၁ ရှမွေလ ၃:၁-၂၁
-
ရှမွေလ ပရောဖက်ဖြစ်လာ (၁-၂၁)
၃ အဲဒီအတောအတွင်း လူငယ်လေး ရှမွေလဟာ ဧလိလက်အောက်မှာ ယေဟောဝါအတွက် အမှုဆောင်နေတယ်။+ အဲဒီအချိန်တုန်းက ယေဟောဝါဆီက စကားတော်ကို မကြားရသလောက်ပဲ။ စိတ်အာရုံ မြင်ရတာတွေလည်း+ သိပ်မရှိဘူး။
၂ ဧလိဟာ မျက်စိမှုန်ပြီး ကောင်းကောင်း မမြင်ရတော့ဘူး။+ တစ်နေ့၊ အခန်းထဲမှာ သူအိပ်နေတယ်။
၃ ဘုရားသခင်ရဲ့ မီးခွက်တွေ+ မငြိမ်းသေးဘူး။ ရှမွေလကတော့ သေတ္တာတော်ရှိရာ ယေဟောဝါရဲ့ ဗိမာန်တော်မှာ*+ အိပ်နေတယ်။
၄ အဲဒီအခါ ယေဟောဝါက ရှမွေလကို ခေါ်တော့ “ကျွန်တော် ရှိပါတယ်” လို့ ပြန်ထူးတယ်။
၅ ပြီးတော့ ဧလိဆီ ပြေးသွားပြီး “ကျွန်တော့်နာမည် ခေါ်သံကြားလို့ လာတာပါ” ဆိုပြီး ပြောတယ်။ ဒါပေမဲ့ ဧလိက “ငါမခေါ်ပါဘူး။ ပြန်သွားအိပ်ချေ” လို့ပြောတာနဲ့ သူလည်း ပြန်သွားအိပ်တယ်။
၆ ယေဟောဝါက “ရှမွေလ” လို့ ထပ်ခေါ်တယ်။ ရှမွေလလည်း ထသွားပြီး “ကျွန်တော့်နာမည် ခေါ်သံကြားလို့ လာတာပါ” ဆိုတော့ ဧလိက “ငါမခေါ်ပါဘူး၊ သားရယ်။ ပြန်သွားအိပ်ပါ” ဆိုပြီးပြောတယ်။
၇ (ရှမွေလက ယေဟောဝါကို ကောင်းကောင်း မသိကျွမ်းသေးဘူး။ ယေဟောဝါဆီက သတင်းစကားတွေလည်း မရသေးဘူး။)+
၈ ယေဟောဝါက “ရှမွေလ” လို့ တတိယအကြိမ် ခေါ်ပြန်တယ်။ သူက ဧလိဆီ ထသွားပြီး “ကျွန်တော့်နာမည် ခေါ်သံ ကြားလို့ လာတာပါ” ဆိုပြီးပြောတယ်။
ဒါနဲ့ ဒီလူငယ်လေးကို ခေါ်နေတာ ယေဟောဝါပဲဆိုတာ ဧလိ ရိပ်မိသွားတဲ့အတွက်၊
၉ “ပြန်သွားအိပ်ပါ။ နောက်တစ်ခါ ထပ်ခေါ်ရင် ‘ယေဟောဝါဘုရား၊ ကျွန်တော် နားထောင်နေပါတယ်’ လို့ပြောနော်” ဆိုပြီး မှာတယ်။ ရှမွေလလည်း ပြန်သွားအိပ်တယ်။
၁၀ ယေဟောဝါက အရင်လိုပဲ “ရှမွေလ၊ ရှမွေလ” လို့ခေါ်ပြန်တယ်။ ရှမွေလက “ကျွန်တော် နားထောင်နေပါတယ်” လို့ဖြေတယ်။
