၂ ရာဇဝင်ချုပ် ၂၉:၁-၃၆
၂၉ ဟေဇကိ+ နန်းတက်ချိန်မှာ အသက် ၂၅ နှစ်ရှိပြီ။ ဂျေရုဆလင်မြို့မှာ ၂၉ နှစ် စိုးစံတယ်။ မယ်တော်က ဇာခရိရဲ့သမီး အဘိယလို့ခေါ်တယ်။+
၂ ဟေဇကိဟာ ဘိုးဘေးဒါဝိဒ်လိုပဲ+ ယေဟောဝါရှေ့မှာ မှန်ရာကို ဆက်လုပ်တယ်။+
၃ နန်းစံပထမနှစ်၊ တစ်လပိုင်းမှာ ယေဟောဝါရဲ့အိမ်တော် တံခါးတွေကို ပြန်ဖွင့်ပြီး ပြုပြင်တယ်။+
၄ အဲဒီနောက် ပုရောဟိတ်တွေနဲ့ လေဝိအမျိုးသားတွေကို အရှေ့ရင်ပြင်မှာ စုဝေးလိုက်ပြီး၊
၅ “လေဝိအမျိုးသားတို့၊ ငါပြောတာကိုနားထောင်ကြပါ။ အခု ကိုယ်ကို သန့်ရှင်းစေကြ။+ ဘိုးဘေးတို့ရဲ့ဘုရား ယေဟောဝါရဲ့ အိမ်တော်ကို ဆက်ကပ်ပြီး သန့်ရှင်းရာဌာနတော်ထဲက မသန့်ရှင်းတာတွေကို ဖယ်ရှားကြ။+
၆ ငါတို့ရဲ့ဖခင်တွေက သစ္စာမဲ့ပြီး ယေဟောဝါဘုရားရှေ့မှာ မကောင်းတာတွေ လုပ်ခဲ့တယ်၊+ ဘုရားကို စွန့်ခွာခဲ့တယ်။ ယေဟောဝါကို ကျောခိုင်းပြီး တဲတော်ကို မျက်နှာလွှဲခဲ့တယ်။+
၇ မုခ်ဦးတံခါးတွေကိုလည်း+ ပိတ်ထားပြီး ဆီမီးခွက်တွေကို ငြိမ်းလိုက်ကြတယ်။+ အစ္စရေးတို့ရဲ့ ဘုရားအတွက် သန့်ရှင်းရာဌာနတော်မှာ မီးရှို့ရာ ပူဇော်သက္ကာတွေ မဆက်သတော့ဘူး။+ နံ့သာပေါင်းတွေ မီးမရှို့ကြတော့ဘူး။+
၈ ဒါကြောင့် ယေဟောဝါဘုရားက ယုဒပြည်နဲ့ ဂျေရုဆလင်မြို့ကို အမျက်ထွက်ပြီး+ သူတို့ကို လူတွေ ထိတ်လန့်စရာ၊ အံ့သြမိန်းမောစရာ၊ လှောင်ပြောင်စရာ* ဖြစ်စေခဲ့တာ ခင်ဗျားတို့ မြင်တဲ့အတိုင်းပဲ။+
၉ ငါတို့ဘိုးဘေးတွေ ဓားဘေးနဲ့ ကျဆုံးခဲ့ရတယ်။+ ငါတို့ရဲ့ သားမယားတွေလည်း သုံ့ပန်းဘဝ ရောက်ခဲ့ရတယ်။+
၁၀ ဒီတော့ ငါတို့အပေါ် အမျက်တော်ပြေသွားအောင် အစ္စရေးတို့ရဲ့ဘုရား ယေဟောဝါနဲ့ ကတိသစ္စာပြုဖို့ ငါဆန္ဒပြင်းပြနေတယ်။+
၁၁ ငါ့သားတို့၊ အခုအချိန်ဟာ အေးအေးဆေးဆေး နေရမယ့်အချိန် မဟုတ်ဘူး။ မင်းတို့ဟာ ရှေ့တော်မှာ ရပ်ပြီး အမှုဆောင်ဖို့၊+ ပူဇော်သက္ကာတွေ မီးရှို့ဆက်သဖို့ ယေဟောဝါဘုရား ရွေးချယ်ထားသူတွေပဲ”+ ဆိုပြီး ပြောတယ်။
