၁ ဘုရင်များ ၉:၁-၂၈
၉ ယေဟောဝါရဲ့အိမ်တော်၊ နန်းတော်နဲ့+ အလိုရှိရာ မှန်သမျှကို ရှောလမုန် ဆောက်လုပ်ပြီးသွားတဲ့အခါ၊+
၂ ယေဟောဝါက ဂိဗောင်မြို့မှာတုန်းကလိုပဲ ရှောလမုန်ရဲ့ အိပ်မက်မှာ ဒုတိယအကြိမ် ရောက်လာတယ်။+
၃ ပြီးတော့ ယေဟောဝါက “မင်းဆုတောင်းတာ၊ မျက်နှာသာရဖို့ အသနားခံတာကို ငါကြားပြီ။ မင်းတည်ဆောက်တဲ့ အိမ်တော်ကို ငါသန့်ရှင်းမြင့်မြတ်စေပြီး အဲဒီမှာ ငါ့နာမည်ကို ထာဝစဉ်တည်စေပြီ။+ ဒါကြောင့် ဒီအိမ်တော်ကို ငါ အမြဲကြည့်ရှုစောင့်ရှောက်မယ်။+
၄ မင်းရဲ့ဖခင် ဒါဝိဒ်လို ငါ့ရှေ့မှာ တည်ကြည်တဲ့စိတ်နဲ့+ ဖြောင့်မတ်စွာ+ လျှောက်လှမ်းမယ်၊+ ငါမိန့်မှာသမျှအတိုင်း လုပ်ဆောင်ပြီး+ ငါ့စည်းမျဉ်းတွေ၊ တရားစီရင်ချက်တွေကို နာခံမယ်ဆိုရင်၊+
၅ ‘အစ္စရေးရာဇပလ္လင်ပေါ်မှာ နန်းထိုင်မယ့် မင်းရဲ့မျိုးဆက် ဘယ်တော့မှ မပြတ်စေရဘူး’ ဆိုပြီး မင်းရဲ့ဖခင်ကို ငါကတိပေးခဲ့တဲ့အတိုင်း အစ္စရေးနိုင်ငံမှာ မင်းရဲ့ရာဇပလ္လင်ကို ငါတည်မြဲစေမယ်။+
၆ ဒါပေမဲ့ မင်းနဲ့ မင်းရဲ့သားမြေးတွေ ငါ့ကိုကျောခိုင်းပြီး ငါမှာထားတဲ့ ပညတ်ချက်တွေ၊ ဥပဒေတွေကို မလိုက်နာဘူးဆိုရင်၊ တခြားဘုရားတွေကို သွားပြီး ရှိခိုးဝတ်ပြုမယ်ဆိုရင်၊+
၇ ငါပေးထားတဲ့ပြည်ကနေ အစ္စရေးတွေကို ပယ်ရှင်းမယ်။+ ငါ့နာမည်အတွက် သန့်ရှင်းမြင့်မြတ်စေတဲ့ ဒီအိမ်တော်ကို ငါ့ရှေ့မှောက်ကနေ ဖယ်ရှားမယ်။+ အစ္စရေးတွေဟာ လူမျိုးတွေအလယ်မှာ နှာခေါင်းရှုံ့စရာ၊ လှောင်ပြောင်စရာ ဖြစ်လာမယ်။+
၈ ဒီအိမ်တော်ဟာလည်း အပျက်အယွင်းပုံကြီး ဖြစ်သွားမယ်။+ လမ်းသွားလမ်းလာတွေက အံ့သြတကြီးကြည့်ပြီး လှောင်ပြောင်ကြမယ်။* ‘ယေဟောဝါက ဒီပြည်နဲ့ ဒီအိမ်တော်ကို ဘာကြောင့် ဒီလိုလုပ်လိုက်တာပါလိမ့်’ လို့ပြောကြလိမ့်မယ်။+
