AMAHUGÛLO G’AMANDIKO G’EBIBLIYA
Mateyo 6:33—“Burhanzi Mulonze Obwami”
‘Burhanzi mulonze Obwami n’obushinganyanya bwage, n’ebyo byoshi mwayish’ibiyushulirwa.’—Mateyo 6:33.
Amahugûlo g’Olwandiko lwa Mateyo 6:33
Obwami bwa Nnâmahanga buli burhegesi erhi guvernema y’omu mpingu yayish’ihikiriza obulonza bwa Nnâmahanga hanw’igulu. (Mateyo 6:9, 10) Omuntu analonza burhanzi Obwami bwa Nnâmahanga omu kubuhira oku nafasi ntanzi omu kalamo kage. * Oko kurhali kuba n’irala ly’okuyiga binji okubiyerekire obo Bwami, cikone kubwira n’abandi lugenda ebintu binja bwayish’ihikiriza. (Mateyo 24:14) Omuntu olonza burhanzi Obwami bwa Nnâmahanga anakamushenga oku buyishe.—Luka 11:2.
Obushinganyanya bwa Nnâmahanga buhîziremwo amarhegeko gage okubiyerekire ebinja n’ebibi. (Ennanga 119:172) Omuntu analonze obushinganyanya bwa Nnâmahanga omu kulama kushimbana n’amarhegeko g’olugenzi lwinja ga Nnâmahanga, galerhera abantu obunguke ngasi mango.—Izaya 48:17.
Omusemwa gudesire byoshi mwayish’ibiyushulirwa ciri ciragane Nnâmahanga ahîre bala bahira Obwami bwage n’amarhegeko gage oku nafasi ntanzi omu kalamo kabo.—Mateyo 6:31, 32.
Akanga Ebinwa Biri omu Mateyo 6:33 Byaderhagwamwo
Yezu aderhaga ebyo binwa omu Mahubiri gage g’oku Ntondo gamanyikine bwenene, gaganirirwe omu Mateyo cigabi ca 5-7. Buzira karhinda, bumvirhiza banji ba Yezu bali bakenyi. Nkaba bakag’irhanya oku bashinganine balongereze ebintu by’omubiri, na buzinda banaba na kasanzi kasungunu k’okulonza Obwami. Cikone Yezu abaha omurhima oku balole kunganaci Nnâmahanga ashibirira emirhi n’ensimba. Nnâmahanga alaganyize oku ntyo ko anajirira balya balonza burhanzi Obwami.—Mateyo 6:25-30.
Entanya z’Obunywesi Okubiyerekire Olwandiko lwa Mateyo 6:33
Entanya z’obunywesi: Omuntu olonza Obwami anagale.
Okuli: Yezu adesire oku abalonza burhanzi Obwami bwa Nnâmahanga banabe n’ebintu by’obulagirire, kwa lwiganyo, ebiryo n’emishangi. (Mateyo 6:25, 31, 32) Cikone arhalaganyagya akalamo k’eraha, arhanayerekanaga oku, okuba na bintu binji by’omubiri kwanayerekana oku rhugishirwe na Nnâmahanga. Ciru, arhonda abumvirhiza bage okubiyerekire okulongereza obuhirhi, bwakarhumire kwaba kuzibu kulibo okulonza burhanzi Obwami. (Mateyo 6:19, 20, 24) Entumwa Paolo yakozire bwenene kuyerekera Obwami bwa Nnâmahanga, ciru hali n’amango akag’ibula bintu bilebe by’omubiri. Aka Yezu, arhonda abandi okubiyerekire omurhego gw’okulonza babe bagale.—Abafilipi 4:11, 12; 1 Timoteyo 6:6-10.
Entanya z’obunywesi: Abakristu barhalagiriri oku kukola mpu lyo balama.
Okuli: Ebibliya edesire oku Abakristu bashinganine bakole lyo bahikiriza amalagirire gabo n’ag’emilala yabo. (1 Abatesalonika 4:11, 12; 2 Abatesalonika 3:10; 1 Timoteyo 5:8) Yezu arhaderhaga oku abanafunzi bage bal’ishinganine balonze Obwami bone, lubero n’oko adesire oku bashinganine balonze burhanzi Obwami.
Abalonza burhanzi Obwami bwa Nnâmahanga baba babidu okukola lyo balama n’okulangalira oku Nnâmahanga abarhabala babe n’ebintu by’obulagirire by’omu kalamo.—1 Timoteyo 6:17-19.
^ Ebinwa “burhanzi mulonze” bihindwirwe kurhenga omu verbe y’Ecigiriki eyerekine ecijiro c’okugendekera, n’ebyo binwa byanacib’ihindûlwa “kulongerereza.” K’okuderha oku Obwami bushinganine burhôle enafasi ntanzi omu kalamo kirhu ci burhabonagwa nka kantu kakujirwa mango malebe gone.
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Obwami bwa Nnâmahanga Byo Bici?
Erhi Yezu aba ali omu mukolo gwage gw’amahubiri hanw’igulu, aganirîre Obwami bwa nnâmahanga kulusha eyindi myanzi. Hakola hali myaka minji abantu basalira ly’Obwami bwa Nnâmahanga buyisha.
AMAHUGÛLO G’EMILONGO Y’EBIBLIYA
Amahugûlo g’Olwandiko lw’Abafilipi 4:6, 7—“Murharhanyagya Cici”
Masala gahi mberuluka gakabarhabala abakozi ba Nnâmahanga bamulangalire n’okuba n’omurhûla gw’ekandalala?
ENYIGIRIZO Z’EBIBLIYA
Ebikolanwa by’Okuyiga Ebibliya
Ocishoge ebi wayiga omu Ebibliya byakakurhabala ogendekere wayiga n’okushagalukira ebi oli wayiga.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.
