ဟေရှာယ ၄၁:၁-၂၉
၄၁ “ကျွန်းတို့၊ တိတ်တိတ်နေပြီး ငါပြောတာကို နားထောင်ကြပါ။
လူမျိုးတွေ ခွန်အားပြည့်အောင် လုပ်ကြပါစေ။
ငါ့ဆီလာပြီး ပြောကြပါစေ။+
တရားရင်ဆိုင်ဖို့ အတူစုဝေးကြစို့။
၂ လူတစ်ယောက်ကို နေထွက်ရာအရပ်ကနေ ပေါ်ထွန်းစေတာ ဘယ်သူလဲ။+
လူမျိုးတွေကို သူ့လက်ထဲအပ်ဖို့၊ ဘုရင်တွေကို နှိမ်နင်းဖို့+ သူ့ကို ဖြောင့်မတ်ခြင်းနဲ့အညီ ခြေတော်ရင်းဆီ ခေါ်ဆောင်လာတာ ဘယ်သူလဲ။
လူမျိုးတွေကို သူ့ဓားရှေ့မှာ မြေမှုန့်လို လွင့်သွားစေတာ၊သူကိုင်တဲ့လေးရှေ့မှာ ရိုးပြတ်လို လွင့်သွားစေတာ ဘယ်သူလဲ။
၃ သူက ခြေမချဖူးတဲ့ လမ်းတွေပေါ် အတားအဆီးမရှိ ဖြတ်လျှောက်ပြီး လူမျိုးတွေကို လိုက်လံတိုက်ခိုက်တယ်။
၄ အဲဒါတွေကို လုပ်ဆောင်တာ၊လူမျိုးဆက်တွေကို အစကနဦး ကတည်းက ဆင့်ခေါ်တာ ဘယ်သူလဲ။
ငါယေဟောဝါဟာ ဦးဆုံးအရှင်ပဲ။+
နောက်ဆုံးမျိုးဆက်အတွက်လည်း ငါဟာ မပြောင်းလဲဘူး။”+
၅ ကျွန်းတွေက အဲဒါကို မြင်ပြီး ကြောက်လန့်တယ်။
ကမ္ဘာမြေ အစွန်အဖျားဒေသတွေလည်း တုန်လှုပ်သွားတယ်။
သူတို့ လာရောက်စုရုံးကြတယ်။
၆ အချင်းချင်း ရိုင်းပင်းကူညီကြတယ်။
ကိုယ့်ညီအစ်ကိုကိုလည်း “အားတင်းစမ်းပါကွာ” လို့ ပြောတယ်။
၇ လက်မှုပညာသည်က ပန်းထိမ်သမားကို အားပေးတယ်။+
တူနဲ့ အချောကိုင်တဲ့သူက ပေပေါ်မှာ တူနဲ့ထုတဲ့သူကို အားပေးပြီး “ဂဟေဆော်ထားတာ ကောင်းလိုက်တာ” လို့ပြောတယ်။
အဲဒီနောက် ရုပ်တုကို မပြိုလဲအောင် သံနဲ့ရိုက်တယ်။
၈ “အစ္စရေး၊ မင်းကတော့ ငါ့ရဲ့ကျွန်ပါ။+
ငါရွေးချယ်ထားတဲ့ ယာကုပ်၊+မင်းဟာ ငါ့မိတ်ဆွေ အာဗြဟံရဲ့ မျိုးနွယ်ပါ။+
၉ မင်းကို ကမ္ဘာမြေ အစွန်အဖျားကနေ ငါခေါ်ခဲ့တယ်။+
အဝေးလံဆုံး ဒေသတွေကနေ ခေါ်ခဲ့တယ်။
ငါပြောမယ်– ‘မင်းဟာ ငါ့ကျွန်ပဲ။+
မင်းကို ငါရွေးချယ်ထားတယ်။ မင်းကို မပစ်ပယ်ဘူး။+
၁၀ မကြောက်နဲ့။ မင်းနဲ့အတူ ငါရှိတယ်။+
မစိုးရိမ်နဲ့။ ငါဟာ မင်းရဲ့ဘုရားသခင်ပါ။+
မင်းကို ခိုင်ခံ့စေမယ်၊ ကူညီပေးမယ်။+
ဖြောင့်မတ်တဲ့ ညာလက်နဲ့ မြဲမြဲကိုင်ထားမယ်။’
