ဟေရှာယ ၃၇:၁-၃၈
၃၇ ဟေဇကိမင်းဟာ အဲဒီအကြောင်းကို ကြားတာနဲ့ ကိုယ့်အဝတ်ကို ဆွဲဆုတ်၊ အထည်ကြမ်းဝတ်ပြီး ယေဟောဝါရဲ့အိမ်တော်ကို သွားတယ်။+
၂ ပြီးတော့ အထည်ကြမ်းဝတ်ထားတဲ့ နန်းတော်အုပ် ဧလျာကိမ်၊ စာရေးတော် ရှေဗနနဲ့ ပုရောဟိတ်အကြီးအကဲတွေကို အာမွတ်ရဲ့သား ပရောဖက်ဟေရှာယဆီ+ လွှတ်လိုက်တယ်။
၃ သူတို့က “‘ဒီနေ့ဟာ ဒုက္ခရောက်တဲ့နေ့၊ စော်ကားခံရတဲ့နေ့၊ အရှက်ကွဲတဲ့နေ့ပဲ။ သားဖွားချိန်ရောက်ပေမဲ့ သားဖွားဖို့ ခွန်အားမရှိတဲ့ အဖြစ်မျိုးပဲ။+
၄ အသက်ရှင်တဲ့ ဘုရားသခင်ကို ကဲ့ရဲ့ဖို့ အဆီးရီးယားဘုရင် လွှတ်လိုက်တဲ့ ရာဗရှာခရဲ့ စကားတွေကို ယေဟောဝါဘုရား ကြားမှာပါ။+ အဲဒီစကားတွေအတွက် သူ့ကို ယေဟောဝါဘုရား ဖြေရှင်းချက်တောင်းလိမ့်မယ်။ ဒါကြောင့် ကျန်နေသေးတဲ့လူတွေအတွက်+ ဆုတောင်းပေးပါ’+ ဆိုပြီး ဟေဇကိ မှာလိုက်ပါတယ်” လို့ ဟေရှာယကို ပြောကြတယ်။
၅ ဟေဇကိရဲ့ မင်းမှုထမ်းတွေ အဲဒီလို ပြောပြီးတဲ့နောက်၊+
၆ ဟေရှာယက “မင်းကြီးကို ပြောလိုက်ပါ။ ‘ယေဟောဝါဘုရား ပြောတာက– “ငါ့ကို အဆီးရီးယားဘုရင်ရဲ့ မင်းမှုထမ်းတွေ+ စော်ကားပြောဆိုတာကို ကြားရလို့ ကြောက်မနေနဲ့။+
၇ အဲဒီဘုရင်ရဲ့စိတ်ထဲမှာ ငါအကြံတစ်ခု ထည့်ပေးမယ်။ သူ သတင်းတစ်ခုကြားပြီး နေရင်းပြည်ကို ပြန်သွားလိမ့်မယ်။+ သူ့ကို အဲဒီမှာပဲ ဓားဘေးနဲ့ ငါကျဆုံးစေမယ်”’” လို့မှာတယ်။+
၈ ရာဗရှာခဟာ လာခိရှမြို့ကနေ အဆီးရီးယားဘုရင် တပ်ဆုတ်သွားတဲ့သတင်းကို ကြားတော့ ဘုရင့်ဆီ ပြန်သွားတယ်။ အဲဒီအခါ လိဗနမြို့ကို ဘုရင်တိုက်ခိုက်နေတာ သူတွေ့လိုက်ရတယ်။+
၉ အဲဒီအချိန်မှာ အဆီးရီးယားဘုရင်က အီသီယိုးပီးယားဘုရင် တိရခါ “စစ်ချီလာပြီ” ဆိုတဲ့သတင်းကို ကြားတယ်။ ဒါနဲ့ ဟေဇကိမင်းဆီ တမန်တွေ ပြန်လွှတ်ပြီး၊+
၁၀ “ယုဒဘုရင် ဟေဇကိကို ပြောလိုက်– ‘မင်းအားကိုးနေတဲ့ ဘုရားသခင်က “ဂျေရုဆလင်မြို့ဟာ အဆီးရီးယားဘုရင်လက်ထဲ ရောက်မှာမဟုတ်ဘူး” ဆိုပြီး လှည့်စားနေတာကို လက်မခံနဲ့။+
