AMAHUGÛLO G’AMANDIKO G’EBIBLIYA

Marko 1:15—“Obwami bwa Nyamuzinda Buli Hofi”

YEREKANA

“Amango gahisire, n’Obwami bwa Nyamuzinda buli hofi: muciyunjuze manayemere Emyanzi y’Akalembe.”—Marko 1:15, Biblia—Tafsiri ya Ulimwengu Mupya..

Amahugûlo g’Olwandiko lwa Marko 1:15

Yezu Kristu abwizire abumvirhiza bage oku Obwami bwa Nyamuzinda * bwali “hofi,” erhi “buyegerire,” bulya ye wakabire Mwami w’obo Bwami ananali haguma nabo bumvirhiza bage.

Yezu arhalonzagya okuderha oku Obwami bwa Nnâmahanga bwali bwamarhondera okurhegeka. Enyuma z’aho, abwizire abanafunzi bage oku obo Bwami bwakarhondire okurhegeka omu mango gayisha. (Ebijiro by’Entumwa 1:6, 7) Cikone, ahisire omu kasanzi kashinganine, omu mwaka Ebibliya yal’ilêbire oku akabonekine nka Mwami w’obo Bwami omu nsiku zayisha. * Co carhumaga Yezu aderha ntya: “Amango gahisire;” k’okuderha amango akarhondire omukolo gwage gw’okuyigiriza e Enjili, erhi, omwanzi mwinja, okubiyerekire Obwami.—Luka 4:16-21, 43.

Akanga Ebinwa Biri omu Marko 1:15 Byaderhagwamwo

Ly’abantu bayunguka n’omwanzi mwinja gw’Obwami, balishinganine baciyunjuze, k’okuderha, kuciyumva kubi enyanya z’ebyaha byabo bya mîra n’okulama kushimbana n’amakanuni ga Nnâmahanga. Abaciyunjuzize bayerekine oku bagwerhe obuyemere omu mwanzi mwinja okubiyerekire obo Bwami bw’akasanzi kayisha.

Yezu adesire ebyo binwa erhi arhangira omukolo gwage gw’amahubiri e Galilaya. Omwanzi gushushine n’ogo guli omu Mateyo 4:17 gudesire oku “kurhenga aho” Yezu arhondera okuyigiriza okubiyerekire Obwami bwa Nnâmahanga. Obwami go gwali mwanzi mukuli gw’amahubiri gage. Kobinali, Obwami buganirirwe kali 100 na kulusha omu bitabu bini by’e Enjili *, kanji-kanji olo luderho luli omu binwa Yezu aderhaga. Omu Bibliya, Yezu adesire okubiyerekire Obwami bwa Nnâmahanga kanji-kanji kulusha ogundi mwanzi goshi-goshi.

Osome Marko cigabi ca 1 n’amahugûlo g’idako, ezindi referanse z’amandiko, enfoto, n’akarte.

^ Obwami bwa Nnâmahanga buba burhegesi bw’empingu bwashimikagwa na Nnâmahanga lyo buhikiriza obulonza bwage okubiyerekire igulu. (Daniyeli 2:44; Mateyo 6:10) Ly’omanya binji, olole ecigabi cidesire “Obwami bwa Nnâmahanga byo Bici?”

^ Yezu alishinganine okuba Mwami ly’ahikiriza emikolo yage nka Masiya walaganyizibagwa, erhi orhumirwe wago-wago na Nnâmahanga. Ly’obona myanzi minji okubiyerekire obulêbi bw’Ebibliya buyerekine oku Yezu ye Masiya, olole ecigabi cidesire “K’Obulêbi Budesire Okubiyerekire Masiya, ka Kobinali Buyerekine oku Yezu Ye Wali Masiya?”

^ E Enjili byo bitabu bini birhanzi by’omu Mandiko g’Ecigiriki g’Ecikristu, galug’ihamagalwa Ndagano Mpyahya, bibamwo emyanzi eganirire akalamo ka Yezu n’omukolo gwage.