“Okazikenga sho na nyoko, ly’olama myaka minji omu cihugo ohîrwe na Nyakasane, Nyamuzinda wawe.”—Olubungo 20:12, New World Translation.

 Nnâmahanga arhegesire Abaisraheli ba mîra oku bakakenga ababusi babo. Bulya aliyushwire eciragane kw’er’irhegeko, oko nako kwarhuma bal’ikenga. Ciru akaba rhurhacihûnyirwi okukenga Irhegeko Nnâmahanga ahâga Abaisraheli, lihamagalwa Irhegeko lya Musa, amakanuni gage garhasag’ishanja. Amakanuni er’Irhegeko lyal’iyimangireko gacirigakola ene, na ntyo gali ga bulagirire oku Bakristu.—Abakolosi 3:20.

 Abana, barho n’abakulu, banakenge ababusi babo omu kubarhumikira. (Bene-Levi 19:3; Emigani 1:8) Ciru n’amango abana bakola bakulu banakola bagwerhe emilala yabo, bashinganine bagendekere bashibirira ababusi babo. Kwa lwiganyo, banajire okwabo koshi ly’ababusi babo bakola bashosi baba n’ebintu by’obulagirire, ciru banabarhale n’ensaranga amango bazilagirireko.—Mateyo 15:4-6; 1 Timoteyo 5:4, 8.

 Okengere oku abana Baisraheli balishinganine bakenge b’ishe na ba nnina, omu kujira ntyo bakag’iyerekana oku babwine omukolo gwa ba nnina oku guli gwa bulagirire omu mulala. (Emigani 6:20; 19:26) Abana b’ene nabo bashinganine bajire ntyo.

 Arhali omu ngasi kantu abana bakengamwo ababusi babo. Abana Baisraheli barhal’ishinganine okurhumikira ababusi babo, erhi muntu yeshi-yeshi, erhi akaba okujira ntyo kwakarhumire barharhumikira Nnâmahanga. (Olushika 13:6-8) Ene nalyo, Abakristu ‘banayumve Nyamuzinda kulusha abantu.’—Ebijiro by’Entumwa 5:29.

 Omu Irhegeko Nnâmahanga ahâga Abaisraheli, alaganya oku abana bakenge ababusi babo lyo ‘balama nsiku nyinji banabone omugisho’ omu cihugo Nyamuzinda akabahire. (Olushika 5:16) Barhakahâbirwe obuhane bwakag’ihâbwa abana barhakag’irhumikira irhegeko lya Nnâmahanga n’okugomera ababusi babo. (Olushika 21:18-21) Amakanuni er’irhegeko liyimangireko garhasag’ishanja mpu bulya hamagera myaka minji lihânyirwe. (Abefezi 6:1-3) Rhube misole erhi bakulu, rhweshi Omulemi wirhu ayish’irhuhûna eraporo. Na nk’oku alaganyize, abana bamurhumikira banarhumikira ababusi babo bayish’ilama myaka minji, bulya bagwerhe obulangalire bw’okulama ensiku n’amango.​—1 Timoteyo 4:8; 6:18, 19.

 Omu citabu c’Olubungo 20:12, aha er’irhegeko liri omu Marhegeko Ikumi, erhi Nderho Ikumi, hayerekine oku liri lya bulagirire. (Olubungo 20:1-17) Amarhegeko gali embere lyalyo gayerekine ebi Abaisraheli bal’ishinganine bajire kuyerekera Nnâmahanga, kwa lwiganyo, balishinganine bamuharhamye yenene. Amarhegeko galikulikire gayerekine ebi balish’inganine bajire kuyerekera ababo bantu, galigahiziremwo okuba bishwekerezi kuli b’iba erhi bakabo n’okurhazimba. Co cirhumire, irhegeko “okazikenga sho na nyoko” linakabonwa nk’irheme erhi cilalo egarhi k’ebi balihûnyirwe okujira kuyerekera Nnâmahanga na kuyerekera ababo bantu.