ဝတ်ပြုရာ ၂၂:၁-၃၃
၂၂ ယေဟောဝါက မောရှေကို မိန့်မှာတယ်–
၂ “ငါ့အတွက် အစ္စရေးတွေ ဆက်ကပ်ပေးလှူတဲ့ သန့်ရှင်းမြင့်မြတ်ရာတွေကို+ ဆက်သပေးတဲ့အခါ သတိထားဖို့၊ သန့်ရှင်းမြင့်မြတ်တဲ့ ငါ့နာမည်ကို ကဲ့ရဲ့စရာမဖြစ်စေဖို့+ အာရုန်နဲ့ သူ့သားတွေကို ပြောပါ။ ငါဟာ ယေဟောဝါပဲ။
၃ သူတို့ကို ပြောလိုက်ပါ– ‘မင်းတို့ရဲ့ သားမြေးတွေထဲက မသန့်မရှင်းဖြစ်နေသူ တစ်ယောက်ဟာ ယေဟောဝါအတွက် အစ္စရေးတွေ ဆက်ကပ်ထားတဲ့ သန့်ရှင်းမြင့်မြတ်ရာတွေအနား လာမိရင် သူ့ကို ငါ့ရှေ့ကနေ ပယ်ရှင်းရမယ်။+ ငါဟာ ယေဟောဝါပဲ။
၄ အာရုန်ရဲ့သားမြေးတွေထဲက အနာကြီးရောဂါဖြစ်နေသူ၊+ အရိအရွဲထွက်နေသူဟာ+ သန့်ရှင်းတဲ့အခြေအနေ မရောက်မချင်း+ သန့်ရှင်းမြင့်မြတ်ရာတွေကို မစားရဘူး။ သေလွန်သူကြောင့် မသန့်မရှင်းဖြစ်နေသူကို ထိမိကိုင်မိသူ၊+ သုက်ရည်ထွက်သူ၊+
၅ မသန့်ရှင်းတဲ့ အုံဖွဲ့နေတတ်တဲ့အကောင်ကို၊+ အကြောင်းတစ်ခုခုကြောင့် မသန့်မရှင်းဖြစ်နေသူကို ထိမိကိုင်မိသူလည်း+ မစားရဘူး။
၆ အဲဒါတွေကို ထိမိကိုင်မိတဲ့လူဟာ ညဦးပိုင်းအထိ မသန့်ရှင်းဘူး။ သန့်ရှင်းမြင့်မြတ်ရာတွေကို မစားရဘူး။ ရေချိုးရမယ်။+
၇ နေဝင်ချိန်ရောက်ရင်တော့ သန့်ရှင်းသွားပြီဖြစ်လို့ သူ့စားစရာဖြစ်တဲ့ သန့်ရှင်းမြင့်မြတ်ရာတွေကို စားနိုင်တယ်။+
၈ တိရစ္ဆာန်အသေကောင်၊ သားရဲကိုက်သတ်ထားတဲ့ အကောင်ကိုလည်း မစားရဘူး။ စားရင် မသန့်မရှင်းဖြစ်သွားလိမ့်မယ်။+ ငါဟာ ယေဟောဝါပဲ။
၉ “‘ပုရောဟိတ်တွေက ငါ့ရဲ့တောင်းဆိုချက်တွေကို လိုက်နာရမယ်။ မလိုက်နာဘူးဆိုရင် သန့်ရှင်းမြင့်မြတ်ရာတွေကို ညစ်ညူးစေတဲ့အတွက် အပြစ်သင့်ပြီး သေရလိမ့်မယ်။ ငါဟာ သူတို့ကို သန့်ရှင်းသူတွေအဖြစ် သီးခြားခွဲထားတဲ့အရှင် ယေဟောဝါပဲ။
၁၀ “‘သန့်ရှင်းမြင့်မြတ်ရာကို အခွင့်မရှိသူ* မစားရဘူး။+ ပုရောဟိတ်ရဲ့ တိုင်းတစ်ပါးသား ဧည့်သည်ဖြစ်စေ၊ စာရင်းငှားဖြစ်စေ သန့်ရှင်းမြင့်မြတ်ရာကို မစားရဘူး။
