ယေရမိ ၁၈:၁-၂၃
၁၈ ယေဟောဝါက ယေရမိကို ပြောတယ်–
၂ “အခု၊ အိုးထိန်းသမားရဲ့ အိမ်ကို ဆင်းသွားပါ။+ အဲဒီမှာ မင်းကို ငါစကားပြောမယ်။”
၃ ဒါနဲ့ ကျွန်တော် ဆင်းသွားတဲ့အခါ အိုးထိန်းသမားက အိုးထိန်းစက်ပေါ်မှာ အိုးလုပ်နေတယ်။
၄ သူလုပ်နေတဲ့ မြေအိုးဟာ သူ့လက်ထဲမှာ ပျက်စီးသွားတဲ့အခါ အဲဒီရွှံ့မြေနဲ့ပဲ နောက်အိုးတစ်လုံးကို သင့်တော်သလို ပြန်လုပ်လိုက်တယ်။
၅ အဲဒီအခါ ယေဟောဝါက ကျွန်တော့်ကို ပြောတယ်–
၆ “ငါယေဟောဝါ ပြောမယ်– ‘အစ္စရေးအမျိုး၊ ဒီအိုးထိန်းသမားလုပ်သလို မင်းတို့ကို ငါမလုပ်နိုင်ဘူး ထင်နေလား။ အစ္စရေးအမျိုး၊ ရွှံ့မြေဟာ အိုးထိန်းသမားလက်ထဲမှာ ရှိသလို မင်းတို့ဟာ ငါ့လက်ထဲမှာ ရှိတယ်။+
၇ လူမျိုးတစ်မျိုး ဒါမှမဟုတ် နိုင်ငံတစ်နိုင်ငံကို နုတ်ပစ်မယ်၊ ဖြိုဖျက်မယ်၊ ဖျက်ဆီးမယ်လို့ ငါပြောလိုက်ပေမဲ့၊+
၈ အဲဒီလူမျိုးက ငါရှုတ်ချတဲ့ ဆိုးညစ်မှုကို စွန့်ပစ်မယ်ဆိုရင် ငါကလည်း သူတို့အပေါ် ကျရောက်စေမယ်လို့ ရည်ရွယ်ထားတဲ့ ဘေးဆိုးနဲ့ပတ်သက်ပြီး စိတ်ကိုပြောင်းလဲမယ်။+
၉ ဒါပေမဲ့ လူမျိုးတစ်မျိုး ဒါမှမဟုတ် နိုင်ငံတစ်နိုင်ငံကို ပြန်တည်ဆောက်မယ်၊ စိုက်ပျိုးမယ်လို့ ငါပြောတဲ့အခါ၊
၁၀ အဲဒီလူမျိုးက ငါ့ရှေ့မှာ မကောင်းတာကို လုပ်ပြီး ငါ့စကားကို မနာခံဘူးဆိုရင် ငါကလည်း သူတို့အတွက် လုပ်ဆောင်ပေးမယ်လို့ ရည်ရွယ်ထားတဲ့ ကောင်းမှုနဲ့ပတ်သက်ပြီး စိတ်ကိုပြောင်းလဲမယ်။’
၁၁ “အခု၊ ယုဒလူတွေနဲ့ ဂျေရုဆလင်မြို့သူမြို့သားတွေကို ပြောလိုက်ပါဦး– ‘မင်းတို့အတွက် ဘေးဆိုးတစ်ခု ငါပြင်ဆင်နေတယ်။ အကြံတစ်ခု ကြံစည်နေတယ်။ မကောင်းတဲ့ လမ်းစဉ်တွေကနေ ပြန်လှည့်လာကြပါတော့။ မင်းတို့ရဲ့လမ်းစဉ်တွေ၊ အကျင့်တွေကို ပြုပြင်ပြောင်းလဲကြ။” ဒါဟာ ငါယေဟောဝါ ပြောတဲ့စကားပဲ။’”+
၁၂ ဒါပေမဲ့ သူတို့က “မျှော်လင့်မနေနဲ့တော့။+ ကိုယ်ထင်ရာပဲ လုပ်တော့မယ်။ ဆိုးညစ်တဲ့ စိတ်အလိုအတိုင်း ခေါင်းမာမာနဲ့ လုပ်မယ်” လို့ပြောကြတယ်။+
၁၃ ဒါကြောင့်ယေဟောဝါပြော တယ်–
“လူမျိုးခြားတွေကို မေးကြည့်လိုက်။
ဒီလိုအဖြစ်မျိုးကို ဘယ်သူကြားဖူးသလဲ။
အစ္စရေးသမီးပျိုက သိပ်ဆိုးဝါးတဲ့အရာကို လုပ်ခဲ့တယ်။+
၁၄ လက်ဘနွန်ရဲ့ဆီးနှင်းတွေ တောင်စောင်းပေါ်မှာ အရည်ပျော်ဖူးလို့လား။
ဒါမှမဟုတ် အဝေးကစီးဆင်းလာတဲ့ အေးမြတဲ့ရေတွေ ခန်းခြောက်ဖူးလို့လား။
