ယောဘ ၃၁:၁-၄၀
၃၁ “ကျုပ်က တခြားမိန်းမကို တပ်မက်တဲ့စိတ်နဲ့ မကြည့်ဘူးလို့+
ကိုယ့်မျက်စိနဲ့ ကတိသစ္စာပြုထားပြီးပြီ။+
၂ အဲဒီလိုသာကြည့်ခဲ့ရင် ကောင်းကင်မှာရှိတဲ့ ဘုရားသခင်ဆီကနေ ဝေစုရပါဦးမလား။
အမြင့်မှာရှိတဲ့ အနန္တတန်ခိုးရှင်ဆီကနေ အမွေရပါဦးမလား။
၃ အမှားကျူးလွန်သူကို ဘေးဒုက္ခတွေ စောင့်ကြိုနေတယ် မဟုတ်လား။
ဒုက္ခရောက်စေသူက ဘေးဆိုးတွေ ကြုံရတယ် မဟုတ်လား။+
၄ ဘုရားက ကျုပ်ရဲ့လမ်းစဉ်တွေကို မြင်တယ် မဟုတ်လား။+
ခြေလှမ်းတိုင်းကို ရေတွက်နေတယ် မဟုတ်လား။
၅ မမှန်တဲ့လမ်းစဉ်မှာ ကျုပ်လျှောက်ဖူးလို့လား။
လှည့်စားဖို့ အပြေးအလွှား သွားဖူးလို့လား။+
၆ ဘုရားသခင်က ကျုပ်ကို မှန်တဲ့ချိန်ခွင်ထဲမှာ ချိန်တွယ်ကြည့်ပါစေ။+
အဲဒါဆိုရင် ကျုပ်ရဲ့သမာဓိကို သိလာပါလိမ့်မယ်။+
၇ ကျုပ်ခြေလှမ်းတွေက လမ်းမှန် ကနေ လွဲသွားခဲ့ရင်၊+
စိတ်နှလုံးက မျက်စိရဲ့အလိုဆန္ဒနောက်ကို လိုက်ပါသွားခဲ့ရင်၊+
လက်တွေ စွန်းထင်းသွားခဲ့ရင်၊
၈ ကျုပ် မျိုးကြဲတာကို သူများ စားသွားပါစေ။+
ကျုပ်စိုက်တဲ့အပင်ဟာ အမြစ်ပါမကျန် နုတ်ပစ်ခံရပါစေ။
၉ မိန်းမတစ်ယောက်ရဲ့ သွေးဆောင်မှုနောက် စိတ်ပါသွားပြီး+
အိမ်နီးချင်းရဲ့တံခါးဝမှာ ချောင်းမြောင်းနေခဲ့မိရင်၊+
၁၀ ကျုပ်ရဲ့ဇနီးက တခြားယောက်ျားအတွက် ကောက်နှံကြိတ်ပေးရပါစေ။
သူ့ကို တခြားယောက်ျားတွေ စော်ကားပါစေ။+
၁၁ ဘာကြောင့်လဲဆိုတော့ ဒါဟာ အရှက်မရှိတဲ့လုပ်ရပ်၊တရားသူကြီးတွေပေးတဲ့ ပြစ်ဒဏ်ကို ခံထိုက်တဲ့လုပ်ရပ်ဖြစ်လို့ပဲ။+
၁၂ ကျုပ်ရဲ့ပစ္စည်းဥစ္စာရှိသမျှကို
အစအနမကျန်အောင် ဝါးမျိုဖျက်ဆီးပစ်မယ့် မီးပဲ။+
၁၃ ကျွန်တွေက ကျုပ်ကို မကျေမနပ်ဖြစ်ပြီး လာပြောတဲ့အခါ
ကျုပ် တရားသဖြင့် မစီရင်ပေးခဲ့ဘူးဆိုရင်၊