၁၁ အဆီးရီးယားဘုရင်တွေက တိုင်းနိုင်ငံအားလုံးကို ဖျက်ဆီးပစ်တယ်ဆိုတာ မင်းကြားဖူးသားပဲ။+ မင်းကျမှ ငါ့လက်ကနေ လွတ်မတဲ့လား။
၁၂ ငါ့ရဲ့ဘိုးဘေးတွေ ဖျက်ဆီးပစ်ခဲ့တဲ့ လူမျိုးတွေရဲ့ဘုရားတွေက သူတို့ကို ကယ်တင်ခဲ့လို့လား။+ ဂေါဇန်ပြည်သား၊ ခါရန်ပြည်သား၊+ ရေဇပ်ပြည်သားတွေ၊ တေလသာမြို့မှာနေထိုင်တဲ့ ဧဒင်လူမျိုးတွေ ဘယ်မှာရှိတော့လို့လဲ။
၁၃ ဟာမတ်ဘုရင်၊ အာပဒ်ဘုရင်၊ သေဖရဝိမ်မြို့၊+ ဟေနမြို့နဲ့ အိဝါမြို့တို့ရဲ့ ဘုရင်တွေကော ဘယ်မှာရှိတော့လို့လဲ’” ဆိုပြီး ပြောခိုင်းလိုက်တယ်။
၁၄ ဟေဇကိမင်းက တမန်တွေဆီက စာတွေကို ယူဖတ်တယ်။ ပြီးတော့ ယေဟောဝါရဲ့ အိမ်တော်ကို တက်သွားပြီး ယေဟောဝါရှေ့မှာ စာတွေကို ဖြန့်ချထားတယ်။+
၁၅ အဲဒီနောက် ယေဟောဝါဆီ ဟေဇကိ ဒီလိုဆုတောင်းတယ်–+
၁၆ “ဗိုလ်ခြေတို့ရဲ့အရှင် ယေဟောဝါ၊+ အစ္စရေးတို့ရဲ့ ဘုရားသခင်၊ ခေရုဗိမ်တွေပေါ်* နန်းထိုင်တဲ့အရှင်၊ ကိုယ်တော်တစ်ပါးတည်းသာ ကမ္ဘာ့တိုင်းနိုင်ငံရှိသမျှကိုပိုင်တဲ့ စစ်မှန်တဲ့ဘုရားသခင်၊ ကောင်းကင်နဲ့ မြေကြီးကို ဖန်ဆင်းတဲ့အရှင် ဖြစ်ပါတယ်။
၁၇ ယေဟောဝါဘုရား၊ နားကိုစွင့်ပြီး နားထောင်ပေးပါ။+ ယေဟောဝါဘုရား၊ မျက်စိကိုဖွင့်ပြီး ကြည့်ရှုပေးပါ။+ အသက်ရှင်တဲ့ ဘုရားသခင်ကို ကဲ့ရဲ့ဖို့ သနာခရိပ်မှာလိုက်တဲ့ စကားတွေကို ကြားလှည့်ပါ။+
၁၈ ယေဟောဝါဘုရား၊ အဆီးရီးယားဘုရင်တွေက တိုင်းနိုင်ငံအားလုံးကိုရော ကိုယ့်နေရင်းပြည်ကိုပါ ဖျက်ဆီးပစ်ခဲ့တယ်ဆိုတာ အမှန်ပါပဲ။+
၁၉ သူတို့ရဲ့ဘုရားတွေကိုလည်း မီးရှို့ပစ်ခဲ့တယ်။+ အဲဒီဘုရားတွေဟာ လူ့လက်နဲ့လုပ်ထားတဲ့ အရာတွေ၊+ သစ်သားတွေ၊ ကျောက်တွေပဲ။ ဘုရားမှ မဟုတ်တာ။ ဒါကြောင့် အဆီးရီးယားတွေ ဖျက်ဆီးနိုင်ခဲ့တာပါ။
၂၀ ကျွန်တော်တို့ရဲ့ဘုရား ယေဟောဝါ၊ အခု အဆီးရီးယားဘုရင်ရဲ့ လက်ထဲကနေ ကယ်တင်ပေးပါ။ ဒါမှ ယေဟောဝါ တစ်ပါးတည်းသာ ဘုရားသခင်ဖြစ်မှန်း ကမ္ဘာ့တိုင်းနိုင်ငံအားလုံး သိကြပါလိမ့်မယ်။”+
