လူသားအားလုံးဟာ အပြစ်သားတွေဖြစ်တယ်လို့ သမ္မာကျမ်းစာမှာ ဖော်ပြထားပါတယ်။ ကျွန်ုပ်တို့ဟာ အပြစ်ပြုချင်တဲ့ ဉာဉ်ဆိုးကို ကနဦးလူသား အာဒံဆီကနေ အမွေရထားကြတယ်။ ဒါကြောင့် တစ်ခါတလေ ကျွန်ုပ်တို့ အပြစ်ပြုမိတယ်၊ နောက်ပိုင်းမှ မိမိလုပ်ခဲ့တဲ့အရာတွေအတွက် စိတ်မကောင်းဖြစ်ကြရပါတယ်။ ဘုရားသခင့်သားတော် ယေရှုခရစ်ဟာ ကျွန်ုပ်တို့အပြစ်အတွက် အသေခံပေးခဲ့တယ်။ ယေရှုရဲ့သေခြင်းကြောင့် ကျွန်ုပ်တို့ဟာ အပြစ်ခွင့်လွှတ်ခံရနိုင်တယ်။ အဲဒါက ဘုရားသခင်ဆီကရတဲ့ လက်ဆောင်တစ်ခုဖြစ်ပါတယ်။—ရောမ ၃:၂၃၊ ၂၄ ကိုဖတ်ပါ။

တချို့က ကြီးလေးတဲ့အပြစ်တွေကို ကျူးလွန်တဲ့အတွက် သူတို့ရဲ့အပြစ်တွေကို ဘုရားသခင် ခွင့်လွှတ်နိုင်ပါ့မလားဆိုပြီး သိချင်ကြတယ်။ ဝမ်းသာစရာက၊ သမ္မာကျမ်းစာမှာ ဒီလိုပြောထားတာပါပဲ– “ကိုယ်တော့်သားတော် ယေရှု၏အသွေးတော်သည် ငါတို့ကို အပြစ်ရှိသမျှမှ သန့်စင်စေပြီ။” (၁ ယောဟန် ၁:၇) ကျွန်ုပ်တို့ဟာ စစ်မှန်တဲ့ နောင်တယူမယ်ဆိုရင် ယေဟောဝါဘုရားသခင်က ကြီးလေးတဲ့အပြစ်တွေကိုတောင် လိုလိုလားလား ခွင့်လွှတ်ပေးမှာဖြစ်တယ်။—ဟေရှာယ ၁:၁၈ ကိုဖတ်ပါ။

ယေဟောဝါဘုရားသခင်ဆီကနေ ခွင့်လွှတ်မှု ရယူချင်တယ်ဆိုရင် ကိုယ်တော့်အကြောင်း သင်ယူပြီး ကိုယ်တော့်နည်းလမ်းတွေ၊ အကြံပြုချက်တွေ၊ တောင်းဆိုချက်တွေကို နားလည်အောင် ပြုလုပ်ဖို့လိုပါတယ်။ (ယောဟန် ၁၇:၃) အကျင့်ဆိုးတွေအတွက် နောင်တယူပြီး ပြုပြင်ပြောင်းလဲဖို့ ကြိုးစားနေတဲ့သူတွေကို ဘုရားသခင် လိုလိုလားလား ခွင့်လွှတ်ပါတယ်။—တမန်တော် ၃:၁၉ ကိုဖတ်ပါ။

ဘုရားသခင်ရဲ့ နှစ်သက်လက်ခံမှုကို ရယူဖို့အတွက် သိပ်မခက်ပါဘူး။ ဘုရားသခင်က ကျွန်ုပ်တို့ရဲ့အားနည်းချက်တွေကို နားလည်ပေးတတ်ပါတယ်။ ဘာကြောင့်လဲဆိုတော့ ယေဟောဝါဟာ သနားကြင်နာတဲ့ ဘုရားသခင်ဖြစ်လို့ပါ။ ဘုရားသခင်ရဲ့ ချစ်ခင်ကြင်နာမှုကြောင့် သင်ဟာ ကိုယ်တော်ရဲ့စိတ်တော်နဲ့တွေ့ဖို့ ဘယ်လိုလုပ်ရမလဲဆိုတာနဲ့ပတ်သက်ပြီး ပိုပြီးသိချင်လာတယ် မဟုတ်ဘူးလား။—ဆာလံ ၁၀၃:၁၃၊ ၁၄ ကိုဖတ်ပါ။