၉ ပြီးတော့ ‘အီဂျစ်ပြည်ကနေ သူတို့ဘိုးဘေးတွေကို ခေါ်ထုတ်လာတဲ့အရှင် သူတို့ရဲ့ဘုရား ယေဟောဝါကို စွန့်ပစ်တဲ့အပြင် တခြားဘုရားတွေကို ဆည်းကပ်ပြီး ဦးချဝတ်ပြုခဲ့တာကိုး။ ဒါကြောင့် ယေဟောဝါက သူတို့ကို ဒီလိုဘေးဆိုးတွေ ကြုံစေတာပေါ့’ ဆိုပြီး ပြောကြလိမ့်မယ်” လို့ပြောတယ်။+
၁၀ ယေဟောဝါရဲ့အိမ်တော်နဲ့ နန်းတော် အဆောက်အအုံနှစ်ခုကို ရှောလမုန် တည်ဆောက်တဲ့အချိန် အနှစ် ၂၀ စေ့တဲ့အခါ၊+
၁၁ ရှောလမုန်မင်းကြီးက တိုင်ရာဘုရင်ဟိရံကို+ ဂါလိလဲနယ်မှာရှိတဲ့ မြို့ပေါင်း ၂၀ ပေးတယ်။ ဟိရံမင်းက သစ်ကတိုးသားတွေ၊ ဂျူနီပါထင်းရှူးသားတွေ၊ ရွှေတွေကို ရှောလမုန် လိုချင်သလောက် ပေးခဲ့လို့ပဲ။+
၁၂ တိုင်ရာမြို့မှာ နန်းစံတဲ့ ဟိရံမင်းက ရှောလမုန်ပေးတဲ့မြို့တွေကို သွားကြည့်ပြီး သဘောမကျတဲ့အတွက်၊
၁၃ “အဆွေတော်၊ ငါ့ကို ဘယ်လိုမြို့တွေ ပေးလိုက်တာလဲ” ဆိုပြီးပြောတယ်။ အဲဒီမြို့တွေက ကာဗုလနယ်မြေ* ဆိုပြီး ဒီနေ့အထိ နာမည်တွင်နေတုန်းပဲ။
၁၄ အဲဒီအတောအတွင်းမှာ ဟိရံက ရှောလမုန်မင်းကြီးကို ရွှေအချိန် တဲလင့်*+ ၁၂၀ ပို့ပေးတယ်။
၁၅ ဒါကတော့ ယေဟောဝါရဲ့အိမ်တော်၊+ နန်းတော်၊ တောင်ကုန်း၊*+ ဂျေရုဆလင်မြို့ရိုး၊ ဟာဇော်မြို့၊+ မေဂိဒေါမြို့၊+ ဂေဇာမြို့တွေ+ ဆောက်တုန်းက ရှောလမုန်မင်းကြီးခိုင်းတဲ့ ချွေးတပ်သားတွေရဲ့+ အကြောင်းပဲ။
၁၆ (အီဂျစ်ဘုရင်ဖာရောက ဂေဇာမြို့ကို ချီတက်သိမ်းပိုက်ပြီး မီးရှို့လိုက်တယ်။ မြို့ထဲမှာနေတဲ့ ခါနန်လူမျိုးတွေကိုလည်း+ ကွပ်မျက်တယ်။ ပြီးတော့ ဂေဇာမြို့ကို သမီးတော်၊ ရှောလမုန်ရဲ့မိဖုရားအတွက် လက်ဖွဲ့ပေးလိုက်တယ်။)+
၁၇ ရှောလမုန်က ဂေဇာမြို့၊ အောက်ဗေသောရုန်မြို့၊+
၁၈ ဗာလတ်မြို့၊+ သူ့တိုင်းပြည်မှာရှိတဲ့ တောကန္တာရထဲက တာမာမြို့၊
၁၉ ရိက္ခာသိုလှောင်ဖို့ မြို့တွေ၊ မြင်းရထားတွေထားဖို့ မြို့တွေ၊+ မြင်းစီးသူရဲတွေထားဖို့ မြို့တွေကို တည်တယ်။ ဂျေရုဆလင်မြို့၊ လက်ဘနွန်ပြည်နဲ့ သူ့နိုင်ငံတစ်ဝန်းလုံးမှာ အလိုရှိရာမှန်သမျှ တည်ဆောက်တယ်။
၂၀ အစ္စရေးလူမျိုးမဟုတ်တဲ့ အာမောရိ၊ ဟိတ္တိ၊ ဖေရဇိ၊ ဟိဝိ၊ ယေဗုသိလူမျိုးတွေထဲက ကျန်ကြွင်းသူအားလုံး၊+