၁၂ အဲဒီအခါ လေဝိအနွယ်ဝင် ကောဟတ်အမျိုးသားတွေထဲက+ အာမသဲရဲ့သား မာဟတ်၊ အာဇရိရဲ့သား ယောလ၊ မေရာရိအမျိုးသားတွေထဲက+ အာဗဒိရဲ့သား ကိရှ၊ ယေဟလလေလရဲ့သား အာဇရိ၊ ဂေရရှုန်အမျိုးသားတွေထဲက+ ဇိမာရဲ့သား ယောအာ၊ ယောအာရဲ့သား ဧဒင်၊
၁၃ ဧလိဇာဖန်ရဲ့ သားမြေးတွေထဲက ရှိမရိနဲ့ ယွေလ၊ အာသပ်ရဲ့သားမြေးတွေထဲက+ ဇာခရိနဲ့ မသနိ၊
၁၄ ဟေမန်ရဲ့ သားမြေးတွေထဲက+ ယေဟေလနဲ့ ရှိမိ၊ ယေဒုသုန်ရဲ့ သားမြေးတွေထဲက+ ရှေမာယနဲ့ သြဇေလတို့က လုပ်စရာရှိတာတွေ စလုပ်ကြတယ်။
၁၅ သူတို့က ညီအစ်ကိုတွေကို စုဝေးခိုင်းပြီး ကိုယ်ကိုသန့်စင်စေကြတယ်။ ယေဟောဝါရဲ့ မိန့်မှာချက်နဲ့အညီ ဘုရင်ခိုင်းတဲ့အတိုင်း ယေဟောဝါရဲ့ အိမ်တော်ကို သန့်စင်အောင်လုပ်ဖို့ လာကြတယ်။+
၁၆ ပုရောဟိတ်တွေလည်း ယေဟောဝါရဲ့ အိမ်တော်ကို သန့်စင်အောင်လုပ်ဖို့ ဝင်လာပြီး ယေဟောဝါရဲ့ ဗိမာန်တော်ထဲက မသန့်ရှင်းတာမှန်သမျှကို ယေဟောဝါရဲ့အိမ်တော် ရင်ပြင်ဆီ+ ထုတ်သွားကြတယ်။ လေဝိအမျိုးသားတွေက အဲဒါတွေကို မြို့ပြင် ကိဒြုန်ချိုင့်ဝှမ်းဆီ သယ်သွားကြတယ်။+
၁၇ ဒီလိုနဲ့ တစ်လပိုင်း၊ တစ်ရက်နေ့ကစပြီး သန့်စင်အောင် လုပ်လိုက်တာ ၈ ရက်မြောက်မှာတော့ ယေဟောဝါရဲ့ အိမ်တော်မုခ်ဦးအထိ ပြီးသွားတယ်။+ ယေဟောဝါရဲ့အိမ်တော်ကို ၈ ရက်လုံးလုံး သန့်ရှင်းမြင့်မြတ်စေပြီးနောက် တစ်လပိုင်း၊ ၁၆ ရက်မှာ လက်စသတ်လိုက်တယ်။
၁၈ အဲဒီနောက် သူတို့က ဟေဇကိမင်းဆီ အခစားဝင်ပြီး “မီးရှို့ပူဇော်ရာပလ္လင်နဲ့+ ပလ္လင်အသုံးအဆောင်တွေ၊+ အဆင့်ဆင့်တင်ထားတဲ့မုန့်* တင်ဖို့ စားပွဲနဲ့+ စားပွဲအသုံးအဆောင်တွေအပါအဝင် ယေဟောဝါဘုရားရဲ့ အိမ်တော်တစ်ခုလုံးကို သန့်စင်အောင် ကျွန်တော်တို့ လုပ်ပြီးပါပြီ။
၁၉ အာခတ်မင်းက နန်းစံချိန်အတွင်းမှာ သစ္စာဖောက်ပြီး အိမ်တော်ထဲကနေ ထုတ်ပစ်ခဲ့တဲ့ အသုံးအဆောင်အားလုံးကို+ သန့်ရှင်းမြင့်မြတ်အောင် လုပ်ပြီး အသင့်ပြင်ထားပါပြီ။+ ယေဟောဝါဘုရားရဲ့ ပူဇော်ရာပလ္လင်ရှေ့မှာ ထားထားပါတယ်” လို့လျှောက်တင်ကြတယ်။
