၂ ရာဇဝင်ချုပ် ၁၈:၁-၃၄
၁၈ ယောရှဖတ်ဟာ စည်းစိမ်ကြွယ်ဝပြီး ဘုန်းတန်ခိုး ကြီးမားလာတယ်။+ ဒါပေမဲ့ အာဟပ်အမျိုးနဲ့ ထိမ်းမြားပေးစားပြီး ဆွေမျိုးတော်စပ်အောင် လုပ်တယ်။+
၂ နှစ်အတော်ကြာတော့ ရှမာရိမြို့မှာရှိတဲ့ အာဟပ်ဆီ ဆင်းသွားတယ်။+ အာဟပ်လည်း ယောရှဖတ်နဲ့ သူ့လူတွေအတွက် သိုးနွားတိရစ္ဆာန်အများကြီး ပူဇော်တယ်။ ပြီးတော့ ယောရှဖတ်ကို ရာမုတ်ဂိလဒ်မြို့ဆီ ချီတက်တိုက်ခိုက်ဖို့ တိုက်တွန်းတယ်။+
၃ အစ္စရေးဘုရင် အာဟပ်က ယုဒဘုရင် ယောရှဖတ်ကို “ရာမုတ်ဂိလဒ်မြို့ကို တိုက်ခိုက်တဲ့အခါ ငါနဲ့အတူ စစ်ချီမလား” လို့မေးတော့ ယောရှဖတ်က “ကျုပ်ဟာ မင်းကြီးနဲ့ တစ်စိတ်တစ်ဝမ်းတည်းပါပဲ။ ကျုပ်ရဲ့လူတွေလည်း မင်းကြီးရဲ့လူတွေနဲ့ တစ်စိတ်တစ်ဝမ်းတည်းပါပဲ။ မင်းကြီးကို စစ်ကူပါ့မယ်” ဆိုပြီးပြန်ပြောတယ်။
၄ ဒါပေမဲ့ ယောရှဖတ်က “ယေဟောဝါဘုရား ဘာပြောမလဲ သိနိုင်ဖို့ အရင်ဆုံး မေးမြန်းကြည့်ပါဦး” လို့ပြောတော့၊+
၅ အစ္စရေးဘုရင်က ပရောဖက် ၄၀၀ ကိုစုရုံးပြီး “ရာမုတ်ဂိလဒ်မြို့ကို တိုက်ရမလား၊ မတိုက်ရဘူးလား” လို့မေးတယ်။ သူတို့ကလည်း “သွားတိုက်ခိုက်ပါ။ စစ်မှန်တဲ့ဘုရားသခင်က အဲဒီမြို့ကို မင်းကြီးလက်ထဲ အပ်လိမ့်မယ်” လို့ပြန်ဖြေကြတယ်။
၆ ယောရှဖတ်က “ယေဟောဝါဘုရားရဲ့ ပရောဖက်တစ်ယောက်မှ မကျန်တော့ဘူးလား။+ ကျန်တယ်ဆိုရင် သူကတစ်ဆင့် မေးမြန်းကြည့်ရအောင်” လို့ပြောတယ်။+
၇ အစ္စရေးဘုရင်က “လူတစ်ယောက်တော့ ကျန်သေးတယ်။+ အိမလရဲ့သား မိက္ခာယဆိုတဲ့ လူပဲ။ သူကတစ်ဆင့် ယေဟောဝါဘုရားကို မေးမြန်းလို့ရတယ်။ ဒါပေမဲ့ သူ့ကို ငါသိပ်မုန်းတယ်။ အဲဒီလူက ငါနဲ့ပတ်သက်ပြီး ဘယ်တော့မှ အကောင်း မဟောတတ်ဘူး။ မကောင်းတာတွေကိုပဲ ဟောတတ်တယ်”+ လို့ပြောတဲ့အခါ ယောရှဖတ်က “မင်းကြီး ဒီလိုတော့ မပြောသင့်ပါဘူး” ဆိုပြီးပြောတယ်။
၈ ဒါနဲ့ အစ္စရေးဘုရင်က နန်းတွင်းအရာရှိတစ်ယောက်ကို ခေါ်ပြီး “အိမလရဲ့သား မိက္ခာယကို ချက်ချင်းခေါ်ခဲ့” လို့အမိန့်ပေးတယ်။+
