၂ ဘုရင်များ ၇:၁-၂၀
၇ ဒါနဲ့ ဧလိရှဲက “ယေဟောဝါဘုရားပြောတာ နားထောင်ပါ။ ယေဟောဝါဘုရား ပြောတယ်– ‘မနက်ဖြန် ဒီအချိန်ရောက်ရင် ရှမာရိမြို့တံခါးမှာ ဂျုံနု တစ်ဆီယာ* ကို တစ်ရှယ်ကယ်၊* မုယောစပါး နှစ်ဆီယာကို တစ်ရှယ်ကယ်နဲ့ ရလိမ့်မယ်’”+ လို့ပြောတယ်။
၂ အဲဒီအခါ ဘုရင်ရဲ့ လူယုံတော်တပ်မှူးက “မိုးကောင်းကင်တံခါးတွေကို ယေဟောဝါဘုရား ဖွင့်ပေးမယ်ဆိုရင်တောင် အဲဒီလို မဖြစ်နိုင်ဘူး”+ ဆိုတော့ စစ်မှန်တဲ့ဘုရားသခင်ရဲ့လူက “ဒါကို ခင်ဗျား မြင်ပဲမြင်ရမယ်၊+ စားရမှာတော့ မဟုတ်ဘူး”+ လို့ပြောတယ်။
၃ မြို့တံခါးမှာ အနာကြီးရောဂါသည် လေးယောက်က+ “ငါတို့ မသေမချင်း ဒီအတိုင်း ထိုင်နေရမှာလား။
၄ မြို့ထဲဝင်မယ်ဆိုရင်လည်း မြို့ထဲမှာ ငတ်ပြတ်နေတော့+ သေမှာပဲ။ ဒီမှာထိုင်နေရင်လည်း သေမှာပဲ။ သေမယ့်အတူတူ ဆီးရီးယားတပ်စခန်းကို သွားကြစို့။ သူတို့အသက်ချမ်းသာပေးရင် ငါတို့ အသက်ရှင်မယ်။ သတ်ရင်လည်း သေရုံပဲပေါ့” ဆိုပြီး ပြောကြတယ်။
၅ နေဝင်ချိန်ရောက်တော့ သူတို့က ဆီးရီးယား တပ်စခန်းထဲ ဝင်သွားပြီး စခန်းအစွန်နား ရောက်လာတယ်။ ဒါပေမဲ့ လူရိပ်တောင် မတွေ့ဘူး။
၆ ယေဟောဝါက စစ်မြင်းရထားတွေ၊ မြင်းတွေနဲ့အတူ စစ်တပ်ကြီး ချီတက်လာတဲ့အသံတွေ ကြားရအောင် လုပ်လိုက်တဲ့အတွက်+ “အစ္စရေးဘုရင်က ဟိတ္တိဘုရင်တွေ၊ အီဂျစ်ဘုရင်တွေကို စစ်ကူတောင်းပြီး ငါတို့ကို လာတိုက်နေပြီ” လို့ ဆီးရီးယားစစ်သည်တွေ အချင်းချင်း ပြောကြတယ်။
၇ ပြီးတော့ ညတွင်းချင်းပဲ တဲတွေ၊ မြင်းတွေ၊ မြည်းတွေနဲ့ တပ်စခန်းတစ်ခုလုံးကို ဒီအတိုင်း ပစ်ထားခဲ့ပြီး အသက်လွတ်အောင် ထွက်ပြေးကြတယ်။
၈ အနာကြီးရောဂါသည်တွေက စခန်းအစွန်နား ရောက်တဲ့အခါ တဲတစ်လုံးထဲ ဝင်၊ စားသောက်ပြီးမှ ရွှေငွေနဲ့အဝတ်တွေကို ယူပြီး သွားဝှက်ထားကြတယ်။ ပြန်လာပြီး နောက်တဲတစ်လုံးထဲ ဝင်၊ ပစ္စည်းတွေကို ယူပြီး သွားဝှက်ထားပြန်တယ်။
၉ နောက်ဆုံးမှာ သူတို့က “ငါတို့ ဒီလိုမလုပ်သင့်ဘူး။ ဒီနေ့ဟာ သတင်းကောင်း ပြောရမယ့်နေ့ပဲ။ မိုးလင်းတဲ့အထိ မပြောဘဲနေရင် ငါတို့ ပြစ်ဒဏ်ခံရလိမ့်မယ်။ အခု မြို့ထဲဝင်ပြီး နန်းတော်ကို သတင်းပို့ကြစို့” လို့ တိုင်ပင်ကြတယ်။
၁၀ ဒါနဲ့ သူတို့က မြို့တံခါးစောင့်တွေဆီ သွားပြီး “ဆီးရီးယားတပ်စခန်းထဲ ငါတို့ရောက်ခဲ့တယ်။ အဲဒီမှာ လူရိပ်တောင် မတွေ့ဘူး။ လူသံလည်း မကြားရဘူး။ မြင်းတွေ၊ မြည်းတွေကို ဒီအတိုင်းပဲ ချည်ထားတယ်။ တဲတွေလည်း ဒီအတိုင်းပဲ ရှိနေတယ်” လို့သတင်းပို့တယ်။