၁၁ ဒါနဲ့ ယေဟောဝါက “ကြားသူတိုင်းကို တုန်လှုပ်ချောက်ချားစေမယ့်* အရာကို အစ္စရေးလူမျိုးမှာ ငါလုပ်တော့မယ်။+
၁၂ အဲဒီနေ့ကျရင် ဧလိရဲ့အိမ်သားတွေနဲ့ ပတ်သက်ပြီး ငါပြောခဲ့သမျှ အစအဆုံး ငါလုပ်မယ်။+
၁၃ ဧလိက သူ့သားတွေ ဘုရားသခင်ကို ပြစ်မှားပြောဆိုနေမှန်း+ သိပေမဲ့+ ပြင်းပြင်းထန်ထန် မဆုံးမဘူး။+ အဲဒီအပြစ်အတွက် သူ့အိမ်သားတွေကို ငါထာဝစဉ် ပြစ်ဒဏ်စီရင်မယ်ဆိုပြီး သူ့ကို ပြောပြလိုက်ပါ။
၁၄ ဒါကြောင့် ပူဇော်သက္ကာတွေ၊ အလှူတွေ ဘယ်လောက်ပဲပေးပေး ဧလိအိမ်သားတွေရဲ့အပြစ် ပြေမှာ မဟုတ်ဘူးဆိုပြီး ငါကျိန်ဆိုခဲ့တာ”+ လို့ ရှမွေလကိုပြောတယ်။
၁၅ ရှမွေလလည်း မနက်အထိ ဆက်အိပ်ပြီးနောက် ယေဟောဝါရဲ့ အိမ်တော် တံခါးတွေကို ဖွင့်တယ်။ သူမြင်ရတဲ့ စိတ်အာရုံအကြောင်း ဧလိကို မပြောပြရဲဘူး။
၁၆ ဧလိက “ငါ့သား၊ ရှမွေလ” လို့ခေါ်တော့ ရှမွေလက “ကျွန်တော် ရှိပါတယ်” လို့ ပြန်ထူးတယ်။
၁၇ ဒါနဲ့ ဧလိက “သားကို ဘုရားသခင် ဘာတွေပြောခဲ့သလဲ။ တစ်ခွန်းမကျန် ပြန်ပြောပြပါ။ တစ်ခွန်းလောက် ထိမ်ချန်ထားမယ်ဆိုရင် သားကို ဘုရားသခင် ပြစ်ဒဏ်တစ်ခုပြီးတစ်ခု ပေးပါစေ” ဆိုပြီးပြောတယ်။
၁၈ ရှမွေလလည်း မထိမ်ချန်ဘဲ တစ်ခွန်းမကျန် ပြောပြလိုက်တော့ ဧလိက “ဒါဟာ ယေဟောဝါဘုရား ပြောတာပဲ။ ဘုရား ကောင်းမယ်ထင်သလိုသာ လုပ်ပါစေ” လို့ပြန်ပြောတယ်။
၁၉ ဒီလိုနဲ့ ရှမွေလလည်း ကြီးပြင်းလာတယ်။ ယေဟောဝါက သူနဲ့အတူ ရှိပြီး+ သူပြောသမျှ တစ်ခွန်းမကျန် ပြည့်စုံစေတယ်။
၂၀ သူဟာ ယေဟောဝါရဲ့ ပရောဖက်အဖြစ် ခန့်အပ်ခံရမှန်း ဒန်မြို့ကနေ ဗေရရှေဘမြို့အထိ အစ္စရေးအားလုံး သိလာကြတယ်။
၂၁ ရှိလောမြို့ဟာ ရှမွေလဆီ ယေဟောဝါ အမြဲထင်ရှားပြတဲ့ နေရာပဲ။ ရှိလောမြို့မှာ ရှမွေလဆီ ယေဟောဝါ ရောက်လာတတ်တယ်။ ယေဟောဝါက စကားတော်ကတစ်ဆင့် မိမိအကြောင်းကို အသိပေးတတ်တယ်။+
