“Mumanye mwankacigererakwo er’igulu, ci muhinduke bantu bahyahya omu murhima gwinyu, lyo mumanyirira obulonza bwa Nnâmahanga; mumanye aminja, ebi akunda n’ebishinganine lwoshi.”—Abaroma 12:2.

 Abalonza okushagalusa Nnâmahanga arhali ntanya zirhashinganini zone bashinganine baleke, cikone bashinganine bajire empindulo omu bumuntu bwabo. Nnâmahanga arhakabaseza oku bajire empindulo; banazijire bulya bamuzigire banahugûsirwe oku amarhegeko gage gaba minja na ga lugero na ga kulerha obunguke.—Izaya 48:17.

 “Mumanye mwankacigererakwo er’igulu.” “Er’igulu,” lihiziremo bene bantu n’amarhegeko gabo, ebijiro byabo, n’enjira yabo y’okukola ebintu erhayerekana entanya za Nnâmahanga. (1 Yowane 2:15-17) Ebyo binakashumya abantu ngasi mango, n’oko kunarhume babumbwa erhi kuhindula ebijiro byabo n’obumuntu bwabo. Lyo Nnâmahanga ayemera enterekêro y’omuntu, ashinganine ahagalike enshumi z’igulu, bulya nk’arhajijiri ntyo anaba n’amorhere gakashereza akalamo kage n’okurhasimisa Nnâmahanga.—Abefezi 2:1-3; 4:17-19.

 “Muhinduke bantu bahyahya omu murhima.” Kandi omuntu ashinganine ajire okwage koshi ly’ajira empindulo omu kandalala n’omu ntanya. Rhwanabona oku ezo mpindulo ziri nyinji bulya oluderho lw’Ecigiriki luganirirwe “kuhinduka,” luganirire empindulo zishushine n’ezi ecisholero cijira lyo ciba cihuhwihwi. Abaharamya Nnâmahanga bashinganine bayambale “omuntu muhyahya.”—Abefezi 4:23, 24; Abakolosi 3:9, 10.

 “Lyo mumanyirira obulonza bwa Nnâmahanga; mumanye aminja, ebi akunda n’ebishinganine lwoshi.” Nnâmahanga aba alonzize abamuharamya bayemere n’obwalagale ebi baba bayemire. Banajire ntyo omu kuyiga Akanwa ka Nnâmahanga, okukolesa ebi kadesire, n’okucibonera obunguke bw’okulama kushimbana n’amakanuni g’olungenzi ga Nnâmahanga. Omu ntyo, banayerekane oku enjira za Nnâmahanga zo nyinja kulusha.—Ennanga 34:8.

 Olwandiko lw’Abaroma cigabi ca 12 luhugwîre ebi okuha Nnâmahanga enterekêro aba ayemire kuhiziremo. Enterekêro ya ntyo eba ehumire oku ngasi cigabi c’akalamo k’omuntu, enaba ehûnyire omuntu akolese “obuhashe bw’okurhanya” ahali h’okuyemera kone nka muhurha erhi kuba n’entanya zirhashinganini. (Abaroma 12:1, 3, NWT) Eco cigabi cirimo amahano minja gakarhurhabala rhube n’amorhere ga Nnâmahanga, gakarhurhabala rhumanye oku rhwakajirira abandi, na gurhi rhwakajira amango bamarhujirira okurhashinganini.—Abaroma 12:9-21.