၂ ရာဇဝင်ချုပ် ၁၃:၁-၂၂
၁၃ ယေရောဗောင်မင်း နန်းစံ ၁၈ နှစ်မှာ အဘိယက ယုဒပြည်မှာ နန်းတက်လာတယ်။+
၂ အဘိယက ဂျေရုဆလင်မြို့မှာ သုံးနှစ် စိုးစံတယ်။ မယ်တော်က ဂိဗာမြို့သား+ ဥရေလရဲ့သမီး မိက္ခာယ+ လို့ခေါ်တယ်။ အဘိယနဲ့ ယေရောဗောင်တို့လည်း စစ်ဆင်နွှဲခဲ့ကြတယ်။+
၃ အဘိယက လက်ရွေးစင်စစ်သည် ၄၀၀,၀၀၀ နဲ့အတူ တိုက်ပွဲဝင်တယ်။+ ယေရောဗောင်လည်း ပြန်တိုက်ခိုက်ဖို့ လက်ရွေးစင်စစ်သည် ၈၀၀,၀၀၀ နဲ့အတူ စစ်ခင်းတယ်။
၄ အဘိယက ဧဖရိမ်တောင်တန်းဒေသမှာရှိတဲ့ ဇေမရိမ်တောင်ပေါ်မှာ ရပ်ပြီး “ယေရောဗောင်နဲ့ အစ္စရေးလူတို့၊ နားထောင်ကြ။
၅ အစ္စရေးတို့ရဲ့ဘုရား ယေဟောဝါက ထာဝစဉ်တည်တဲ့ ပဋိညာဉ်* ဖွဲ့ပြီး+ အစ္စရေးတွေကို ထာဝစဉ်အုပ်ချုပ်မယ့် နိုင်ငံတစ်ခုကို+ ဒါဝိဒ်နဲ့ သားမြေးတွေလက်ထဲ+ ပေးအပ်ခဲ့တာ ခင်ဗျားတို့ အသိပဲ။
၆ ဒါပေမဲ့ နေဗတ်ရဲ့သား ယေရောဗောင်က+ ဒါဝိဒ်ရဲ့သား သူ့အရှင် ရှောလမုန်ကို ပုန်ကန်တယ်။+
၇ အလုပ်လက်မဲ့တွေ၊ လူဖျင်းတွေကို စုရုံးပြီး ရှောလမုန်ရဲ့သား ရောဗောင်ကို ပုန်ကန်တာ အောင်မြင်သွားတယ်။ ရောဗောင်က ငယ်ရွယ်ပြီး သတ္တိနည်းတဲ့အတွက် သူတို့ကို မနှိမ်နင်းနိုင်ခဲ့ဘူး။
၈ “အခု ခင်ဗျားတို့ အင်အားတောင့်တင်းတဲ့အပြင် ဘုရားအဖြစ် ကိုးကွယ်ဖို့ ယေရောဗောင် လုပ်ပေးထားတဲ့ ရွှေနွားငယ်ရုပ်တွေလည်း ရှိတယ်ဆိုတော့ ဒါဝိဒ်ရဲ့ သားမြေးတွေလက်ထဲက ယေဟောဝါရဲ့နိုင်ငံကို နှိမ်နင်းနိုင်မယ်လို့ ထင်နေကြတယ်။+
၉ ခင်ဗျားတို့က ယေဟောဝါဘုရားရဲ့ ပုရောဟိတ်တွေဖြစ်တဲ့ အာရုန်ရဲ့သားမြေးတွေ၊ လေဝိအမျိုးသားတွေကို နှင်ထုတ်ပြီး+ တိုင်းတစ်ပါးသားတွေ လုပ်သလို ကိုယ်ပိုင်ပုရောဟိတ်တွေ ခန့်ထားတယ် မဟုတ်လား။+ နွားထီးပျိုတစ်ကောင်နဲ့ သိုးထီးခုနစ်ကောင် ယူလာရင် ဘယ်သူမဆို ဘုရားမဟုတ်တဲ့ ရုပ်တုတွေရဲ့ ပုရောဟိတ် ဖြစ်တော့တာပဲ။
၁၀ ကျုပ်တို့ကိုးကွယ်တဲ့ ဘုရားကတော့ ယေဟောဝါပဲ။+ ဘုရားကို ကျုပ်တို့ မစွန့်ဘူး။ အာရုန်ရဲ့သားမြေး ပုရောဟိတ်တွေက ယေဟောဝါဘုရားအတွက် အမှုဆောင်နေတယ်။ သူတို့ကို လေဝိအမျိုးသားတွေ ကူညီပေးနေတယ်။
၁၁ မနက်တိုင်း၊ ညနေတိုင်း+ မီးရှို့ရာအလှူတွေ၊ နံ့သာပေါင်းတွေကို+ ယေဟောဝါဘုရားဆီ ပူဇော်တယ်။ ရွှေစင်စားပွဲပေါ်မှာ အဆင့်ဆင့်တင်ထားတဲ့မုန့်ကို*+ ပြင်ဆင်တယ်။ ရွှေဆီမီးတိုင်နဲ့+ မီးခွက်တွေကို ညနေတိုင်း ထွန်းတယ်။+ ကျုပ်တို့က ယေဟောဝါဘုရားပေးတဲ့ တာဝန်ကို ထမ်းဆောင်နေတယ်။ ခင်ဗျားတို့ကတော့ ဘုရားကို စွန့်ပစ်သွားကြပြီ။
၁၂ အခု စစ်မှန်တဲ့ဘုရားသခင်က ကျုပ်တို့နဲ့အတူ ရှိတယ်၊ ကျုပ်တို့ကို ဦးဆောင်နေတယ်။ ခင်ဗျားတို့နဲ့ တိုက်တဲ့အခါ အသင့်ပြင်ဖို့ အချက်ပေးမယ့် ခရာတွေ၊ ဘုရားရဲ့ ပုရောဟိတ်တွေလည်း ကျုပ်တို့ဆီမှာ ရှိတယ်။ အစ္စရေးတို့၊ ဘိုးဘေးတို့ရဲ့ဘုရား ယေဟောဝါကို မတိုက်ခိုက်ကြနဲ့။ ခင်ဗျားတို့ နိုင်မှာမဟုတ်ဘူး” လို့ပြောတယ်။+
၁၃ ဒါပေမဲ့ ယေရောဗောင်က ယုဒတပ်ကို နောက်ကနေ တိုက်ခိုက်ဖို့ ချုံခိုတပ်ဖွဲ့ လွှတ်လိုက်တယ်။ တပ်မကြီးက ရှေ့ကနေ၊ ချုံခိုတပ်ဖွဲ့က နောက်ကနေ တိုက်ဖို့ ဖြစ်တယ်။
၁၄ ယုဒလူတွေ နောက်လှည့်ကြည့်တဲ့အခါ ရှေ့ကရော နောက်ကပါ တိုက်ခိုက်ခံနေရမှန်း သိတာနဲ့ ယေဟောဝါကို အော်ဟစ်အကူအညီတောင်းကြတယ်။+ ပုရောဟိတ်တွေက ခရာတွေကို အကျယ်ကြီးမှုတ်ကြတယ်။
၁၅ ယုဒလူတွေ စစ်ငြာသံပေးပြီး ကြွေးကြော်တဲ့အခါ ဘုရားသခင်က ယေရောဗောင်နဲ့ အစ္စရေးတွေကို အဘိယနဲ့ ယုဒလူတွေရှေ့မှာ ရှုံးနိမ့်စေတယ်။
၁၆ အစ္စရေးတွေက ယုဒလူတွေရှေ့ကနေ ထွက်ပြေးရတယ်။ သူတို့ကို ယုဒလူတွေလက်ထဲ ဘုရားသခင် အပ်လိုက်တယ်။
၁၇ အဘိယနဲ့ သူ့လူတွေက အစ္စရေးတွေကို အကြီးအကျယ် တိုက်ခိုက်ချေမှုန်းတဲ့အတွက် အစ္စရေးလက်ရွေးစင် စစ်သည် ၅၀၀,၀၀၀ ကျဆုံးသွားတယ်။
၁၈ အစ္စရေးတွေဟာ အဲဒီအချိန်မှာ ရှုံးနိမ့်ပြီး အရှက်ကွဲသွားတယ်။ ယုဒလူတွေကတော့ ဘိုးဘေးတို့ရဲ့ဘုရား ယေဟောဝါကို အားကိုးတဲ့အတွက် အနိုင်ရခဲ့တယ်။+
၁၉ အဘိယက ယေရောဗောင်ကို လိုက်တိုက်ပြီး ဗေသလမြို့နဲ့+ ပတ်ဝန်းကျင်မြို့ငယ်တွေ၊ ယေရှနမြို့နဲ့ ပတ်ဝန်းကျင်မြို့ငယ်တွေ၊ ဧဖရိမ်မြို့နဲ့+ ပတ်ဝန်းကျင်မြို့ငယ်တွေကို သိမ်းယူလိုက်တယ်။
၂၀ အဘိယလက်ထက်မှာ ယေရောဗောင် အာဏာပြန်မရတော့ဘူး။ အဲဒီနောက် ယေဟောဝါ ဒဏ်ခတ်တဲ့အတွက် သူသေဆုံးသွားတယ်။+
၂၁ အဘိယကတော့ အင်အား ကြီးမားလာတယ်။ သူ့မှာ မိဖုရား ၁၄ ယောက်၊+ သား ၂၂ ယောက်၊ သမီး ၁၆ ယောက်ရှိတယ်။
၂၂ အဘိယရဲ့ ကျန်တဲ့သမိုင်းကြောင်းတွေ၊ သူလုပ်ဆောင်ခဲ့တာတွေ၊ သူပြောခဲ့တဲ့စကားတွေကို ပရောဖက်အိဒေါရဲ့ ကျမ်းစောင်မှာ ရေးထားတယ်။+
