Mogwirizana ndi akulu a m’mipingo, maofesi a nthambi a ku Rwanda ndi ku Zimbabwe akugwira ntchito yothandiza abale ndi alongo omwe alibe ndalama zokwanira zogulira zinthu zofunika pamoyo chifukwa cha mliri wa colonavairasi.

Pa 2 April 2020, Komiti ya Nthambi ku Rwanda inapempha akulu m’mipingo kuti afufuze komanso athandize abale ndi alongo omwe akhudzidwa ndi mavuto a zachuma chifukwa cha mliriwu. Potsatira zimenezi, akulu m’madera osiyanasiyana m’dzikoli anakonza dongosolo lopereka chakudya ndi zinthu zina zofunika kwa abale ndi alongowa.

Patangodutsa milungu iwiri, ofesi ya nthambi ku Rwanda inakhazikitsa makomiti 31 opereka chithandizo pakagwa mavuto amwadzidzidzi. Makomitiwa anagawa kwa mabanja okhudzidwa zinthu monga ufa, mpunga, nyemba, mchere, shuga ndi mafuta ophikira. Pofika pano, mabanja oposa 7,000 alandira zinthuzi.

Atalandira zinthu zimenezi, Mlongo Nizeyimana Charlote ndi ana ake atatu ananena kuti: “Zikomo kwambiri chifukwa chopitirizabe kutithandiza mwauzimu komanso mwakuthupi pamene kuli mliri woopsa wa kolonavairasi. Tikusowa chonena, sitikudziwa kuti tikuthokozeni bwanji.”

Tamvani zimene m’bale wina anafotokoza za tsiku limene anauzidwa kuti banja lake lilandira nawo chakudya. Iye anati: “Pa tsikuli, mkazi wanga anakomoka chifukwa chosowa chakudya. Mosayembekezereka m’bale wina anandiimbira foni n’kundiuza kuti pakonzedwa dongosolo loti banja lathu lilandira nawo chakudya. Ndinadzidzimuka kwambiri. Ndinachezera kupemphera usiku wonse poyamikira Yehova.”

Mliri wa COVID-19 wachititsa kuti vuto losowa chakudya lomwe linalipo kale m’dzikoli liwonjezereke.

Ofesi ya nthambi ku Zimbabwe inasankha makomiti 5 opereka chithandizo pakagwa mavuto amwadzidzidzi kuti ayendetse ntchito yothandiza abale ndi alongo. Kuwonjezera pamenepa, ofesi ya nthambi inakonza zoti ofalitsa azipereka chakudya ndi zinthu zina zothandizira abale ndi alongo omwe akuvutika. Makomitiwa akugawa kwa abalewa zinthu zomwe zinaperekedwazi.

Pofika pano, makomitiwa agawa chimanga cholemera makilogalamu 62,669, mafuta ophikira malita 6,269, kapenta (nsomba zouma) makilogalamu 3,337 ndiponso nyemba zolemera makilogalamu 5,139 kwa ofalitsa 7,319.

Banja lina limene likuphunzira Baibulo komanso limapezeka nawo pamisonkhano yampingo linasowa chakudya. Banjali linakhudzidwa kwambiri litalandira chakudya kuchokera kwa m’bale yemwe amawaphunzitsa Baibulo. Apa n’kuti mwa dzulo lake m’busa wa ku tchalitchi chawo anawaitana. M’busayu anapempha banjali kuti limupatse zopereka n’cholinga choti akagulire zinthu zofunika zoti zithandizire m’busayo ndi mkazi wake. Banjali litaona kusiyana komwe kulipo pakati pa m’busayu ndi a Mboni za Yehova linakafufutitsa mayina awo n’kutuluka m’chipembedzocho.

Sitikukayikira kuti Yehova apitiriza kudalitsa ntchito yothandiza anthu ovutika ndiponso aonetsetsa kuti abale ndi alongo athu ku Rwanda ndi ku Zimbabwe alandira zinthu zimene akufunikira.—Machitidwe 11:29.