ဗျာဒိတ် ၁၁:၁-၁၉
၁၁ သူက ကျွန်တော့်ကို တုတ်ချောင်းနဲ့တူတဲ့ ကျူရိုးတစ်ချောင်းပေးပြီး+ “ထပါ။ ဘုရားသခင့် ဗိမာန်တော်ရဲ့ သန့်ရှင်းရာဌာနနဲ့ ပူဇော်ရာပလ္လင်ကို တိုင်းတာပါ။ အဲဒီမှာ ကိုးကွယ်နေသူတွေကို ရေတွက်ပါ။
၂ ဗိမာန်တော်အပြင်ဘက်က ရင်ပြင်ကိုတော့ ဒီအတိုင်းထားလိုက်ပါ၊ မတိုင်းပါနဲ့။ အဲဒီရင်ပြင်ကို လူမျိုးခြားတွေဆီ ပေးအပ်ထားပြီဖြစ်လို့ သန့်ရှင်းတဲ့မြို့တော်ကို+ ၄၂ လလုံးလုံး သူတို့ နင်းခြေကြလိမ့်မယ်။+
၃ သက်သေနှစ်ယောက်ကို ငါစေလွှတ်မယ်။ သူတို့က အထည်ကြမ်းဝတ်ပြီး ရက်ပေါင်း ၁,၂၆၀ တိုင်တိုင် ပရောဖက်ပြုလိမ့်မယ်” လို့ပြောတယ်။
၄ သူတို့နှစ်ယောက်က သံလွင်ပင်နှစ်ပင်နဲ့+ ဆီမီးတိုင်နှစ်ခုကို+ ဆိုလိုတယ်။ ကမ္ဘာမြေကို ပိုင်စိုးတဲ့သခင်ရှေ့မှာ ရပ်နေတယ်။+
၅ သူတို့ကို တစ်ယောက်ယောက်က အန္တရာယ်ပေးချင်ပြီဆိုရင် သူတို့ခံတွင်းထဲကနေ မီးလျှံထွက်လာပြီး ရန်သူတွေကို လောင်ကျွမ်းပစ်တယ်။ သူတို့ကို အန္တရာယ်ပေးချင်သူမှန်သမျှ အဲဒီအတိုင်း သေရလိမ့်မယ်။
၆ သူတို့ပရောဖက်ပြုတဲ့ နေ့ရက်တွေအတွင်းမှာ မိုးမရွာအောင်+ ကောင်းကင်ကို ပိတ်နိုင်တဲ့တန်ခိုး သူတို့ရထားတယ်။+ ရေကိုသွေးဖြစ်အောင် ပြောင်းလဲနိုင်တဲ့ တန်ခိုး၊+ အလိုရှိတဲ့အခါတိုင်း ကမ္ဘာမြေကို ကပ်ဘေးအမျိုးမျိုးနဲ့ ဒဏ်ခတ်နိုင်တဲ့တန်ခိုးကိုလည်း ရထားတယ်။
၇ သူတို့ သက်သေခံလို့ ပြီးသွားတဲ့အခါ တွင်းနက်ကြီးထဲကနေ တက်လာတဲ့ သားရဲက သူတို့ကို တိုက်ခိုက်အောင်မြင်ပြီး သတ်ပစ်လိမ့်မယ်။+
၈ သူတို့ရဲ့အလောင်းတွေဟာ မြို့ကြီးရဲ့လမ်းမပေါ်မှာ ဒီအတိုင်း ရှိနေလိမ့်မယ်။ အဲဒီမြို့ဟာ သူတို့သခင် သစ်တိုင်ပေါ် ကွပ်မျက်ခံရတဲ့မြို့၊ သောဒုံနဲ့ အီဂျစ်ဆိုပြီး တင်စားခေါ်ဝေါ်ရတဲ့မြို့ပဲ။
၉ လူစုတွေ၊ လူမျိုးနွယ်တွေ၊ ဘာသာစကားအမျိုးမျိုးပြောတဲ့ လူတွေက သူတို့ရဲ့ အလောင်းတွေကို ဂူသွင်းခွင့်မပြုဘဲ သုံးရက်ခွဲတိတိ ဒီအတိုင်းပဲ ကြည့်နေကြလိမ့်မယ်။+
၁၀ သူတို့သေသွားတဲ့အတွက် ကမ္ဘာပေါ်နေထိုင်သူတွေက ဝမ်းသာအားရပွဲခံပြီး အပြန်အလှန် လက်ဆောင် ပေးကြလိမ့်မယ်။ အဲဒီပရောဖက်နှစ်ယောက်ဟာ ကမ္ဘာပေါ် နေထိုင်သူတွေကို ညှဉ်းဆဲခဲ့ကြလို့ပဲ။
