၁ ဘုရင်များ ၁၆:၁-၃၄
၁၆ ဗာရှာအပေါ် ချမှတ်မယ့် စီရင်ချက်ကို ဟာနေနိရဲ့သား+ ယေဟုကတစ်ဆင့်+ ယေဟောဝါ ကြေညာတယ်–
၂ “မင်းကို မြေမှုန့်ထဲကနေ ငါချီးမြှောက်ပြီး ငါ့လူမျိုးအစ္စရေးရဲ့ ခေါင်းဆောင်အဖြစ် ခန့်ခဲ့တယ်။+ ဒါပေမဲ့ မင်းက ယေရောဗောင်ရဲ့ လမ်းစဉ်အတိုင်း ဆက်လိုက်ပြီး အစ္စရေးတွေကို အပြစ်ကျူးလွန်စေတယ်။ ဒီတော့ သူတို့လည်း အပြစ်တွေကျူးလွန်ပြီး ငါ့ကို အမျက်ထွက်အောင် လုပ်ကြတယ်။+
၃ ဒါကြောင့် ဗာရှာနဲ့သူ့အမျိုးကို ငါရှင်းထုတ်ပစ်မယ်။ သူ့အမျိုးကို နေဗတ်ရဲ့သား ယေရောဗောင်အမျိုးလို ဖြစ်စေမယ်။+
၄ ဗာရှာအမျိုးထဲက ဘယ်သူမဆို မြို့ထဲမှာသေရင် ခွေးတွေ စားလိမ့်မယ်၊ မြို့ပြင်မှာသေရင် ငှက်တွေ စားလိမ့်မယ်။”
၅ ဗာရှာရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။
၆ နောက်ပိုင်းမှာ ဗာရှာ ကွယ်လွန်သွားတဲ့အတွက် တိရဇာမြို့မှာ+ သင်္ဂြိုဟ်လိုက်ကြတယ်။ သားတော်ဧလာက ထီးနန်းဆက်ခံတယ်။
၇ ဗာရှာနဲ့သူ့အမျိုးခံရမယ့် စီရင်ချက်ကို ဟာနေနိရဲ့သား ပရောဖက် ယေဟုကတစ်ဆင့် ယေဟောဝါ ကြေညာတယ်။ ဗာရှာက ယေဟောဝါရှေ့မှာ မကောင်းတာတွေလုပ်ပြီး အမျက်ထွက်စေတဲ့အတွက်၊ နာဒပ်ကို ကွပ်မျက်တဲ့အတွက် သူ့အမျိုးဟာ ယေရောဗောင်ရဲ့အမျိုးလို ဖြစ်ခဲ့ရတယ်။+
၈ ယုဒဘုရင်အာသ နန်းစံ ၂၆ နှစ်မြောက်မှာ ဗာရှာရဲ့သား ဧလာက အစ္စရေးပြည်မှာ နန်းတက်လာပြီး တိရဇာမြို့မှာ ၂ နှစ် စိုးစံတယ်။
၉ မြင်းရထားတပ် တစ်ဝက်ကို ကြီးကြပ်ရတဲ့ တပ်မှူးဇိမရိက ဘုရင်ကိုလုပ်ကြံဖို့ လျှို့ဝှက်ကြံစည်တယ်။ တိရဇာမြို့မှာ နန်းထိုင်တဲ့ ဧလာဟာ တိရဇာမြို့က နန်းတော်အုပ် အာဇရဲ့အိမ်မှာ သောက်စားမူးယစ်နေတုန်း၊
၁၀ ဇိမရိ ဝင်လာပြီး ဧလာကို လုပ်ကြံလိုက်တယ်။+ ယုဒဘုရင်အာသနန်းစံ ၂၇ နှစ်မြောက်မှာ ဇိမရိ နန်းတက်တယ်။
၁၁ ဇိမရိက ဘုရင်ဖြစ်လာပြီး ရာဇပလ္လင်ပေါ် နန်းထိုင်တာနဲ့ ဗာရှာရဲ့ အမျိုးအားလုံးကို ကွပ်မျက်လိုက်တယ်။ ဆွေတော်မျိုးတော်ဖြစ်စေ၊ မိတ်ဆွေဖြစ်စေ ယောက်ျားတစ်ယောက်ကိုမှ မချန်ထားဘူး။
၁၂ ဒီလိုနဲ့ ဇိမရိဟာ ဗာရှာရဲ့အမျိုး တစ်မျိုးလုံးကို သုတ်သင်လိုက်တယ်။ ဗာရှာခံရမယ့် စီရင်ချက်အကြောင်း ပရောဖက် ယေဟုကတစ်ဆင့် ယေဟောဝါ ကြေညာတဲ့အတိုင်း ဖြစ်လာတယ်။+