၁၅ ငါ့လူတွေကျတော့ ငါ့ကို မေ့သွားပြီ။+
အသုံးမဝင်တဲ့အရာတွေဆီ ယဇ်ပူဇော်တယ်။+
လမ်းဟောင်းတွေပေါ်မှာ တိုက်မိလဲအောင်၊+မဖြောင့်ဖြူး၊ မညီညာတဲ့လမ်းတွေပေါ်မှာ ပြန်လျှောက်အောင် အချင်းချင်း လုပ်ကြတယ်။
၁၆ ဒီနည်းနဲ့ သူတို့ရဲ့ပြည်ကို ကြောက်စရာကောင်းတဲ့ပြည် ဖြစ်အောင်၊+ထာဝရ လှောင်ပြောင်စရာ*ဖြစ်အောင် လုပ်ကြတယ်။+
ဖြတ်သန်းသွားလာသူတိုင်း ကြောက်အားလန့်အားနဲ့ ကြည့်ပြီး ခေါင်းခါကြလိမ့်မယ်။+
၁၇ အရှေ့လေတိုက်လို့ လွင့်သွားသလို သူတို့ကို ရန်သူတွေရှေ့မှာ ငါကွဲလွင့်စေမယ်။
ဘေးဒုက္ခရောက်တဲ့နေ့မှာ မျက်နှာသာမပြဘဲ ကျောခိုင်းထားမယ်။+
၁၈ သူတို့က “လာကြ။ ယေရမိကို မကောင်းကြံကြစို့။+ ပညတ်သွန်သင်မယ့် ပုရောဟိတ်တွေ၊ အကြံဉာဏ်ပေးမယ့် ပညာရှိတွေ၊ ဘုရားရဲ့သတင်းစကားကို အသိပေးမယ့် ပရောဖက်တွေ ရှိမြဲရှိနေဦးမှာပဲ။ ဒီတော့ သူ့ကို စွပ်စွဲပြောဆိုကြစို့။ သူ့စကားတွေကို အရေးမစိုက်ဘဲ နေကြစို့” လို့ပြောကြတယ်။
၁၉ အို ယေဟောဝါ၊ ကျွန်တော့်ကို အာရုံစိုက်လှည့်ပါ။
ရန်သူတွေပြောနေတာကို ကြားလှည့်ပါ။
၂၀ အကောင်းကို အဆိုးနဲ့ တုံ့ပြန်သင့်သလား။
ကျွန်တော့်ကိုသတ်ဖို့ သူတို့ တွင်းတူးထားတယ်။+
သူတို့အတွက် အကောင်းပြောပေးဖို့၊ သူတို့ဆီကနေ အမျက်တော် ရုပ်သိမ်းစေဖို့
ရှေ့တော်မှာ ကျွန်တော် အကြိမ်ကြိမ် ရပ်ခဲ့ဖူးတာကို သတိရပေးပါ။
၂၁ သူတို့ရဲ့သားတွေကို အငတ်ဘေးလက်ထဲ အပ်လိုက်ပါ။
ဓားဘေးလက်ထဲ အပ်လိုက်ပါ။+
မိန်းမတွေ သားသမီး ဆုံးပါးသွားပါစေ။ မုဆိုးမ ဖြစ်သွားပါစေ။+
ယောက်ျားတွေ ရောဂါဆိုးနဲ့ သေပါစေ။
လူငယ်တွေ စစ်ပွဲမှာ ဓားဘေးနဲ့ ကျဆုံးပါစေ။+
၂၂ ဓားပြတွေကို ကိုယ်တော် ရုတ်တရက်စေလွှတ်တဲ့အခါ
သူတို့ရဲ့အိမ်ထဲက ငိုသံတွေကို ကြားရပါစေ။
သူတို့က ကျွန်တော့်ကိုဖမ်းဖို့ တွင်းတူးထားတယ်။
ခြေကိုကျော့မိစေဖို့ ကျော့ကွင်းထောင်ထားတယ်။+
၂၃ အို ယေဟောဝါ၊ ကျွန်တော့်ကိုသတ်ဖို့ သူတို့ကြံစည်နေသမျှကို
ကိုယ်တော် ကောင်းကောင်း သိပါတယ်။+
သူတို့ရဲ့အမှားကို မဖုံးထားပါနဲ့။
သူတို့ရဲ့အပြစ်ကို ရှေ့တော်ကနေ မပယ်ဖျက်လိုက်ပါနဲ့။
အမျက်တော် ထွက်ပြီး အရေးယူတဲ့အချိန်မှာ+
သူတို့ကို တိုက်မိလဲစေပါ။+
အောက်ခြေမှတ်ချက်များ
^ မူရင်း၊ “လေချွန်စရာ။”
