ထွက်မြောက်ရာ ၁၉:၁-၂၅
၁၉ အစ္စရေးတွေက အီဂျစ်ပြည်ကနေ ထွက်လာပြီးနောက် တတိယလ၊ အဲဒီနေ့မှာပဲ* ဆိုင်းနိုင်းတောကန္တာရကို ရောက်လာတယ်။
၂ ရေဖိဒိမ်အရပ်ကနေ+ ဆိုင်းနိုင်းတောကန္တာရကို ရောက်လာတော့ ဆိုင်းနိုင်းတောင်ရှေ့မှာ စခန်းချကြတယ်။+
၃ မောရှေလည်း စစ်မှန်တဲ့ဘုရားသခင်နဲ့တွေ့ဆုံဖို့ တောင်ပေါ်တက်သွားတယ်။ တောင်ပေါ်မှာ ယေဟောဝါက သူ့ကို ခေါ်ပြီး+ “ယာကုပ်အမျိုး၊ အစ္စရေးတွေကို ပြောပြပါ။
၄ ‘မင်းတို့ကို လင်းယုန်လို တောင်ပံတွေနဲ့ ငါဘယ်လိုသယ်ဆောင်ခဲ့တယ်၊+ အီဂျစ်လူမျိုးကို ဘာလုပ်ခဲ့တယ်ဆိုတာ မင်းတို့ကိုယ်တိုင် မြင်ခဲ့ကြပြီ။+
၅ မြေတစ်ပြင်လုံးကို ငါပိုင်တယ်။+ ဒါကြောင့် ငါ့စကားကို မြေဝယ်မကျ နာခံပါ။ မင်းတို့နဲ့ငါဖွဲ့မယ့် ပဋိညာဉ်ကို စောင့်ထိန်းပါ။ ဒါဆိုရင် မင်းတို့ဟာ လူမျိုးအားလုံးထဲမှာ ငါတန်ဖိုးအထားရဆုံးလူမျိုး ဖြစ်လာမယ်။+
၆ သန့်ရှင်းတဲ့လူမျိုး၊ ပုရောဟိတ်အုပ်ချုပ်တဲ့နိုင်ငံ ဖြစ်လာမယ်’”+ ဆိုပြီးပြောတယ်။
၇ မောရှေပြန်လာတော့ အကြီးအကဲတွေကို ခေါ်ပြီး ယေဟောဝါ မိန့်မှာသမျှကို ပြန်ပြောပြတယ်။+
၈ လူအားလုံးက “ယေဟောဝါဘုရား မိန့်မှာသမျှကို လိုက်နာပါ့မယ်” ဆိုပြီး တညီတညွတ်တည်း ပြောကြတယ်။+ မောရှေလည်း ချက်ချင်းပဲ သူတို့ပြောတာကို ယေဟောဝါဆီ ပြန်ပြောပြတယ်။
၉ ယေဟောဝါက “မင်းကို ငါစကားပြောတဲ့အခါ လူတွေကြားနိုင်ဖို့၊ မင်းကို သူတို့ အမြဲယုံကြည်နိုင်ဖို့ တိမ်ထုကြီးနဲ့ ငါဆင်းလာမယ်” ဆိုပြီး မောရှေကို ပြောတယ်။ မောရှေလည်း လူတွေပြောတာကို ယေဟောဝါဆီ ပြန်ပြောပြတယ်။
၁၀ ယေဟောဝါက “ဒီနေ့နဲ့ မနက်ဖြန် လူတွေကို သန့်စင်အောင် လုပ်ခိုင်းပါ။ အဝတ်တွေ လျှော်ဖွပ်ခိုင်းပါ။
၁၁ သုံးရက်မြောက်နေ့အတွက် သူတို့ အသင့်ဖြစ်နေရမယ်။ ယေဟောဝါက သုံးရက်မြောက်နေ့ကျရင် လူအားလုံးရှေ့မှာ ဆိုင်းနိုင်းတောင်ပေါ်ကို ဆင်းလာမယ်။
၁၂ တောင်ခြေပတ်လည်ကို စည်းတားထားပါ။ ပြီးတော့ ‘တောင်ပေါ် မတက်ကြနဲ့။ တောင်ခြေနားကိုလည်း မကပ်ကြနဲ့။ တောင်အနားလာသူတိုင်း သေဒဏ်ခံရမယ်။
