၂ ဘုရင်များ ၆:၁-၃၃
၆ ပရောဖက်တစ်စုက+ ဧလိရှဲကို “ခင်ဗျားနဲ့ ကျွန်တော်တို့ အခုနေတဲ့နေရာဟာ ကျဉ်းလွန်းတယ်။
၂ ဂျော်ဒန်မြစ်နား သွားရအောင်။ အဲဒီမှာ သစ်တွေကိုခုတ်ပြီး နေစရာလေး ဆောက်ရအောင်” လို့ခွင့်တောင်းတော့ ဧလိရှဲက “ကောင်းပြီ” လို့ခွင့်ပေးလိုက်တယ်။
၃ ပရောဖက်တစ်ယောက်က “ကျွန်တော်တို့နဲ့အတူ လိုက်ခဲ့ပါလား” ဆိုတော့ ဧလိရှဲက “အေး၊ လိုက်မယ်” ဆိုပြီး၊
၄ သူတို့နဲ့အတူ လိုက်သွားတယ်။ ဂျော်ဒန်မြစ်နား ရောက်တဲ့အခါ သစ်တွေခုတ်ကြတယ်။
၅ ပရောဖက်တစ်ယောက် သစ်ခုတ်နေတုန်း ပုဆိန်က ကျွတ်ထွက်ပြီး ရေထဲကျသွားတော့ “သွားပါပြီ၊ ဆရာရယ်။ ဒီပုဆိန်က ငှားလာတဲ့ပုဆိန်” လို့ပြောတယ်။
၆ စစ်မှန်တဲ့ဘုရားသခင်ရဲ့လူက “ဘယ်နားမှာ ကျတာလဲ” လို့ မေးတယ်။ အဲဒီနောက် တုတ်တစ်ချောင်းခုတ်ပြီး အဲဒီလူ ညွှန်ပြတဲ့နေရာမှာ ပစ်ချလိုက်တော့ ပုဆိန် ပေါလောပေါ်လာတယ်။
၇ ဧလိရှဲက “ဆယ်လိုက်ပါ” လို့ပြောတော့ ပရောဖက်လည်း ပုဆိန်ကို ဆယ်လိုက်တယ်။
၈ ဆီးရီးယားဘုရင်က အစ္စရေးတွေကိုတိုက်ဖို့ စစ်ချီတယ်။+ မင်းမှုထမ်းတွေနဲ့တိုင်ပင်ပြီး တပ်ချမယ့်နေရာကို အသိပေးထားတယ်။
၉ ဘုရားသခင်ရဲ့လူက+ အစ္စရေးဘုရင်ကို “အဲဒီနေရာ မသွားပါနဲ့။ အဲဒီကနေ ဆီးရီးယားတပ်တွေ ဆင်းလာလိမ့်မယ်” ဆိုပြီး သတင်းပို့တယ်။
၁၀ အဲဒီအခါ အစ္စရေးဘုရင်က ဘုရားသခင်ရဲ့လူ သတိပေးတဲ့အတိုင်း အဲဒီနေရာမှာ ရောက်နေတဲ့ စစ်သည်တွေကို ပြန်သတင်းပို့တယ်။ သူ အမြဲသတိပေးလို့ ရန်သူကို ရှောင်နိုင်ခဲ့တာ အကြိမ်ကြိမ်ပဲ။+
၁၁ ဒါကြောင့် ဆီးရီးယားဘုရင်က ဒေါသတကြီးနဲ့ မင်းမှုထမ်းတွေကို ဆင့်ခေါ်ပြီး “ဒီထဲမှာ အစ္စရေးဘုရင်ရဲ့ ဘက်တော်သား ရှိနေတယ်။ ဘယ်သူလဲ ပြောစမ်း” လို့မေးတော့၊
၁၂ မင်းမှုထမ်းတစ်ယောက်က “အရှင်မင်းကြီး၊ ကျွန်တော်တို့ မဟုတ်ရပါဘူး။ အစ္စရေးပြည်မှာရှိတဲ့ ပရောဖက်ဧလိရှဲပါပဲ။ အိပ်ခန်းထဲမှာ မင်းကြီးပြောတဲ့ စကားကိုတောင် အစ္စရေးဘုရင်ဆီ သူပြန်ပြောပြနိုင်တယ်”+ လို့ လျှောက်တင်တယ်။
၁၃ ဘုရင်က “သူဘယ်မှာလဲ စုံစမ်းကြ။ လူလွှတ်ပြီး ဖမ်းခိုင်းမယ်” လို့အမိန့်ပေးတော့ “ဒေါသန်မြို့မှာ ရှိပါတယ်”+ ဆိုတဲ့သတင်း ရောက်လာတယ်။
