လေ့လာရန် ဆောင်းပါး ၁၂
သီချင်း ၇၇ မှောင်မိုက်လောကထဲက အလင်း
အမှောင်နဲ့ ကင်းကင်းနေပါ၊ အလင်းထဲ လျှောက်လှမ်းနေပါ
“ခင်ဗျားတို့ဟာ တစ်ချိန်က အမှောင်ထဲမှာ ရှိခဲ့ကြတယ်။ အခုတော့ . . . အလင်းထဲ ရောက်နေပြီ။”—ဧ. ၅:၈။
အာရုံစိုက်ရာ
ဧဖက် အခန်းကြီး ၅ မှာ ပါတဲ့ အမှောင်နဲ့ အလင်း တင်စားချက်ကနေ ဘာသင်ယူနိုင်သလဲ။
၁-၂။ (က) ဘယ်လို အခြေအနေမျိုးမှာ ဧဖက်အသင်းတော်ဆီ ပေါလု စာရေးသလဲ။ ဘာကြောင့်လဲ။ (ခ) ဘာမေးခွန်းတွေ ဆွေးနွေးကြမလဲ။
ရောမမြို့မှာ တမန်တော် ပေါလု အိမ်အကျယ်ချုပ် ကျနေပေမဲ့ ညီအစ်ကို/မတွေကို အားပေးချင်တယ်။ လူကိုယ်တိုင် သွားအားမပေးနိုင်လို့ စာတွေ ရေးတယ်။ တစ်စောင်ကတော့ အေဒီ ၆၀ ဒါမှမဟုတ် ၆၁ လောက်မှာ ဧဖက်အသင်းတော်ဆီ ရေးတဲ့ စာပါ။—ဧ. ၁:၁။ ၄:၁။
၂ လွန်ခဲ့တဲ့ ဆယ်နှစ်နီးပါးက ဧဖက်မြို့မှာ ပေါလု အချိန်အတော်ကြာ သတင်းကောင်း ဟောပြောသွန်သင်တယ်။ (တ. ၁၉:၁၊ ၈-၁၀။ ၂၀:၂၀၊ ၂၁) ညီအစ်ကို/မတွေကို သိပ်ချစ်တယ်။ ယေဟောဝါအပေါ် ဆက်သစ္စာရှိနိုင်ဖို့ ကူညီပေးချင်တယ်။ ဒါပေမဲ့ ဘာကြောင့် အမှောင်နဲ့ အလင်းအကြောင်း ဘိသိက်ခံ ခရစ်ယာန်တွေဆီ ရေးသလဲ။ ခရစ်ယာန်အားလုံး ဘာသင်ယူနိုင်သလဲ။
အမှောင်မှ အလင်း
၃။ ဧဖက်မြို့က ခရစ်ယာန်တွေ အကြီးအကျယ် ပြောင်းလဲသွားတာကို ပေါလု ဘယ်လို တင်စားသလဲ။
၃ “ခင်ဗျားတို့ဟာ တစ်ချိန်က အမှောင်ထဲမှာ ရှိခဲ့ကြတယ်။ အခုတော့ . . . အလင်းထဲ ရောက်နေပြီ” လို့ ဧဖက်မြို့က ခရစ်ယာန်တွေကို ပေါလု ပြောတယ်။ (ဧ. ၅:၈) သူတို့ အကြီးအကျယ် ပြောင်းလဲသွားတာကို ဖော်ပြဖို့ အမှောင်နဲ့ အလင်း တင်စားချက် သုံးထားတယ်။ “တစ်ချိန်က အမှောင်ထဲမှာ ရှိခဲ့ကြတယ်” လို့ ပေါလု ဘာကြောင့် ပြောသလဲ။
၄။ ဧဖက်မြို့သားတွေ ဘယ်လိုနည်းနဲ့ ဘာသာရေး အမှောင်ကျခဲ့ကြသလဲ။
