“Orhayobohaga, bulya ndi haguma nawe, orhabaga bihamba, bulya nie Nyamuzinda wawe. Nakuzibuhya nankurhabale, nakugwasa n’okulyo kw’obuciranuzi [erhi bushinganyanya] bwani.”​—Izaya 41:10, Biblia—Tafsiri ya Ulimwengu Mupya.

 Yehova * Nnâmahanga ayemezize n’obwalagale abakozi bage bishwekerezi oku abarhabala, ciru bakarhimanana na mazibu gahi.

 “Ndi haguma nawe.” Yehova abwizire abakozi bage bulya gurhi barhashinganini bayobohe, ababwizire oku ali haguma nabo. Ali abona ebiri byabahikira ananayumvirhize amasala gabo, muli ntyo ali nk’ali haguma nabo.—Ennanga 34:15; 1 Petro 3:12.

 “Nie Nyamuzinda wawe.” Yehova arhulirizize abakozi bage omu kubakengeza oku aciri Nyamuzinda wabo anacibayemire nka bakozi bage. Banayemera n’obwalagale oku nta kanga koshi-koshi kakarhuma Nyamuzinda arhabarhabala.—Ennanga 118:6; Abaroma 8:32; Abahabraniya 13:6.

 ‘Nakuzibuhya nankurhabale, nakugwasa n’okulyo kw’obuciranuzi [erhi bushinganyanya] bwani.’ Yehova agalukire ntanya nguma omu kukolesa njira isharhu ziri lubero ly’asegeza oku abarhabala. Akolesize olwiganyo ly’ayerekana gurhi ajira amango abakozi bage balagirire oku burhabale. Erhi muntu mulebe akahirima, Yehova anamurhege okuboko kwage kulyo ly’amuzusa.—Izaya 41:13.

 Akanwa kage, Bibliya, yo njira y’obulagirire bwenene Nnâmahanga akolesa ly’azibuhya n’okurhabala abakozi bage. (Yozwe 1:8; Abahabraniya 4:12) Kwa lwiganyo, Akanwa ka Nnâmahanga kanahe obwenge abali balwisa amazibu, nk’obukenyi, endwala, erhi kufîrwa n’omuzigirwa. (Emigani 2:6, 7) Na kandi, anakolese iroho lyage litagatifu, erhi misi yage ekola, ly’arhabala abakozi bage babe n’entanya nyinja barhanagogomeragwa n’amazibu gabo.—Izaya 40:29; Luka 11:13.

 Ebyo binwa byarhulirizize Abayahudi bishwekerezi bahekagwa e Babiloni enyuma z’aho. Yehova ali erhi alebîre oku, okubuzinda bw’emyaka bakajijire e Babiloni, bakayumvirhe emyanzi okubiyerekire omuntu wakasherezize amashanja gal’ibazungulusire n’okuhirako Babiloni ecirhero. (Izaya 41:2-4; 44:1-4) Ciru akaba Abababiloni n’amashanja gal’ibazungulusire bakayobohire enyanya z’eyo myanzi, Abayahudi bohe barhakayobohire, bulya Yehova akabalanzire. Ayemeza n’obwalagale abantu bage omu kubabwira kasharhu koshi-koshi oku ‘barhayobohaga.’—Izaya 41:5, 6, 10, 13, 14.

 Ciru akaba ebinwa biri omu lwandiko lwa Izaya 41:10 byaliyerekire burhangiriza Abayahudi bishwekerezi bal’ihêsirwe e Babiloni, Yehova ajijire ebyo binwa bilangwe lyo bikarhuliriza abakozi bage boshi. (Izaya 40:8; Abaroma 15:4) Ali arhabala abakozi bage ene, nk’oku arhabalaga ab’omu mango ga mîra.