၁၃ သူ့ကို ဘယ်သူမှ မထိနဲ့။ ကျောက်ခဲနဲ့ ပေါက်သတ်ရမယ် ဒါမှမဟုတ် မြားနဲ့ ပစ်သတ်ရမယ်။ တိရစ္ဆာန်ဖြစ်စေ၊ လူဖြစ်စေ အနားလာရင် သေဒဏ်ခံရမယ်’+ လို့လူတွေကိုပြောပါ။ သိုးချိုတံပိုး မှုတ်သံကြားရင်တော့+ တောင်နားကို လာလို့ရတယ်” လို့ မောရှေကို မိန့်မှာတယ်။
၁၄ မောရှေက တောင်ပေါ်က ဆင်းလာပြီး လူတွေကို သန့်စင်အောင် လုပ်ခိုင်းတယ်။ လူတွေလည်း အဝတ်တွေ လျှော်ဖွပ်ကြတယ်။+
၁၅ ပြီးတော့ မောရှေက “သုံးရက်မြောက်နေ့အတွက် အသင့်ပြင်ထားကြပါ။ မိန်းမနားကို မကပ်ကြနဲ့”* လို့မှာတယ်။
၁၆ သုံးရက်မြောက်နေ့ မနက်ပိုင်းမှာ မိုးခြိမ်းပြီး လျှပ်စီးတွေလက်တယ်။ တောင်ပေါ်ကို တိမ်ထုကြီး ဆင်းလာတယ်။+ တံပိုးမှုတ်သံကြီး ထွက်လာတော့ စခန်းမှာရှိတဲ့လူအားလုံး တုန်လှုပ်သွားတယ်။+
၁၇ မောရှေက လူတွေကို ဘုရားသခင်နဲ့ တွေ့ဆုံပေးဖို့ စခန်းကနေ ခေါ်လာတယ်။ လူတွေလည်း တောင်ခြေနားမှာ ရပ်နေကြတယ်။
၁၈ ယေဟောဝါက မီးလျှံနဲ့ဆင်းလာတော့ ဆိုင်းနိုင်းတစ်တောင်လုံး မီးခိုးဖုံးသွားတယ်။+ မီးခိုးတွေက မီးဖိုထဲကတက်လာသလို အလိပ်လိုက် တက်လာတယ်။ တစ်တောင်လုံးလည်း သွက်သွက်ခါအောင် လှုပ်နေတယ်။+
၁၉ တံပိုးမှုတ်သံ ကျယ်သည်ထက် ကျယ်လာတဲ့အခါ မောရှေခေါ်လိုက်တော့ စစ်မှန်တဲ့ဘုရားသခင်လည်း ပြန်ထူးတယ်။
၂၀ ယေဟောဝါက ဆိုင်းနိုင်းတောင်ပေါ် ဆင်းလာတယ်။ တောင်ပေါ်တက်လာဖို့ ယေဟောဝါခေါ်တော့ မောရှေ တက်သွားတယ်။+
၂၁ ယေဟောဝါက “တောင်အောက် ဆင်းသွားပါ။ ယေဟောဝါကို ဖူးမြင်ဖို့ အတင်း မတက်လာကြနဲ့ဆိုပြီး လူတွေကို သတိပေးပါ။ တက်လာရင် သူတို့ သေရမယ်။
၂၂ ယေဟောဝါအနား ပုံမှန်လာတဲ့ ပုရောဟိတ်တွေကိုလည်း ကိုယ်ကိုသန့်စင်အောင် လုပ်ခိုင်းပါ။ မလုပ်ရင် ယေဟောဝါ ဒဏ်ခတ်မယ်”+ လို့ပြောတယ်။
၂၃ မောရှေက “ဆိုင်းနိုင်းတောင်ပေါ်ကို သူတို့ တက်လာမှာ မဟုတ်ပါဘူး။ ‘တောင်ခြေပတ်လည်ကို စည်းတားထားပြီး သန့်ရှင်းမြင့်မြတ်စေပါ’+ လို့ ကိုယ်တော် သတိပေးပြီးသားပဲ” ဆိုပြီး ယေဟောဝါကို ပြောတယ်။
၂၄ ဒါပေမဲ့ ယေဟောဝါက “မဟုတ်ဘူး။ မင်း ဆင်းသွားပါ။ အာရုန်ကိုခေါ်ပြီး ပြန်တက်လာခဲ့။ ပုရောဟိတ်တွေနဲ့ လူတွေကိုတော့ ယေဟောဝါဆီ အတင်း မတက်လာစေနဲ့။ တက်လာရင် ငါဒဏ်ခတ်မိမယ်”+ လို့ပြောတယ်။
၂၅ မောရှေလည်း လူတွေဆီ ဆင်းသွားပြီး ပြောပြတယ်။