၄ ဘာသာရေး အမှောင်ကျခြင်း။ ဧဖက်မြို့က အာတေမိ ဘုရားကျောင်းဟာ ရှေးခေတ် ကမ္ဘာ့အံ့ဖွယ် ခုနစ်ပါးမှာ ပါတယ်။ ရုပ်တုတွေ အပြည့်ပဲ။ အာတေမိ ဘုရားမရဲ့ ငွေနတ်ကွန်းတွေ လုပ်ရောင်းပြီး ပန်းထိမ်သမားတွေ စီးပွားတက်နေကြတယ်။ (တ. ၁၉:၂၃-၂၇) ဒါ့အပြင် မြို့သား တော်တော်များများ မှော်အတတ် လိုက်စားကြတယ်။ (တ. ၁၉:၁၉) ဒါကြောင့် ဧဖက်မြို့က ခရစ်ယာန်တွေဟာ အမှန်တရား မသိခင်၊ ခရစ်ယာန် ဖြစ်မလာခင် မှားယွင်းတဲ့ ဘာသာရေး သွန်သင်ချက်၊ မှော်အတတ်ရဲ့ ကျွန် ဖြစ်ခဲ့ကြတယ်။
၅။ ဧဖက်မြို့သားတွေ ဘယ်လိုနည်းနဲ့ ကိုယ်ကျင့်တရား အမှောင်ကျခဲ့ကြသလဲ။
၅ ကိုယ်ကျင့်တရား အမှောင်ကျခြင်း။ ဧဖက်မြို့သားတွေဟာ အကျင့်ပျက် လုပ်ရပ်တွေ၊ မျက်နှာပြောင်တိုက်တဲ့ လုပ်ရပ်တွေနဲ့ နာမည်ကြီးတယ်။ ဇာတ်ရုံတွေ၊ ဘာသာရေးပွဲတွေမှာ မကြားဝံ့မနာသာ စကားတွေ မကြားချင်မှ အဆုံးပဲ။ (ဧ. ၅:၃) မြို့သား အများစုမှာ “ကိုယ်ကျင့်တရား မရှိတော့” ဘူး။ တစ်နည်းအားဖြင့် “စိတ်နှလုံး ထုံထိုင်းနေတယ်။” (ဧ. ၄:၁၇-၁၉) အမှားအမှန် မသိခင် အချိန်မို့ အမှားလုပ်လည်း စိတ်ကြည်ကြည်ပဲ။ ယေဟောဝါဆီမှာ စာရင်းရှင်းရမယ်ဆိုတာ မသိဘူး။ ဒါကြောင့် “ဉာဏ်အလင်းကွယ်နေတယ်။ . . . ဘုရားသခင် ပေးသနားတဲ့ အသက်နဲ့ ကင်းကွာနေတယ်” လို့ ပေါလု ပြောတာ။
၆။ ဧဖက်မြို့က ခရစ်ယာန်တွေ “အလင်းထဲ ရောက်နေပြီ” လို့ ပေါလု ဘာကြောင့် ပြောသလဲ။
၆ ဧဖက်မြို့သားတချို့ အမှောင်ကနေ ထွက်လာတယ်။ “အခုတော့ သခင်ယေရှုနဲ့ စပ်ဆိုင်ပြီ ဖြစ်လို့ အလင်းထဲ ရောက်နေပြီ” လို့ ပေါလု ပြောတယ်။ (ဧ. ၅:၈) အမှန်တရားအလင်း လမ်းပြတဲ့အတိုင်း ကျင့်ကြံပြုမူကြတယ်။ (ဆာ. ၁၁၉:၁၀၅) မှားယွင်းတဲ့ ဘာသာရေး အကျင့်အကြံတွေ၊ အကျင့်ပျက် လုပ်ရပ်တွေ စွန့်ကြတယ်။ “ဘုရားသခင်ကို အတုယူကြ” တယ်။ ဘုရားကို ဝတ်ပြုဖို့၊ ဘုရားစိတ်နဲ့ တွေ့ဖို့ အတတ်နိုင်ဆုံး ကြိုးစားကြတယ်။—ဧ. ၅:၁။
၇။ ကျွန်တော်တို့ရဲ့ အခြေအနေဟာ ဧဖက်မြို့က ခရစ်ယာန်တွေရဲ့ အခြေအနေနဲ့ ဘယ်လို တူသလဲ။
