AMAHUGÛLO G’AMANDIKO G’EBIBLIYA
Mateyo 6:34—“Murhacîlibuzagya oku by’Irhondo”
“Murhacîlibuzagya oku by’irhondo: olusiku lw’irhondo lwone lwacîlongeza. Ngasi lusiku n’amalibuko galwo.”—Mateyo 6:34, Mashi Bible.
Amahugûlo g’Olwandiko lwa Mateyo 6:34
Yezu, waderhaga ezo nderho, ayemezize n’obwalagale abumvirhiza bage oku barhakwanini bakacilibuza, erhi kurhanya kurhalusire olugero, okubiyerekire amazibu g’amango gayisha. Lubero n’oko, bakayungusire omu kushibirira amazibu ga lusiku luguma luguma.
Yezu arhalonzagya okuderha oku rhurhashinganini rhukarhanya oku by’irhondo erhi kujira emipango okubiyerekire amango gayisha. (Emigani 21:5) Cikone, alonzagya okurhurhabala lyo rhuyaka okucilibuza, erhi kurhanya kurhalusire olugero, okubiyerekire ebyakarhuhikira irhondo. Okurhanya kurhalusire olugero kwanarhuma rhwabula omwishingo na kandi kwanarhuma rhurhacijira ebi rhwakajijire. Rhurhakahash’iyusa amazibu garhacirhuhikira omu kugarhanyako ene. N’ebi rhucilibuzako kanji-kanji birhahika, n’erhi byakahika birhaba bizibu nk’oku rhwal’irhanyize.
Akanga Ebinwa Biri omu Mateyo 6:34 Byaderhagwamwo
Yezu aderhaga ebyo binwa omu Mahubiri gage g’oku Ntondo gamanyikine bwenene, gaganirirwe omu Mateyo cigabi ca 5-7. Muli ago mahubiri, Yezu ahugwîre oku okurhanya kurhalusire olugero kurhakakubûla akalamo kirhu erhi kuyushula obuli bwako. (Mateyo 6:27) Na kandi adesire oku, erhi rhwakaheba Nnâmahanga oku nafasi ntanzi omu kalamo kirhu, rhurhashinganini rhucilibuze okurhalusire okugero okubiyerekire eb’irhondo. Bulya Nnâmahanga anashibirire emirhi n’ensimba, arhakaleka okushibirira amalagirire g’abantu bamukolera.—Mateyo 6:25, 26, 28-33.
Osome Mateyo cigabi ca 6 n’amahugûlo g’idako, ezindi referanse z’amandiko, n’enfoto.
Olole n'Ebi Bikulikire
AMAHUGÛLO G’EMILONGO Y’EBIBLIYA
Amahugûlo g’Olwandiko lw’Abafilipi 4:6, 7—“Murharhanyagya Cici”
Masala gahi mberuluka gakabarhabala abakozi ba Nnâmahanga bamulangalire n’okuba n’omurhûla gw’ekandalala?
ENYIGIRIZO Z'OMUSINGI Z'EBIBLIYA
Ka Nnâmahanga Anayumvirhize Amasala Goshi?
Ka Nnâmahanga anayumvirhiza amasala gw’omuntu oli wamusalira n’obulyalya? Ka Nnâmahanga anashuza oku masala gw’omulume oli walibuza mukage?
ENYIGIRIZO Z’EBIBLIYA
Ebikolanwa by’Okuyiga Ebibliya
Ocishoge ebi wayiga omu Ebibliya byakakurhabala ogendekere wayiga n’okushagalukira ebi oli wayiga.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.
