Wolembedwa ndi Maliko 9:1-50

Onetsani Kaonekedwe ka Mawu Bisani Kaonekedwe ka Mawu

Yesu anasintha maonekedwe ake (1-13)
Mnyamata wogwidwa ndi chiwanda anachiritsidwa (14-29)
- Zinthu zonse ndi zotheka kwa munthu amene ali ndi chikhulupiriro (23)
Yesu ananeneratu kachiwiri za imfa yake (30-32)
Ophunzira anakangana kuti wamkulu ndi ndani (33-37)
Aliyense amene sakulimbana nafe ali kumbali yathu (38-41)
Zopunthwitsa (42-48)
“Khalani ndi mchere mwa inu nokha” (49, 50)

9 Ndiye anawauzanso kuti: “Ndithu ndikukuuzani kuti pali ena mwa amene aimirira pano amene sadzalawa imfa mʼpangʼono pomwe mpaka choyamba ataona Ufumu wa Mulungu utabwera ndi mphamvu zake.”+ ² Patapita masiku 6, Yesu anatenga Petulo, Yakobo ndi Yohane nʼkukwera nawo mʼphiri lalitali kwaokhaokha. Ndiyeno iye anasintha maonekedwe ake iwo akuona.+ ³ Malaya ake akunja anayamba kunyezimira nʼkuyera kwambiri kuposa mmene wochapa zovala aliyense padziko lapansi angayeretsere zovala. ⁴ Komanso Eliya ndi Mose anaonekera kwa iwo ndipo ankakambirana ndi Yesu. ⁵ Ndiye Petulo anauza Yesu kuti: “Rabi, zingakhale bwino ife titamakhala pano. Choncho timange matenti atatu pano, imodzi yanu, imodzi ya Mose ndi ina ya Eliya.” ⁶ Petulo sanadziwe choti anene, chifukwa ophunzirawo anachita mantha kwambiri. ⁷ Ndiyeno kunachita mtambo umene unawaphimba. Kenako panamveka mawu+ kuchokera mumtambomo akuti: “Uyu ndi Mwana wanga wokondedwa.+ Muzimumvera.”+ ⁸ Kenako iwo anayangʼana uku ndi uku ndipo anangoona kuti palibe wina aliyense koma Yesu yekha basi. ⁹ Pamene ankatsika mʼphirimo, Yesu anawalamula mwamphamvu kuti asauze aliyense zimene anaonazo,+ mpaka Mwana wa munthu atauka kwa akufa.+ ¹⁰ Iwo anasungadi zimenezo mumtima,* koma anayamba kukambirana zimene kuuka kwa akufa kumeneku kukutanthauza. ¹¹ Ndiyeno anayamba kumufunsa kuti: “Nʼchifukwa chiyani alembi amanena kuti Eliya+ ayenera kubwera choyamba?”+ ¹² Iye anawayankha kuti: “Eliya adzabweradi choyamba nʼkubwezeretsa zinthu zonse.+ Koma nʼchifukwa chiyani malemba amanena kuti Mwana wa munthu ayenera kukumana ndi mavuto ambiri+ komanso kumuchitira zinthu zachipongwe?+ ¹³ Koma ine ndikukuuzani kuti Eliya+ anabwera kale ndipo anamuchitira zilizonse zimene iwo anafuna, mogwirizana ndi zimene Malemba amanena zokhudza iye.”+ ¹⁴ Atayandikira kumene kunali ophunzira ena aja, iwo anaona gulu lalikulu la anthu litawazungulira ndipo panali alembi amene ankakangana nawo.+ ¹⁵ Koma gulu lonselo litangomuona linadabwa ndipo linamuthamangira kuti likamupatse moni. ¹⁶ Ndiyeno iye anawafunsa kuti: “Mukukangana nawo chiyani?” ¹⁷ Munthu wina amene anali mʼgululo anamuyankha kuti: “Mphunzitsi, ine ndabweretsa mwana wanga wamwamuna kwa inu chifukwa ali ndi mzimu umene umamulepheretsa kulankhula.+ ¹⁸ Mzimuwo umati ukamugwira, umamugwetsera pansi. Akatero amachita thovu mʼkamwa komanso kukukuta mano ndipo amafooka. Ndinapempha ophunzira anu kuti autulutse koma alephera.” ¹⁹ Iye anayankha kuti: “Inu mʼbadwo wopanda chikhulupiriro,+ kodi ndikhala nanube mpaka liti? Ndipitirize kukupirirani mpaka liti? Bwera nayeni kuno.”+ ²⁰ Choncho iwo anapita naye kwa Yesu. Koma mzimuwo utamuona, nthawi yomweyo unachititsa kuti mwanayo aphuphe. Anagwa pansi nʼkumagubudukagubuduka ndipo ankachita thovu kukamwa. ²¹ Ndiyeno Yesu anafunsa bambo ake kuti: “Izi zakhala zikumuchitikira kwa nthawi yaitali bwanji?” Bambo a mwanayo ananena kuti: “Kuyambira ali wamngʼono ²² ndipo nthawi zambiri umamugwetsera pamoto komanso mʼmadzi kuti umuwononge. Koma ngati mungathe kuchitapo kanthu, tichitireni chifundo nʼkutithandiza.” ²³ Yesu anafunsa bambowo kuti: “Mukuti ‘Ngati mungatheʼ? Chilichonsetu nʼchotheka kwa munthu amene ali ndi chikhulupiriro.”