၇ ကျွန်တော်တို့လည်း အမှန်တရား မသိခင်က ဘာသာရေး၊ ကိုယ်ကျင့်တရား အမှောင်ကျခဲ့ကြတယ်။ တချို့က မှားယွင်းတဲ့ ဘာသာရေးပွဲတွေ ကျင်းပတယ်။ အကျင့်ပျက် ဘဝပုံစံနဲ့ နေတယ်။ ဒါပေမဲ့ ယေဟောဝါရဲ့ အမှားအမှန်စံနှုန်း သိလာတော့ ပြောင်းလဲလာတယ်။ ဘုရား နေစေချင်တဲ့ ဘဝပုံစံနဲ့ နေတယ်။ ဒါကြောင့် ကောင်းကျိုး အများကြီး ရတယ်။ (ဟေရှာ. ၄၈:၁၇) ဒါပေမဲ့ ထွက်လာခဲ့တဲ့ အမှောင်နဲ့ ကင်းကင်းနေဖို့၊ “အလင်းရဲ့ သားသမီးတွေအဖြစ် လျှောက်လှမ်းနေ” ဖို့ အမြဲ မလွယ်ဘူး။
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
ဧဖက်အသင်းတော်ဆီ ရေးတဲ့ စာထဲက ပေါလုရဲ့ မေတ္တာပါ အကြံပြုချက်တွေဟာ ကျွန်တော်တို့နဲ့လည်း ဆိုင် (စာပိုဒ် ၇ ကို ကြည့်ပါ) b
အမှောင်နဲ့ ကင်းကင်းနေပါ
၈။ ဧဖက် ၅:၃-၅ အရ ဧဖက်မြို့က ခရစ်ယာန်တွေ ဘာရှောင်ရမလဲ။
၈ ဧဖက် ၅:၃-၅ ကို ဖတ်ပါ။ ကိုယ်ကျင့်တရား အမှောင်လောကနဲ့ ဧဖက်မြို့က ခရစ်ယာန်တွေ ကင်းကင်းနေနိုင်ဖို့ဆိုရင် ယေဟောဝါ မနှစ်သက်တဲ့ အကျင့်အကြံတွေ မပြတ် တွန်းလှန်နေရမယ်။ လိင်အကျင့် မယိုယွင်းရုံနဲ့ မရဘူး။ မကြားဝံ့မနာသာ စကားတွေလည်း မပြောရဘူး။ “ခရစ်တော်နဲ့ ဘုရားသခင်ရဲ့ နိုင်ငံတော်ကို အမွေ” ခံချင်ရင် အဲဒါတွေ ရှောင်ရမယ်လို့ ပေါလု သတိပေးတယ်။
၉။ လိင်အကျင့်ယိုယွင်းမိစေနိုင်တဲ့ ဘယ်အရာကိုမဆို ဘာကြောင့် တွန်းလှန်သင့်သလဲ။
၉ ကျွန်တော်တို့လည်း “အမှောင်နဲ့ ဆိုင်တဲ့ အကျိုးမဲ့ အကျင့်တွေ” မပြတ် တွန်းလှန်နေရမယ်။ (ဧ. ၅:၁၁) မသန့်ရှင်းတာတွေ၊ အကျင့်ပျက်တာတွေ ကြည့်လေ၊ နားထောင်လေ၊ ပြောလေ အမှားလုပ်ဖို့ လွယ်လေဆိုတာ တွေ့ကြုံမှုတွေက သက်သေပါပဲ။ (က. ၃:၆။ ယာ. ၁:၁၄၊ ၁၅) နိုင်ငံတစ်နိုင်ငံမှာ ညီအစ်ကိုတစ်စု အွန်လိုင်းမှာ “ဖရန့်” လုပ်ထားပြီး စကားပြောကြတယ်။ အစပိုင်းမှာတော့ ဘုရားရေးရာအကြောင်းပဲ ပြောတာပါ။ ဒါပေမဲ့ တဖြည်းဖြည်း စကားဝိုင်းမှာ မကောင်းတာတွေ ပါလာတယ်။ ပြောသမျှ လိင်အကြောင်းကနေ မထွက်တော့ဘူး။ လိင်အကျင့်ယိုယွင်းမိသွားတာ အဲဒီအပြောအဆိုတွေကနေ စတာပဲလို့ ညီအစ်ကို တော်တော်များများ နောက်ပိုင်း ဝန်ခံကြတယ်။