၁၁ မင်းကို ဒေါသထွက်တဲ့သူတွေ အရှက်တကွဲ အကျိုးနည်း ရလိမ့်မယ်။+
မင်းကို တိုက်ခိုက်တဲ့သူတွေ အချည်းနှီးဖြစ်ပြီး ပျက်စီးရလိမ့်မယ်။+
၁၂ ရန်လုပ်တဲ့သူတွေကို မင်း လိုက်ရှာရင်တောင် တွေ့တော့မှာ မဟုတ်ဘူး။
မင်းကို စစ်တိုက်တဲ့သူတွေဟာ မတည်ရှိတဲ့အရာလို၊ ဘာမှမဟုတ်တဲ့အရာလို ဖြစ်သွားမယ်။+
၁၃ မင်းရဲ့ဘုရား ယေဟောဝါဟာ မင်းရဲ့ညာလက်ကို ဆုပ်ကိုင်ပြီး ‘မကြောက်နဲ့။ ငါကူညီမယ်’ လို့ ပြောတဲ့အရှင်ပဲ။+
၁၄ တီကောင်* ယာကုပ်၊ မကြောက်ပါနဲ့။+ အစ္စရေးလူတို့၊ ငါကူညီမှာပေါ့” ဆိုပြီး အစ္စရေးတို့ရဲ့ သန့်ရှင်းတဲ့အရှင်၊ မင်းတို့ကို ပြန်ဝယ်ယူတဲ့အရှင်+ ယေဟောဝါ ပြောတယ်။
၁၅ “ငါက မင်းကို ကောက်နယ်ပြား ဖြစ်စေပြီ။+
အသွားထက်တဲ့ ကောက်နယ်ပြားအသစ် ဖြစ်စေပြီ။
တောင်တန်းတွေကို မင်း နင်းခြေပစ်လိမ့်မယ်။
တောင်ကုန်းတွေကို ဖွဲလို လွင့်သွားစေလိမ့်မယ်။
၁၆ မင်းက စပါးလှေ့သလို သူတို့ကို လှေ့ရလိမ့်မယ်။
သူတို့ လေတိုက်ရာ လွင့်ပါသွားမယ်။
လေပြင်းကြောင့် ကွဲလွင့်သွားမယ်။
ယေဟောဝါကြောင့် မင်း ရွှင်လန်းရလိမ့်မယ်။+
အစ္စရေးတို့ရဲ့ သန့်ရှင်းတဲ့အရှင်ကြောင့် ဝါကြွားရလိမ့်မယ်။”+
၁၇ “ဆင်းရဲနွမ်းပါးသူတွေ ရေကိုရှာပေမဲ့ ရေမရှိဘူး။
ရေငတ်လို့ အာခေါင်ခြောက်လာတယ်။+
ယေဟောဝါက သူတို့ခေါ်တဲ့အခါ ပြန်ထူးမယ်။+
အစ္စရေးတို့ရဲ့ ဘုရားသခင်က သူတို့ကို မစွန့်ပစ်ဘူး။+
၁၈ တောင်ကတုံးတွေပေါ်မှာ မြစ်တွေ စီးဆင်းစေမယ်။+
ချိုင့်ဝှမ်းလွင်ပြင်တွေမှာ စမ်းချောင်းတွေ စီးဆင်းစေမယ်။+
တောကန္တာရကို ကျူပင်ပေါတဲ့ရေအိုင် ဖြစ်စေမယ်။
ရေမရှိတဲ့မြေကို စမ်းချောင်း ဖြစ်စေမယ်။+
၁၉ ကန္တာရမှာ သစ်ကတိုးပင်၊ရှားပင်၊ မုရတုပင်၊* ထင်းရှူးပင်ကို စိုက်ပျိုးမယ်။+
ကန္တာရလွင်ပြင်မှာ ဂျူနီပါထင်းရှူးပင်၊သစ်ရာပင်၊ ဆိုက်ပရပ်ထင်းရှူးပင်ကို စိုက်ပျိုးမယ်။+
၂၀ ဒါမှ ယေဟောဝါကိုယ်တိုင် အဲဒါတွေကို လုပ်ဆောင်ခဲ့တယ်၊အစ္စရေးတို့ရဲ့ သန့်ရှင်းတဲ့အရှင်က အဲဒါတွေကို ဖန်ဆင်းခဲ့တယ်ဆိုတာ
