“Murharhanyagya cici; ci omu ngasi bulagirire musegere Nnâmahanga, mumushenge, munamuvuge omunkwa. Ntyo omurhûla gwa Nyamuzinda gulushire ngasi nkengero gwalanga emirhima yinyu n’obukengere bwinyu muli Kristu Yezu.”​—Abafilipi 4:6, 7.

 Amango abakozi ba Nnâmahanga bali barhanya okurhalusire olugero, banamushenga ly’abaha oburhulirize. Nnâmahanga alaganyize oku anabaha omurhûla gw’ekandalala, gwabarhabala balwise oko kurhanya kurhalusire olugero n’okulanga entanya zabo z’ekandalala. Omulongo gwa 6 guganirire amasala mberuluka gakabarhabala babe n’omurhûla gwa ntyo.

 Okusengera gaba masala omuntu asembereramwo Nnâmahanga oburhabale. Omuntu anasengera Nnâmahanga amango ali aciyumva kubi bwenene erhi amango ali omu buhanya, nk’oku Yezu ajiraga. (Abahabraniya 5:7) Kanji-kanji omuntu anagalukire-galukire amasala ga ntyo.

 Okushenga gaba masala gayumvikine omuntu abwira Nnâmahanga. Abakozi bage banamushenga “omu ngasi bulagirire,” erhi “ngasi kanga.” Cikone, ago masala gashinganine gapatane n’obulonza bwa Nnâmahanga nk’oku buyerekinwe omu Bibliya.—1 Yowane 5:14.

 Amasala g’okuvuga Nnâmahanga omunkwa ganayerekane oku rhushagalukire ebi arhujirire n’ebi arhujirira amango gayisha. Erhi rhusegeza obwenge bwirhu oku birhumire by’okuvuga Nnâmahanga omunkwa, kunarhurhabale rhugendekere rhwaba n’obushagaluke.—1 Abatesalonika 5:16-18.

 Omurhûla Nnâmahanga aha abakozi bage lyo liba ishuzo ly’ago masala. “Omurhûla gwa Nyamuzinda” guhugwîre okurhulirira omuntu ayumva okubona agwerhe obwîra bwinja haguma naye. (Abaroma 15:13; Abafilipi 4:9) Ogo murhûla “gulushire ngasi nkengero” bulya gunakarhenga emwa Nnâmahanga gwanarhurhabala kulusha oku rhwal’irhanyize.

 Olu lwandiko luyerekine oku omurhûla gwa Nnâmahanga gwanalanga emirhima yirhu. Oluderho lw’Ecigiriki luhindwirwe “kulanga” luli luderho lukolesibwa omu cisoda luyerekana ebi ecigusho c’abasoda cakag’ijira lyo cilanga olugo luyubake n’olukata luzi-zibu. Ko n’oko, omurhûla gwa Nnâmahanga gunalange entanya zirhu z’ekandalala n’obukengere bwirhu. Kugererago omuntu arhaciciyumva agogomerwe n’amazibu ali alwisa.

 Omurhûla gwa Nnâmahanga gunarhulange “muli Kristu Yezu,” bulya kugerera Yezu lyo rhwakaba bîra ba Nnâmahanga. Yezu acihânyire ngombôlo erhi byaha birhu birhuma. Erhi rhwakaba rhugwerhe obuyemere muli Yezu, rhwanashagalukira emigisho ya Nnâmahanga. (Abahabraniya 11:6) Na kandi rhwanashenga Nnâmahanga kugerera Yezu. Yezu aderha ntya: “Ntaye wankaja emwa Larha arhanangeziriho.”—Yowane 14:6; 16:23.

 Ecitabu c’Abafilipi gali maruba entumwa Paolo yayandikiraga Abakristu bal’ilamire omu vile y’e Filipi. * Omu cigabi ca 4 c’eco citabu, Paolo aha Abakristu bamw’eco cigamba omurhima oku bacishinge, anabavuga omunkwa oku buhânyi bwabo bwarhumaga ashagaluka. (Abafilipi 4:4, 10, 18) Ayerekine oku isala linarhume omuntu aba n’omurhûla gwa Nnâmahanga, anayerekana ntanya zihi na bijiro bihi byakarhuhash’isa okuba n’oburhabale bw’“omurhûla gwa Nyamuzinda.”—Abafilipi 4:8, 9.