+ ²⁴ Nthawi yomweyo bambo a mwanayo anafuula nʼkunena kuti: “Chikhulupiriro ndili nacho! Limbitsani chikhulupiriro changa!”+ ²⁵ Tsopano Yesu ataona kuti gulu la anthu likuthamangira kwa iwo, anakalipira mzimu wonyansawo kuti: “Iwe mzimu wolepheretsa munthu kulankhula komanso kumva, ndikukulamula, tuluka ndipo usadzalowenso mwa iye.”+ ²⁶ Mwanayo atafuula ndi kuphupha kwambiri, mzimuwo unatuluka ndipo ankaoneka ngati wafa, moti anthu ambiri ankanena kuti: “Wamwalira!” ²⁷ Koma Yesu anamugwira dzanja nʼkumudzutsa ndipo mwanayo anaimirira. ²⁸ Ndiyeno atalowa mʼnyumba, ophunzira ake anamufunsa ali kwaokha kuti: “Nʼchifukwa chiyani ife tinalephera kutulutsa chiwanda chija?”+ ²⁹ Iye anawayankha kuti: “Mzimu wa mtundu umenewu sungathe kutuluka ndi chilichonse, koma pemphero basi.” ³⁰ Atachoka kumeneko anapitiriza ulendo wawo kudutsa mu Galileya, koma iye sanafune kuti aliyense adziwe zoti ali kumeneko. ³¹ Chifukwa iye ankaphunzitsa ophunzira ake nʼkuwauza kuti: “Mwana wa munthu adzaperekedwa mʼmanja mwa anthu ndipo adzamupha.+ Koma ngakhale adzamuphe, adzauka patatha masiku atatu.”+ ³² Komabe ophunzirawo sanamvetse mawu akewo ndipo ankaopa kuti amufunse. ³³ Kenako anafika ku Kaperenao. Ndiyeno pamene anali mʼnyumba anawafunsa kuti: “Mʼnjira muja mumakangana chiyani?”+ ³⁴ Iwo anangokhala chete, chifukwa mʼnjira amakangana kuti wamkulu ndi ndani pakati pawo. ³⁵ Choncho anakhala pansi nʼkuitana ophunzira 12 aja nʼkuwauza kuti: “Ngati aliyense akufuna kukhala woyamba, ayenera kukhala wotsiriza pa onse ndiponso mtumiki wa onse.”+ ³⁶ Kenako anatenga mwana wamngʼono nʼkumuimika pakati pawo ndipo anamukumbatira nʼkuwauza kuti: ³⁷ “Aliyense amene walandira mwana wamngʼono+ ngati ameneyu mʼdzina langa, walandiranso ine. Ndipo aliyense amene walandira ine, sanalandire ine ndekha, koma walandiranso Mulungu amene anandituma.”+ ³⁸ Kenako Yohane anauza Yesu kuti: “Mphunzitsi, ife tinaona munthu wina akutulutsa ziwanda mʼdzina lanu ndiye tinamuletsa, chifukwa sakuyenda ndi ife.”+ ³⁹ Koma Yesu ananena kuti: “Musamuletse, chifukwa palibe amene angachite ntchito zamphamvu mʼdzina langa, nthawi yomweyo nʼkundinenera zachipongwe. ⁴⁰ Chifukwa amene sakutsutsana ndi ife ali kumbali yathu.+ ⁴¹ Komanso aliyense amene wakupatsani kapu ya madzi akumwa chifukwa chakuti ndinu ophunzira a Khristu,+ ndithu ndikukuuzani, ameneyo mphoto yake sidzatayika.+ ⁴² Koma aliyense wokhumudwitsa mmodzi wa tiana iti timene tili ndi chikhulupiriro, zingamukhalire bwino kwambiri ngati atamumangirira chimwala champhero mʼkhosi mwake chimene bulu amayendetsa nʼkumuponya munyanja.+ ⁴³ Ngati dzanja lako limakuphunthwitsa, ulidule. Ndi bwino kuti ukapeze moyo ulibe chiwalo chimodzi, kusiyana nʼkupita ku Gehena,* kumoto umene sungazimitsidwe, uli ndi manja onse awiri.+ ⁴⁴ *⁠—— ⁴⁵ Ndipo ngati phazi lako limakupunthwitsa, ulidule. Ndi bwino kuti ukapeze moyo uli wolumala, kusiyana nʼkuti uponyedwe mʼGehena* uli ndi mapazi onse awiri.+ ⁴⁶ *⁠—— ⁴⁷ Ngati diso lako limakuchimwitsa,* ulitaye.+ Ndi bwino kuti ukalowe mu Ufumu wa Mulungu uli ndi diso limodzi, kusiyana nʼkuti uponyedwe mu Gehena* uli ndi maso onse awiri,+ ⁴⁸ kumene mphutsi za mitembo sizifa ndipo moto wake suzima.+ ⁴⁹ Chifukwa aliyense akuyenera kuwazidwa mchere umene ukuimira moto.+ ⁵⁰ Mchere ndi wabwino, koma ngati mcherewo watha mphamvu, kodi mphamvuyo mungaibwezeretse bwanji?+ Khalani ndi mchere mwa inu nokha+ ndipo sungani mtendere pakati panu.”+