော. ၃:၃၅။ ၁၀:၁၇။ ၁၇:၂၄။

၉။ ဘိသိက်ခံတွေကို ယေဟောဝါ ချစ်တယ်ဆိုတာ ဘယ်အသုံးအနှုန်းက ဖော်ပြသလဲ။ ရှင်းပြပါ။ (ရောမ ၅:၅)

^၉ ဘိသိက်ခံတွေကို ချစ်ကြောင်းလည်း ယေဟောဝါ ပြတယ်။ (ရောမ ၅:၅ ကို ဖတ်ပါ။) “ချစ်မြတ်နိုးကြောင်း ဖော်ပြ” ဆိုတဲ့ စကားလုံးကို သတိပြုပါ။ “စမ်းရေလို စီးကျလာ” ဆိုပြီး အကိုးအကားစာအုပ်တစ်အုပ်က ဖော်ပြတယ်။ ဘိသိက်ခံတွေအပေါ် ယေဟောဝါရဲ့ မေတ္တာ လျှံထွက်စီးကျနေတာကို ကွက်ကွက်ကွင်းကွင်း သရုပ်ဖော်ထားတာပဲ။ မိမိတို့ဟာ “ဘုရားသခင် ချစ်တဲ့သူတွေ” ဖြစ်မှန်း ဘိသိက်ခံတွေ သိကြတယ်။ (ယု. ၁) “အဖဘုရားက ကျွန်တော်တို့ကို ဘယ်လောက်တောင် ချစ်မြတ်နိုးတယ်ဆိုတာ စဉ်းစားကြည့်ပါ။ ကျွန်တော်တို့ကို ဘုရားသခင်ရဲ့ သားသမီးတွေလို့ ခေါ်တယ်” ဆိုပြီး ဘိသိက်ခံတွေရဲ့ ခံစားချက်ကို တမန်တော် ယောဟန် ဖော်ပြတယ်။ (၁ ယော. ၃:၁) ဘိသိက်ခံတွေကိုပဲ ယေဟောဝါ ချစ်သလား။ မဟုတ်ပါဘူး။ ကျွန်တော်တို့အားလုံးကို ချစ်တယ်။

၁၀။ သင့်ကို ယေဟောဝါ ချစ်ကြောင်း အခိုင်လုံဆုံး သက်သေက ဘာလဲ။

^၁၀ ကျွန်တော်တို့ကို ယေဟောဝါ ချစ်ကြောင်း အခိုင်လုံဆုံး သက်သေက ဘာလဲ။ ရွေးဖိုးပါ။ စကြဝဠာမှာ ဘယ်သူမှ ဒီလောက်အတိုင်းအတာနဲ့ မချစ်နိုင်ဘူး။ (ယော. ၃:၁၆။ ရော. ၅:၈) ဘုရားရဲ့ တရားမျှတမှု စံနှုန်းအရ ရွေးဖိုး ပေးမှ ဖြစ်မှာမို့လို့ ပေးတာ မဟုတ်ဘူး။ ချစ်လို့ ပေးတာ။ ကျွန်တော်တို့ အပြစ် ခွင့်လွှတ်ခံရဖို့၊ ဘုရားနဲ့ မိတ်ဆွေ ဖြစ်နိုင်ဖို့ တန်ဖိုးအထားရဆုံး သားယေရှုကို ဝေဒနာ ခံစားပြီး သေဆုံးစေခြင်းအားဖြင့် ကျွန်တော်တို့ကို ချစ်ကြောင်း သက်သေပြတယ်။ (၁ ယော. ၄:၁၀) ယေဟောဝါနဲ့ ယေရှု ပေးဆက်ခဲ့တာကို တွေးကြည့်လေ ကျွန်တော်တို့တစ်ယောက်စီကို ဘယ်လောက် ချစ်သလဲ သဘောပေါက်လာလေပဲ။—ဂလ. ၂:၂၀။

