၁ ရှမွေလ ၂၃:၁-၂၉
၂၃ “ဖိလိတိလူတွေ ကိလာမြို့ကို+ တိုက်ခိုက်ပြီး ကောက်နယ်တလင်းတွေကို လုယက်နေကြတယ်” ဆိုတဲ့သတင်းကို ဒါဝိဒ်ကြားတဲ့အခါ၊
၂ “သူတို့ကို သွားတိုက်ခိုက်ရမလား” လို့ ယေဟောဝါကို မေးတယ်။+ ယေဟောဝါကလည်း “သွားပါ။ ဖိလိတိလူတွေကို တိုက်ခိုက်ပြီး ကိလာမြို့ကို ကယ်တင်ပါ” လို့ဖြေတယ်။
၃ ဒါပေမဲ့ ဒါဝိဒ်ရဲ့လူတွေက “ဒီယုဒနယ်မြေမှာတောင် ကျွန်တော်တို့ ဒီလောက်ကြောက်နေရတာ။+ ကိလာမြို့ကို သွားပြီး ဖိလိတိတပ်တွေကို တိုက်ခိုက်ဖို့ဆိုရင် ပိုလို့တောင် ကြောက်ပါတယ်”+ လို့ပြောကြတယ်။
၄ ဒါနဲ့ ယေဟောဝါကို ဒါဝိဒ်ထပ်မေးတဲ့အခါ+ ယေဟောဝါက “ကိလာမြို့ကို ဆင်းသွားပါ။ ဖိလိတိလူတွေကို မင်းလက်ထဲ ငါအပ်မယ်”+ ဆိုပြီးပြောတယ်။
၅ ဒါဝိဒ်လည်း သူ့လူတွေနဲ့အတူ ကိလာမြို့ကို ဆင်းသွားပြီး ဖိလိတိလူတွေကို တိုက်ခိုက်တယ်။ သူတို့ရဲ့ တိရစ္ဆာန်တွေကို သိမ်းယူပြီး ဖိလိတိလူ အမြောက်အမြားကို သတ်ပစ်တယ်။ ဒီနည်းနဲ့ ကိလာမြို့သားတွေကို ကယ်တင်ခဲ့တယ်။+
၆ အဟိမလက်ရဲ့သား အဗျာသာက+ ဒါဝိဒ်ရှိနေတဲ့ ကိလာမြို့ကိုထွက်ပြေးလာတဲ့အခါ သင်တိုင်းကိုပါ ယူလာတယ်။
၇ “ကိလာမြို့မှာ ဒါဝိဒ်ရောက်နေတယ်” ဆိုတဲ့သတင်းကိုရတဲ့အခါ ရှောလုက “သူ့ကို ငါ့လက်ထဲ ဘုရားသခင် အပ်ပြီ။+ မြို့တံခါးတွေ၊ ကန့်လန့်ကျင်တွေရှိတဲ့မြို့ထဲ ရောက်နေတာဆိုတော့ သူပိတ်မိနေလောက်ပြီ” လို့ပြောတယ်။
၈ ဒါကြောင့် ရှောလုက ကိလာမြို့ကို ဆင်းသွားဖို့၊ ဒါဝိဒ်နဲ့ အပေါင်းပါတွေကို ဝိုင်းရံတိုက်ခိုက်ဖို့ သူ့လူအားလုံးကို ဆင့်ခေါ်လိုက်တယ်။
၉ ရှောလု မကောင်းကြံနေမှန်း ဒါဝိဒ်သိသွားတဲ့အခါ “သင်တိုင်း ယူလာခဲ့ပါဦး” လို့ ပုရောဟိတ်အဗျာသာကို ပြောတယ်။+
၁၀ အဲဒီနောက် “အစ္စရေးတို့ရဲ့ဘုရား ယေဟောဝါ၊ ရှောလုမင်းက ကျွန်တော့်ကြောင့် ကိလာမြို့ကို လာဖျက်ဆီးဖို့ ကြံစည်နေတဲ့သတင်းကို ကြားပါတယ်။+
