ဟေရှာယ ၅၁:၁-၂၃
၅၁ “ဖြောင့်မတ်ခြင်းကို လိုက်စားနေသူတို့၊ ယေဟောဝါကို ရှာဖွေနေသူတို့၊ငါပြောတာကို နားထောင်ကြ။
မင်းတို့ကို ထွင်းထုတ်ယူခဲ့တဲ့ ကျောက်ဆောင်၊မင်းတို့ကို တူးထုတ်ယူခဲ့တဲ့ ကျောက်တွင်းကို ကြည့်ကြ။
၂ မင်းတို့ရဲ့ဘိုးဘေး အာဗြဟံနဲ့ မင်းတို့ကို မွေးထုတ်ခဲ့တဲ့ စာရာကို ကြည့်ကြ။+
ငါခေါ်တုန်းက သူဟာ တစ်ယောက်တည်းပဲ။+
သူ့ကို ငါကောင်းချီးပေးပြီး များပြားစေခဲ့တယ်။+
၃ ယေဟောဝါက ဇိအုန်ကို နှစ်သိမ့်ပေးမယ်။+
သူ့ရဲ့အပျက်အယွင်းတွေကို နှစ်သိမ့်ပေးမယ်။+
တောကန္တာရကို ဧဒင်ဥယျာဉ်လို၊+ကန္တာရလွင်ပြင်ကို ယေဟောဝါရဲ့ ဥယျာဉ်လို ဖြစ်စေမယ်။+
ဇိအုန်မှာ လူတွေ ရွှင်လန်းဝမ်းမြောက်ပြီး ကျေးဇူးတင်ချီးမွမ်း ကြလိမ့်မယ်။
သာယာနာပျော်ဖွယ်သီချင်းတွေ ဆိုကြလိမ့်မယ်။+
၄ ငါ့လူတို့၊ ငါပြောတာကို အာရုံစိုက်ကြ။
ငါ့လူမျိုး၊ ငါ့စကားကို နားစိုက်ကြ။+
ငါ့ဆီကနေ ပညတ်တော် ပေါ်ထွက်လိမ့်မယ်။+
ငါ့ရဲ့တရားမျှတမှုကို လူတွေအတွက် အလင်းအဖြစ် ငါတည်စေမယ်။+
၅ ငါ့ဖြောင့်မတ်ခြင်း ရောက်လာတော့မယ်။+
ငါ့ကယ်တင်ခြင်းလည်း လာနေပြီ။+
လူတွေကို လက်ရုံးတော်နဲ့ တရားစီရင်တော့မယ်။+
ကျွန်းတွေက ငါ့ကို မျှော်လင့်ကြလိမ့်မယ်။+
လက်ရုံးတော်ကို စောင့်မျှော်ကြလိမ့်မယ်။
၆ မိုးကောင်းကင်ကို မော့ကြည့်ကြ။
မြေကြီးကိုလည်း ငုံ့ကြည့်ကြ။
မိုးကောင်းကင်ဟာ မီးခိုးလို လွင့်ပြယ်သွားမယ်။
မြေကြီးဟာ အဝတ်လို ဟောင်းနွမ်းသွားမယ်။
ကမ္ဘာမြေပေါ်နေထိုင်သူတွေဟာ မှက်တွေလိုပဲ သေဆုံးသွားမယ်။
ငါ့ကယ်တင်ခြင်းကတော့ ထာဝစဉ် တည်မြဲနေလိမ့်မယ်။+
ငါ့ဖြောင့်မတ်ခြင်းဟာ အဆုံးတိုင်မှာ မဟုတ်ဘူး။+
၇ ဖြောင့်မတ်ခြင်းအကြောင်း သိနားလည်သူတို့၊ငါ့တရားကို နှလုံးသွင်းထားသူတို့၊+ ငါပြောတာကို နားထောင်ကြ။