၁၀။ ကျွန်တော်တို့ကို စာတန် ဘယ်လို ထင်စေချင်သလဲ။ (ဧဖက် ၅:၆)
၁၀ ကျွန်တော်တို့ကို စာတန့်လောက လှည့်ဖြားချင်တယ်။ အကျင့်ပျက်တယ်၊ မသန့်ရှင်းဘူးလို့ ယေဟောဝါ သတ်မှတ်ထားတာတွေဟာ တကယ်တမ်း အဆိုးကြီးတော့လည်း မဟုတ်ပါဘူးလို့ ထင်စေချင်တယ်။ (၂ ပေ. ၂:၁၉) ဒါ အံ့ဩစရာတော့ မဟုတ်ဘူး။ လူတွေ အမှားအမှန် မသဲကွဲအောင် လုပ်တဲ့နည်းဟာ စာတန် တောက်လျှောက် သုံးလာတဲ့ နည်းပဲ။ (ဟေရှာ. ၅:၂၀။ ၂ ကော. ၄:၄) မသန့်ရှင်းတဲ့ အကျင့်၊ ဘဝပုံစံဟာ မမှားဘူး၊ ပျော်စရာကောင်းတယ်၊ အန္တရာယ် ကင်းတယ်လို့ ထင်စေချင်တယ်။ (ဧဖက် ၅:၆ ကို ဖတ်ပါ။) ဒါကြောင့်လည်း ရုပ်ရှင်၊ တီဗီ အစီအစဉ်၊ ဝက်ဘ်ဆိုက်တွေမှာ ဘုရားစံနှုန်းနဲ့ မညီတဲ့ အတွေးအခေါ်တွေ ပလူပျံနေတာ။
၁၁။ ဧဖက် ၅:၇ မှာ ပါတဲ့ ပညာရှိ အကြံဉာဏ်ကို လိုက်နာဖို့ လိုကြောင်း အန်ဂျလာရဲ့ အဖြစ်ကနေ ဘာသိရသလဲ။ (ရုပ်ပုံကိုလည်း ကြည့်ပါ။)
၁၁ ဘုရားစံနှုန်း လိုက်နာဖို့ အခက်တွေ့စေမယ့် အပေါင်းအသင်းတွေနဲ့ ကျွန်တော်တို့ကို စာတန် ပေါင်းမိသွားစေချင်တယ်။ ဒါကြောင့်လည်း အမှားလုပ်နေသူတွေနဲ့ “မပတ်သက်ကြနဲ့” လို့ ဧဖက်အသင်းတော်ကို ပေါလု တိုက်တွန်းတာ။ (ဧ. ၅:၇) ဒီနေ့ခေတ်မှာ လူချင်းတွေ့မှ မဟုတ်ဘဲ လူမှုမီဒီယာကနေလည်း ပေါင်းလို့ ရနေတာမို့ ရှေးဧဖက်မြို့က ခရစ်ယာန်တွေထက် ပိုသတိထားရမယ်။ လူမှုမီဒီယာ ဘယ်လောက် အန္တရာယ် များမှန်း အာရှမှာ နေတဲ့ ညီအစ်မ အန်ဂျလာ a သိလာတယ်။ “လူမှုမီဒီယာဟာ ထောင်ချောက်ပဲ။ ကျွန်မကို အတွေးအခေါ် တစ်စတစ်စ ပြောင်းလာစေတယ်။ နောက်တော့ ကျမ်းစာမူတွေကို မလေးစားသူတွေနဲ့ ‘ဖရန့်’ လုပ်တာ စိတ်ထဲ ဘယ်လိုမှ မနေတော့ဘူး။ ယေဟောဝါ မနှစ်သက်တဲ့ ဘဝပုံစံနဲ့ နေတာ ဘာမှ မဖြစ်ပါဘူးလို့တောင် တွေးလာတဲ့အထိပဲ” လို့ ဝန်ခံတယ်။ အန်ဂျလာ လိုအပ်တဲ့ အပြောင်းအလဲတွေ လုပ်နိုင်ဖို့ အကြီးအကဲတွေ မေတ္တာပါပါ ကူညီပေးကြတယ်။ “လူမှုမီဒီယာကို မဟုတ်ဘဲ ဘုရားရေးရာကိုပဲ အာရုံစိုက်နေပြီ” လို့ အန်ဂျလာ ပြောတယ်။