၁၁ ကိလာမြို့ခေါင်းဆောင်တွေက ကျွန်တော့်ကို ရှောလုမင်း လက်ထဲအပ်မှာလား။ ကျွန်တော်ကြားတဲ့အတိုင်း သူဆင်းလာမှာလား။ အစ္စရေးတို့ရဲ့ဘုရား ယေဟောဝါ၊ ကျွန်တော့်ကို အဖြေပေးပါ” လို့အသနားခံတဲ့အခါ ယေဟောဝါက “ရှောလု ဆင်းလာလိမ့်မယ်” လို့ပြောတယ်။
၁၂ “ကိလာမြို့ခေါင်းဆောင်တွေကရော ကျွန်တော်နဲ့ ကျွန်တော့်လူတွေကို ရှောလုမင်းလက်ထဲ အပ်မှာလား” လို့ ဒါဝိဒ်ထပ်မေးတော့ ယေဟောဝါက “အပ်လိမ့်မယ်” လို့ဖြေတယ်။
၁၃ ဒါဝိဒ်လည်း သူ့လူ ၆၀၀ လောက်နဲ့အတူ+ ကိလာမြို့ကနေ ချက်ချင်းထွက်ပြီး ရှောင်တိမ်းလို့ရနိုင်တဲ့ နေရာတွေဆီ သွားကြတယ်။ ကိလာမြို့ကနေ ဒါဝိဒ်ထွက်ပြေးပြီဆိုတဲ့ သတင်းကို ရှောလုကြားတဲ့အခါ ဆက်မလိုက်တော့ဘူး။
၁၄ ဒါဝိဒ်က သွားဖို့ခက်ခဲတဲ့ နေရာတွေ၊ ဇိဖတောမှာရှိတဲ့ တောကြိုတောင်ကြားတွေမှာ ရှောင်တိမ်းနေတယ်။+ ဒါဝိဒ်ကို ရှောလု အဆက်မပြတ် လိုက်ရှာနေပေမဲ့+ ယေဟောဝါက ရှောလုလက်ထဲ မအပ်ဘူး။
၁၅ ဇိဖတော ဟောရရှအရပ်မှာ ဒါဝိဒ်ရှိနေတုန်း သူ့ရဲ့အသက်ကို သတ်ဖို့ ရှောလုထွက်လာပြီဆိုတာ သိလိုက်တယ်။*
၁၆ ရှောလုရဲ့သား ယောနသန်က ဟောရရှအရပ်မှာရှိတဲ့ ဒါဝိဒ်ဆီလာပြီး ယေဟောဝါကို ယုံကြည်စိတ်ချဖို့ အားပေးတယ်။+
၁၇ “မကြောက်ပါနဲ့။ မင်းကို ခမည်းတော်ရှောလု ရှာလို့တွေ့မှာ မဟုတ်ဘူး။ မင်းဟာ အစ္စရေးဘုရင် ဖြစ်လာမယ်။+ ငါကိုယ်တိုင် မင်းကို ထောက်ခံအားပေးမယ်။ ဒါကို ခမည်းတော်လည်း သိထားတယ်”+ လို့ပြောတယ်။
၁၈ အဲဒီနောက် ယေဟောဝါရှေ့မှာ နှစ်ယောက်သား ကတိသစ္စာပြုကြတယ်။+ ဒါဝိဒ်က ဟောရရှအရပ်မှာ နေခဲ့ပြီး ယောနသန်ကတော့ အိမ်ပြန်သွားတယ်။
၁၉ ဇိဖမြို့သားတွေက ရှောလုရှိနေတဲ့ ဂိဗာမြို့ဆီ တက်သွားပြီး+ “ဒါဝိဒ်က ဟောရရှအရပ်မှာရှိတဲ့+ သွားဖို့ခက်ခဲတဲ့ နေရာတွေမှာ၊ ယေရှိမုန်အရပ်ရဲ့တောင်ဘက်+ ဟခိလတောင်ကုန်းပေါ်မှာ+ ပုန်းနေပါတယ်။ ကျွန်တော်တို့နဲ့ သိပ်မဝေးဘူး။+