၁၄ ဘုရားသခင်နဲ့ ရင်ဆိုင်ရတဲ့အခါ ဘယ်လိုလုပ်မလဲ။
ဖြေရှင်းချက်တောင်းတဲ့အခါ ဘယ်လိုပြောရမလဲ။+
၁၅ အမေ့ဝမ်းထဲမှာ ကျုပ်ကိုဖန်ဆင်းတဲ့အရှင်ဟာ သူတို့ကိုလည်း ဖန်ဆင်းခဲ့တယ် မဟုတ်လား။+
ကျုပ်တို့ကို မမွေးခင်ကတည်းက ပုံသွင်းတာလည်း အဲဒီအရှင်ပဲ မဟုတ်လား။+
၁၆ ကျုပ်က ဆင်းရဲသားကို လိုချင်တာမပေးခဲ့ရင်၊+
မုဆိုးမကို မျက်စိမျက်နှာ ညှိုးငယ်သွားအောင် လုပ်ခဲ့ရင်၊+
၁၇ ကိုယ်စားမယ့်အစာကို မိဘမဲ့တွေနဲ့ မဝေမျှဘဲ
တစ်ယောက်တည်း စားပစ်ခဲ့ရင်၊+
၁၈ (ကျုပ်ဟာ ငယ်ငယ်ကတည်းက မိဘမဲ့ကလေးကို ဖခင်သဖွယ် ပြုစုစောင့်ရှောက်ခဲ့တယ်။
ကလေးဘဝကတည်းက မုဆိုးမကို လမ်းပြပေးခဲ့တယ်။)
၁၉ ဝတ်စရာမရှိလို့ အေးခဲပြီး သေရတော့မယ့်သူ၊ခြုံစရာမရှိတဲ့ ဆင်းရဲသားကို တွေ့တဲ့အခါ၊+
၂၀ သိုးမွေးထည်နဲ့ နွေးသွားအောင် မလုပ်ပေးမိလို့
ကျုပ်ကို သူဆုမွန်ကောင်း မတောင်းပေးခဲ့ရင်၊+
၂၁ မြို့တံခါးနားမှာ ကျုပ်ရဲ့အကူအညီ လိုနေတဲ့ မိဘမဲ့ကလေးကို+
ခြိမ်းခြောက်တဲ့အနေနဲ့ လက်သီးဆုပ်ပြခဲ့ရင်၊+
၂၂ ကျုပ်လက်မောင်းဟာ ပခုံးကနေ ပြုတ်ထွက်ပါစေ။
တံတောင်ဆစ်ကနေကျိုးပါစေ။
၂၃ ဘုရားသခင်ဆီက ဘေးဒုက္ခကို ကျုပ်ကြောက်တယ်။
ဂုဏ်အရှိန်အဝါကြောင့် ရှေ့တော်မှာ ကျုပ် မရပ်တည်နိုင်ဘူး။
၂၄ ရွှေကို ကျုပ်အားကိုးခဲ့ရင်၊ရွှေစင်ကို ‘အာမခံချက်ပဲ’ လို့ပြောခဲ့ရင်၊+
၂၅ စုဆောင်းထားတဲ့ ပစ္စည်းဥစ္စာတွေ များလာပြီး+
စည်းစိမ်ချမ်းသာကို သာယာ ခဲ့ရင်၊+
၂၆ တောက်ပတဲ့ နေမင်းကိုဖြစ်စေ၊ခံ့ခံ့ညားညား ရွေ့လျားနေတဲ့ လမင်းကိုဖြစ်စေ တွေ့တဲ့အခါ၊+
၂၇ စိတ်နှလုံး လမ်းလွဲသွားပြီး
အဲဒါတွေကို ဝတ်ပြုတဲ့အနေနဲ့ ကိုယ့်လက်ကို နမ်းခဲ့ရင်၊+
၂၈ ကောင်းကင်မှာရှိတဲ့ စစ်မှန်တဲ့ဘုရားသခင်ကို ငြင်းပယ်ရာရောက်တယ်။