ယေဟောဝါရဲ့ စံနှုန်းတွေ လိုက်နိုင်၊ မလိုက်နိုင်ဆိုတာ ဘယ်သူတွေနဲ့ ကိုယ် ပေါင်းနေသလဲဆိုတာအပေါ် အများကြီး မူတည် (စာပိုဒ် ၁၁ ကို ကြည့်ပါ)
၁၂။ ယေဟောဝါရဲ့ အမှားအမှန်စံနှုန်းတွေ လိုက်နာဖို့ ဘာက ကူညီပေးမလဲ။
၁၂ အကျင့်ပျက် ဘဝပုံစံဟာ မမှားပါဘူးဆိုတဲ့ လောကအမြင်ကို တွန်းလှန်ရမယ်။ ဘယ်ဟာ မှားတယ်၊ မှန်တယ်ဆိုတာ လောက,က လူတွေထက် ကျွန်တော်တို့ ပိုသိတာပဲ။ (ဧ. ၄:၁၉၊ ၂၀) ‘ဘုရားစံနှုန်းတွေကို မလေးစားတဲ့ အလုပ်ဖော်၊ အတန်းဖော်၊ တခြားသူတွေနဲ့ မလိုအပ်ဘဲ မပေါင်းမိအောင် ငါ ရှောင်ရဲ့လား။ အမြင်ကျဉ်းတယ်လို့ အပြောခံရရင်တောင် ဘုရားစံနှုန်းတွေ ငါ သတ္တိရှိရှိ လိုက်နာသလား’ လို့ စဉ်းစားပါ။ ၂ တိမောသေ ၂:၂၀-၂၂ မှာ ဖော်ပြသလို အသင်းတော်ထဲမှာတောင် ဘယ်သူတွေနဲ့ ရင်းရင်းနှီးနှီး ပေါင်းနေသလဲ ဂရုစိုက်ရမယ်။ သစ္စာရှိရှိ ဘုရားအမှုဆောင်ဖို့ အပေါင်းအသင်းတိုင်းက အကူအညီ ဖြစ်နေမှာ မဟုတ်လို့ပါပဲ။
“အလင်းရဲ့ သားသမီးတွေအဖြစ် လျှောက်လှမ်းနေကြပါ”
၁၃။ “အလင်းရဲ့ သားသမီးတွေအဖြစ် လျှောက်လှမ်းနေကြပါ” ဆိုတာ ဘာကို ဆိုလိုသလဲ။ (ဧဖက် ၅:၇-၉)
၁၃ အမှောင်နဲ့ ကင်းကင်းနေရုံသာမက “အလင်းရဲ့ သားသမီးတွေအဖြစ် လျှောက်လှမ်းနေ” ဖို့ ဧဖက်အသင်းတော်ကို ပေါလု အားပေးတယ်။ (ဧဖက် ၅:၇-၉ ကို ဖတ်ပါ။) ခရစ်ယာန်စစ်တွေလို အချိန်ပြည့် ပြုမူဖို့ ပြောနေတာ။ တစ်နည်းကတော့ ကျမ်းစာနဲ့ ကျမ်းစာ အခြေပြု စာပေတွေ ဝီရိယရှိရှိ ဖတ်တာ၊ လေ့လာတာပဲ။ အထူးသဖြင့် ယေရှုခရစ်ရဲ့ စံနမူနာနဲ့ သွန်သင်ချက်တွေကို အာရုံစိုက်ဖို့ အရေးကြီးတယ်။ ယေရှုဟာ “ဒီလောကရဲ့ အလင်း” ဖြစ်လို့ပဲ။—ယော. ၈:၁၂။ ပညာ. ၆:၂၃။
၁၄။ သန့်ရှင်းသော စွမ်းအားတော် ဘယ်လို ကူညီပေးနိုင်သလဲ။