၁၁ ပုရောဟိတ် ဝယ်ထားတဲ့သူ၊ သူ့အိမ်မှာမွေးလာတဲ့ ကျွန်တွေကတော့ စားနိုင်တယ်။+
၁၂ ပုရောဟိတ်ရဲ့သမီးက ပုရောဟိတ်မဟုတ်သူနဲ့ လက်ထပ်ရင် သန့်ရှင်းမြင့်မြတ်တဲ့ အလှူတွေကို မစားရဘူး။
၁၃ ဒါပေမဲ့ သူက သားသမီးမရှိဘဲ မုဆိုးမဖြစ်သွားလို့ ဒါမှမဟုတ် ကွာရှင်းလိုက်လို့ ဖခင်ရဲ့အိမ်ကိုပြန်လာပြီး အရင်လိုနေထိုင်တယ်ဆိုရင် ဖခင်ရတဲ့ အစားအစာကို စားနိုင်တယ်။+ အခွင့်မရှိသူ* ကတော့ မစားရဘူး။
၁၄ “‘လူတစ်ယောက်ဟာ သန့်ရှင်းမြင့်မြတ်ရာကို မတော်တဆစားမိရင် ပုရောဟိတ်ကို ပြန်လျော်ပေးရမယ်။ တန်ဖိုးရဲ့ ငါးပုံတစ်ပုံကိုလည်း ထပ်ပေးရမယ်။+
၁၅ ပုရောဟိတ်တွေကလည်း ယေဟောဝါအတွက် အစ္စရေးလူမျိုး ပေးလှူထားတဲ့ သန့်ရှင်းမြင့်မြတ်ရာတွေကို ညစ်ညူးအောင်မလုပ်ရဘူး။+
၁၆ အဲဒါတွေကို လူတွေကိုစားခွင့်ပေးပြီး ပြစ်ဒဏ်သင့်စေတာမျိုး မဖြစ်စေရဘူး။ ငါယေဟောဝါဟာ သူတို့ကို သန့်ရှင်းတဲ့လူမျိုးအဖြစ် သီးခြားခွဲထားတဲ့ အရှင်ပဲ။’”
၁၇ ယေဟောဝါက မောရှေကို ဆက်ပြောတယ်–
၁၈ “အာရုန်နဲ့ သူ့သားတွေ၊ အစ္စရေးတွေကို ပြောပါ။ ‘အစ္စရေးလူမျိုးဖြစ်စေ၊ လာအခြေချတဲ့ တိုင်းတစ်ပါးသားဖြစ်စေ တစ်ယောက်ယောက်က မီးရှို့ရာအလှူကို+ သစ္စာကတိအလျောက်၊ စေတနာအလျောက် ယေဟောဝါဆီ ဆက်သမယ်ဆိုရင်၊+
၁၉ အနာအဆာမရှိတဲ့+ နွားထီး၊ သိုးထီးလေး ဒါမှမဟုတ် ဆိတ်ထီးဖြစ်မှပဲ နှစ်သက်လက်ခံမှု ရလိမ့်မယ်။
၂၀ အနာအဆာရှိတဲ့အကောင်ကို မဆက်သရဘူး။+ ဆက်သရင် မင်းတို့ကို နှစ်သက်လက်ခံမှာ မဟုတ်ဘူး။
၂၁ “‘လူတစ်ယောက်က မိတ်သဟာယ ပူဇော်သက္ကာကို+ သစ္စာကတိအလျောက် ဒါမှမဟုတ် စေတနာအလျောက် ယေဟောဝါဆီ ဆက်သမယ်ဆိုရင် အနာအဆာမရှိတဲ့ အကောင်ဖြစ်မှပဲ နှစ်သက်လက်ခံမှုရလိမ့်မယ်။ အဲဒီတိရစ္ဆာန်မှာ အနာအဆာ လုံးဝမရှိရဘူး။