ဒါဟာ တရားသူကြီးတွေပေးတဲ့ ပြစ်ဒဏ်ကို ခံထိုက်တဲ့အမှားပဲ။
၂၉ ရန်သူပျက်စီးတဲ့အခါ ကျုပ်ဝမ်းသာဖူးလို့လား။+
သူဒုက္ခရောက်တဲ့အခါ အားရဖူးလို့လား။
၃၀ သူ့အသက်ကို ရင်းပြီး သစ္စာဆိုခိုင်းတဲ့ အပြစ်မျိုး
ကျုပ် တစ်ခါမှ မလုပ်ခဲ့ဘူး။+
၃၁ ‘သူကျွေးတဲ့အခါ ဝဝလင်လင် မစားရတဲ့သူ ရှိလို့လား’ ဆိုပြီး
ကျုပ်တဲမှာနေတဲ့ လူတွေ ပြောကြတယ်။+
၃၂ ဘယ်သူစိမ်းမှ အပြင်မှာ ညမအိပ်ခဲ့ရဘူး။+
ခရီးသွားဧည့်သည်တွေအတွက် တံခါးကို ဖွင့်ထားတယ်။
၃၃ ကျုပ်က တခြားလူတွေလို ကိုယ့်အပြစ်ကို ဖုံးကွယ်ဖူးသလား။+
ကိုယ့်အမှားကို လူမမြင်အောင်* ဝှက်ထားဖူးသလား။
၃၄ အများတကာ ဘယ်လိုတုံ့ပြန်မလဲဆိုပြီး တွေးပူခဲ့ဖူးလို့လား။
တခြားမိသားစုတွေ အထင်သေးမှာ ကြောက်လို့
နှုတ်ဆိတ်နေပြီး အိမ်တွင်းပုန်းခဲ့ဖူးလို့လား။
၃၅ ကျုပ်ပြောတာကို နားထောင်ပေးမယ့်သူရှိရင် သိပ်ကောင်းမှာပဲ။+
ပြောခဲ့တာတွေအတွက် ကျုပ်နာမည်ကို လက်မှတ်ထိုး ပါ့မယ်။
အနန္တတန်ခိုးရှင် ပြန်ဖြေပါစေ။+
စွပ်စွဲသူကလည်း စွဲချက်တွေကို ရေးမှတ်ထားရင် သိပ်ကောင်းမှာပဲ။
၃၆ အဲဒီစွဲချက်တွေကို ကျုပ်ထမ်းထားပြီး
ခေါင်းပေါ်မှာ သရဖူလို ဆောင်းထားမယ်။
၃၇ ကျုပ်ရဲ့ခြေလှမ်းတိုင်းအတွက် ဘုရားကို အစီရင်ခံမယ်။
မင်းညီမင်းသားတစ်ပါးလို ယုံကြည်မှုအပြည့်နဲ့ ဘုရားအနား သွားမယ်။
၃၈ မြေက ကျုပ်ကို အပြစ်တင်အော်ဟစ်ပြီး
ထယ်ကြောင်းတွေက ငိုကြွေးခဲ့ရင်၊
၃၉ မြေထွက်သီးနှံတွေကို ငွေမပေးဘဲ စားသုံးခဲ့ရင်၊+
မြေပိုင်ရှင်တွေကို စိတ်ဆင်းရဲအောင်လုပ်ခဲ့ရင်၊+
၄၀ ဂျုံပင်အစား ဆူးပင်၊မုယောပင်အစား နံစော်တဲ့ပေါင်းပင်တွေ ပေါက်ပါစေ။”
ယောဘရဲ့စကား ပြီးဆုံးပြီ။
အောက်ခြေမှတ်ချက်များ
^ မူရင်း၊ “အင်္ကျီရင်ဖုံးထဲမှာ။”