၁၄ “အလင်းရဲ့ သားသမီးတွေအဖြစ်” ဆက်ပြုမူနိုင်ဖို့ သန့်ရှင်းသော စွမ်းအားတော်ရဲ့ အကူအညီလည်း လိုတယ်။ အကျင့်ပျက် လောကမှာ သန့်ရှင်းမြဲ သန့်ရှင်းနေဖို့ မလွယ်လို့ပဲ။ (၁ သက်. ၄:၃-၅၊ ၇၊ ၈) ဘုရားအတွေးအခေါ်နဲ့ မညီတဲ့ လောကအတွေးအခေါ်တွေ၊ အမြင်တွေ တွန်းလှန်ဖို့ သန့်ရှင်းသော စွမ်းအားတော် ကူညီပေးနိုင်တယ်။ “ကောင်းမြတ်” နေဖို့၊ “ဖြောင့်မတ်” နေဖို့လည်း ကူညီပေးနိုင်တယ်။—ဧ. ၅:၉။
၁၅။ သန့်ရှင်းသော စွမ်းအားတော် ဘယ်လို ရနိုင်သလဲ။ (ဧဖက် ၅:၁၉၊ ၂၀)
၁၅ စွမ်းအားတော် ရနိုင်တဲ့ တစ်နည်းကတော့ ဆုတောင်းခြင်းပါပဲ။ “တောင်းတဲ့သူတွေကို သန့်ရှင်းသော စွမ်းအားတော်” ယေဟောဝါ ပေးမယ်လို့ ယေရှု ပြောတယ်။ (လု. ၁၁:၁၃) အစည်းအဝေးမှာ ယေဟောဝါကို အတူတကွ ချီးမွမ်းတဲ့အခါလည်း စွမ်းအားတော် ရတယ်။ (ဧဖက် ၅:၁၉၊ ၂၀ ကို ဖတ်ပါ။) သန့်ရှင်းသော စွမ်းအားတော် သက်ရောက်နေရင် သန့်ရှင်းတဲ့ ဘဝပုံစံနဲ့ နေနိုင်မယ်။
၁၆။ ဆုံးဖြတ်ချက်ကောင်း ချနိုင်ဖို့ ဘာက ကူညီပေးမလဲ။ (ဧဖက် ၅:၁၀၊ ၁၇)
၁၆ အရေးကြီးတဲ့ ဆုံးဖြတ်ချက် ချဖို့ လိုတဲ့အခါ “ယေဟောဝါရဲ့ အလိုတော်ကို သိနားလည်အောင်” ကြိုးစားရမယ်။ အလိုတော်နဲ့အညီ ကျင့်ကြံပြုမူရမယ်။ (ဧဖက် ၅:၁၀၊ ၁၇ ကို ဖတ်ပါ။) ကိုယ့်အခြေအနေနဲ့ သက်ဆိုင်တဲ့ ကျမ်းစာမူတွေ ရှာတာဟာ ဘုရားအတွေးအခေါ်ကို သိနားလည်ဖို့ ကြိုးစားတာပဲ။ ဘုရားအတွေးအခေါ်ကို အခြေခံရင် ဆုံးဖြတ်ချက်ကောင်း ချနိုင်မယ်။
၁၇။ အချိန်ကို ဘယ်လို အကျိုးရှိရှိ အသုံးချနိုင်သလဲ။ (ဧဖက် ၅:၁၅၊ ၁၆) (ရုပ်ပုံကိုလည်း ကြည့်ပါ။)
၁၇ အချိန်ကို အကျိုးရှိရှိ အသုံးချဖို့လည်း ဧဖက်အသင်းတော်ကို ပေါလု အကြံပေးတယ်။ (ဧဖက် ၅:၁၅၊ ၁၆ ကို ဖတ်ပါ။) “ဆိုးညစ်သူ” ရန်သူ စာတန်က ကျွန်တော်တို့ ဘုရားအမှုဆောင်ဖို့ အချိန်မရှိတော့တဲ့အထိ လောကမှာ အလုပ်များနေစေချင်တယ်။ (၁ ယော. ၅:၁၉) အမှုဆောင် အခွင့်အရေးတွေနောက် မဟုတ်ဘဲ ငွေ၊ ပညာရေး၊ အလုပ်အကိုင်နောက် လိုက်မိဖို့ သိပ်လွယ်တယ်။ လိုက်နေပြီဆိုရင် လောကအတွေးအခေါ် ဝင်နေပြီဆိုတဲ့ အဓိပ္ပာယ်ပဲ။ အဲဒီအရာတွေဟာ မမှားပေမဲ့ ဘဝမှာ နံပါတ်တစ် ဖြစ်မနေသင့်ဘူး။ “အလင်းရဲ့ သားသမီးတွေအဖြစ် လျှောက်လှမ်းနေ” နိုင်ဖို့ဆိုရင် “အချိန်ကို အကျိုးရှိရှိ အသုံးချ” ရမယ်။ တကယ် အရေးကြီးတာကို အာရုံစိုက်ရမယ်။