၂၁ အဲဒီအခါ အာမွတ်ရဲ့သား ဟေရှာယက ဟေဇကိမင်းကို အခုလို သတင်းပါးလိုက်တယ်– “အစ္စရေးတို့ရဲ့ဘုရား ယေဟောဝါပြောတာက ‘အဆီးရီးယားဘုရင် သနာခရိပ်နဲ့ပတ်သက်ပြီး မင်းဆုတောင်းတဲ့အတွက်၊+
၂၂ သူ့ကို ငါယေဟောဝါ ပြောမယ်–
“ဇိအုန်သမီးပျိုက မင်းကို အထင်သေးပြီး လှောင်နေပြီ။
ဂျေရုဆလင်သမီးပျိုက မင်းကိုကြည့်ပြီး ခေါင်းခါနေပြီ။
၂၃ မင်း ဘယ်သူ့ကို ကဲ့ရဲ့နေတာလဲ။+ ဘယ်သူ့ကို စော်ကားပြောဆိုနေတာလဲ။
ဘယ်သူ့ကို အော်ကြီးဟစ်ကျယ် ပြောနေတာလဲ။+
ဘယ်သူ့ကို မောက်မာတဲ့အကြည့်နဲ့ ကြည့်နေတာလဲ။
အစ္စရေးတို့ရဲ့ သန့်ရှင်းတဲ့အရှင်ကို မဟုတ်လား။+
၂၄ မင်းက မင်းမှုထမ်းတွေလွှတ်ပြီး ငါယေဟောဝါကို ကဲ့ရဲ့တယ်။+
‘လက်ဘနွန်ရဲ့ တောင်ထိပ်တွေ၊အစွန်အဖျားဒေသတွေကိုစစ်မြင်းရထားအလုံးအရင်းနဲ့ငါတက်မယ်။+
မြင့်မားတဲ့ သစ်ကတိုးပင်တွေ၊ အကောင်းဆုံး ဂျူနီပါထင်းရှူးပင်တွေကို ခုတ်လှဲမယ်။
အမြင့်ဆုံး ဆိတ်ငြိမ်ရာအရပ်တွေထဲ၊ တောနက်ကြီးတွေထဲ ငါဝင်မယ်။
၂၅ ရေတွင်းတွေ တူးပြီး ရေသောက်မယ်။
အီဂျစ်ချောင်းတွေကို ငါ့ခြေဖဝါးနဲ့ ခန်းခြောက်စေမယ်’ လို့ပြောတယ်။
၂၆ မင်း မကြားဖူးဘူးလား။ ဟိုးအရင်ကတည်းက ဒါကို ဆုံးဖြတ်ပြီးသားပဲ။
ရှေးကတည်းက ငါပြင်ဆင်ထားပြီးသားပဲ။+
အခု အဲဒါကို အကောင်အထည် ဖော်တော့မယ်။+
မင်းက ခံတပ်မြို့တွေကို အပျက်အယွင်းပုံကြီး ဖြစ်စေမယ်။+
၂၇ ဒါကြောင့် အဲဒီမြို့သူမြို့သားတွေ ခိုကိုးရာမဲ့ ဖြစ်သွားမယ်။
ထိတ်လန့်ပြီး အရှက်ကွဲမယ်။
အရှေ့လေကြောင့် ခြောက်သွေ့သွားတဲ့ တောမြက်ပင်တွေ၊မြက်စိမ်းတွေ၊ ခေါင်မိုးပေါ်ကမြက်တွေလို ဖြစ်သွားမယ်။
၂၈ ဒါပေမဲ့ မင်း ထိုင်နေတာ၊ ဝင်ထွက်သွားလာနေတာ၊+ငါ့ကို ဒေါသထွက်နေတာတွေ ငါကောင်းကောင်းသိတယ်။+
၂၉ မင်း ငါ့ကိုဒေါသထွက်ပြီး+ ကြိမ်းမောင်းနေတာကို ငါကြားတယ်။+
ဒါကြောင့် မင်းရဲ့နှာခေါင်းကို ချိတ်နဲ့ချိတ်ပြီး ပါးစပ်မှာ ဇက်ခွံ့မယ်။+
