၁ ဘုရင်များ ၁၀:၁-၂၉
၁၀ ရှေဘဘုရင်မက ရှောလမုန်ရဲ့ ဂုဏ်သတင်း၊ ယေဟောဝါရဲ့ နာမည်ကို ကျော်စောစေတဲ့ ဂုဏ်သတင်းကို ကြားသိရတဲ့အခါ+ ခက်ခဲနက်နဲတဲ့ မေးခွန်းတွေနဲ့ ပညာစမ်းဖို့ ရောက်လာတယ်။+
၂ ဘုရင်မဟာ ဗာလစံဆီမွှေး၊+ များပြားလှတဲ့ရွှေတွေ၊ ကျောက်မျက်တွေ တင်လာတဲ့ ကုလားအုတ်တွေနဲ့အတူ အခြွေအရံအများကြီးကို ခေါ်ပြီး ဂျေရုဆလင်မြို့ကို ရောက်လာတယ်။+ ရှောလမုန်ဆီ အခစားဝင်ပြီး သိချင်တာမှန်သမျှ မေးမြန်းတယ်။
၃ ရှောလမုန်လည်း သူမေးသမျှကို ဖြေဆိုတယ်။ မဖြေနိုင်တဲ့ မေးခွန်းဆိုလို့ တစ်ခုမှမရှိဘူး။
၄ ရှေဘဘုရင်မက ရှောလမုန်ရဲ့ ဉာဏ်ပညာကြီးမားပုံ၊+ တည်ဆောက်ထားတဲ့ နန်းတော်၊+
၅ ပွဲတော်စာတွေ၊+ မှူးမတ်တွေအတွက် နေရာထိုင်ခင်း စီစဉ်ပုံ၊ ပွဲတော်အမှုထမ်းတွေရဲ့ တည်ခင်းဧည့်ခံပုံနဲ့ ဝတ်စားဆင်ယင်ပုံ၊ ဖလားတော်ဝန်တွေ၊ ယေဟောဝါရဲ့အိမ်တော်မှာ ပုံမှန်ပူဇော်တဲ့ မီးရှို့ရာ ပူဇော်သက္ကာတွေကို မြင်လိုက်ရတဲ့အခါ ရင်သပ်ရှုမော ဖြစ်သွားတယ်။
၆ ဒါကြောင့် “မင်းကြီးရဲ့ အောင်မြင်မှုသတင်း၊ ဉာဏ်ပညာကြီးမားတဲ့ သတင်းက ကျွန်မရဲ့တိုင်းပြည်အထိ ပျံ့နေတယ်။ ဒီသတင်း သိပ်မှန်တာပဲ။
၇ ဒီကိုလာပြီး မျက်စိနဲ့ တပ်အပ်မမြင်ရခင်က ဒီသတင်းကို မယုံခဲ့ဘူး။ ကြည့်ပါဦး။ ကျွန်မကြားထားတာတွေဟာအကုန်မဟုတ်သေးပါလား။ မင်းကြီးရဲ့ ဉာဏ်ပညာနဲ့ ဘုန်းစည်းစိမ်ဟာ ကျွန်မကြားထားတာထက် အဆမတန် သာလွန်နေပါလား။
၈ မင်းကြီးရဲ့လူတွေဟာ မင်္ဂလာရှိလိုက်တာ။ ရှေ့တော်မှာ အမြဲခစားပြီး မင်းကြီးရဲ့ ဉာဏ်ပညာစကားကို ကြားနာရတဲ့ အမှုထမ်းတွေလည်း မင်္ဂလာရှိလိုက်တာ။+
၉ မင်းကြီးကိုးကွယ်တဲ့ဘုရား ယေဟောဝါကို ချီးမွမ်းကြပါစေ။+ ယေဟောဝါဘုရားက မင်းကြီးကို ချစ်မြတ်နိုးပြီး အစ္စရေးရာဇပလ္လင်ပေါ် နန်းထိုင်စေတယ်။ ဘုရားသခင်က အစ္စရေးတွေကို ထာဝရမေတ္တာနဲ့ ချစ်တဲ့အတွက် သူတို့ကို တရားမျှတစွာ၊ ဖြောင့်မတ်စွာ အုပ်ချုပ်ဖို့ မင်းကြီးကို မင်းမြှောက်ခဲ့ပြီ” လို့ပြောတယ်။