၂၁ အစ္စရေးတွေ မဖျက်ဆီးနိုင်ခဲ့လို့ တိုင်းပြည်မှာ ကျန်ကြွင်းတဲ့ အဲဒီလူမျိုးတွေရဲ့ သားမြေးတွေကို ရှောလမုန်က ကျွန်အဖြစ် စေခိုင်းတယ်။ ဒီနေ့အထိ သူတို့ ကျွန်ခံနေရတုန်းပဲ။+
၂၂ အစ္စရေးတွေကိုတော့ တစ်ယောက်မှ ကျွန်မခံခိုင်းဘူး။+ စစ်သည်တွေ၊ အမှုထမ်းတွေ၊ မှူးမတ်တွေ၊ ဗိုလ်မှူးတွေ၊ ရထားထိန်းနဲ့ မြင်းစီးသူရဲတွေရဲ့ ခေါင်းဆောင်တွေအဖြစ် အမှုထမ်းစေတယ်။
၂၃ ရှောလမုန်ရဲ့အလုပ်ကို ကြီးကြပ်ရတဲ့၊ အလုပ်သမားတွေကို ကြီးကြပ်ရတဲ့ ဝန်မင်း+ ၅၅၀ ရှိတယ်။
၂၄ ဖာရောရဲ့သမီးတော်က+ ဒါဝိဒ်မြို့+ ကနေထွက်ပြီး ရှောလမုန်ဆောက်ပေးတဲ့ နန်းဆောင်မှာ သွားနေတယ်။ အဲဒီနောက် ရှောလမုန်က တောင်ကုန်းကို*+ တည်ဆောက်တယ်။
၂၅ ရှောလမုန်က ယေဟောဝါအတွက် တည်ဆောက်တဲ့ ပူဇော်ရာပလ္လင်ပေါ်မှာ မီးရှို့ရာ ပူဇော်သက္ကာတွေ၊ မိတ်သဟာယ ပူဇော်သက္ကာတွေကို တစ်နှစ်သုံးကြိမ်+ ပူဇော်တယ်။+ ယေဟောဝါရှေ့၊ ပူဇော်ရာပလ္လင်ပေါ်မှာ မီးရှို့ပူဇော်တယ်။ ဒီလိုနဲ့ အိမ်တော်ကို လက်စသတ်လိုက်တယ်။+
၂၆ ဒါ့အပြင် ရှောလမုန်မင်းကြီးက ဧဒုံပြည် ပင်လယ်နီကမ်းနား၊+ ဧလုတ်အရပ်နားက ဧဇယုန်ဂါဗာအရပ်မှာ+ သင်္ဘောတွေ တည်ဆောက်တယ်။
၂၇ ဟိရံမင်းကြီးကလည်း အတွေ့အကြုံရှိတဲ့ သူ့ရဲ့ သင်္ဘောသားတချို့ကို+ လွှတ်ပြီး ရှောလမုန်ရဲ့ အမှုထမ်းတွေနဲ့အတူ အမှုထမ်းစေတယ်။
၂၈ သူတို့က သြဖိရအရပ်ကို+ သွားပြီး အဲဒီကနေ ရွှေအချိန် တဲလင့် ၄၂၀ ကို ရှောလမုန်မင်းကြီးဆီ ယူလာကြတယ်။
အောက်ခြေမှတ်ချက်များ
^ မူရင်း၊ “လေချွန်ကြလိမ့်မယ်။”
^ “ညံ့ဖျင်းတဲ့မြေ” လည်းဖြစ်နိုင်။
^ တစ်တဲလင့်က ၃၄.၂ ကီလိုနဲ့ညီ။ နောက်ဆက်တွဲ ခ၁၄ ကိုကြည့်။
^ ဒါမှမဟုတ်၊ “မိလော။” မြေဖို့ထားတဲ့နေရာလို့ အဓိပ္ပာယ်ရှိတဲ့ ဟီဘရူးစကားလုံး။
^ ဒါမှမဟုတ်၊ “မိလောကို။” မြေဖို့ထားတဲ့နေရာလို့ အဓိပ္ပာယ်ရှိတဲ့ ဟီဘရူးစကားလုံး။