၁၁။ ယေရမိ ၃၁:၃ ကနေ ဘာသိရသလဲ။

^၁၁ သိခဲ့တဲ့အတိုင်း ကျွန်တော်တို့ကို ယေဟောဝါ အုံ့ပုန်း မချစ်ဘူး။ ချစ်တယ်လို့ ပြောတယ်။ ချစ်ကြောင်း ပြတယ်။ (ယေရမိ ၃၁:၃ ကို ဖတ်ပါ။) ချစ်လို့ မိမိဆီ ဆွဲဆောင်တယ်။ (တရားဟောရာ ၇:၇၊ ၈ နဲ့ နှိုင်းယှဉ်ပါ။) ဘုရားမေတ္တာ မခံစားရအောင် ဘာကမှ၊ ဘယ်သူကမှ မတားဆီးနိုင်ဘူး။ (ရော. ၈:၃၈၊ ၃၉) ဘုရား ချစ်ပေးလို့ သင် ဘယ်လို ခံစားရသလဲ။ ဆာလံ ၂၃ ကို ဖတ်ကြည့်ပါ။ ဘုရား ချစ်ပေးလို့ ဒါဝိဒ် ဘယ်လို ခံစားရတယ်၊ ကျွန်တော်တို့အားလုံးလည်း ဘယ်လို ခံစားရနိုင်တယ်ဆိုတာ သတိပြုပါ။

ယေဟောဝါ ချစ်ပေးလို့ သင် ဘယ်လို ခံစားရသလဲ

၁၂။ ဆာလံ ၂၃ ကို အတိုချုပ် ပြောပြပါ။

^၁၂ ဆာလံ ၂၃:၁-၆ ကို ဖတ်ပါ။ ကိုယ့်ကို ယေဟောဝါ ချစ်တယ်ဆိုတာ ယုံကြည်စိတ်ချကြောင်း ဆာလံ ၂၃ မှာ ဒါဝိဒ် သီချင်း စပ်ဆိုထားတယ်။ သိုးထိန်း ယေဟောဝါနဲ့ မိမိရဲ့ ခိုင်မြဲတဲ့ နှောင်ကြိုးအကြောင်း စပ်ဆိုထားတာ။ ယေဟောဝါ ဦးဆောင်ခေါ်သွားရာနောက် လိုက်တဲ့အတွက်၊ အကြွင်းမဲ့ အားကိုးတဲ့အတွက် လုံခြုံတယ်လို့ ခံစားရတယ်။ ဘုရားမေတ္တာ တစ်သက်လုံး ခံစားရမယ်ဆိုတာ စိတ်ချတယ်။ ဘာကြောင့် အဲဒီလောက် စိတ်ချသလဲ။

၁၃။ ယေဟောဝါ ဂရုစိုက်မယ်ဆိုတာ ဒါဝိဒ် ဘာကြောင့် စိတ်ချသလဲ။

^၁၃ “လိုလေသေးမရှိ ငါ ပြည့်စုံနေတာ။” (ဆာ. ၂၃:၁) လိုလေသေးမရှိ ပြည့်စုံတယ်လို့ ဒါဝိဒ် ခံစားရတယ်။ လိုသမျှ ဘုရား အမြဲ ဖြည့်ဆည်းပေးလို့၊ ဘုရားနဲ့ ရင်းနှီးနေလို့၊ ဘုရားမျက်နှာသာ ရထားလို့ပဲ။ ဒါကြောင့်လည်း ရှေ့မှာ ဘာပဲ ကြုံကြုံ လိုသမျှ ယေဟောဝါ ဆက်ဖြည့်ဆည်းပေးမယ်ဆိုတာ စိတ်ချနေတာ။ အဲဒီလို စိတ်ချလွန်းလို့ စိုးရိမ်စိတ်တွေ ပျောက်သွားတယ်။ ပျော်ရွှင်ကျေနပ်နေတယ်။—ဆာ. ၁၆:၁၁။

