Oweruza 10:1-18
10 Abimeleki atafa, panabwera Tola, mwana wa Puwa amene anali mwana wa Dodo wa fuko la Isakara ndipo anapulumutsa Isiraeli.+ Iye ankakhala ku Samiri mʼdera lamapiri la Efuraimu.
2 Tola anaweruza Isiraeli zaka 23. Kenako anamwalira ndipo anaikidwa ku Samiri.
3 Tola atamwalira, panabwera Yairi wa ku Giliyadi ndipo anaweruza Isiraeli zaka 22.
4 Iye anali ndi ana 30 aamuna amene ankayenda pa abulu 30, ndipo iwo anali ndi mizinda 30. Mpaka lero mizinda imeneyi imadziwikabe kuti Havoti-yairi+ ndipo ili ku Giliyadi.
5 Kenako Yairi anamwalira ndipo anaikidwa ku Kamoni.
6 Aisiraeli anayambanso kuchita zoipa pamaso pa Yehova,+ ndipo anayamba kutumikira Abaala,+ mafano a Asitoreti, milungu ya ku Aramu,* milungu ya ku Sidoni, milungu ya ku Mowabu,+ milungu ya Aamoni+ ndi milungu ya Afilisiti.+ Iwo anasiya Yehova ndipo sankamutumikira.
7 Zitatero, Yehova anakwiyira kwambiri Aisiraeli moti anawapereka* kwa Afilisiti ndi kwa Aamoni.+
8 Choncho, anthu amenewa anazunza ndi kupondereza kwambiri Aisiraeli chaka chimenecho. Kwa zaka 18, anapondereza Aisiraeli onse amene anali kumʼmawa kwa Yorodano, mʼdziko la Aamori limene linali ku Giliyadi.
9 Aamoni ankawolokanso Yorodano kukamenyana ndi fuko la Yuda, la Benjamini ndi la Efuraimu, moti Aisiraeli ankavutika kwambiri.
10 Zitatero Aisiraeli anapempha Yehova kuti awathandize.+ Iwo anati: “Takuchimwirani inu Mulungu wathu, chifukwa tinakusiyani nʼkuyamba kutumikira Abaala.”+
11 Koma Yehova anauza Aisiraeli kuti: “Kodi sindinakupulumutseni pamene Aiguputo,+ Aamori,+ Aamoni, Afilisiti,+
12 Asidoni, Aamaleki ndi Amidiyani ankakuponderezani? Inu mutandilirira ndinakupulumutsani mʼmanja mwawo.
13 Koma munandisiya nʼkuyamba kutumikira milungu ina.+ Nʼchifukwa chake sindikupulumutsaninso.+
14 Pitani, mukapemphe thandizo kwa milungu imene mwasankhayo.+ Milungu imeneyoyo ikupulumutseni pa nthawi imene mukuvutikayi.”+
15 Koma Aisiraeli anauza Yehova kuti: “Tachimwa. Inuyo mutichite chilichonse chimene mukuona kuti nʼchabwino. Koma panopa chonde tipulumutseni.”
16 Atatero, iwo anachotsa milungu yonse yachilendo imene anali nayo ndipo anayamba kutumikira Yehova,+ moti iye sanalole kuti Aisiraeli apitirize kuvutika.+
17 Patapita nthawi, Aamoni+ anasonkhana nʼkumanga msasa wawo ku Giliyadi. Zitatero, Aisiraeli nawonso anasonkhana nʼkumanga msasa wawo ku Mizipa.
18 Ndiyeno anthu ndi akalonga a Giliyadi anayamba kufunsana kuti: “Ndani atitsogolere kukamenyana ndi Aamoni?+ Ameneyo akhale mtsogoleri wa anthu onse okhala mʼGiliyadi.”