၂၂ မျက်စိကန်း၊ ခြေကျိုး၊ ထိခိုက်ရှနာရှိနေတာ၊ ကြွက်နို့၊ ဝဲနာ၊ ပွေးပေါက်နေတာ မဖြစ်ရဘူး။ အဲဒါမျိုးကို ယေဟောဝါဆီ မဆက်သရဘူး။ အဲဒီလိုအလှူမျိုးကို ပူဇော်ရာပလ္လင်ပေါ် တင်ပြီး ယေဟောဝါဆီ မဆက်သရဘူး။
၂၃ ခြေလက်တစ်ဖက် ရှည်လွန်းတိုလွန်းတဲ့ သိုးနွားတွေကို စေတနာအလျောက်ပေးတဲ့ အလှူအဖြစ် ဆက်သနိုင်ပေမဲ့ သစ္စာကတိအလျောက်ပေးတဲ့ အလှူအဖြစ် ဆက်သရင်တော့ လက်ခံမှာမဟုတ်ဘူး။
၂၄ ဝှေးစေ့ပျက်နေတဲ့ အကောင်၊ သင်းကွပ်ထားတဲ့ အကောင်ကို ယေဟောဝါဆီ မဆက်သရဘူး။ အစ္စရေးပြည်မှာ အဲဒါတွေကို မဆက်သရဘူး။
၂၅ အဲဒီလိုအကောင်မျိုးကို တိုင်းတစ်ပါးသားဆီကနေ ရရင်လည်း အနာအဆာ၊ ချို့ယွင်းချက်တွေ ရှိနေတဲ့အတွက် ဘုရားသခင်ရဲ့ အစားအစာအဖြစ် မဆက်သရဘူး။ အဲဒါမျိုးကို လက်ခံမှာ မဟုတ်ဘူး။’”
၂၆ ယေဟောဝါက မောရှေကို ဆက်ပြောတယ်–
၂၇ “နွား၊ သိုး၊ ဆိတ်မွေးလာတဲ့အခါ မိခင်နဲ့အတူ ခုနစ်ရက်ထားရမယ်။+ ရှစ်ရက်မြောက်နေ့ကစပြီး ယေဟောဝါဆီ မီးရှို့ရာအလှူအဖြစ် ပူဇော်နိုင်တယ်။
၂၈ နွားဖြစ်ဖြစ်၊ သိုးဖြစ်ဖြစ် သားအမိနှစ်ကောင်စလုံးကို တစ်ရက်တည်းမှာ မသတ်ရဘူး။+
၂၉ “ယေဟောဝါဆီ ကျေးဇူးတင်ချီးမွမ်းရာ ပူဇော်သက္ကာကို ဆက်သမယ်ဆိုရင်+ နှစ်သက်လက်ခံမှုရစေမယ့်နည်းနဲ့ ဆက်သရမယ်။
၃၀ ပူဇော်တဲ့အသားကို ဆက်သတဲ့နေ့မှာပဲ စားရမယ်။ နောက်နေ့မနက်အထိ မချန်ထားရဘူး။+ ငါဟာ ယေဟောဝါပဲ။
၃၁ “ငါ့ပညတ်ချက်တွေကို လိုက်နာစောင့်ထိန်းရမယ်။+ ငါဟာ ယေဟောဝါပဲ။
၃၂ သန့်ရှင်းမြင့်မြတ်တဲ့ ငါ့နာမည်ကို ကဲ့ရဲ့စရာဖြစ်အောင် မလုပ်ရဘူး။+ အဲဒီအစား အစ္စရေးတွေအလယ်မှာ ငါ့ကို ဂုဏ်တင်ချီးမွမ်းရမယ်။+ ငါဟာ မင်းတို့ကို သန့်ရှင်းတဲ့လူမျိုးအဖြစ် သီးခြားခွဲထားတဲ့အရှင် ယေဟောဝါပဲ။+
၃၃ မင်းတို့ရဲ့ ဘုရားသခင်ဖြစ်ကြောင်းပြဖို့ မင်းတို့ကို အီဂျစ်ပြည်ကနေ ခေါ်ထုတ်လာတဲ့ အရှင်ဖြစ်တယ်။+ ငါဟာ ယေဟောဝါပဲ။”