၁၄။ ကျွန်တော်တို့ကို ယေဟောဝါ ဘယ်လို မေတ္တာထား ဂရုစိုက်သလဲ။

^၁၄ အထူးသဖြင့်၊ အဖြစ်ဆိုးတွေ ကြုံရချိန်မှာ ယေဟောဝါ မေတ္တာထား ဂရုစိုက်ပေးတယ်။ ဗေသလမှာ အမှုဆောင်တာ နှစ် ၂၀ ကျော်ပြီ ဖြစ်တဲ့ ညီအစ်မ ကလယ်ရာ a အကြောင်း စဉ်းစားကြည့်ပါ။ အဖေ လေဖြတ်သွားတယ်။ အသင်းတော်ကနေ ညီမလေး နှင်ထုတ်ခံရတယ်။ မိသားစု စီးပွားရေး ပျက်သွားတယ်။ အိမ်ကို ဘဏ်သိမ်းသွားတယ်။ ပြဿနာတွေ တန်းစီ ကြုံရလို့ မိသားစုကို ဘယ်လို ကူညီရမလဲဆိုပြီး ကလယ်ရာ တော်တော်လေး အကြံအိုက်မိတယ်။ ဒါပေမဲ့ ယေဟောဝါ ဂရုစိုက်ပေးတာကို သူတို့မိသားစု ဘယ်လို ခံစားရသလဲ။ “မိသားစုမှာ တစ်ရက်စာ တစ်ရက် လိုတာ ဘာမဆို ရှိနေအောင် ယေဟောဝါ အမြဲ စီစဉ်ပေးတယ်။ လိုတာထက် ပိုပေးတာလည်း အကြိမ်ကြိမ်ပဲ။ ယေဟောဝါရဲ့ မေတ္တာ ခံစားရတဲ့ အချိန်တွေကို ပြန်ပြန် စဉ်းစားတယ်။ ဘယ်တော့မှ မမေ့ဘူး။ ဒါကြောင့်လည်း အခက်အခဲတွေ ရှိပေမဲ့ ရှေ့ဆက်နိုင်တာ” လို့ ကလယ်ရာ ပြောတယ်။

၁၅။ ဒါဝိဒ် ဘာကြောင့် လန်းဆန်းတယ်လို့ ခံစားရသလဲ။ (ရုပ်ပုံကိုလည်း ကြည့်ပါ။)

^၁၅ “ငါ့ကို လန်းဆန်းစေတယ်။” (ဆာ. ၂၃:၃) ပြဿနာ များလွန်းလို့ ဒါဝိဒ် တစ်ခါတလေ စိတ်မောလာတယ်။ (ဆာ. ၁၈:၄-၆) ပင်ပန်းနွမ်းလျနေတဲ့ မိတ်ဆွေ ဒါဝိဒ်ကို “စိမ်းစိုတဲ့ စားကျက်၊” “ရေပေါများတဲ့နေရာဆီ” ယေဟောဝါ ခေါ်သွားပေးတယ်။ ယေဟောဝါရဲ့ မေတ္တာ၊ ဂရုစိုက်မှု ခံစားရလို့ ဒါဝိဒ် လန်းဆန်းအားပြည့်လာပြီး ရှေ့ဆက်နိုင်သွားတယ်။—ဆာ. ၁၈:၂၈-၃၂။

၁၆။ ယေဟောဝါရဲ့ မေတ္တာကြောင့် သင် ဘယ်လို လန်းဆန်းသွားဖူးသလဲ။

^၁၆ ဒီနေ့လည်း ဘဝပြဿနာတွေ ကြုံရပေမဲ့ “ယေဟောဝါရဲ့ ခိုင်မြဲတဲ့ မေတ္တာကြောင့် ကျွန်တော်တို့ ဇာတ်သိမ်းသွားမှာ မဟုတ်ဘူး။” (မြည်. ၃:၂၂။ ကော. ၁:၁၁) ညီအစ်မ ရေချယ်အကြောင်း စဉ်းစားကြည့်ပါ။ ကိုဗစ်-၁၉ ကပ်ရောဂါအတွင်း မိမိကိုရော ယေဟောဝါကိုပါ ခင်ပွန်း စွန့်သွားလို့ ဝမ်းနည်းပက်လက် ဖြစ်ခဲ့ရတယ်။ ယေဟောဝါ ဘာလုပ်ပေးသလဲ။ “အချစ်ခံရတယ်လို့ ခံစားရအောင် ယေဟောဝါ လုပ်ပေးတယ်။ မိတ်ဆွေကောင်းတွေနဲ့ ဝန်းရံထားပေးတယ်။ မိတ်ဆွေတွေက ကျွန်မဘေးမှာ ရှိပေးကြတယ်။ အစားအသောက်တွေ ယူလာပေးကြတယ်။ အားရှိစရာ စာတိုလေးတွေ၊ ကျမ်းပိုဒ်တွေ ပို့ကြတယ်။ ပြုံးပြကြတယ်။ ကျွန်မကို ယေဟောဝါ ဂရုစိုက်တယ်ဆိုတာ မပြတ် သတိပေးကြတယ်။ ဒီလို မေတ္တာ လွှမ်းခြုံတဲ့ မိသားစုကြီး ပေးထားလို့ ယေဟောဝါကို ကျေးဇူးတင်မဆုံးဘူး” လို့ ရေချယ် ပြောတယ်။