၁၀ အဲဒီနောက် ရှေဘဘုရင်မက ရှောလမုန်မင်းကြီးကို ရွှေအချိန် တဲလင့်* ၁၂၀၊ ဗာလစံဆီမွှေး+ အမြောက်အမြားနဲ့ ကျောက်မျက်ရတနာတွေ+ ဆက်သတယ်။ သူဆက်သတဲ့ ဗာလစံဆီမွှေး ပမာဏလောက် များတာမျိုး တစ်ခါမှ ထပ်ရောက်မလာတော့ဘူး။
၁၁ ဟိရံမင်းရဲ့ သင်္ဘောတွေဟာ သြဖိရအရပ်က+ ရွှေတွေအပြင် စန္ဒကူးသား+ အမြောက်အမြားနဲ့ ကျောက်မျက်ရတနာတွေကိုလည်း သယ်ဆောင်လာတယ်။+
၁၂ မင်းကြီးက ယေဟောဝါရဲ့အိမ်တော်နဲ့ နန်းတော်အတွက် ပွတ်လုံးတိုင်တွေ၊ သီချင်းသည်တွေအတွက် စောင်းတွေ၊ ကြိုးတပ်တူရိယာတွေကို+ စန္ဒကူးသားနဲ့ လုပ်တယ်။ အဲဒီလိုစန္ဒကူးသားတွေ ထပ်ရောက်မလာတော့တာ၊ မတွေ့ရတော့တာ ဒီနေ့အထိပဲ။
၁၃ ရှောလမုန်မင်းကြီးက ရှေဘဘုရင်မကို လက်ဆောင်တွေ ရက်ရက်ရောရော ပေးတဲ့အပြင် သူလိုချင်သမျှ၊ တောင်းသမျှကိုလည်း ပေးတယ်။ အဲဒီနောက် ဘုရင်မက အခြွေအရံတွေနဲ့အတူ နေရင်းပြည်ကို ပြန်သွားတယ်။+
၁၄ နှစ်စဉ် ရှောလမုန်ကို ဆက်သတဲ့ ရွှေအလေးချိန်ကတော့ ၆၆၆ တဲလင့်ရှိတယ်။+
၁၅ ကုန်သည်တွေ၊ အရောင်းအဝယ်လုပ်သူတွေ၊ အာရပ်ဘုရင်တွေ၊ တိုင်းပြည်မှာရှိတဲ့ ဘုရင်ခံတွေဆီကနေ အမြတ်ခွန်တွေကိုလည်း ရသေးတယ်။
၁၆ ရှောလမုန်မင်းကြီးက ဒိုင်းလွှားကြီး ၂၀၀ ကို သတ္တုစပ်ထားတဲ့ ရွှေနဲ့ လုပ်တယ်။+ (ဒိုင်းလွှားတစ်ခုစီဟာ ရွှေအချိန် ရှယ်ကယ်* ၆၀၀ ရှိတယ်။)+
၁၇ ဒိုင်းငယ် ၃၀၀ ကိုလည်း သတ္တုစပ်ထားတဲ့ ရွှေနဲ့ လုပ်တယ်။ (ဒိုင်းငယ်တစ်ခုစီဟာ ရွှေအချိန် သုံးမိုင်နာ* ရှိတယ်။) အဲဒါတွေကို လက်ဘနွန်စံအိမ်မှာ+ ထားလိုက်တယ်။
၁၈ ဒါ့အပြင် မင်းကြီးက ဆင်စွယ်ရာဇပလ္လင်ကြီးကို+ လုပ်ပြီး ရွှေစင်နဲ့ ရွှေချတယ်။+
၁၉ ရာဇပလ္လင်ကိုတက်တဲ့လှေကား ခြောက်ထစ်ရှိတယ်။ ပလ္လင်နောက်မှာ အမိုးခုံး၊ ဘေးနှစ်ဖက်မှာ လက်တန်းတွေရှိတယ်။ ပလ္လင်ဘေးနှစ်ဖက်မှာ လက်တန်းတွေရှိပြီး လက်တန်းတွေရဲ့ဘေးမှာ ခြင်္သေ့ရုပ်နှစ်ရုပ်+ ရှိတယ်။
၂၀ လှေကားခြောက်ထစ်ရဲ့ ဘေးတစ်ဖက်စီမှာလည်း ခြင်္သေ့ရုပ်တစ်ရုပ်စီ၊ စုစုပေါင်း ၁၂ ရုပ် ရှိတယ်။ အဲဒီလိုရာဇပလ္လင်မျိုး ဘယ်တိုင်းပြည်မှာမှ မရှိဘူး။