လူအားလုံး သိမြင်လာမယ်။
အာရုံစိုက်ပြီး နားလည်လာမယ်။”+
၂၁ “မင်းတို့ရဲ့အမှုကို တင်ပြကြ” လို့ ယေဟောဝါ ပြောတယ်။
“လျှောက်လဲချက်တွေကို တင်သွင်းကြ” လို့ ယာကုပ်ရဲ့ဘုရင် ပြောတယ်။
၂၂ “အထောက်အထားရှိရင် ပြကြ။ အနာဂတ်မှာ ဘာတွေဖြစ်ပျက်လာမလဲ ပြောကြ။
အတိတ်က အဖြစ်အပျက်တွေကို ပြောကြလေ။
ဒါမှ ငါတို့ သုံးသပ်ပြီး နောက်ဆုံးရလဒ်ကို သိနိုင်မှာပေါ့။
ဒါမှမဟုတ်ရင်လည်း အနာဂတ်မှာ ဖြစ်လာမယ့်အရာတွေကို ပြောကြ။+
၂၃ မင်းတို့ဟာ ဘုရားတွေဖြစ်မှန်း ငါတို့သိအောင်
အနာဂတ်မှာ ဖြစ်လာမယ့်အရာတွေကို ပြောပြပါ။+
ငါတို့ကြည့်ပြီး အံ့သြသွားအောင် အကောင်း၊ အဆိုး တစ်ခုခုလုပ်ပြစမ်းပါ။+
၂၄ မင်းတို့ဟာ ဘာမှ အသုံးမဝင်တဲ့သူတွေပဲ။
မင်းတို့ရဲ့ အောင်မြင်မှုဟာ အလကားပဲ။+
မင်းတို့ကို ရွေးချယ်တဲ့သူတွေလည်း ရွံစရာကောင်းတဲ့သူတွေပဲ။+
၂၅ မြောက်အရပ်ကနေ လူတစ်ယောက်ကို ငါပေါ်ထွန်းစေမယ်။ သူ ရောက်လာမယ်။+
သူဟာ နေထွက်ရာအရပ်ကနေ ပေါ်ထွန်းတဲ့သူ၊+ ငါ့နာမည်ကို ခေါ်တဲ့သူပဲ။
ရွှံ့စေးကို နင်းခြေတဲ့ အိုးထိန်းသမားလို အုပ်စိုးရှင်တွေကို ရွှံ့စေးလို သူနင်းခြေမယ်။+
၂၆ ဒီအကြောင်းကို ငါတို့သိရအောင် အစကတည်းက ဘယ်သူပြောခဲ့လို့လဲ။
‘သူ မှန်တယ်’ လို့ပြောရအောင် ဟိုးရှေးကတည်းက ဘယ်သူပြောခဲ့လို့လဲ။+
တစ်ယောက်မှ မပြောခဲ့ဘူး။
တစ်ယောက်မှ မကြေညာခဲ့ဘူး။
မင်းတို့ပြောတာကို ကြားခဲ့တဲ့သူ ဘယ်သူမှ မရှိဘူး။”+
၂၇ “ကြည့်လိုက်ပါ။ ဒါတွေ ဖြစ်လာမယ်” လို့ ဇိအုန်ကို ဦးဆုံးပြောခဲ့သူဟာ ငါပဲ။+
သတင်းကောင်း သယ်ဆောင်သူကို ဂျေရုဆလင်ဆီ ငါစေလွှတ်မယ်။+
၂၈ ငါကြည့်နေပေမဲ့ တစ်ယောက်မှ မရှိဘူး။
သူတို့ထဲမှာ အကြံပေးနိုင်တဲ့သူ တစ်ယောက်မှ မရှိဘူး။
ငါမေးနေပေမဲ့ တစ်ယောက်မှ ပြန်မဖြေကြဘူး။
၂၉ ကြည့်ပါ။ သူတို့အားလုံးဟာ လှည့်စားမှုသက်သက်ပဲ။
လူတွေ လုပ်ထားတာတွေဟာ အလကားပဲ။
လူတွေရဲ့ ရုပ်တုတွေဟာ လေပဲ။ တကယ်မရှိတဲ့အရာတွေပဲ။+