၁၇။ ဒါဝိဒ် ဘာကြောင့် “ဘာအန္တရာယ်မှ မကြောက်” သလဲ။

^၁၇ “ကိုယ်တော် ရှိနေလို့ ဘာအန္တရာယ်မှ မကြောက်ဘူး။” (ဆာ. ၂၃:၄) ဒါဝိဒ် အသက် အန္တရာယ် ခဏခဏ ကြုံတယ်။ အင်အားကြီး ရန်သူတွေ ဝိုင်းနေတယ်။ ဒါပေမဲ့ ယေဟောဝါရဲ့ မေတ္တာကြောင့် ဘေးကင်းလုံခြုံတယ်လို့ ခံစားရတယ်။ ဘယ်အခြေအနေ ရောက်ရောက် မိမိနဲ့အတူ ယေဟောဝါ ရှိနေတယ်လို့ ခံစားရတဲ့အတွက် အားရှိတယ်။ ဒါကြောင့် “ကြောက်လန့်စရာ မှန်သမျှကနေ ငါ့ကို [ယေဟောဝါ] ကယ်တင်တယ်” လို့ စပ်ဆိုခဲ့တယ်။ (ဆာ. ၃၄:၄) ဒါဝိဒ် ကြုံရသမျှ ကြောက်စရာချည်းပဲ။ ဒါပေမဲ့ ကြောက်အားထက် ဘုရားမေတ္တာကို ယုံအား ပိုကြီးတယ်။

၁၈။ ကိုယ့်ကို ယေဟောဝါ ချစ်တယ်ဆိုတာ သိထားတာက ထိတ်လန့်စရာ အခြေအနေတွေ ကြုံရချိန်မှာ ဘယ်လို အားရှိစေနိုင်သလဲ။

^၁၈ ကိုယ့်ကို ယေဟောဝါ ချစ်မှန်း သိထားတာက ထိတ်လန့်စရာ အခြေအနေတွေ ကြုံရချိန်မှာ ဘယ်လို အားရှိစေသလဲ။ သားဖြစ်သူ ကိုယ့်ကိုယ်ကိုယ် သတ်သေသွားချိန်မှာ မိမိတို့ ဇနီးမောင်နှံ ဘယ်လို ခံစားရသလဲဆိုတာ ရှေ့ဆောင် ညီအစ်မ ဆူဇီ ဒီလိုပြောတယ်– “ရုတ်တရက် အဖြစ်ဆိုး ကြုံရရင် လူတွေ စိတ်ဒဏ်ရာ ရသွားတတ်ကြတယ်။ ကူကယ်ရာ မဲ့သွားပြီ၊ ဒီထက် ပိုဆိုးတာ ဘာတွေများ ကြုံရမလဲဆိုပြီး ချောက်ချားတတ်ကြတယ်။ ကျွန်မတို့ကတော့ ယေဟောဝါရဲ့ မေတ္တာကြောင့် ခံသာတယ်။” အစောပိုင်းမှာ ဖော်ပြတဲ့ ရေချယ်လည်း ဒီလို ပြောတယ်– “တစ်ည စိုးရိမ်စိတ်၊ ထိတ်လန့်စိတ်တွေနဲ့ အသည်းခိုက်အောင် နာကျင်လွန်းလို့ ယေဟောဝါဆီ အော်ဟစ်ဆုတောင်းတယ်။ မိခင်က ကလေးကို ချော့သိပ်သလို ကျွန်မ စိတ်အေးသွားအောင်၊ စိတ်ငြိမ်သွားအောင် ယေဟောဝါ ချော့သိပ်ပေးတယ်လို့ ခံစားလိုက်ရတယ်။ အဲဒီနောက် နှစ်နှစ်ခြိုက်ခြိုက် အိပ်ပျော်သွားတယ်။ အဲဒီအချိန်ကို ဘယ်တော့မှ မမေ့ဘူး။” စစ်ထဲ မဝင်လို့ ထောင်လေးနှစ် ကျသွားတဲ့ အကြီးအကဲ ညီအစ်ကို တာဆော့အကြောင်းလည်း စဉ်းစားကြည့်ပါ။ ယေဟောဝါရဲ့ မေတ္တာ၊ ဂရုစိုက်မှု ဘယ်လို ခံစားရသလဲ။ “ယေဟောဝါက လိုတာရော လိုတာထက်ပါ ဖြည့်ဆည်းပေးတယ်။ ယေဟောဝါကို အပြည့်အဝ ယုံကြည်ကိုးစားနိုင်မှန်း ပိုစိတ်ချသွားတယ်။ ထောင်လိုမျိုး စိတ်ဓာတ်ကျစရာ နေရာမှာတောင် ပျော်နေဖို့ စွမ်းအားတော်ကတစ်ဆင့် ကူညီပေးတယ်။ ဘုရားနဲ့ ရင်းနှီးလေ ဘုရားမေတ္တာ ခံစားရလေဆိုတာ သဘောပေါက်သွားတယ်။ ဒါကြောင့် ထောင်ကျနေတုန်းမှာပဲ မှန်မှန်ရှေ့ဆောင် စလုပ်တယ်” လို့ ပြောတယ်။

