Oweruza 2:1-23
2 Kenako mngelo wa Yehova+ ananyamuka ku Giligala+ kupita ku Bokimu, ndipo anati: “Ndinakutulutsani mu Iguputo nʼkukulowetsani mʼdziko limene ndinalumbirira makolo anu.+ Ndinanenanso kuti, ‘Sindidzaphwanya pangano langa ndi inu.+
2 Inuyo musachite pangano ndi anthu okhala mʼdzikoli,+ ndipo mugwetse maguwa awo ansembe.’+ Koma inu simunamvere mawu anga.+ Nʼchifukwa chiyani mwachita zimenezi?
3 Nʼchifukwa chake ndinanena kuti, ‘Sindidzawathamangitsa pamaso panu,+ koma adzakhala msampha wanu,+ ndipo milungu yawo idzakhala ngati nyambo.’”+
4 Mngelo wa Yehova atauza Aisiraeli mawu amenewa, anthuwo anayamba kulira mokweza.
5 Choncho malowo anawapatsa dzina lakuti Bokimu,* ndipo anaperekapo nsembe kwa Yehova.
6 Yoswa atauza Aisiraeliwo kuti azipita, aliyense anapita komwe kunali cholowa chake, kukatenga dzikolo kukhala lawo.+
7 Anthuwo anapitiriza kutumikira Yehova masiku onse amene Yoswa anali ndi moyo komanso masiku onse a akulu amene anakhalabe ndi moyo Yoswa atamwalira, omwe anaona zinthu zazikulu zimene Yehova anachitira Aisiraeli.+
8 Kenako Yoswa, mtumiki wa Yehova, mwana wa Nuni, anamwalira ali ndi zaka 110.+
9 Ndipo anamuika mʼmanda ku Timinati-heresi,+ mʼdera limene analandira monga cholowa chake, mʼdera lamapiri la Efuraimu, kumpoto kwa phiri la Gaasi.+
10 Anthu onse a mʼbadwo umenewo anamwalira, ndipo panabwera mʼbadwo wina umene sunkadziwa Yehova kapena zimene iye anachitira Isiraeli.
11 Choncho Aisiraeli anayamba kuchita zinthu zoipa pamaso pa Yehova ndipo anayamba kutumikira* Abaala.+
12 Iwo anasiya Yehova, Mulungu wa makolo awo amene anawatulutsa mʼdziko la Iguputo+ nʼkuyamba kutsatira milungu ya anthu owazungulira.+ Anayamba kugwadira milunguyo ndipo anakhumudwitsa Yehova.+
13 Anasiya Yehova nʼkuyamba kutumikira Baala ndi zifaniziro za Asitoreti.+
14 Zitatero Yehova anakwiyira kwambiri Aisiraeli, moti anawapereka mʼmanja mwa adani amene anawaukira nʼkutenga zinthu zawo.+ Iye anawagulitsa kwa adani awo owazungulira+ moti sanathe kulimbana nawo.+
15 Kulikonse kumene ankapita, dzanja la Yehova linkawaukira ndi kuwabweretsera tsoka,+ mogwirizana ndi zimene Yehova ananena ndiponso zimene Yehova anawalumbirira,+ moti iwo ankavutika kwambiri.+
16 Zikatero, Yehova ankawapatsa oweruza omwe ankawapulumutsa mʼmanja mwa adani.+
17 Koma Aisiraeli sankamvera oweruzawo. Iwo ankachita chiwerewere ndi milungu ina ndi kuigwadira. Anasiya mwamsanga njira imene makolo awo anayendamo. Makolo awo ankamvera malamulo a Yehova,+ koma iwo sanachite zimenezo.
18 Yehova akawapatsa woweruza,+ Yehova ankakhala ndi woweruzayo, ndipo ankawapulumutsa mʼmanja mwa adani awo pa nthawi yonse ya woweruzayo. Yehova ankawamvera chisoni+ akamva kulira kwawo chifukwa cha anthu omwe ankawapondereza+ komanso kuwachitira nkhanza.
19 Koma woweruza akamwalira, iwo ankayambiranso kuchita zoipa kuposa makolo awo. Ankatsatira milungu ina, kuitumikira ndi kuigwadira.+ Iwo sanasiye zochita zawozo ndiponso unkhutukumve wawo.
20 Pamapeto pake, Yehova anakwiyira kwambiri Aisiraeli+ ndipo anati: “Popeza mtundu umenewu waphwanya pangano langa+ limene ndinalamula makolo awo kuti alisunge, ndipo sanandimvere,+
21 ine sindithamangitsanso pamaso pawo mtundu uliwonse pa mitundu imene Yoswa anaisiya pamene ankamwalira.+
22 Ndichita zimenezi kuti ndiyese Aisiraeli ngati angasunge njira ya Yehova+ poyenda mʼnjirayo ngati mmene makolo awo anachitira.”
23 Choncho, Yehova analola mitundu imeneyi kukhalabe. Sanaithamangitse mwamsanga komanso sanaipereke mʼmanja mwa Yoswa.