သေမျိုးဖြစ်တဲ့လူတွေ ကဲ့ရဲ့မှာကို မကြောက်နဲ့။
သူတို့စော်ကားတာကို မထိတ်လန့်နဲ့။
၈ ပိုးတွေက အဝတ်ကိုစားသလို သူတို့ကို စားလိမ့်မယ်။
သိုးမွေးထည်ကို ပိုး* စားသလို သူတို့ကို စားလိမ့်မယ်။+
ငါ့ဖြောင့်မတ်ခြင်းကတော့ ထာဝစဉ် တည်မြဲလိမ့်မယ်။
ငါ့ကယ်တင်ခြင်းကလည်း လူမျိုးအဆက်ဆက် တည်မြဲလိမ့်မယ်။”+
၉ ယေဟောဝါရဲ့ လက်ရုံးတော်၊+ နိုးထပါ။ နိုးထပါ။
အစွမ်းခွန်အားကို ဝတ်ဆင်ပါ။
ရှေးတုန်းကလို၊ အရင်လူမျိုးဆက်တွေတုန်းကလို နိုးထပါ။
ရာခပ်ကို+ အပိုင်းပိုင်းချိုးပစ်ပြီး
ပင်လယ်သတ္တဝါကြီးကို ထိုးဖောက်ခဲ့တာ ကိုယ်တော်ပဲ မဟုတ်လား။+
၁၀ နက်ရှိုင်းတဲ့ပင်လယ်ကို ခန်းခြောက်စေခဲ့တာ၊+
ပြန်ဝယ်ထားတဲ့သူတွေ ဖြတ်လျှောက်ဖို့ နက်ရှိုင်းတဲ့ပင်လယ်မှာ လမ်းဖောက်ခဲ့တာ ကိုယ်တော်ပဲ မဟုတ်လား။+
၁၁ ယေဟောဝါ ရွေးယူတဲ့သူတွေ ပြန်လာမယ်။+
ရွှင်လန်းစွာ ကြွေးကြော်ရင်း ဇိအုန်ကို ပြန်လာမယ်။+
အဆုံးမဲ့ပျော်ရွှင်ခြင်းကို သရဖူ ဆောင်းရလိမ့်မယ်။+
ရွှင်လန်းခြင်းနဲ့ ဝမ်းမြောက်ခြင်းကို ပိုင်ဆိုင်ရလိမ့်မယ်။
ပူဆွေးခြင်းနဲ့ သက်ပြင်းချခြင်းတွေ ပျောက်ကွယ်သွားမယ်။+
၁၂ “ငါဟာ မင်းတို့ကို နှစ်သိမ့်ပေးတဲ့အရှင်ပဲ။+
သေမျိုးဖြစ်တဲ့လူကို၊
မြက်စိမ်းလို ညှိုးနွမ်းသွားမယ့်လူသားကို ဘာလို့ ကြောက်ရမှာလဲ။+
၁၃ မိုးကောင်းကင်ကို ဖြန့်မိုးပြီး+ မြေကြီးကို အုတ်မြစ်ချတဲ့အရှင်၊
ဖန်ဆင်းရှင် ယေဟောဝါကို ဘာလို့ မေ့ရတာလဲ။+
မင်းကို ဖျက်ဆီးနိုင်မယ့်သူလို့ ထင်ပြီး ဖိနှိပ်သူရဲ့ ဒေါသကို
ဘယ့်နှယ် တစ်ချိန်လုံး ကြောက်နေရတာလဲ။
အခု ဖိနှိပ်သူရဲ့ဒေါသ ဘယ်မှာလဲ။
၁၄ ချုပ်နှောင်ခံရသူဟာ မကြာခင် လွတ်မြောက်လာမယ်။+
သေဆုံးပြီး သေတွင်းထဲ မဆင်းရဘူး။
စားစရာ မပြတ်လပ်ရဘူး။