ချစ်ခင်တွယ်တာတတ်တဲ့ ဘုရားနဲ့ ရင်းနှီးအောင် လုပ်ပါ

၁၉။ (က) ကိုယ့်ကို ဘုရား ချစ်တယ်ဆိုတာ သိထားရင် ဘယ်လို ဆုတောင်းမလဲ။ (ခ) ယေဟောဝါရဲ့ မေတ္တာကို ဘယ်လို ပုံဖော်ထားတာ သင် အကြိုက်ဆုံးလဲ။ (“ ယေဟောဝါရဲ့ နွေးထွေးတဲ့ မေတ္တာကို ခံစားနားလည်ဖို့ ကူညီပေးတဲ့ ဖော်ပြချက်များ” လေးထောင့်ကွက်ကို ကြည့်ပါ။)

^၁၉ ကျွန်တော်တို့နဲ့အတူ ‘မေတ္တာရှင်’ ယေဟောဝါ ရှိနေကြောင်း ဒီဆောင်းပါးမှာ ပါတဲ့ တွေ့ကြုံမှုတွေက သက်သေပါပဲ။ (၂ ကော. ၁၃:၁၁) တစ်ယောက်ချင်းစီကို ဘုရား ဂရုစိုက်တယ်။ “ခိုင်မြဲတဲ့ မေတ္တာတော်” နဲ့ “ဝိုင်းရံ” ထားပေးတယ်။ (ဆာ. ၃၂:၁၀) ဘုရား မေတ္တာ ဘယ်လို ပြသလဲ တွေးလေ ကိုယ့်ကို ဘယ်လောက် ဂရုစိုက်သလဲ မြင်လာလေ၊ ဘုရားနဲ့ ရင်းနှီးလာလေပဲ။ ကိုယ့်ကို ဘုရား နားလည်တယ်၊ ကူညီပေးချင်တယ်ဆိုတာ စိတ်ချရင် ဘုရားမေတ္တာ ဘယ်လောက်တောင် လိုအပ်တယ်ဆိုတာ တွန့်မနေဘဲ ပြောပြရဲမယ်။ စိုးရိမ်စရာတွေ ပြောပြရဲမယ်။—ဆာ. ၁၄၅:၁၈၊ ၁၉။

၂၀။ ဘုရားမေတ္တာက ဘယ်လို ဆွဲဆောင်သလဲ။

^၂၀ ဆောင်းတွင်းဆိုရင် မီးဖိုနားပဲ ကပ်နေချင်သလို ယေဟောဝါရဲ့ မေတ္တာဟာ နွေးထွေးတာမို့ ယေဟောဝါနား ကျွန်တော်တို့ ကပ်နေချင်ကြတယ်။ ယေဟောဝါဟာ မေတ္တာ အားကြီးတယ်။ ချစ်ခင်တွယ်တာတတ်တယ်။ ဒီလိုဘုရားမျိုးရဲ့ အချစ်ခံရတယ်ဆိုတဲ့ သိစိတ်နဲ့ ပျော်လိုက်ပါ။ “ယေဟောဝါကို ငါ ချစ်မြတ်နိုးတယ်” လို့ ကြွေးကြော်ပြီး ချစ်တုံ့ပြန်လိုက်ပါ။—ဆာ. ၁၁၆:၁။