၂၁ ရှောလမုန်မင်းကြီးရဲ့ ဖလားအားလုံးဟာ ရွှေဖလားတွေဖြစ်ပြီး လက်ဘနွန်စံအိမ်+ မှာသုံးတဲ့ အသုံးအဆောင်အားလုံးကိုလည်း ရွှေစင်နဲ့လုပ်ထားတယ်။ ငွေနဲ့လုပ်ထားတာ တစ်ခုမှ မရှိဘူး။ သူ့လက်ထက်မှာ ငွေကို တန်ဖိုးမရှိဘူးလို့ သဘောထားလို့ပဲ။+
၂၂ မင်းကြီးက တာရှိသင်္ဘောတွေကို+ ဟိရံမင်းရဲ့ သင်္ဘောတွေနဲ့အတူ ပင်လယ်ခရီးထွက်ခိုင်းတယ်။ တာရှိသင်္ဘောတွေက ရွှေ၊ ငွေ၊ ဆင်စွယ်၊+ မျောက်ဝံတွေ၊ ဒေါင်းတွေကို သယ်ဆောင်ပြီး သုံးနှစ်တစ်ကြိမ် ပြန်လာလေ့ရှိတယ်။
၂၃ ဒါကြောင့် ရှောလမုန်မင်းကြီးဟာ စည်းစိမ်ချမ်းသာနဲ့+ ဉာဏ်ပညာအရာမှာ+ ကမ္ဘာပေါ်က ဘုရင်ရှိသမျှထက် သာလွန်တယ်။
၂၄ မြေတစ်ပြင်လုံးမှာရှိတဲ့ လူတွေက ရှောလမုန်ဆီ ဘုရားသခင် ပေးအပ်ထားတဲ့ ဉာဏ်ပညာစကားကို+ နားထောင်ဖို့ ရောက်လာကြတယ်။
၂၅ နှစ်တိုင်း မင်းကြီးဆီ ရောက်လာသူတွေက ရွှေထည်ငွေထည်၊ အဝတ်အထည်၊ လက်နက်၊ ဗာလစံဆီမွှေး၊ မြင်းနဲ့ လားတွေကို လက်ဆောင်ပဏ္ဏာအဖြစ် ဆက်သကြတယ်။
၂၆ ရှောလမုန်က မြင်းရထားတွေ၊ မြင်းတွေကိုလည်း စုဆောင်းလေ့ရှိတယ်။ သူ့မှာ မြင်းရထား ၁,၄၀၀၊ မြင်း ၁၂,၀၀၀ ရှိပြီး+ အဲဒါတွေကို မြင်းရထားမြို့တွေမှာ ထားတယ်။ သူစံမြန်းတဲ့ ဂျေရုဆလင်မြို့မှာလည်း ထားတယ်။+
၂၇ မင်းကြီးက ဂျေရုဆလင်မြို့မှာ ငွေတွေကို ကျောက်ခဲတွေလို၊ သစ်ကတိုးသားတွေကို ရှဖိလာအရပ်မှာရှိတဲ့ သဖန်းပိုးစာပင်တွေလို ပေါများစေတယ်။+
၂၈ ရှောလမုန်အတွက် မြင်းတွေကို အီဂျစ်ပြည်ကနေ တင်သွင်းတယ်။ ဘုရင့်ကုန်သည်အဖွဲ့က မြင်းအုပ်တွေကို ပေါက်စျေးပေးပြီး ဝယ်တတ်ကြတယ်။*+
၂၉ မြင်းရထားတစ်စီးကို ငွေစ ၆၀၀၊ မြင်းတစ်ကောင်ကို ၁၅၀ နဲ့ဝယ်ပြီး အီဂျစ်ပြည်ကနေ တင်သွင်းတယ်။ အဲဒါတွေကို ဟိတ္တိဘုရင်တွေနဲ့+ ဆီးရီးယားဘုရင်တွေဆီ ပြန်တင်ပို့ကြတယ်။
အောက်ခြေမှတ်ချက်များ
^ တစ်တဲလင့်က ၃၄.၂ ကီလိုနဲ့ညီ။ နောက်ဆက်တွဲ ခ၁၄ ကိုကြည့်။
^ တစ်ရှယ်ကယ်က ၁၁.၄ ဂရမ်နဲ့ညီ။ နောက်ဆက်တွဲ ခ၁၄ ကိုကြည့်။
^ ဟီဘရူးကျမ်းစောင်တွေထဲက တစ်မိုင်နာက ၅၇၀ ဂရမ်နဲ့ညီ။ နောက်ဆက်တွဲ ခ၁၄ ကိုကြည့်။
^ “အီဂျစ်ပြည်နဲ့ ကောပြည်ကနေ တင်သွင်းတယ်။ ဘုရင့်ကုန်သည်တွေက ကောပြည်ကနေ ဝယ်တတ်ကြတယ်” လည်းဖြစ်နိုင်။ ကောပြည်ဟာ ကိလိကိပြည်ဖြစ်နိုင်။
