၂ ရှမွေလ ၂:၁-၃၂
၂ အဲဒီနောက် ဒါဝိဒ်က “ယုဒမြို့တစ်မြို့မြို့ကို ကျွန်တော် တက်သွားရမလား” လို့ယေဟောဝါကို မေးတယ်။+ ယေဟောဝါက “တက်သွား” လို့ဖြေတယ်။ “ဘယ်မြို့ကို တက်သွားရမလဲ” ဆိုတော့ “ဟေဗြုန်မြို့ကို သွား”+ လို့ ပြောတယ်။
၂ ဒါဝိဒ်လည်း ဟေဗြုန်မြို့ကို တက်သွားတယ်။ ဇနီးနှစ်ယောက်ဖြစ်တဲ့ ယေဇရေလမြို့သူ အဟိနောင်နဲ့+ ကရမေလမြို့သား နာဗလရဲ့ဇနီးဖြစ်ဖူးတဲ့ အဘိဂဲလလည်း+ ပါတယ်။
၃ သူ့လူတွေနဲ့ မိသားစုတွေကိုပါ ခေါ်သွားပြီး+ ဟေဗြုန်မြို့အနီးတစ်ဝိုက်က မြို့တွေမှာ နေထိုင်ကြတယ်။
၄ အဲဒီအခါ ယုဒအမျိုးသားတွေ ရောက်လာပြီး ဘိသိက်ပေးတဲ့အတွက် ဒါဝိဒ်ဟာ ယုဒဘုရင် ဖြစ်လာတယ်။+
သူတို့က “ရှောလုကို ယာဗက်ဂိလဒ်မြို့သားတွေ သင်္ဂြိုဟ်လိုက်ပြီ” လို့ ပြောပြတဲ့အခါ၊
၅ ဒါဝိဒ်က ယာဗက်ဂိလဒ်မြို့သားတွေဆီ တမန်တွေလွှတ်ပြီး “ရှောလုမင်းကို သင်္ဂြိုဟ်ပြီး+ ခိုင်မြဲတဲ့မေတ္တာ ပြခဲ့တဲ့အတွက် မင်းတို့ကို ယေဟောဝါဘုရား ကောင်းချီးပေးပါစေ။
၆ ယေဟောဝါဘုရားက မင်းတို့ကို ခိုင်မြဲတဲ့မေတ္တာနဲ့ သစ္စာစောင့်သိမှု ပြပါစေ။ မင်းတို့လုပ်တဲ့ ဒီကောင်းမှုအတွက် ငါကလည်း ကျေးဇူးဆပ်မှာပါ။+
၇ မင်းတို့ရဲ့ဘုရင် ရှောလု ကွယ်လွန်သွားပေမဲ့ ယုဒအမျိုးသားတွေက ငါ့ကို ဘုရင်အဖြစ် ဘိသိက်ပေးလိုက်ပြီဆိုတော့ မင်းတို့ အားမာန်တင်းပြီး ရဲစွမ်းသတ္တိရှိကြပါ” လို့ ပြောခိုင်းလိုက်တယ်။
၈ ရှောလုရဲ့ဗိုလ်ချုပ်၊ နေရရဲ့သား အာဗနာကတော့+ ရှောလုရဲ့သား အိရှဗောရှက်ကို+ မြစ်တစ်ဖက်ကမ်းမှာရှိတဲ့ မဟာနိမ်မြို့ဆီ ခေါ်သွားပြီး၊+
၉ ဂိလဒ်ပြည်၊+ အာရှရုတ်လူမျိုး၊ ယေဇရေလမြို့၊+ ဧဖရိမ်နယ်မြေ၊+ ဗင်ယာမိန်နယ်မြေနဲ့ အစ္စရေးတစ်ပြည်လုံးရဲ့ ဘုရင်အဖြစ် နန်းတင်လိုက်တယ်။
၁၀ ရှောလုရဲ့သား အိရှဗောရှက်ဟာ အစ္စရေးဘုရင်အဖြစ် နန်းတက်ချိန်မှာ အသက် ၄၀ ရှိပြီ။ သူက တိုင်းပြည်ကို နှစ်နှစ် အုပ်ချုပ်တယ်။ ယုဒအမျိုးသားတွေကတော့ ဒါဝိဒ်ကို လက်အောက်ခံကြတယ်။+
၁၁ ဒါဝိဒ်ဟာ ဟေဗြုန်မြို့မှာ နန်းစံပြီး ယုဒအမျိုးကို ခုနစ်နှစ်နဲ့ ခြောက်လ အုပ်ချုပ်တယ်။+
