Salimo 8:1-9
Kwa wotsogolera nyimbo, pa Gititi.* Nyimbo ya Davide.
8 Inu Yehova Ambuye wathu, dzina lanu ndi lalikulu padziko lonse lapansi,Mwachititsa kuti ulemerero wanu ukhale pamwamba kuposa kumwamba!+
2 Kudzera mʼmawu otamanda ochokera mʼkamwa mwa ana ndi mwa makanda+Mwasonyeza mphamvu zanu chifukwa cha adani anu,Kuti adani anu komanso amene akufuna kukubwezerani zoipa akhale chete.
3 Ndikayangʼana kumwamba, ntchito ya zala zanu,Mwezi ndi nyenyezi zimene munapanga,+
4 Ndimaganiza kuti, munthu ndi ndani kuti muzimuganizira,Ndipo mwana wa munthu ndi ndani kuti muzimusamalira?+
5 Munamutsitsa pangʼono poyerekeza ndi angelo,*Ndipo munamuveka ulemerero ndi ulemu ngati chisoti chachifumu.
6 Munamupatsa mphamvu kuti alamulire ntchito za manja anu.+Mwaika zinthu zonse pansi pa mapazi ake:
7 Nkhosa, mbuzi ndi ngʼombe zonse,Komanso nyama zakutchire,*+
8 Mbalame zamumlengalenga komanso nsomba zamʼnyanja,Chilichonse chimene chimasambira mʼnyanja.
9 Inu Yehova Ambuye wathu, dzina lanu ndi lalikulu padziko lonse lapansi!
Mawu a M'munsi
^ Onani Matanthauzo a Mawu Ena.
^ Kapena kuti, “ena okhala ngati Mulungu.”
^ Mʼchilankhulo choyambirira, “zilombo zakutchire.”