၁၁ ချက်ချင်းပဲ မြို့တံခါးစောင့်တွေ နန်းတော်ထဲက လူတွေဆီ သတင်းပို့လိုက်တယ်။
၁၂ ဘုရင်လည်း မိုးမလင်းသေးပေမဲ့ ချက်ချင်းထပြီး မင်းမှုထမ်းတွေကို “ဆီးရီးယားတွေရဲ့ လှည့်ကွက်ကို ငါပြောပြမယ်။ သူတို့က ငါတို့ငတ်ပြတ်နေမှန်းသိလို့+ စခန်းထဲက ထွက်ပြီး တောထဲမှာ ပုန်းနေတာ။ ‘ဒီလူတွေ မြို့ထဲကထွက်လာတဲ့အခါ အရှင်ဖမ်းပြီး မြို့ထဲဝင်ကြမယ်’+ လို့ကြံစည်နေတာ” ဆိုပြီးပြောတယ်။
၁၃ အဲဒီအခါ မင်းမှုထမ်းတစ်ယောက်က “မင်းကြီး၊ မြို့ထဲမှာ မြင်းငါးကောင် ကျန်နေသေးတာပဲ။ လူတချို့ကို အဲဒီမြင်းတွေနဲ့ လွှတ်လိုက်ပါ။ သူတို့ ဒီမှာနေရင်လည်း သေရမယ့်အတူတူ အဖြစ်မှန်ကို သွားစုံစမ်းခိုင်းပါ။ ဒီမှာကျန်နေတဲ့ အစ္စရေးတွေထက်တော့ အခြေအနေ ပိုဆိုးစရာအကြောင်း မရှိပါဘူး” လို့အကြံပေးတယ်။
၁၄ ဒါနဲ့ သူတို့ မြင်းရထားနှစ်စီးကို ယူကြတယ်။ ဘုရင်က “သွားစုံစမ်းကြ” ဆိုပြီး ဆီးရီးယားတပ်စခန်းဆီ လွှတ်လိုက်တယ်။
၁၅ ဂျော်ဒန်မြစ်အထိ သူတို့လိုက်သွားတဲ့အခါ ဆီးရီးယားတွေ အလန့်တကြား ထွက်ပြေးတုန်းက လွှင့်ပစ်ခဲ့တဲ့ အဝတ်တွေ၊ ပစ္စည်းတွေ လမ်းတစ်လျှောက်မှာ တွေ့ရတယ်။ တမန်တွေလည်း ပြန်လာပြီး ဘုရင်ကို သတင်းပို့တယ်။
၁၆ အဲဒီအခါ လူတွေထွက်လာပြီး ဆီးရီးယား တပ်စခန်းကို သိမ်းယူလိုက်တယ်။ ဒါကြောင့် ယေဟောဝါပြောတဲ့အတိုင်း ဂျုံနု တစ်ဆီယာကို တစ်ရှယ်ကယ်၊ မုယောစပါး နှစ်ဆီယာကို တစ်ရှယ်ကယ်ပဲ ပေးရတော့တယ်။+
၁၇ ဘုရင်က လူယုံတော်တပ်မှူးကို တံခါးမှူးအဖြစ် ခန့်လိုက်တယ်။ ဒါပေမဲ့ လူတွေတက်နင်းလို့ သူသေသွားတယ်။ ဘုရင် လာတွေ့တုန်းက ဘုရားသခင်ရဲ့လူ ပြောခဲ့တဲ့အတိုင်း ဖြစ်လာတယ်။
၁၈ “မနက်ဖြန် ဒီအချိန်ရောက်ရင် ရှမာရိမြို့တံခါးမှာ ဂျုံနု တစ်ဆီယာကို တစ်ရှယ်ကယ်၊ မုယောစပါး နှစ်ဆီယာကို တစ်ရှယ်ကယ်နဲ့ ရလိမ့်မယ်” ဆိုပြီး ဘုရင်ကို ဘုရားသခင်ရဲ့လူ ပြောခဲ့တဲ့အတိုင်း ဖြစ်လာတယ်။+
၁၉ ဒါပေမဲ့ အဲဒီတပ်မှူးက “မိုးကောင်းကင်တံခါးတွေကို ယေဟောဝါဘုရား ဖွင့်ပေးမယ်ဆိုရင်တောင် အဲဒီလို မဖြစ်နိုင်ဘူး” လို့ပြောတော့ ဘုရားသခင်ရဲ့လူ ဧလိရှဲက “ဒါကို ခင်ဗျား မြင်ပဲမြင်ရမယ်၊ စားရမှာတော့ မဟုတ်ဘူး” လို့ပြန်ပြောခဲ့တယ်။
၂၀ ပြောတဲ့အတိုင်းပဲ ဖြစ်လာတယ်။ မြို့တံခါးမှာ လူတွေတက်နင်းလို့ သူသေသွားတယ်။
အောက်ခြေမှတ်ချက်များ
^ တစ်ဆီယာက ၇.၃၃ လီတာဆံ့တဲ့ ပုံးတစ်ပုံးစာရှိ။ နောက်ဆက်တွဲ ခ၁၄ ကိုကြည့်။
^ တစ်ရှယ်ကယ်က ၁၁.၄ ဂရမ်နဲ့ညီ။ နောက်ဆက်တွဲ ခ၁၄ ကိုကြည့်။