လာလမ်းအတိုင်း လှည့်ပြန်စေမယ်။”
၃၀ “‘ဟေဇကိအတွက် နိမိတ်ကတော့– အလိုလိုပေါက်တဲ့ သီးနှံတွေကို ဒီနှစ်မှာ စားရလိမ့်မယ်။ အဲဒီကနေ ပေါက်လာတဲ့ ကောက်နှံတွေကို ဒုတိယနှစ်မှာ စားရလိမ့်မယ်။ တတိယနှစ်မှာတော့ မျိုးစေ့ကြဲပြီး ရိတ်သိမ်းရလိမ့်မယ်။ စပျစ်ခြံတွေ စိုက်ပျိုးပြီး စပျစ်သီးတွေ စားရလိမ့်မယ်။+
၃၁ ယုဒအမျိုးထဲက အသက်ရှင်ကျန်ရစ်ပြီး လွတ်မြောက်သွားသူတွေဟာ+ သစ်ပင်တွေလို အမြစ်စွဲပြီး သီးပွင့်မယ်။
၃၂ ကျန်ကြွင်းသူတွေ ဂျေရုဆလင်မြို့ကနေ ထွက်လာမယ်။ အသက်ရှင်ကျန်ရစ်သူတွေ ဇိအုန်တောင်ကနေ ထွက်လာမယ်။+ ဗိုလ်ခြေတို့ရဲ့အရှင်၊ စိတ်ထက်သန်တဲ့ဘုရား ငါယေဟောဝါ ဒါကိုလုပ်ဆောင်မယ်။+
၃၃ “‘ဒါကြောင့် အဆီးရီးယားဘုရင်နဲ့ပတ်သက်ပြီး ယေဟောဝါ ပြောတာက–+
“သူ ဒီမြို့ထဲဝင်ရမှာ မဟုတ်ဘူး။+
မြို့ထဲကို မြားတစ်စင်းမှ ပစ်ရမှာ မဟုတ်ဘူး။
ဒိုင်းလွှားကိုင်ပြီး တိုက်ရမှာ မဟုတ်ဘူး။
ထိုးစစ်ကုန်းရိုးကိုလည်း တည်ဆောက်ရမှာ မဟုတ်ဘူး။”’+
၃၄ ငါယေဟောဝါရဲ့ အမိန့်ကတော့– ‘သူဟာ လာလမ်းအတိုင်း လှည့်ပြန်ရလိမ့်မယ်။
ဒီမြို့ထဲ ဝင်ရမှာ မဟုတ်ဘူး။
၃၅ ငါ့နာမည်အတွက်၊+ ငါ့ကျွန်ဒါဝိဒ်အတွက်+ ဒီမြို့ကို ငါကာကွယ်မယ်။ ကယ်တင်မယ်။’”+
၃၆ အဲဒီနောက် ယေဟောဝါရဲ့ ကောင်းကင်တမန်တစ်ပါး ထွက်လာပြီး အဆီးရီးယားတပ်စခန်းမှာရှိတဲ့ စစ်သည် ၁၈၅,၀၀၀ ကို ကွပ်မျက်လိုက်တယ်။ မနက်စောစော လူတွေနိုးလာချိန်မှာ အလောင်းတွေကိုပဲ တွေ့ရတယ်။+
၃၇ ဒါကြောင့် အဆီးရီးယားဘုရင် သနာခရိပ်လည်း ဆုတ်ခွာပြီး နိနဝေမြို့မှာ+ သွားနေထိုင်တယ်။+
၃၈ သနာခရိပ်က သူကိုးကွယ်တဲ့ဘုရား နိသရုတ်ရဲ့ဗိမာန်မှာ ဦးချနေတုန်း သားတော် အာဒရာမေလက်နဲ့ ရှရေဇာက သူ့ကိုလုပ်ကြံပြီး+ အာရရတ်ပြည်ကို ထွက်ပြေးသွားတယ်။+ သားတော် ဧသရဟဒုန်+ ထီးနန်းဆက်ခံတယ်။
အောက်ခြေမှတ်ချက်များ
^ “ခေရုဗိမ်တွေကြားမှာ” လည်းဖြစ်နိုင်။