အချိန်ကို အကျိုးရှိရှိ အသုံးချဖို့ ဧဖက်မြို့က ခရစ်ယာန်တွေ အားပေးခံရ (စာပိုဒ် ၁၇ ကို ကြည့်ပါ)
၁၈။ ညီအစ်ကို ဒေါ်နယ် အချိန်ကို ဘယ်လို အကျိုးရှိရှိ အသုံးချသလဲ။
၁၈ ယေဟောဝါအတွက် ပိုအမှုဆောင်နိုင်ဖို့ အခွင့်အရေးတွေ ရှာပါ။ “ကိုယ့်အခြေအနေကို ဆန်းစစ်တယ်။ အမှုဆောင်မှာ ပိုပါဝင်နိုင်ဖို့၊ ပိုပါဝင်စေနိုင်မယ့် အလုပ်ရဖို့ ဆုတောင်းတယ်။ ယေဟောဝါ ကူညီပေးလို့ သင့်တော်တဲ့ အလုပ် ရှာတွေ့သွားတယ်။ မောင်နှံစုံလိုက် အချိန်ပြည့် အမှုဆောင်နိုင်သွားတယ်” လို့ တောင်အာဖရိကမှာ နေတဲ့ ညီအစ်ကို ဒေါ်နယ် ပြောတယ်။
၁၉။ “အလင်းရဲ့ သားသမီးတွေအဖြစ်” ဘယ်လို လျှောက်လှမ်းနေနိုင်သလဲ။
၁၉ ပေါလုရဲ့ စာက ဧဖက်အသင်းတော်ကို အများကြီး ကူညီပေးခဲ့မှာပဲ။ ဖျော်ဖြေရေး၊ အပေါင်းအသင်း ပညာရှိရှိ ရွေးဖို့ ကျွန်တော်တို့ကိုလည်း ကူညီပေးတယ်။ ကျမ်းစာ မှန်မှန် လေ့လာဖို့ လှုံ့ဆော်ပေးတယ်။ ဒါမှ အမှန်တရားအလင်း လမ်းပြတဲ့အတိုင်း ကျင့်ကြံပြုမူနိုင်မှာ။ အရည်အသွေးကောင်းတွေ ရှိလာစေနိုင်တဲ့ သန့်ရှင်းသော စွမ်းအားတော်ရဲ့ အရေးကြီးမှုကိုလည်း ပေါလုရဲ့ စာက အလေးပေးဖော်ပြတယ်။ ယေဟောဝါရဲ့ အတွေးအခေါ်နဲ့ ကိုက်ညီတဲ့ ပညာရှိ ဆုံးဖြတ်ချက်တွေ ချဖို့ ကူညီပေးတယ်။ စာမှာ ပါတဲ့ အကြံပေးချက်တွေ လိုက်နာရင် အမှောင်နဲ့ ကင်းကင်းနေပြီး အလင်းထဲ လျှောက်လှမ်းနေနိုင်ပါလိမ့်မယ်။
သင် ဘယ်လို ဖြေမလဲ
-
ဧဖက် ၅:၈ မှာ ပါတဲ့ “အမှောင်” နဲ့ “အလင်း” က ဘာကို တင်စားသလဲ။
-
“အမှောင်” နဲ့ ဘယ်လို ကင်းကင်းနေနိုင်သလဲ။
-
“အလင်းရဲ့ သားသမီးတွေအဖြစ်” ဘယ်လို လျှောက်လှမ်းနေနိုင်သလဲ။
သီချင်း ၄၃ မြဲမြံ၊ နိုးကြား၊ ခွန်အားကြီးပွားလော့
a အမည်လွှဲများ။
b ပုံအညွှန်း– ဧဖက်အသင်းတော်ဆီ ရေးတဲ့ တမန်တော် ပေါလုရဲ့ စာ ရှေးမိတ္တူပုံ။
