ဟေရှာယ ၃၁:၁-၉
၃၁ စစ်ကူတောင်းဖို့ အီဂျစ်ကို ဆင်းသွားတဲ့သူတွေ အဖြစ်ဆိုး ကြုံရလိမ့်မယ်။+
သူတို့က မြင်းတွေကို အားကိုးတယ်၊+စစ်မြင်းရထားအလုံးအရင်းနဲ့
ခွန်အားကြီးတဲ့ စစ်မြင်းတွေကို ယုံစားတယ်။
အစ္စရေးတို့ရဲ့ သန့်ရှင်းတဲ့အရှင်ကိုတော့ မမျှော်ကိုးကြဘူး။
ယေဟောဝါကို မရှာဖွေကြဘူး။
၂ ဘုရားဟာ ဉာဏ်ပညာကြီးတယ်။ ဘေးဆိုး ကျရောက်စေမယ်။
နှုတ်တော်ထွက်စကားကို ပြန်ရုပ်သိမ်းမှာ မဟုတ်ဘူး။
ဆိုးညစ်တဲ့အမျိုးကိုရော သူတို့ကို ကူညီတဲ့သူတွေကိုပါ တိုက်ခိုက်ဖို့ ထလိမ့်မယ်။+
၃ အီဂျစ်တွေဟာ ဘုရားသခင်မှ မဟုတ်တာ၊ လူသားတွေလေ။
သူတို့ရဲ့မြင်းတွေက ဝိညာဉ်သတ္တဝါတွေမှ မဟုတ်တာ၊ အသွေးအသားတွေလေ။+
ယေဟောဝါက လက်ဆန့်လိုက်တဲ့အခါ အကူအညီပေးသူတွေ တိုက်မိလဲလိမ့်မယ်။
အကူအညီယူသူတွေ လဲကျသွားမယ်။
အားလုံး တစ်ပြိုင်တည်း ပျက်စီးသွားမယ်။
၄ ယေဟောဝါက “သန်မာတဲ့ ခြင်္သေ့ပျိုဟာ သားကောင်ကိုကိုက်ပြီး မာန်ဖီတဲ့အခါ သိုးထိန်းတွေ ဝိုင်းအုံ ခြောက်လှန့်ပေမဲ့ သူတို့ရဲ့အသံကို မကြောက်သလို၊သူတို့ရဲ့ ခြောက်လှန့်သံကို မဖြုံသလို ဇိအုန်တောင်နဲ့ တောင်ကုန်းအတွက် စစ်တိုက်ဖို့ ဗိုလ်ခြေတို့ရဲ့အရှင် ယေဟောဝါ ဆင်းလာတဲ့အခါ အဲဒီလိုဖြစ်မယ်။
၅ ဗိုလ်ခြေတို့ရဲ့အရှင် ယေဟောဝါက ထိုးဆင်းလာတဲ့ငှက်လို အမြန်လာပြီး ဂျေရုဆလင်ကို ကာကွယ်မယ်။+
သူ့ကို ကာကွယ်ပြီး ကယ်တင်မယ်။
အသက်ချမ်းသာပေးပြီး ကယ်တင်မယ်” ဆိုပြီး ငါ့ကိုပြောတယ်။
၆ “အစ္စရေးတို့၊ မင်းတို့ ပြောင်ပြောင်တင်းတင်း ပုန်ကန်ခဲ့တဲ့ အရှင်ဆီ ပြန်လာကြပါ။+
၇ အဲဒီအချိန်ကျရင် လူတိုင်းက ကိုယ်တိုင်ထုလုပ်ပြီး အပြစ်သင့်စေခဲ့တဲ့ အသုံးမဝင်တဲ့ ငွေဘုရားတွေ၊ အချည်းနှီးဖြစ်တဲ့ ရွှေဘုရားတွေကို စွန့်ပစ်မယ်။
၈ အဆီးရီးယားက ဓားချက်နဲ့ ကျဆုံးသွားမယ်။ လူတွေရဲ့ ဓားချက်နဲ့တော့ မဟုတ်ဘူး။
ဓားတစ်စင်းက သူ့ကို ကွပ်မျက်မယ်။ လူတွေကိုင်တဲ့ဓားတော့ မဟုတ်ဘူး။+
ဓားဘေးကြောင့် သူထွက်ပြေးရလိမ့်မယ်။
သူ့ရဲ့ လူငယ်လူရွယ်တွေလည်း ကျွန်ခံရလိမ့်မယ်။
၉ သူ့ရဲ့ကျောက်ဆောင်က လန့်ဖျပ်ပြီး ပျောက်ကွယ်သွားမယ်။
သူ့ရဲ့မင်းညီမင်းသားတွေလည်း လွှင့်ထူထားတဲ့ အလံကြောင့် ကြောက်လန့်ကြလိမ့်မယ်” လို့ ယေဟောဝါ ပြောတယ်။
ဇိအုန်မှာ ဘုရားရဲ့အလင်း တည်ရှိတယ်။ ဂျေရုဆလင်မှာ ဘုရားရဲ့မီးဖို တည်ရှိတယ်။