၉ ရှမာရိမြို့တံခါးဝနားက ကောက်နယ်တလင်းမှာ အစ္စရေးဘုရင်နဲ့ ယုဒဘုရင်ယောရှဖတ်က မင်းဝတ်တန်ဆာတွေ ဆင်မြန်းပြီး ရာဇပလ္လင်ကိုယ်စီနဲ့ ထိုင်နေတယ်။ ပရောဖက်တွေကတော့ သူတို့ရှေ့မှာ ပရောဖက်ပြုနေတယ်။
၁၀ ခေနာနာရဲ့သား ဇေဒကိက သံဦးချိုတွေလုပ်ပြီး “ယေဟောဝါဘုရား ပြောတာက ‘မင်းက ဒီဦးချိုတွေနဲ့ ခွေ့ပြီး ဆီးရီးယားတွေကို အစတုံး ဖျက်ဆီးလိမ့်မယ်’” လို့ အာဟပ်မင်းကို ပြောတယ်။
၁၁ သူဟောတဲ့အတိုင်းပဲ တခြားပရောဖက်အားလုံးကလည်း ရာမုတ်ဂိလဒ်မြို့ကို သွားတိုက်ခိုက်ပါ။ မင်းကြီး အောင်ပွဲဆင်လိမ့်မယ်။+ ယေဟောဝါဘုရားက အဲဒီမြို့ကို မင်းကြီးလက်ထဲ အပ်လိမ့်မယ်” လို့ပြောကြတယ်။
၁၂ မိက္ခာယကို သွားခေါ်တဲ့ တမန်ကလည်း “ပရောဖက်တွေက မင်းကြီးအတွက် ကောင်းတာကိုပဲ တစ်ညီတည်း ဟောနေကြတယ်။ ခင်ဗျားလည်း သူတို့လို+ ကောင်းတာတွေချည်းပဲ ဟောပါ”+ လို့တိုက်တွန်းတော့၊
၁၃ မိက္ခာယက “အသက်ရှင်နေတဲ့ဘုရား ယေဟောဝါကို တိုင်တည်ပြီး ပြောမယ်၊ ဘုရားသခင် ပြောခိုင်းတာကိုပဲ ကျွန်တော် ပြောမယ်”+ လို့ဖြေတယ်။
၁၄ အဲဒီနောက် အခစားဝင်တဲ့အခါ အစ္စရေးဘုရင်က “မိက္ခာယ၊ ရာမုတ်ဂိလဒ်မြို့ကို ငါတို့တိုက်ရမလား။ မတိုက်ရဘူးလား” လို့မေးတယ်။ သူက ချက်ချင်းပဲ “သွားတိုက်ခိုက်ပါ။ မင်းကြီး အောင်ပွဲဆင်လိမ့်မယ်။ ရန်သူတွေ မင်းကြီးလက်ထဲ ရောက်လာလိမ့်မယ်” လို့ပြောတယ်။
၁၅ ဒါနဲ့ အစ္စရေးဘုရင်က “ယေဟောဝါဘုရားရဲ့ နာမည်ကိုသုံးပြီး မှန်သောစကားကိုပဲပြောဖို့ မင်းကို ဘယ်နှစ်ခါ ကျိန်ဆိုခိုင်းရမလဲ” လို့ပြောလိုက်တော့၊
၁၆ မိက္ခာယက “အစ္စရေးတွေဟာ ထိန်းသူမရှိတဲ့ သိုးတွေလို တောင်ပေါ်မှာ တကွဲတပြားဖြစ်နေတာကို ကျွန်တော်မြင်တယ်။+ ‘ဒီလူတွေအားလုံး သခင် မရှိတဲ့အတွက် ကိုယ့်အိမ်ကိုယ့်ရာဆီ အေးအေးဆေးဆေး ပြန်ကြပါစေ’ လို့ ယေဟောဝါဘုရား ပြောတယ်” ဆိုပြီး လျှောက်တင်တယ်။