၁၅ ငါဟာ မင်းတို့ရဲ့ဘုရား ယေဟောဝါပဲ။
ပင်လယ်ကို မွှေနှောက်ပြီး လှိုင်းတွေကို ဟုန်းဟုန်းထစေတဲ့အရှင်ပဲ။+
ငါ့နာမည်က ဗိုလ်ခြေတို့ရဲ့အရှင် ယေဟောဝါလို့ခေါ်တယ်။+
၁၆ မိုးကောင်းကင်ကို နေရာချဖို့၊ကမ္ဘာမြေကို အုတ်မြစ်ချဖို့၊+
‘မင်းဟာ ငါ့လူမျိုးပဲ’ လို့ ဇိအုန်ကိုပြောဖို့+
မင်းတို့ကို ငါ့စကားတွေ ကြေညာခိုင်းမယ်။
ငါ့လက်နဲ့ ကာကွယ်ပေးမယ်။+
၁၇ အို ဂျေရုဆလင်၊ နိုးထပါ။ နိုးထပါ။+
ယေဟောဝါရဲ့လက်ထဲက အမျက်တော်ခွက်ကို မင်း သောက်တယ်။
ဝိုင်ခွက်ကို သောက်တယ်။
ခွက်ဖလားကို ကုန်အောင်သောက်ပြီး ယိမ်းယိုင်နေပြီ။+
၁၈ မင်းမွေးတဲ့ သားတွေထဲမှာ မင်းကိုလမ်းပြပေးမယ့်သူ မရှိဘူး။
ကြည့်ရှုပြုစုတဲ့ သားတွေထဲမှာ လက်ကိုတွဲပေးမယ့်သူ မရှိဘူး။
၁၉ ဖျက်ဆီးခြင်းနဲ့ ပျက်စီးခြင်းဘေး၊ အငတ်ဘေးနဲ့ ဓားဘေး၊+
အဲဒီဘေးဒဏ်နှစ်ခု မင်းအပေါ် ကျရောက်ပြီ။
မင်းကို ဘယ်သူ ကိုယ်ချင်းစာပေးမှာလဲ။
ဘယ်သူ နှစ်သိမ့်ပေးမှာလဲ။+
၂၀ မင်းရဲ့သားတွေ မေ့မြောသွားပြီ။+
ပိုက်ကွန်မိတဲ့ သိုးရိုင်းလို လမ်းထောင့်တွေမှာ လဲကျကုန်ပြီ။
ယေဟောဝါရဲ့အမျက်၊ ဘုရားသခင်ရဲ့ ဆုံးမမှုကို
အပြည့်အဝ ခံရပြီ။”
၂၁ ဒါကြောင့် ဒုက္ခရောက်နေတဲ့ မိန်းမ၊ စပျစ်ဝိုင် မသောက်ဘဲ မူးနေတဲ့မိန်းမ၊
နားထောင်ပါ။
၂၂ မိမိလူတွေကို ခုခံကာကွယ်တဲ့အရှင်
ယေဟောဝါဘုရား ပြောတာက–
“ယိမ်းယိုင်စေတဲ့ ခွက်ကို မင်းလက်ထဲကနေ ငါသိမ်းယူမယ်။+
အမျက်တော်ခွက်ဖလားကို မင်း မသောက်ရတော့ဘူး။+
၂၃ မင်းကိုညှဉ်းဆဲသူတွေက
‘ဝပ်ကြစမ်း။ ငါတို့ကျော်နင်းမယ်’ လို့ပြောတဲ့အတွက်
သူတို့ကျော်နင်းဖို့ မြေပြင်လို၊ လမ်းလို မင်း ကျောခင်းပေးခဲ့ရတယ်။
အဲဒီလူတွေလက်ထဲ အမျက်တော် ခွက်ဖလားကို ငါထည့်လိုက်မယ်။”+
အောက်ခြေမှတ်ချက်များ
^ “တီကောင်” လည်းဖြစ်နိုင်။