၁၃ ဗာရှာနဲ့ သားတော်ဧလာက အပြစ်တွေကျူးလွန်ပြီး အစ္စရေးတွေကိုလည်း အပြစ်ကျူးလွန်စေခဲ့တယ်၊ အသုံးမဝင်တဲ့ ရုပ်တုတွေ ကိုးကွယ်ပြီး အစ္စရေးတို့ရဲ့ဘုရား ယေဟောဝါကို အမျက်ထွက်အောင် လုပ်ခဲ့တဲ့အတွက် အဲဒီလိုဖြစ်ရတာပဲ။+
၁၄ ဧလာရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။
၁၅ ယုဒဘုရင်အာသ နန်းစံ ၂၇ နှစ်မြောက်မှာ ဇိမရိက တိရဇာမြို့မှာ ခုနစ်ရက် စိုးစံတယ်။ အဲဒီအချိန်မှာ စစ်သည်တွေက ဖိလိတိလူတွေပိုင်တဲ့ ဂိဗသုန်မြို့ကို+ တိုက်ခိုက်ဖို့ တပ်ချထားတယ်။
၁၆ ဇိမရိက လျှို့ဝှက်ကြံစည်ပြီး ဘုရင်ကို လုပ်ကြံလိုက်ပြီဆိုတဲ့ သတင်းကို တပ်ချထားတဲ့စစ်သည်တွေ ကြားတယ်။ ဒါကြောင့် အဲဒီနေ့မှာပဲ တပ်စခန်းမှာရှိတဲ့ အစ္စရေးတွေက ဗိုလ်ချုပ်သြမရိကို+ အစ္စရေးဘုရင်အဖြစ် မင်းမြှောက်လိုက်တယ်။
၁၇ ပြီးတော့ သြမရိနဲ့ အစ္စရေးစစ်သည်တွေက ဂိဗသုန်မြို့ကနေ ချီတက်သွားပြီး တိရဇာမြို့ကို ဝိုင်းထားလိုက်တယ်။
၁၈ မြို့တော် သိမ်းပိုက်ခံရပြီဆိုတာကို ဇိမရိသိတာနဲ့ နန်းတော်ရဲ့ ခံတပ်မျှော်စင်ထဲ ဝင်ပြီး နန်းတော်ကို မီးရှို့လိုက်တယ်၊ ကိုယ်တိုင်လည်း မီးအလောင်ခံပြီး သေသွားတယ်။+
၁၉ ဒီလိုဖြစ်ရတာဟာ ယေဟောဝါရှေ့မှာ မကောင်းတာတွေ လုပ်ခဲ့တဲ့ သူကိုယ်တိုင်ရဲ့ အပြစ်ကြောင့်ပဲ။ သူဟာ အစ္စရေးတွေကို အပြစ်ကျူးလွန်စေခဲ့တဲ့ ယေရောဗောင်ရဲ့ လမ်းစဉ်ကို လိုက်ခဲ့တယ်။+
၂၀ ဇိမရိရဲ့ ကျန်တဲ့သမိုင်းကြောင်းတွေ၊ ဘုရင်ကိုလုပ်ကြံဖို့ လျှို့ဝှက်ကြံစည်တာတွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။
၂၁ အဲဒီနောက် အစ္စရေးတွေထဲမှာ ဂိနတ်ရဲ့သား တိဗနိကိုထောက်ခံပြီး မင်းမြှောက်ချင်တဲ့ အုပ်စုနဲ့ သြမရိကို ထောက်ခံတဲ့ အုပ်စုဆိုပြီး နှစ်စုကွဲသွားတယ်။
၂၂ ဒါပေမဲ့ သြမရိကို ထောက်ခံတဲ့ အုပ်စုက ဂိနတ်ရဲ့သား တိဗနိကိုထောက်ခံတဲ့ အုပ်စုကို အနိုင်ရသွားတယ်။ တိဗနိ သေဆုံးသွားပြီး ဩမရိ နန်းတက်လာတယ်။
၂၃ ယုဒဘုရင်အာသ နန်းစံ ၃၁ နှစ်မြောက်မှာ သြမရိက အစ္စရေးပြည်မှာ နန်းတက်လာပြီး ၁၂ နှစ် စိုးစံတယ်။ တိရဇာမြို့မှာ ၆ နှစ် နန်းထိုင်ပြီးနောက်