၂၀ ဟေဇကိမင်းက မနက်စောစောထပြီး မြို့အကြီးအကဲတွေကို စုဝေးလိုက်ပြီးနောက် ယေဟောဝါရဲ့အိမ်တော်ကို တက်သွားကြတယ်။
၂၁ သူတို့က တိုင်းပြည်အတွက်၊+ သန့်ရှင်းရာဌာနတော်အတွက်၊ ယုဒပြည်သူတွေအတွက် အပြစ်ဖြေရာအလှူအဖြစ် နွားထီးခုနစ်ကောင်၊ သိုးထီးခုနစ်ကောင်၊ သိုးသငယ်အထီး ခုနစ်ကောင်၊ ဆိတ်ထီးခုနစ်ကောင်ကို ယူလာကြတယ်။ ဟေဇကိက အဲဒါတွေကို ယေဟောဝါရဲ့ ပူဇော်ရာပလ္လင်ပေါ်မှာ ပူဇော်ဖို့ အာရုန်ရဲ့သားမြေး ပုရောဟိတ်တွေကို ပြောတယ်။
၂၂ ဒါနဲ့ နွားတွေကို သတ်ပြီးနောက်+ ပုရောဟိတ်တွေက သွေးကိုယူ၊ ပူဇော်ရာပလ္လင်ပေါ်မှာ ဖျန်းတယ်။+ သိုးထီးတွေကို သတ်ပြီး သွေးကို ပူဇော်ရာပလ္လင်ပေါ်မှာ ဖျန်းတယ်။ သိုးသငယ်အထီးတွေကိုလည်း သတ်ပြီး သွေးကို ပူဇော်ရာပလ္လင်ပေါ်မှာ ဖျန်းတယ်။
၂၃ ပြီးတော့ အပြစ်ဖြေရာအလှူ ဆိတ်ထီးတွေကို ရှင်ဘုရင်နဲ့ လူစုကြီးရှေ့ ယူလာတဲ့အခါ ဆိတ်ထီးတွေပေါ် လက်တင်ကြတယ်။
၂၄ ပုရောဟိတ်တွေက ဆိတ်ထီးတွေ သတ်ပြီး အပြစ်ဖြေရာအလှူအဖြစ် ပူဇော်တယ်။ အစ္စရေးတွေအတွက် အပြစ်ဖြေပေးဖို့ သွေးကို ပူဇော်ရာပလ္လင်ပေါ်မှာ ဖျန်းတယ်။ မီးရှို့ရာအလှူနဲ့ အပြစ်ဖြေရာအလှူကို အစ္စရေးအားလုံးအတွက် ပူဇော်ရမယ်လို့ ဘုရင်မှာထားလို့ပဲ။
၂၅ အဲဒီအချိန်မှာ ဟေဇကိက လင်းကွင်း၊ ကြိုးတပ်တူရိယာနဲ့ စောင်းတွေ+ တီးမှုတ်ရတဲ့ လေဝိအမျိုးသားတွေကို ယေဟောဝါရဲ့ အိမ်တော်မှာ နေရာယူခိုင်းလိုက်တယ်။ ပရောဖက်တွေကတစ်ဆင့် ယေဟောဝါ ညွှန်ကြားခဲ့တဲ့အတိုင်း၊ ဘုရင်ကို စိတ်အာရုံအသိပေးရသူ ဂဒ်၊+ ပရောဖက်နာသန်နဲ့+ ဒါဝိဒ် ညွှန်ကြားခဲ့တဲ့အတိုင်း+ နေရာယူခိုင်းတယ်။
၂၆ လေဝိအမျိုးသားတွေက ဒါဝိဒ်မင်း လုပ်ထားတဲ့ တူရိယာတွေ ကိုင်ပြီး၊ ပုရောဟိတ်တွေက ခရာတွေ ကိုင်ပြီး ရပ်နေကြတယ်။+
၂၇ အဲဒီနောက် ဟေဇကိက ပူဇော်ရာပလ္လင်ပေါ်မှာ မီးရှို့ရာ ပူဇော်သက္ကာတွေ ဆက်သဖို့ အမိန့်ပေးတယ်။+ အဲဒီလိုဆက်သလိုက်တာနဲ့ ယေဟောဝါကို ချီးမွမ်းသီချင်း စဆိုကြတယ်။ အစ္စရေးဘုရင်ဒါဝိဒ် လုပ်ထားတဲ့ တူရိယာတွေရဲ့ တေးသွားအတိုင်း ခရာတွေကိုလည်း မှုတ်ကြတယ်။