၁၄ ဒါနဲ့ မြင်းတွေ၊ စစ်မြင်းရထားတွေပါတဲ့ စစ်တပ်ကြီးကို ချက်ချင်းလွှတ်လိုက်တဲ့အတွက် ညအချိန်မှာ ဒေါသန်မြို့ကို ရောက်လာပြီး ဝိုင်းထားကြတယ်။
၁၅ ဘုရားသခင့်လူရဲ့ နောက်လိုက်က မနက်စောစောထပြီး အိမ်ပြင်ထွက်ကြည့်တဲ့အခါ မြင်းတွေ၊ စစ်မြင်းရထားတွေပါတဲ့ စစ်တပ်ကြီး မြို့ကိုဝိုင်းထားတာကိုတွေ့တော့ “အမယ်လေး၊ သခင်ရေ။ ကျွန်တော်တို့ ဘယ်လိုလုပ်ကြမလဲ” လို့ပြောတယ်။
၁၆ ဧလိရှဲက “မကြောက်ပါနဲ့။+ ငါတို့ဘက်ကလူတွေဟာ သူတို့ဘက်ကလူတွေထက် ပိုများတယ်”+ လို့အားပေးပြီး၊
၁၇ “ယေဟောဝါဘုရား၊ သူ့မျက်စိကို ဖွင့်ပေးပါ”+ လို့ဆုတောင်းတယ်။ အဲဒီအခါ နောက်လိုက်ရဲ့ မျက်စိကို ယေဟောဝါ ဖွင့်ပေးလိုက်တဲ့အတွက် ဧလိရှဲပတ်လည်က+ တောင်တန်းဒေသတစ်ခုလုံးမှာ မီးလိုတောက်ပတဲ့ မြင်းတွေ၊ စစ်မြင်းရထားတွေ+ ပြည့်နေတာကို သူမြင်တယ်။
၁၈ ဆီးရီးယားတပ်တွေ ဆင်းလာတဲ့အခါ ဧလိရှဲက “ဒီလူတွေ မျက်စိကွယ်သွားအောင် လုပ်ပေးပါ”+ ဆိုပြီး ယေဟောဝါဆီ ဆုတောင်းတယ်။ ဧလိရှဲတောင်းဆိုတဲ့အတိုင်း ဘုရားသခင်က သူတို့မျက်စိကွယ်သွားအောင် လုပ်လိုက်တယ်။
၁၉ အဲဒီအခါ ဧလိရှဲက “ခင်ဗျားတို့ လမ်းမှားနေပြီ။ ဒီမြို့ဟာ ခင်ဗျားတို့ရှာနေတဲ့ မြို့မဟုတ်ဘူး။ ကျွန်တော့်နောက် လိုက်ခဲ့ကြ။ ခင်ဗျားတို့ရှာနေတဲ့လူဆီ ပို့ပေးမယ်” လို့ ပြောပြီး ရှမာရိမြို့ဆီ ခေါ်သွားတယ်။+
၂၀ ရှမာရိမြို့ထဲရောက်တဲ့အခါ ဧလိရှဲက “ယေဟောဝါဘုရား၊ သူတို့မျက်စိကို ပြန်ဖွင့်ပေးပါ” လို့ဆုတောင်းတော့ ယေဟောဝါလည်း မျက်စိဖွင့်ပေးလိုက်တဲ့အတွက် ရှမာရိမြို့ထဲရောက်နေမှန်း သူတို့သိလိုက်ရတယ်။
၂၁ အစ္စရေးဘုရင်က ဆီးရီးယားတပ်ကို တွေ့တော့ “အဘ၊ သူတို့ကို သတ်ပစ်ရမလား” လို့ ဧလိရှဲကို မေးတယ်။
၂၂ ဒါပေမဲ့ ဧလိရှဲက “မသတ်ပါနဲ့။ တိုက်ပွဲကနေ ဖမ်းခေါ်လာတဲ့ သုံ့ပန်းတွေကို မင်းကြီး သတ်ပစ်လို့လား။ သူတို့ကို အစာရေစာ ကျွေးမွေးပါ။+ ပြီးရင် သူတို့ဘုရင်ဆီ ပြန်လွှတ်လိုက်ပါ” လို့ဖြေတယ်။
၂၃ ဒါနဲ့ အစ္စရေးဘုရင်က သူတို့အတွက် စားသောက်ပွဲကြီး လုပ်ပေးတော့ စားသောက်ကြတယ်။ အဲဒီနောက် သူတို့ရဲ့ဘုရင်ဆီ ပြန်လွှတ်လိုက်တယ်။ ဆီးရီးယားတွေရဲ့ တိုက်ခိုက်လုယက်တဲ့အဖွဲ့တွေ+ အစ္စရေးပြည်ကို ထပ်မလာကြတော့ဘူး။
