1 Mbiri 20:1-8
20 Kumayambiriro kwa chaka, pa nthawi imene mafumu ankapita kukamenya nkhondo, Yowabu+ anatsogolera gulu lankhondo nʼkukawononga dziko la Aamoni ndiponso kuzungulira mzinda wa Raba.+ Koma Davide anatsala ku Yerusalemu.+ Yowabu anaukira mzinda wa Raba nʼkuuwononga.+
2 Kenako Davide anatenga chipewa chachifumu chimene chinali kumutu kwa Malikamu. Anapeza kuti chinali cholemera talente imodzi* ya golide ndipo chinali chokongoletsedwa ndi miyala yamtengo wapatali. Anthu anaveka Davide chipewacho. Komanso iye anatenga zinthu zambiri mumzindawo.+
3 Davide anatenga anthu amene anali mumzindawo nʼkuyamba kuwagwiritsa ntchito+ yocheka miyala komanso ntchito zina zogwiritsa ntchito zitsulo zakuthwa ndi nkhwangwa. Zimenezi ndi zimene anachitira anthu onse amʼmizinda ya Aamoni. Kenako Davide ndi asilikali onse anabwerera ku Yerusalemu.
4 Nkhondo imeneyi itatha, panabukanso nkhondo ina ndi Afilisiti ku Gezeri. Pa nthawi imeneyo Sibekai+ wa ku Husa* anapha Sipa, amene anali mbadwa ya Arefai,+ moti Afilisiti anagonjetsedwa.
5 Kenako panabukanso nkhondo ina ndi Afilisiti, ndipo Elihanani mwana wa Yairi anapha Lami, mchimwene wake wa Goliyati+ wa ku Gati, amene mtengo wa mkondo wake unali waukulu ngati mtengo wogwiritsa ntchito powomba nsalu.+
6 Kenako panayambikanso nkhondo ina ku Gati+ ndipo kunali munthu wamkulu modabwitsa.+ Iye anali ndi zala 6 kudzanja lililonse ndiponso zala 6 kuphazi lililonse, moti anali ndi zala 24. Nayenso anali mbadwa ya Arefai.+
7 Iye ankanyoza+ kwambiri Aisiraeli. Choncho Yonatani mwana wa Simeya,+ mchimwene wake wa Davide, anamupha.
8 Anthu amenewa anali mbadwa za Arefai+ ku Gati+ ndipo anaphedwa ndi Davide ndi atumiki ake.
Mawu a M'munsi
^ Talente imodzi inkalemera makilogalamu 34.2. Onani Zakumapeto B14.
^ Mabaibulo ena amati, “mbadwa ya Husa.”