၂၈ ခရာတွေမှုတ်ပြီး သီဆိုနေချိန်မှာ လူအားလုံးက မီးရှို့ရာအလှူ ပူဇော်ပြီးချိန်အထိ ပျပ်ဝပ်နေကြတယ်။
၂၉ ပူဇော်ပြီးတာနဲ့ မင်းကြီးနဲ့ အနားမှာရှိနေသူတွေ ဦးချပျပ်ဝပ်လိုက်တယ်။
၃၀ ပြီးတော့ မင်းကြီးနဲ့ အကြီးအကဲတွေက ဒါဝိဒ်နဲ့+ စိတ်အာရုံမြင်ရသူ အာသပ်+ တို့စပ်ဆိုခဲ့တဲ့ သီချင်းတွေ ဆိုပြီး ယေဟောဝါကို ချီးမွမ်းဖို့ လေဝိအမျိုးသားတွေကို ပြောတယ်။ သူတို့လည်း ဝမ်းသာအားရ ချီးမွမ်းသီဆိုပြီး ဦးချပျပ်ဝပ်ကြတယ်။
၃၁ အဲဒီနောက် ဟေဇကိမင်းက “အခု မင်းတို့က ယေဟောဝါဘုရားအတွက် သီးသန့်ဖယ်ထားခံရသူတွေ ဖြစ်သွားပြီ။ ဒါကြောင့် ယေဟောဝါရဲ့ အိမ်တော်ကို ပူဇော်သက္ကာတွေ၊ ကျေးဇူးတင်ချီးမွမ်းရာ အလှူတွေ ယူလာကြ” လို့ပြောတယ်။ လူတွေလည်း ပူဇော်သက္ကာတွေ၊ ကျေးဇူးတင်ချီးမွမ်းရာ အလှူတွေ ယူလာကြတယ်။ စေတနာထက်သန်သူတိုင်း မီးရှို့ရာအလှူတွေ ယူလာကြတယ်။+
၃၂ မီးရှို့ရာအလှူအဖြစ် နွား ၇၀၊ သိုးထီး ၁၀၀၊ သိုးသငယ်အထီး ၂၀၀ တို့ကို ယေဟောဝါဆီ ဆက်သဖို့ ယူလာကြတယ်။+
၃၃ သန့်ရှင်းရာအလှူအဖြစ် နွား ၆၀၀၊ သိုး ၃,၀၀၀ ကိုလည်း ယူလာကြတယ်။
၃၄ ဒါပေမဲ့ မီးရှို့ရာအလှူ တိရစ္ဆာန်အားလုံးကို အရေခွံဆုတ်ပေးမယ့် ပုရောဟိတ်တွေ နည်းနေတဲ့အတွက် ဆွေမျိုးသားချင်း လေဝိအမျိုးသားတွေက ပုရောဟိတ်တွေ ကိုယ်ကိုသန့်စင်လို့ ပြီးချိန်အထိ၊+ အလုပ်ပြီးချိန်အထိ ကူညီပေးကြတယ်။+ ကိုယ်ကို သန့်စင်တာနဲ့ပတ်သက်ရင် လေဝိအမျိုးသားတွေက ပုရောဟိတ်တွေထက် ပိုအလေးထားတတ်ကြတယ်။
၃၅ မီးရှို့ရာအလှူတွေ၊+ မိတ်သဟာယ ပူဇော်သက္ကာရဲ့ အဆီတွေလည်း+ အများကြီး ရှိတယ်။ မီးရှို့ရာအလှူတွေနဲ့အတူ ပူဇော်ရတဲ့ သွန်းလောင်းရာအလှူလည်း+ အများကြီးပဲ။ ဒီနည်းနဲ့ ယေဟောဝါရဲ့ အိမ်တော်လုပ်ငန်း နဂိုအခြေအနေအတိုင်း ပြန်ဖြစ်လာတယ်။
၃၆ လူတွေအတွက် စစ်မှန်တဲ့ဘုရားသခင် လုပ်ဆောင်ပေးခဲ့တာတွေ၊ အချိန်တိုအတွင်းမှာ အားလုံး ဖြစ်မြောက်သွားတာတွေကြောင့် ဟေဇကိမင်းနဲ့ လူတွေအားလုံး ဝမ်းမြောက်နေကြတယ်။+