၂၄ နောက်ပိုင်းမှာ ဆီးရီးယားဘုရင် ဗင်ဟာဒဒ်က တပ်မတစ်ခုလုံးကို စုရုံးပြီး ရှမာရိမြို့ကို လာဝိုင်းတယ်။+
၂၅ ဒါကြောင့် ရှမာရိမြို့ထဲမှာ အငတ်ဘေးကြီးဆိုက်ပြီး+ မြည်းခေါင်းတစ်လုံးကို+ ငွေစ ၈၀၊ ချိုးငှက်ချေး လက်နှစ်ဆုပ်စာကို* ငွေ ၅ စ ပေးရတဲ့အထိ အစာရှားပါးလာတယ်။
၂၆ မြို့ရိုးပေါ် အစ္စရေးဘုရင် လမ်းလျှောက်လာနေချိန်မှာ အမျိုးသမီးတစ်ယောက်က “အရှင်မင်းကြီး၊ ကယ်ပါဦး” လို့အော်ပြောတယ်။
၂၇ ဘုရင်က “ယေဟောဝါဘုရား မကယ်ရင် ငါဘယ်လိုကယ်နိုင်မှာတုံး။ ကောက်နှံတွေ၊ ဝိုင်တွေ၊ ဆီတွေကို ငါပေးနိုင်မယ်လို့ မင်းထင်နေတာလား။
၂၈ အခု ဘာတွေဖြစ်နေလို့လဲ။ ပြောပါဦး” လို့မေးတော့ အမျိုးသမီးက “ဒီမိန်းမပေါ့၊ ‘ဒီနေ့ နင့်ရဲ့သားကို ငါတို့စားဖို့ ပေး။ မနက်ဖြန် ငါ့သားကို စားကြမယ်’ တဲ့။+
၂၉ ဒါနဲ့ ကျွန်မရဲ့သားကို ချက်ပြုတ် စားကြတယ်။+ နောက်တစ်နေ့မှာ ‘ငါတို့စားဖို့ နင့်သားကိုပေး’ လို့တောင်းတဲ့အခါ သူ့သားကို ဝှက်ထားပါတယ်” လို့တိုင်တယ်။
၃၀ မြို့ရိုးပေါ် လမ်းလျှောက်လာတဲ့ အစ္စရေးဘုရင်က အဲဒီအမျိုးသမီးပြောတာကို ကြားတာနဲ့ ကိုယ့်အဝတ်ကို ဆွဲဆုတ်လိုက်တယ်။+ အဲဒီအခါ ဝတ်ရုံအောက်မှာ အထည်ကြမ်း* ဝတ်ထားတာကို လူတွေ တွေ့ကြတယ်။
၃၁ ဘုရင်က “ဒီနေ့ ရှာဖတ်သား ဧလိရှဲရဲ့ခေါင်း မပြတ်လို့ကတော့ ဘုရားသခင်က ငါ့ကို ပြစ်ဒဏ် တစ်ခုပြီးတစ်ခု ပေးပါစေ” လို့ ကြိမ်းတယ်။+
၃၂ ဧလိရှဲက အကြီးအကဲတွေနဲ့အတူ အိမ်ထဲမှာ ထိုင်နေတုန်း အစ္စရေးဘုရင်က တမန်တစ်ယောက် ကြိုလွှတ်လိုက်တယ်။ တမန်မရောက်လာခင် ဧလိရှဲက အကြီးအကဲတွေကို “လူသတ်ကောင်ရဲ့သားက+ ငါ့ခေါင်းကိုဖြတ်ဖို့ လူလွှတ်လိုက်ပြီ။ အဲဒီလူရောက်လာရင် တံခါးမဖွင့်ပေးနဲ့။ သူမဝင်လာနိုင်အောင် တံခါးပိတ်ပြီး တွန်းထားကြ။ သူ့သခင်လည်း ပါလာတယ်” လို့ပြောတယ်။
၃၃ အဲဒီလိုပြောနေတုန်း တမန်ရောက်လာတယ်။ ဘုရင်က “ဒီဘေးဆိုးဟာ ယေဟောဝါဘုရားဆီက လာတာပဲ။ ဒီတော့ ယေဟောဝါဘုရားကို ဘာလို့ စောင့်နေရဦးမှာလဲ” လို့ပြောတယ်။
အောက်ခြေမှတ်ချက်များ
^ ဒါမှမဟုတ်၊ “တစ်ခပ်ရဲ့ လေးပုံတစ်ပုံကို။” တစ်ခပ်က ၁.၂၂ လီတာဆံ့တဲ့ ပုံးတစ်ပုံးစာရှိ။ နောက်ဆက်တွဲ ခ၁၄ ကိုကြည့်။