၂၄ ရှမာရိတောင်ကို ရှမေရဆီကနေ ငွေ ၂ တဲလင့်* နဲ့ဝယ်ပြီး တောင်ပေါ်မှာ မြို့တည်တယ်။ သူတည်တဲ့မြို့ကို ပိုင်ရှင်ရှမေရရဲ့ နာမည်ကို အစွဲပြုပြီး ရှမာရိ*+ လို့မှည့်ခေါ်တယ်။
၂၅ သြမရိက ယေဟောဝါရှေ့မှာ မကောင်းတာတွေ ဆက်လုပ်တယ်၊ အရင်ကဘုရင်တွေထက် ပိုဆိုးတယ်။+
၂၆ သူက နေဗတ်သား ယေရောဗောင်ရဲ့ လမ်းစဉ်အတိုင်း လိုက်ခဲ့တယ်။ အစ္စရေးတွေကို အသုံးမဝင်တဲ့ ရုပ်တုတွေ ကိုးကွယ်အောင်၊+ အစ္စရေးတို့ရဲ့ဘုရား ယေဟောဝါကို အမျက်ထွက်အောင်လုပ်ခဲ့တဲ့ ယေရောဗောင်ရဲ့ လမ်းစဉ်အတိုင်း လိုက်ခဲ့တယ်။
၂၇ သြမရိရဲ့ ကျန်တဲ့သမိုင်းကြောင်းတွေ၊ လုပ်ဆောင်ခဲ့တာတွေ၊ စွမ်းဆောင်ချက်တွေကို အစ္စရေးဘုရင်တွေရဲ့ ရာဇဝင်မှတ်တမ်းမှာ ရေးထားတယ်။
၂၈ နောက်ပိုင်းမှာ ဩမရိ ကွယ်လွန်သွားတဲ့အတွက် ရှမာရိမြို့မှာ သင်္ဂြိုဟ်လိုက်ကြတယ်။ သားတော်အာဟပ်က+ ထီးနန်းဆက်ခံတယ်။
၂၉ ယုဒဘုရင်အာသ နန်းစံ ၃၈ နှစ်မြောက်မှာ သြမရိရဲ့သား အာဟပ်က အစ္စရေးပြည်မှာ နန်းတက်လာတယ်။ သြမရိရဲ့သား အာဟပ်က ရှမာရိမြို့မှာ+ နန်းထိုင်ပြီး အစ္စရေးပြည်ကို ၂၂ နှစ် စိုးစံတယ်။
၃၀ သြမရိရဲ့သား အာဟပ်က ယေဟောဝါရှေ့မှာ မကောင်းတာတွေ ဆက်လုပ်တယ်၊ အရင်ကဘုရင်တွေထက် ပိုဆိုးတယ်။+
၃၁ နေဗတ်သား ယေရောဗောင်ရဲ့ အပြစ်လမ်းစဉ်အတိုင်း+ လိုက်တာကို မကျေနပ်သေးဘဲ ဆိုင်ဒုန်ဘုရင်+ ဧသဗာလရဲ့သမီး ယေဇဗေလကိုလည်း+ မိဖုရားမြှောက်ပြီး ဗာလဘုရားကို+ ဦးချဝတ်ပြုတယ်။
၃၂ ဒါ့အပြင် ရှမာရိမြို့မှာ သူတည်ဆောက်ထားတဲ့ ဗာလဘုရားကျောင်းမှာ+ ဗာလဘုရားအတွက် ယဇ်ပလ္လင်တစ်ခု တည်တယ်။
၃၃ အာဟပ်က ကိုးကွယ်ရာသစ်တိုင်*+ ကိုလည်း လုပ်တယ်။ အစ္စရေးတို့ရဲ့ဘုရား ယေဟောဝါကို အရင်က အစ္စရေးဘုရင်တွေထက် ပိုပြီးအမျက်ထွက်စေခဲ့တယ်။
၃၄ အာဟပ်လက်ထက်မှာ ဗေသလမြို့သား ဟိဧလက ယေရိခေါမြို့ကို ပြန်ဆောက်တယ်။ မြို့ကိုအုတ်မြစ်ချတဲ့အခါ သူ့ရဲ့သားဦးအဘိရံ သေသွားတယ်။ မြို့တံခါးတွေကို တပ်ဆင်တဲ့အခါ သားထွေးစေဂုပ် သေသွားတယ်။ နုန်ရဲ့သား ယောရှုကတစ်ဆင့် ယေဟောဝါ ပြောခဲ့တဲ့အတိုင်း ဖြစ်လာတယ်။+
အောက်ခြေမှတ်ချက်များ
^ အဓိပ္ပာယ်၊ “ရှမေရအမျိုး ပိုင်တဲ့မြို့။”
^ တစ်တဲလင့်က ၃၄.၂ ကီလိုနဲ့ညီ။ နောက်ဆက်တွဲ ခ၁၄ ကိုကြည့်။