၁၂ နောက်တော့ နေရရဲ့သား အာဗနာနဲ့ ရှောလုရဲ့သား အိရှဗောရှက်ရဲ့ကျွန်တွေက မဟာနိမ်မြို့ကနေ+ ဂိဗောင်မြို့ကို+ ထွက်လာတယ်။
၁၃ ဇေရုယာရဲ့သား+ ယွာဘနဲ့+ ဒါဝိဒ်ရဲ့ မင်းမှုထမ်းတွေလည်း ထွက်လာပြီး ဂိဗောင်ရေကန်နားမှာ သူတို့နဲ့ ဆုံမိကြတယ်။ တစ်အုပ်စုက ရေကန်ရဲ့ ဒီဘက်မှာ၊ နောက်တစ်အုပ်စုက ရေကန်ရဲ့ဟိုဘက်မှာ ထိုင်နေတယ်။
၁၄ အာဗနာက “မင်းရဲ့လူတွေနဲ့ ငါ့လူတွေကို ယှဉ်ပြီး တိုက်ခိုင်းရအောင်” လို့ပြောတော့ ယွာဘက “ကောင်းပြီလေ။ တိုက်ခိုင်းကြတာပေါ့” လို့ပြောတယ်။
၁၅ ဒါနဲ့ အိရှဗောရှက်ရဲ့ အုပ်စုထဲက ဗင်ယာမိန်အမျိုးသား ၁၂ ယောက်၊ ဒါဝိဒ်ရဲ့ မင်းမှုထမ်းတွေထဲက ၁၂ ယောက် ထွက်လာပြီး တိုက်ခိုက်ကြတယ်။
၁၆ တစ်ယောက်ရဲ့ခေါင်းကို တစ်ယောက်ဖမ်းကိုင်ပြီး နံဘေးကို ဓားနဲ့ထိုးတဲ့အတွက် အားလုံး လဲသေကုန်တယ်။ ဒါကြောင့် ဂိဗောင်မြို့မှာရှိတဲ့ အဲဒီနေရာက ဟေလက်ဟာဇုရိမ်လို့ နာမည်တွင်သွားတယ်။
၁၇ အဲဒီနေ့မှာ တိုက်ပွဲပြင်းပြင်းထန်ထန် ဆက်ဖြစ်ပြီး နောက်ဆုံး အာဗနာနဲ့ အစ္စရေးအမျိုးသားတွေက ဒါဝိဒ်ရဲ့မင်းမှုထမ်းတွေကို ရှုံးနိမ့်သွားတယ်။
၁၈ ဇေရုယာရဲ့+ သား သုံးယောက်ဖြစ်တဲ့ ယွာဘ၊+ အဘိရှဲနဲ့+ အာသဟေလလည်း+ ရှိနေတယ်။ အာသဟေလက တောထဲမှာကျင်လည်တဲ့ ဒရယ်လို လျင်မြန်တယ်။
၁၉ သူက အာဗနာကို မဲပြီး မနားတမ်းလိုက်တယ်။
၂၀ အာဗနာက နောက်လှည့်ကြည့်ပြီး “မင်းက အာသဟေလလား” လို့မေးတော့ “ဟုတ်တယ်” လို့ သူဖြေတယ်။
၂၁ အာဗနာက “ငါ့နောက်ကို မလိုက်နဲ့တော့။ ငါ့ကိုလိုက်ဖမ်းမယ့်အစား တခြားတစ်ယောက်ကို လိုက်ဖမ်းပြီး သူ့ပစ္စည်းတွေ ချွတ်ယူလိုက်” လို့ပြောပေမဲ့ အာသဟေလက မနားတမ်း ဆက်လိုက်နေတယ်။
၂၂ အာဗနာက “ငါ့နောက်ကို ဆက်မလိုက်နဲ့တော့။ မင်းကို သတ်မိလိမ့်မယ်။ သတ်မိရင် မင်းအစ်ကိုယွာဘကို ငါဘယ်လိုမျက်နှာပြရမလဲ” ဆိုပြီး ထပ်ပြောပေမဲ့၊