၁၇ အဲဒီအခါ အစ္စရေးဘုရင်က ယောရှဖတ်ကို “‘ဒီလူက ငါနဲ့ပတ်သက်ပြီး ကောင်းတာတွေကို မဟောဘဲ မကောင်းတာတွေကိုပဲ ဟောလိမ့်မယ်’ လို့ ငါပြောတယ် မဟုတ်လား” ဆိုပြီးပြောတယ်။+
၁၈ မိက္ခာယက “ယေဟောဝါဘုရား ပြောတာကို နားထောင်ပါ။ ရာဇပလ္လင်ပေါ်မှာ ယေဟောဝါ စံမြန်းနေတာ၊+ လက်ယာဘက်၊ လက်ဝဲဘက်မှာ ကောင်းကင်ဗိုလ်ခြေတွေ+ ရပ်ပြီး ခစားနေကြတာကို ကျွန်တော်မြင်တယ်။+
၁၉ ယေဟောဝါက ‘အစ္စရေးဘုရင် အာဟပ်ကို ရာမုတ်ဂိလဒ်မြို့ဆီ ချီတက်အောင်၊ သူ ကျဆုံးသွားအောင် ဘယ်သူလှည့်စားမလဲ’ လို့မေးတော့ တစ်ပါးက တစ်မျိုးပြောတယ်။ နောက်တစ်ပါးကလည်း တစ်မျိုးပြောတယ်။
၂၀ အဲဒီနောက် ကောင်းကင်တမန်*+ တစ်ပါး ရှေ့ထွက်လာပြီး ယေဟောဝါရှေ့မှာ ခစားတယ်။ ပြီးတော့ ‘ကျွန်တော် လှည့်စားမယ်’ တဲ့။ ယေဟောဝါက ‘ဘယ်လိုလှည့်စားမှာလဲ’ လို့မေးတော့၊
၂၁ သူက ‘ကျွန်တော်သွားပြီး သူ့ပရောဖက်တွေ လိမ်လည်ဟောပြောအောင် လုပ်ပါ့မယ်’ လို့ဖြေတယ်။ ဘုရားသခင်က ‘သူ့ကို မင်းလှည့်စားနိုင်လိမ့်မယ်။ အောင်လည်း အောင်မြင်လိမ့်မယ်။ သွားပြီး အဲဒီအတိုင်းလုပ်ပါ’ လို့ပြောတယ်။
၂၂ ဒါကြောင့် မင်းကြီးရဲ့ပရောဖက်တွေ လိမ်လည်ဟောပြောအောင်လုပ်ဖို့ ကောင်းကင်တမန်ကို ယေဟောဝါ ခွင့်ပြုလိုက်တာပါ။+ ဒါပေမဲ့ မင်းကြီး ဘေးဆိုးကြုံရမယ်လို့ ယေဟောဝါ အမိန့်ချပြီးသားပါပဲ” လို့ပြန်လျှောက်တင်တယ်။
၂၃ အဲဒီအခါ ခေနာနာရဲ့သား ဇေဒကိက+ ရှေ့တိုးလာပြီး မိက္ခာယကို+ ပါးရိုက်တယ်။+ “ငါ့ဆီမှာ ယေဟောဝါရဲ့ စွမ်းအားတော် မရှိတော့ဘူး၊ မင်းကပဲ စွမ်းအားတော် လမ်းညွှန်တဲ့အတိုင်း ဟောနေတယ်ပေါ့ ဟုတ်လား” ဆိုတော့၊+
၂၄ မိက္ခာယက “အတွင်းခန်းထဲ ခင်ဗျား ဝင်ပုန်းတဲ့နေ့ကျရင် သိရမှာပါ” လို့ဖြေတယ်။
၂၅ အဲဒီအခါ အစ္စရေးဘုရင်က “မိက္ခာယကို ဖမ်းပြီး မြို့ဝန်အာမုန်နဲ့ သားတော်ယောရှဆီ အပ်လိုက်စမ်း။
