AMAHUGÛLO G’AMANDIKO G’EBIBLIYA

Ennanga 23:4—“Ciru Nankahonera omu Kabanda k’Omwizimya”

YEREKANA

“Ciru nankahonera omu kabanda k’omwizimya nta mabi nyobohire, bulya rhwembi rhunali. Akarhi kawe n’obuhiri bwawe bindi hofi; byo bidwirhe byantûliriza.”—Ennanga 23:4.

Amahugûlo g’Olwandiko lw’Ennanga 23:4 *

Nnâmahanga analange abakozi bage ciru n’amango bali balwisa akanga kazibu bwenene. Olu lwandiko lushushanyize oku Yehova ashibiriramwo abakozi bage n’oku omungere ashibirira ebibuzi byage. * Barhaciyumva bali bone amango balwisa akanga kazibu kaganirirwe mw’olu lwandiko nka mwizimya erhi kanga k’okufâ. Muli ako kanga, abakozi bage banaciyumve bali omu murhûla banabe nka Nnâmahanga abali aha burhambi.

Omu mango ga mîra, omungere akag’ikolesa akarhi ly’alanga ebibuzi birhag’ilibwa n’ebiryanyi. Kandi akag’ikolesa obuhiri bulîri buliko ecifundo enyanya ly’alanga ebibuzi byage birhag’ihikirwa n’amazibu. Ko n’oko, Yehova ali nka Mungere w’obuzigire olanga n’okulongoza abantu bamuharamya. Ciru n’amango bali omu kanga kazibu bwenene, Yehova anabashibirire omu njira nyinji.

Anabayigirize n’okubarhuliriza kugerera Akanwa kage, Bibliya.—Abaroma 15:4.
Anayumvirhize amasala gabo, anabarhabale babe n’omurhûla omu bukengere n’ekandalala.—Abafilipi 4:6, 7.
Anakolese ababo bemezi lyo babaha omurhima.—Abahabraniya 10:24, 25.
Abahire obulangalire b’okunali okubiyerekire akasanzi kinja kayisha, amango ayusa ngasi mazibu goshi gali gabahikira.—Ennanga 37:29; Amafulûlo 21:3-5.

Akanga Ebinwa Biri omu Ennanga 23:4 Byaderhagwamwo

Olulanga lwa 23 lwayandikagwa na Daudi, wali mungere erhi ali musole. Na buzinda aba mwami w’ishanja ly’Abaisraheli ba mîra. (1 Samweli 17:34, 35; 2 Samweli 7:8) Olo lulanga lurhondire omu kuganirira Yehova nka Mungere olongoza, olisa, n’orhuliriza abakozi bage, nka kula omungere w’okunali anajirira ebibuzi byage.—Ennanga 23:1-3.

Omu Ennanga 23:4, amango Daudi ali aganirira obulanzi bwa Nnâmahanga amaleka okumuganirira nka muntu wa kasharhu w’obusungunu (ye) amamuganirira nka muntu wa wabirhi w’obusungunu (we). Eyo mpindûlo eyerekine obwîra bwa hofi-hofi Daudi agwerhe haguma na Yehova. Daudi alimanyire oku Nnâmahanga akag’imushibirira n’oku al’imanyire amazibu akag’ilwisa. Co cirhumire, Daudi arhal’iyobohire cici

Omu milongo ibirhi ekulikire y’Olulanga lwa 23, k’okuderha omulongo gwa 5 n’ogwa 6, Daudi arhacishushanyizi Yehova n’omungere, cikone amamushushanya n’omuntu wamayankirira ecigolo n’ecigolo cage. Aka omuntu oyankirire ecigolo na muhânyi, Yehova ajirire Daudi nka cigolo cikengwa. Ciru n’abashombanyi ba Daudi barhakahanzize Nnâmahanga okumushibirira. Okubuzinda bw’olo lulanga, Daudi ayerekine oku Nnâmahanga amuyeresa obwinja omu yindi myaka yoshi akac’ilamire.

Enyiganyo zikolesibwe omu Ennanga 23 ziyerekine oku Nnâmahanga agendekera ashibirira abakozi bage omu njira y’obuzigire.—1 Petro 2:25.

^ Olulanga lwa lwa 23 lo luba lwa 22 omu Bibliya nguma na nguma. Ciru akaba Ennanga zoshi ziba 150, Bibliya nguma na nguma zinazipange kushimbana n’amandiko gaba Masoreti b’Ecihabraniya, n’ezindi zinazipange kushimbana n’Ebibliya Septante, y’Ecigiriki mpindûlo y’amandiko g’Ecihabraniya yahwaga okuyandika omu myaka magana abirhi E.K.K.K.

^ Nnâmahanga, ohamagalwa Yehova, kanji-kanji Ebibliya enakamuganirira nka Mungere w’olukogo. Abakozi bage bashushanyizibwe n’ebibuzi baba balagirire oku bulanzi bwage n’oburhabale bwage.—Ennanga 100:3; Izaya 40:10, 11; Yeremiya 31:10; Ezekiyeli 34:11-16.