၂၃ အာသဟေလ ဆက်လိုက်နေတော့ အာဗနာက လှံကို နောက်ပြန်ထိုးလိုက်တယ်။+ အာသဟေလက ဝမ်းဗိုက်ထုတ်ချင်းပေါက်ပြီး အဲဒီမှာပဲ ပွဲချင်းပြီး သေဆုံးသွားတယ်။ သူလဲသေတဲ့နေရာကို လူတွေရောက်လာတဲ့အခါ ဆက်မလိုက်တော့ဘဲ ရပ်နေကြတယ်။
၂၄ ယွာဘနဲ့ အဘိရှဲကတော့ အာဗနာနောက်ကို ဆက်လိုက်တယ်။ နေဝင်ချိန်မှာ ဂိဗောင်တောကိုသွားတဲ့ လမ်းနား၊ ဂိအာအရပ်ဘက် မျက်နှာမူနေတဲ့ အမ်မတောင်ကုန်းကို သူတို့ရောက်လာတယ်။
၂၅ အဲဒီမှာ ဗင်ယာမိန်အမျိုးသားတွေ စုရုံးလာပြီး အာဗနာနဲ့ ပူးပေါင်းကြတယ်။ သူတို့က တောင်ကုန်းပေါ်မှာ ရပ်နေကြတယ်။
၂၆ အာဗနာက ယွာဘကို “ငါတို့အချင်းချင်း ဒီလိုပဲ သတ်နေတော့မှာလား။ ဒီအတိုင်းသာဆိုရင် ဆိုးကျိုးတွေပဲ ကြုံရမယ်ဆိုတာ မင်းသိတာပဲ။ ကိုယ့်ညီအစ်ကိုတွေနောက် ဆက်မလိုက်ဖို့ လူတွေကို မတားတော့ဘူးလား” လို့ အော်ပြောတယ်။
၂၇ ဒါနဲ့ ယွာဘက “စစ်မှန်ပြီး အသက်ရှင်နေတဲ့ ဘုရားသခင်ကို တိုင်တည်ပြီး ငါပြောမယ်။ မင်းသာ အခုလိုမပြောရင် မိုးလင်းတဲ့အထိ ကိုယ့်ညီအစ်ကိုတွေနောက်ကို ငါ့လူတွေ ဆက်လိုက်နေမှာပဲ” လို့ ပြောတယ်။
၂၈ အဲဒီနောက် တံပိုးမှုတ်ပြီး အချက်ပေးလိုက်တဲ့အခါ သူ့လူတွေ ဆက်မလိုက်တော့ဘူး။ ဒါကြောင့် တိုက်ပွဲ ပြီးဆုံးသွားတယ်။
၂၉ အာဗနာနဲ့ သူ့လူတွေက အရာဗာအရပ်ကို+ တစ်ညလုံး ဖြတ်လျှောက်သွားပြီး ဂျော်ဒန်မြစ်ကို ကူးကြတယ်။ အဲဒီနောက် လျှိုမြောင်တစ်လျှောက်* ချီတက်သွားပြီး နောက်ဆုံး မဟာနိမ်မြို့ကို ရောက်လာတယ်။+
၃၀ ယွာဘကတော့ အာဗနာနောက်ကို လိုက်ရာကနေ ပြန်လှည့်လာပြီးနောက် သူ့လူတွေကို စုရုံးလိုက်တဲ့အခါ အာသဟေလအပြင် ဒါဝိဒ်ရဲ့ မင်းမှုထမ်းထဲက ၁၉ ယောက် လျော့နေတယ်။
၃၁ ဒါပေမဲ့ ဒါဝိဒ်ရဲ့မင်းမှုထမ်းတွေက ဗင်ယာမိန်အမျိုးသားတွေနဲ့ အာဗနာရဲ့လူတွေထဲက အယောက် ၃၆၀ ကို နှိမ်နင်းလိုက်တယ်။
၃၂ အာသဟေလရဲ့+ အလောင်းကိုတော့ သယ်သွားပြီး ဘက်သလီဟင်မြို့မှာရှိတဲ့+ သူ့ဖခင်ရဲ့သင်္ချိုင်းမှာ သင်္ဂြိုဟ်ကြတယ်။ အဲဒီနောက် ယွာဘနဲ့ သူ့လူတွေက တစ်ညလုံး ခရီးဆက်ပြီး မိုးသောက်ချိန်မှာ ဟေဗြုန်မြို့ကို+ ရောက်လာတယ်။
အောက်ခြေမှတ်ချက်များ
^ “ဗိသရုန်” လည်းဖြစ်နိုင်။