၂၆ ပြီးတော့ ‘ဒီလူကို အကျဉ်းချထားလိုက်။+ ငါချောချောမောမော ပြန်လာတဲ့အချိန်အထိ သူ့ကို မဝရေစာ ကျွေးထားလိုက်။’ ငါ ဒီလိုအမိန့်ချတယ်ဆိုတာ သူတို့ကို ပြောပြလိုက်” ဆိုပြီးအမိန့်ပေးတယ်။
၂၇ မိက္ခာယကလည်း “မင်းကြီးသာ တကယ်ပဲ ချောချောမောမော ပြန်ရောက်တယ်ဆိုရင် ကျွန်တော့်ကို ယေဟောဝါဘုရား ပြောတာမဟုတ်ဘူးလို့ မှတ်ပါ”+ လို့လျှောက်ပြီးနောက် “ဒီမှာရှိနေတဲ့ ခင်ဗျားတို့အားလုံးလည်း မှတ်ထားကြ” ဆိုပြီးပြောတယ်။
၂၈ အစ္စရေးဘုရင်နဲ့ ယုဒဘုရင်ယောရှဖတ်က ရာမုတ်ဂိလဒ်မြို့ကို ချီတက်သွားကြတယ်။+
၂၉ အစ္စရေးဘုရင်က “ငါရုပ်ဖျက်ပြီး တိုက်ပွဲဝင်မယ်။ မင်းကြီးကတော့ မင်းဝတ်တန်ဆာတွေ ဆင်မြန်းထားပါ” လို့ ယောရှဖတ်ကို ပြောတယ်။ ပြီးတော့ ရုပ်ဖျက်ပြီး တိုက်ပွဲဝင်တယ်။
၃၀ ဆီးရီးယားဘုရင်က မြင်းရထားတပ်မှူးတွေကို “အစ္စရေးဘုရင်ကိုပဲ တိုက်ကြ။ တခြားလူ ကြီးကြီးငယ်ငယ်မှန်သမျှ တိုက်မနေနဲ့” လို့မှာထားတယ်။
၃၁ မြင်းရထားတပ်မှူးတွေက ယောရှဖတ်ကို မြင်တာနဲ့ “ဒါ အစ္စရေးဘုရင်ပဲ” ဆိုပြီး သူ့ကို လိုက်တိုက်ကြတယ်။ ယောရှဖတ်လည်း အော်ဟစ်အကူအညီတောင်းတဲ့အခါ+ သူ့ကို ယေဟောဝါ ကူညီတယ်။ ဘုရားသခင်က ချက်ချင်းပဲ သူတို့ကို လမ်းလွဲသွားအောင် လုပ်လိုက်တယ်။
၃၂ မြင်းရထားတပ်မှူးတွေက အစ္စရေးဘုရင် မဟုတ်မှန်းသိတဲ့အခါ ဆက်မလိုက်တော့ဘဲ ချက်ချင်း ပြန်လှည့်သွားကြတယ်။
၃၃ ဒါပေမဲ့ စစ်သည်တစ်ယောက်က မြားတစ်စင်းကို အမှတ်မထင် ပစ်လွှတ်လိုက်တာ အစ္စရေးဘုရင် အာဟပ် ဝတ်ထားတဲ့ ချပ်ဝတ်တန်ဆာရဲ့အဆက်ကြားမှာ ထိမှန်သွားတယ်။ ဒါနဲ့ အာဟပ်မင်းက ရထားထိန်းကို “ပြန်လှည့်တော့။ ငါ့ကို စစ်မြေပြင်ကနေ ခေါ်ထုတ်သွားပါ။ ငါ အကြီးအကျယ် ဒဏ်ရာရနေပြီ” လို့ အမိန့်ပေးတယ်။+
၃၄ အဲဒီတစ်နေ့လုံး တိုက်ပွဲ အပြင်းအထန်ဖြစ်တယ်။ အာဟပ်မင်းက ညနေပိုင်းအထိ မြင်းရထားထဲမှာ လူကိုမှီပြီး ဆီးရီးယားတွေဘက် မျက်နှာမူထားတယ်။ နေဝင်ချိန်ရောက်တော့ ကွယ်လွန်သွားတယ်။+
အောက်ခြေမှတ်ချက်များ
^ မူရင်း၊ “ဝိညာဉ်သတ္တဝါ။”