၂၀ မင်းကြီး အလိုရှိတဲ့အချိန်မှာ ဆင်းလာနိုင်ပါတယ်။ သူ့ကို မင်းကြီးလက်ထဲ ကျွန်တော်တို့ အပ်ပါ့မယ်”+ လို့ပြောတော့၊
၂၁ ရှောလုက “ငါ့ကို စာနာကြတဲ့အတွက် မင်းတို့ကို ယေဟောဝါဘုရား ကောင်းချီးပေးပါစေ။
၂၂ အခုတော့ မင်းတို့ပြန်သွားကြ။ သူ ဘယ်မှာ ပုန်းနေတယ်၊ သူ့ကို ဘယ်သူ ရှာတွေ့ခဲ့တယ်ဆိုတာ အသေအချာ စုံစမ်းပါ။ သူ သိပ်ဉာဏ်များတယ်လို့ ငါကြားတယ်။
၂၃ သူပုန်းတတ်တဲ့နေရာတွေကို အသေအချာ မှတ်ထားပြီး အထောက်အထားတွေ ယူခဲ့ကြ။ အဲဒီအခါကျရင် မင်းတို့နဲ့အတူ ငါလိုက်မယ်။ ထောင်နဲ့ချီတဲ့ ယုဒလူတွေကြားမှာ ပုန်းနေရင်တောင် ငါမတွေ့တွေ့အောင် ရှာမယ်” လို့ပြောတယ်။
၂၄ ဒါကြောင့် ဇိဖမြို့သားတွေဟာ ရှောလုထက်အရင် ဇိဖမြို့ကို+ ပြန်သွားကြတယ်။ ဒါဝိဒ်နဲ့ သူ့လူတွေကတော့ မောနတော၊+ ယေရှိမုန်အရပ်ရဲ့ တောင်ဘက် အရာဗာအရပ်မှာ+ ရှိနေကြတယ်။
၂၅ ရှောလုက ဒါဝိဒ်ကိုရှာဖို့ သူ့လူတွေနဲ့အတူ ရောက်လာတယ်။+ ဒီသတင်းကို ဒါဝိဒ်ကြားတဲ့အခါ ချက်ချင်းပဲ ကျောက်ဆောင်ရှိရာကို ဆင်းသွားပြီး+ မောနတောမှာ ပုန်းနေလိုက်တယ်။ ဒါကို ရှောလုကြားတော့ မောနတောကို လိုက်လာတယ်။
၂၆ ရှောလုက တောင်ရဲ့ဒီဘက်ခြမ်းကို ရောက်လာတဲ့အခါ ဒါဝိဒ်နဲ့ သူ့လူတွေက တောင်ရဲ့ဟိုဘက်ခြမ်းမှာ ရှိနေကြတယ်။ ဒါဝိဒ်တို့က အဖမ်းခံရမယ့်ဆဲဆဲ ဖြစ်နေလို့+ ရှောလုနဲ့ သူ့လူတွေရဲ့ရန်ကနေ လွတ်အောင် ထွက်ပြေးဖို့ ကြိုးစားချိန်မှာပဲ၊+
၂၇ ရှောလုဆီ တမန်တစ်ယောက် ရောက်လာပြီး “အမြန်ပြန်ခဲ့ပါ။ ဖိလိတိတွေ တိုင်းပြည်ကို လာတိုက်နေပြီ” လို့သတင်းပေးတယ်။
၂၈ ရှောလုလည်း ဒါဝိဒ်နောက် ဆက်မလိုက်တော့ဘဲ+ ဖိလိတိလူတွေကို တိုက်ခိုက်ဖို့ ပြန်လှည့်သွားတယ်။ ဒါကြောင့် အဲဒီနေရာဟာ လမ်းခွဲကျောက်ဆောင်လို့ နာမည်တွင်သွားတယ်။
၂၉ ဒါဝိဒ်က အဲဒီကနေ တက်သွားပြီး အင်ဂေဒိတောထဲက+ သွားဖို့ခက်ခဲတဲ့ နေရာတွေမှာ ပုန်းရှောင်နေတယ်။
အောက်ခြေမှတ်ချက်များ
^ “ထွက်လာလို့ ကြောက်သွားတယ်” လည်းဖြစ်နိုင်။
