လုကာ ၄:၁-၄၄

စာတန်းထိုးပါ စာတန်းထိုး ပိတ်ပါ

  • ယေရှု​ကို မာရ်​နတ်​သွေး​ဆောင် (၁-၁၃)

  • ဂါ​လိ​လဲ​နယ်​မှာ ယေရှု စတင်​ဟော​ပြော (၁၄၊ ၁၅)

  • နာ​ဇ​ရက်​မြို့​သား​တွေ ယေရှု​ကို လက်မခံ (၁၆-၃၀)

  • က​ပေရ​နောင်​မြို့ တ​ရား​ဇ​ရပ်​မှာ (၃၁-၃၇)

  • ရှိ​မုန်​ရဲ့​ယောက္ခ​မနဲ့ တ​ခြား​လူ​တွေ​ကို ကုသပေး (၃၈-၄၁)

  • လူ​သူ​ကင်း​မဲ့​တဲ့​နေ​ရာ​မှာ ယေရှု​ကို တွေ့​အောင် ရှာကြ (၄၂-၄၄)

၄  သန့်​ရှင်း​သော  စွမ်းအား​တော်​နဲ့​ပြည့်​နေ​တဲ့ ယေရှု​က ဂျော်​ဒန်​မြစ်​က​နေ ထွက်​သွား​တယ်။ တော​ထဲ​မှာ စွမ်းအား​တော်​က သူ့​ကို လမ်း​ညွှန်​တယ်။+ ၂  တော​ထဲ​မှာ ရက်​ပေါင်း ၄၀ နေတယ်။ အဲဒီ​အတော​အတွင်း  ဘာ​မှ​မစား​ဘူး။ ရက် ၄၀ စေ့​တော့ သူ​ဆာ​လောင်​နေ​တယ်။ အဲဒီ​အခါ မာရ်​နတ်​က သူ့​ကို သွေး​ဆောင်​တယ်။+ ၃  မာရ်​နတ်​က “မင်း ဘုရား​သခင်​ရဲ့ သား​မှန်​ရင် ဒီ​ကျောက်​ခဲ​တွေ​ကို  မုန့်​ဖြစ်​စေ​လို့ အမိန့်​ပေး​လိုက်​လေ”  လို့​ပြော​တော့၊ ၄  ယေရှု​က ‘လူ​ဟာ အစား​အစာ​နဲ့​ပဲ အသက်​ရှင်​ရ​မှာ မဟုတ်​ဘူး’+ လို့ ကျမ်း​စာ​မှာ ရေး​ထား​တယ်” ဆို​ပြီး ပြန်​ပြော​တယ်။ ၅  ဒါ​နဲ့ မာရ်​နတ်​က ယေရှု​ကို တောင်​ပေါ် ခေါ်​သွား​တယ်။ ကမ္ဘာ့​တိုင်း​နိုင်​ငံ​တွေ​ကို တစ်​ခ​ဏ​လောက် ပြပြီး​နောက်၊+ ၆  “ဒီ​တိုင်း​နိုင်​ငံ​တွေ​ကို အုပ်​စိုး​ပိုင်​ခွင့်​ရော ဘုန်း​စည်း​စိမ်​အားလုံး​ကို​ပါ မင်း​ကို ငါ​ပေး​မယ်။ ဒါ​တွေ​ကို ငါ​ပိုင်​တဲ့​အတွက်+ ပေး​ချင်​တဲ့​သူ​ကို ပေး​လို့ရ​တယ်။ ၇  ငါ့​ကို တစ်​ကြိမ်​ပဲ ရှိ​ခိုး​ဦး​ချ​ရင် ဒါ​တွေ​အားလုံး  မင်း​ကိုပေး​မယ်”  လို့​ပြော​တယ်။ ၈  ယေရှု​က “‘ယေဟောဝါ* ဘုရား​ကို​ ကိုးကွယ်​ရ​မယ်။ ကိုယ်​တော်​တစ်ပါး​တည်း​ကို​ပဲ ဝတ်​ပြု​ရ​မယ်’+ လို့ ကျမ်း​စာ​မှာ ရေး​ထား​တယ်” ဆို​ပြီး​ပြန်​ပြော​တယ်။ ၉  အဲဒီ​နောက် မာရ်​နတ်​က ယေရှု​ကို ဂျေရု​ဆ​လင်​မြို့​ဆီ ခေါ်​သွား​တယ်။ ဗိမာန်​တော်​အမိုး​ပေါ်​မှာ ရပ်​ခိုင်း​ပြီး “မင်း ဘုရား​သခင်​ရဲ့​သား​မှန်​ရင် ဒီ​က​နေ ခုန်​ချ​လိုက်​ပါ​လား။+ ၁၀  ‘ဘုရား​က မင်း​ကို ကာ​ကွယ်​ဖို့ ကောင်း​ကင်​တ​မန်​တွေ​ကို မိန့်မှာ​ထား​လိမ့်​မယ်။’ ၁၁  ‘သူတို့ လက်​နဲ့​ပင့်​ထား​မှာ​ဖြစ်​လို့ မင်းက​ ကျောက်​တုံး​နဲ့​ ထိ​မိ​ခိုက်​မိ​မှာ မဟုတ်​ဘူး’+ လို့ ကျမ်း​စာ​မှာ ရေး​ထား​တာ​ပဲ” ဆို​ပြီး ပြော​တယ်။ ၁၂  ယေရှု​က “‘ယေဟောဝါ* ဘုရား​ကို အကဲ​မစမ်း​ပါ​နဲ့’+ လို့ ကျမ်း​စာ​မှာ ရေး​ထား​တယ်”  ဆို​ပြီး  ပြန်​ပြော​တယ်။ ၁၃  မာရ်​နတ်​က ယေရှု​ကို အမျိုး​မျိုး​သွေး​ဆောင်​ပြီး​တဲ့​နောက် ထွက်​သွား​ပြီး အခွင့်​အခါ​ကောင်း​ကို စောင့်​နေ​တယ်။+ ၁၄  ယေရှု​က စွမ်းအား​တော်​တန်ခိုး​နဲ့ ပြည့်​ပြီး ဂါ​လိ​လဲ​ပြည်​ကို ပြန်​လာ​တယ်။+ အဲဒီ​ဒေ​သတစ်​လျှောက်​လုံး​မှာ သူ့​ရဲ့​ကောင်း​သတင်း ပျံ့​နှံ့​သွား​တယ်။ ၁၅  တ​ရား​ဇ​ရပ်တွေ​မှာ စ​ပြီး​သွန်သင်​ပေး​တဲ့​အခါ သူ့​ကို လူ​အားလုံး ချီး​မွမ်း​ကြ​တယ်။ ၁၆  ယေရှု​က  ကြီး​ပြင်း​ရာ  နာ​ဇ​ရက်​မြို့​ကို+  ရောက်​တော့ ထုံး​စံ​အ​တိုင်း​ ဥ​ပုသ်​နေ့​မှာ  တ​ရား​ဇ​ရပ်​ထဲ  ဝင်​တယ်။+ ကျမ်း​စာ​ဖတ်​ဖို့  ထ​ရပ်​လိုက်​တဲ့​အခါ၊ ၁၇  ပရော​ဖက် ဟေရှာယ​ရေး​တဲ့ ကျမ်း​လိပ်​ကို လှမ်း​ပေး​ကြ​တယ်။ ဒါ​နဲ့ ယေရှု​က ကျမ်း​လိပ်​ကို​ဖွင့်​ပြီး ရှာ​လိုက်​တဲ့အခါ ဒီ​ကျမ်း​ချက်​ကို တွေ့​တယ်– ၁၈  “ယေဟောဝါ​ရဲ့* စွမ်းအား​တော်​က ငါ့​အပေါ်​မှာ သက်​ရောက်​နေ​တယ်။ နွမ်း​ပါး​သူ​တွေ​ကို သတင်း​ကောင်း ကြေ​ညာ​ဖို့ ငါ့​ကို ဘိ​သိက်​ပေး​ထား​တယ်။ သုံ့​ပန်း​တွေ​ကို လွတ်​လပ်​ခွင့်​ရ​တော့​မယ့်​အကြောင်း၊ မျက်​မမြင်​တွေ​ကို  ပြန်​မြင်​တော့​မယ့်​အကြောင်း၊ ဖိ​နှိပ်​ခံ​ရ​သူ​တွေ​ကို လွတ်​မြောက်​တော့​မယ့်​အကြောင်း ကြေ​ညာ​ဖို့ ငါ့​ကို ဘုရား​စေ​လွှတ်​တယ်။+ ၁၉  ယေ​ဟောဝါ* မျက်​နှာ​သာ​ပေး​တဲ့​နှစ်​အကြောင်း ဟော​ပြော​ဖို့​လည်း ပါ​တာ​ပေါ့။”+ ၂၀  ယေရှု​က ကျမ်း​လိပ်​ကို လိပ်၊ ဇ​ရပ်​မှူး​ကို ပြန်​ပေး​ပြီး ထိုင်​လိုက်​တဲ့​အခါ တ​ရား​ဇ​ရပ်​မှာ​ရှိ​သူ​အားလုံး  သူ့​ကို  အာ​ရုံ​စိုက်  ကြည့်​နေ​ကြ​တယ်။ ၂၁  အဲဒီ​အခါ​ ယေရှုက​ “ခင်ဗျား​တို့ အခု​ကြား​ရ​တဲ့ ကျမ်း​ချက်​ဟာ ဒီ​နေ့ ပြည့်​စုံ​ပြီ”+ လို့​ပြော​လိုက်​တယ်။ ၂၂  လူ​အားလုံး​က ယေရှု​ကို ချီး​မွမ်း​ကြ​တယ်။ သူ​ပြော​တဲ့ ယဉ်​ကျေး​သိမ်​မွေ့​တဲ့ စကား​တွေ​ကြောင့်+ အံ့​သြပြီး “ဒီ​လူ​ဟာ ယော​သပ်​ရဲ့​သား မဟုတ်​လား”+ လို့​ပြော​ကြ​တယ်။ ၂၃  အဲဒီ​အခါ ယေရှု​က “ခင်​ဗျား​တို့​က ‘သမား​တော်​ကြီး၊ ကိုယ်​တိုင်​ကျန်း​မာ​အောင် အရင်​လုပ်​ပါ​ဦး’ ဆို​တဲ့ ဆို​ရိုး​စကား​ကို ကိုး​ကား​ပြီး ကျွန်​တော့်​ကို​လည်း ‘က​ပေရ​နောင်​မြို့​မှာ+ ခင်​ဗျား​လုပ်​ပြခဲ့​တာ​တွေ​ကို ကျုပ်​တို့​ကြား​ထား​တယ်။ အခု ကိုယ့်​နေ​ရင်း​မြို့​မှာ အဲဒီ​အတိုင်း လုပ်​ပြပါ​ဦး” ဆို​ပြီး ပြော​ချင်​နေ​မှာ​ပဲ။ ၂၄  ကျွန်​တော် မှန်​တာ​ကို​ပြော​မယ်။ ဘယ်​ပရော​ဖက်​မှ ကိုယ့်​နေရင်း​မြို့​မှာ တန်​ဖိုး​ထား​မခံ​ရ​ဘူး။+ ၂၅  ကျွန်​တော်  မှန်​တာ​ကို​ပြော​မယ်။ တ​ကယ်​တော့ ဧလိယ​လက်​ထက်​မှာ သုံး​နှစ်​နဲ့ ခြောက်​လ​ပတ်​လုံး မိုး​ခေါင်​ပြီး တစ်​ပြည်​လုံး အငတ်​ဘေး​ဆိုက်​တုန်း​က+ အစ္စရေး​ပြည်​မှာ မုဆိုး​မ​တွေ အများ​ကြီး​ရှိ​တာ​ပဲ။ ၂၆  ဒါ​ပေမဲ့ ဘုရား​က ဧလိယ​ကို အဲဒီ​မု​ဆိုး​မတွေ​ဆီ မစေ​လွှတ်​ဘဲ ဆိုင်​ဒုန်​ပြည်၊ ဇ​ရတ္တ​မြို့​သူ မု​ဆိုး​မဆီ​ကို​ပဲ စေ​လွှတ်​ခဲ့​တယ်။+ ၂၇  ပရော​ဖက်​ဧလိရှဲ လက်​ထက်​တုန်း​က​လည်း အစ္စရေး​ပြည်​မှာ အနာ​ကြီး​ရော​ဂါသ​ည်​တွေ အများ​ကြီး​ရှိ​တာ​ပဲ။ ဒါ​ပေမဲ့ ဆီး​ရီး​ယား​လူ နေမန်​က​လွဲ​လို့ ဘယ်​သူ့​ကို​မှ မကု​သပေး​ခဲ့​ဘူး”+ လို့​ပြော​လိုက်​တယ်။ ၂၈  အဲဒီ​စကား​ကို တ​ရား​ဇ​ရပ်​မှာ​ရှိ​သူ​တွေ ကြား​တဲ့​အခါ အကြီး​အကျယ် ဒေါသ​ထွက်​ပြီး၊+ ၂၉  ယေရှု​ကို မြို့​ပြင် ဆွဲ​ထုတ်​သွား​ကြ​တယ်။ ပြီး​တော့ မြို့​တည်​ရာ တောင်​ထိပ်​စွန်း​က​နေ ဇောက်​ထိုး​ကျ​သွား​အောင် တွန်း​ချ​ဖို့ လုပ်​တဲ့​အခါ၊ ၃၀  ယေရှု​က လူ​အုပ်​ကြား​ထဲ​က​နေ  ရှောင်​ထွက်​သွားတယ်။+ ၃၁  အဲဒီ​နောက် ယေရှု​က ဂါ​လိ​လဲ​ပြည်၊  က​ပေရ​နောင်​မြို့​ကို  ဆင်း​သွား​ပြီး  ဥ​ပုသ်​နေ့​မှာ  သွန်သင်​တယ်။+ ၃၂  အခွင့်​အာ​ဏာ​ရှိ​ရှိ ဟော​ပြော​တဲ့​အတွက် လူ​တွေ​က သူ့​ရဲ့​သွန်သင်​ပုံ​ကို အံ့သြ​ကြ​တယ်။+ ၃၃  အဲဒီ​တ​ရား​ဇရပ်​မှာ နတ်​ဆိုး​ပူး​နေ​သူ​တစ်​ယောက် ရှိ​တယ်။ သူ​က အသံ​ကျယ်​ကျယ်​နဲ့၊+ ၃၄  “နာ​ဇ​ရက်​မြို့​သား+  ယေရှု၊ ခင်ဗျား​က ကျုပ်​တို့​နဲ့ ဘာ​ဆိုင်​လို့​တုံး။ ကျုပ်​တို့​ကို ဖျက်​ဆီး​ဖို့ လာ​တာ​လား။ ခင်​ဗျား​ဟာ ဘုရား​သခင်​ဆီ​က​လာ​တဲ့ သန့်​ရှင်း​သူ​ပဲ​ဆို​တာ ကျုပ်​သိ​တာ​ပေါ့” လို့အော်​ပြော​တယ်။+ ၃၅  ယေရှု​က “တိတ်​စမ်း၊ သူ့​အထဲ​က​နေ ထွက်​သွား” ဆို​ပြီး ဆုံးမ​လိုက်​တဲ့​အခါ နတ်​ဆိုး​က အဲဒီ​လူ​ကို လူ​အများ​ရှေ့​မှာ လှဲ​ချ​ပစ်​ပြီး ဘေး​အန္တရာယ်​မပြု​ဘဲ ထွက်​သွား​တယ်။ ၃၆  အဲဒီ​အခါ လူ​တွေ အံ့​သြပြီး “သူ့​စကား​တွေ​ဟာ အစွမ်း​ထက်​လှ​ချေ​လား။ တန်ခိုး​အာ​ဏာ​နဲ့ အမိန့်​ပေး​လိုက်​တာ နတ်​ဆိုး​တွေ ထွက်​ရ​တော့​တာ​ပဲ” လို့ အချင်း​ချင်း ပြော​ကြ​တယ်။ ၃၇  ဒါ​ကြောင့် ယေရှု​ရဲ့​သတင်း​ဟာ ပတ်​ဝန်း​ကျင်​အရပ်ရပ် ပျံ့​နှံ့​သွား​တော့​တယ်။ ၃၈  ယေရှု​က  တ​ရား​ဇ​ရပ်​က​နေ ထွက်​ပြီး ရှိ​မုန်​အိမ်​ကို သွား​တယ်။ ရှိ​မုန်​ရဲ့​ယောက္ခ​မ  အဖျား​ကြီး​နေ​တဲ့​အတွက် ကုသ​ပေး​ဖို့  အသနား​ခံ​ကြ​တယ်။+ ၃၉  ဒါ​နဲ့ လူ​နာ​အနား​ကို သွား​ပြီး ကုသ​ပေး​လိုက်​တဲ့​အခါ အဖျား​ပျောက်​သွား​တယ်။ ရှိ​မုန်​ရဲ့ ယောက္ခ​မက ချက်​ချင်း​ပဲ ထ​ပြီး သူတို့​ကို ဧည့်​ဝတ်​ပြု​တော့​တယ်။ ၄၀  နေ​ဝင်​ချိန်​ရောက်​တဲ့​အခါ ရောဂါသ​ည်​အမျိုး​မျိုး​ကို ခေါ်​လာ​ကြ​တဲ့​အ​တွက်​ ယေရှု​က တစ်​ယောက်​စီ​အပေါ် လက်​ကို​တင်​ပြီး  ကု​သပေး​တယ်။+ ၄၁  နတ်​ဆိုး​တွေ​က​လည်း “ခင်​ဗျား​ဟာ ဘုရား​သခင်​ရဲ့​သား​ပဲ” လို့အော်​ဟစ်​ပြီး+ သူတို့​ဝင်​ပူး​နေ​တဲ့ လူ​တွေ​ထဲ​က​နေ ထွက်​လာ​တယ်။ ဒါ​ပေမဲ့ ယေရှု​ဟာ ခ​ရစ်​တော်​ဖြစ်​မှန်း နတ်​ဆိုး​တွေ သိ​တဲ့​အတွက်+ သူတို့​ကို စကား​တစ်​ခွန်း​မှ မပြော​ဖို့ ဆုံးမ​တယ်။+ ၄၂  မနက်​မိုး​လင်း​တော့ ယေရှု​က လူ​သူ​ကင်း​ဝေး​တဲ့​နေ​ရာ​ဆီ  ထွက်​သွား​တယ်။+ လူ​တွေ​က​လည်း မတွေ့​တွေ့​အောင်​ရှာ​ပြီး သူ​ရှိ​တဲ့​နေ​ရာ​ကို ရောက်​လာ​ကြ​တယ်။ သူတို့​ဆီ​က​နေ  ထွက် မသွား​ဖို့ တောင်း​ပန်​ကြ​တယ်။ ၄၃  ဒါ​ပေမဲ့ ယေရှု​က “ဘုရား​သခင့်​နိုင်​ငံ​တော် သတင်း​ကောင်း​ကို တ​ခြား​မြို့​ရွာ​တွေ​မှာ​လည်း ဟော​ရဦး​မယ်။ အဲဒီ​အတွက် ကျွန်​တော့်​ကို စေ​လွှတ်​လိုက်​တာ” လို့​ပြော​ပြီး၊+ ၄၄  ယုဒ​ပြည် တ​ရား​ဇ​ရပ်တွေ​မှာ သွား​ဟော​ပြော​တယ်။

အောက်ခြေမှတ်ချက်များ

ကမ္ဘာသစ်ဘာသာပြန်ကျမ်း
လုကာ ၄
မြန်မာ လက်သင်္ကေတပြဘာသာစကား
ကျမ်း​စောင်​အ​မည်​များ
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt ၄၀