၁၁ သုံးရက်ခွဲကြာပြီးနောက် ဘုရားသခင်ဆီက အသက်စွမ်းအား ဝင်လာတဲ့အတွက်+ သူတို့ထရပ်ကြတယ်။ မြင်တဲ့သူတွေ အကြီးအကျယ် ထိတ်လန့်သွားတယ်။
၁၂ အဲဒီနောက် ကောင်းကင်ကနေ “ဒီကို တက်လာခဲ့” ဆိုတဲ့ အသံကျယ်ကြီးကို သူတို့ကြားတယ်။ ဒါနဲ့ မိုးတိမ်ခြံရံပြီး ကောင်းကင်ဆီ သူတို့တက်သွားတာကို ရန်သူတွေ မြင်တယ်။
၁၃ အဲဒီအချိန်မှာ မြေငလျင်ကြီး လှုပ်တဲ့အတွက် မြို့ရဲ့ဆယ်ပုံတစ်ပုံ ပျက်စီးပြီး လူ ၇,၀၀၀ သေဆုံးသွားတယ်။ ကျန်တဲ့သူတွေက ထိတ်လန့်ပြီး ကောင်းကင်အုပ်စိုးရှင် ဘုရားသခင်ရဲ့ ဘုန်းတော်ကို ချီးမွမ်းကြတယ်။
၁၄ ဒုတိယအဖြစ်ဆိုး+ လွန်သွားပြီ။ တတိယအဖြစ်ဆိုး အမြန်ဆုံးလာနေတယ်။
၁၅ အဲဒီနောက် သတ္တမကောင်းကင်တမန် ခရာမှုတ်တဲ့အခါ+ “လောကနိုင်ငံဟာ ဘုရားသခင်ရဲ့နိုင်ငံနဲ့+ ခရစ်တော်ရဲ့နိုင်ငံ ဖြစ်ပြီ။+ ဘုရားသခင်က ဘုရင်အဖြစ် အစဉ်ထာဝရ အုပ်စိုးတော့မယ်”+ ဆိုတဲ့ ကျယ်လောင်တဲ့အသံ ကောင်းကင်ကနေ ထွက်ပေါ်လာတယ်။
၁၆ ဘုရားသခင်ရှေ့ ပလ္လင်တွေပေါ်မှာ ထိုင်နေတဲ့အကြီးအကဲ ၂၄ ယောက်က+ ဘုရားသခင်ကို ပျပ်ဝပ်ကိုးကွယ်ပြီး၊
၁၇ “အတိတ်နဲ့ ပစ္စုပ္ပန်မှာ အစဉ်တည်ရှိတဲ့ အနန္တတန်ခိုးရှင် ယေဟောဝါ* ဘုရား၊+ ကိုယ်တော်ဟာ မဟာတန်ခိုးတော်ကို သုံးပြီး ဘုရင်အဖြစ် စတင်အုပ်စိုးပြီဖြစ်လို့+ ကျွန်တော်တို့ ကျေးဇူးတင်ပါတယ်။
၁၈ ဒါပေမဲ့ လောကတိုင်းနိုင်ငံတွေကတော့ အမျက်ထွက်ကြတယ်။ ကိုယ်တော်လည်း အမျက်ထွက်နေတယ်။ သေလွန်သူတွေကို တရားစီရင်ဖို့၊ ကိုယ်တော်ရဲ့ကျွန် ပရောဖက်တွေ၊+ သန့်ရှင်းသူတွေ၊ နာမတော် ကြောက်ရွံ့ရိုသေတဲ့ လူကြီးလူငယ်တွေကို ဆုချဖို့၊+ ကမ္ဘာမြေကို ဖျက်ဆီးတဲ့သူတွေကို ဖျက်ဆီးဖို့ သတ်မှတ်ထားတဲ့အချိန် ရောက်ပါပြီ”+ လို့ ပြောကြတယ်။
၁၉ အဲဒီအခါ ကောင်းကင်မှာရှိတဲ့ ဘုရားသခင်ရဲ့ ဗိမာန်တော် ပွင့်လာပြီး ဗိမာန်တော်ထဲမှာရှိနေတဲ့ ပဋိညာဉ်သေတ္တာကို ကျွန်တော်မြင်ရတယ်။+ အဲဒီအချိန်မှာ မိုးခြိမ်းသံတွေ၊ စကားသံတွေ ထွက်ပေါ်လာတယ်။ လျှပ်စီးလက်ပြီး မြေငလျင်လှုပ်တယ်၊ မိုးသီးမုန်တိုင်းတွေ ကျတယ်။
အောက်ခြေမှတ်ချက်များ
^ နောက်ဆက်တွဲ က၅ ကိုကြည့်။
