AMAHUGÛLO G’AMANDIKO G’EBIBLIYA
Yeremiya 29:11—“Mmanyire Niene Omuhigo Ngerêrezize Kuli Mwe”
“‘Mmanyire niene omuhigo ngerêrezize kuli mwe. Guli muhigo gwa murhûla cikwone gurhali gwa buhanya, * nti lyo mmuha obulangalire bw’ensiku zash’iyisha.’”—Yeremiya 29:11, Mashi Bible.
Amahugûlo g’Olwandiko lwa Yeremiya 29:11
Yehova Nnâmahanga alaganyize abakozi bage oku akabahîre omurhûla amango gayisha. Ciru akaba ebyo binwa byal’iyerekire abakozi bage ba mango ga mîra, biciyerekine entanya Nnâmahanga acigwerhe ene. Aba “Nnâmahanga ohâna obulangalire.” (Abaroma 15:13, Mashi Bible) Kobinali, ayandikisize ebiragane bya ntyo omu Bibliya lyo “rhuba n’obulangalire” bw’amango minja gayisha.—Abaroma 15:4.
Akanga Ebinwa Biri omu Yeremiya 29:11 Byaderhagwamwo
Ebyo binwa byali biguma by’omu nderho zali omu maruba garhumiragwa Abaisraheli bahamisibagwa kurhenga e Yeruzalemu n’okuhêkwa e Babiloni. * (Yeremiya 29:1) Nnâmahanga ababwira oku bakabêzire eyo munda myaka minji n’oku bakayubasire enyumpa, bahinge amashwa, banarhôle abakazi n’okuburha abana. (Yeremiya 29:4-9) Cikone, Nnâmahanga ayushula ntya: “Amango emyaka makumi gali nda e Babiloni yaba yamahika, namurhandûla nnanyunjuze omulagi namulaganyagya gw’okumugalula [e Yeruzalemu].” (Yeremiya 29:10) Omu kuderha ntyo, Nnâmahanga abayemeza n’obwalagale oku arhakabayibagire n’oku obulangalire bw’okugaluka emwabo bwakahikirire.—Yeremiya 31:16, 17.
Nnâmahanga ahikirizize eciragane ahâga Abaisraheli. Nk’oku analêbaga, Babiloni ahimwa n’Omwami Mupersi ohamagalwa Sirusi. (Izaya 45:1, 2; Yeremiya 51:30-32) Enyuma z’aho, Sirusi ayemerera Abayahudi oku bagaluke emwabo. Bagaluka e Yeruzalemu enyuma za myaka 70 y’okuhamisibwa.—2 Enganîro 36:20-23; Ezra 3:1.
Okuhikirizibwa kw’eciragane ciri omu Yeremiya 29:11 kuyemezize n’obwalagale abalangalira ebiragane bya Nnâmahanga ene oku anabihikirize. Ebyo biragane bihiziremwo okugalula omurhûla omw’igulu lyoshi kugerera Obwami bwa Nnâmahanga bwayish’irhambulwa na Kristu Yezu.—Ennanga 37:10, 11, 29; Izaya 55:11; Mateyo 6:10.
Entanya z’Obunywesi Okubiyerekire Olwandiko lwa Yeremiya 29:11
Entanya z’obunywesi: Nnâmahanga ajira “omuhigo” erhi mupango mulebe kuyerekera ngasi muntu.
Okuli: Nnâmahanga analeke ngasi muntu acishoge ebi ajira omu kalamo kage. Ebinwa byage biri omu Yeremiya 29:11 abibwiraga ecigusho c’Abaisraheli bali e Babiloni, ci arhabibwiraga muntu muguma-muguma, ananal’ilonzize abantu ba muli eco cigusho coshi babe n’omurhûla omu mango gayisha. (Yeremiya 29:4) Cikone, Nnâmahanga analeke ngasi muntu acishoge erhi ayunguka n’eciragane cage erhi nanga. (Olushika 30:19, 20; Yeremiya 29:32) Abacishozire okulonza Nnâmahanga bajijire ntyo omu kumushenga n’omurhima goshi.—Yeremiya 29:12, 13.
Entanya z’obunywesi: Nnâmahanga anashoboze abakozi bage obugale bw’omubiri.
Okuli: Oluderho “kushoboza” luli omu Yeremiya 29:11 luhindwirwe kurhenga omu luderho lw’Ecihabraniya luhugwîre “murhûla, bugale, n’akalamo kinja.” Kushimbana n’emilongo eri enyanya n’idako ly’olo lwandiko, Nnâmahanga alaganyize Abaisraheli omurhûla n’akalamo kinja, cikone arhabalaganyagya obugale. Er’ishanja lyakagendekire lyabaho na buzinda bakagalusire e Yeruzalemu.—Yeremiya 29:4-10.
Osome Yeremiya cigabi ca 29 n’amahugûlo g’idako, n’ezindi referanse z’amandiko.
^ Yehova ly’izino lya Nnâmahanga.—Ennanga 83:18.
^ Okubiyerekire olwandiko lwa Yeremiya 29:11, citabu ciguma (The Expositor’s Bible Commentary) cidesire ntya: “Eco co ciragane cinja bwenene ciri omu Bibliya ciyerekine obwonjo bunji Yahweh [Yehova] agwerhe kuyerekera abo bahamisibwa na buzinda cabaha ecirhumire c’okuba n’entanya nyinja n’obulangalire.”—Ibugu 7, bukurasa bwa 360.
Olole n'Ebi Bikulikire
ENYIGIRIZO Z'OMUSINGI Z'EBIBLIYA
Obwami bwa Nnâmahanga Byo Bici?
Erhi Yezu aba ali omu mukolo gwage gw’amahubiri hanw’igulu, aganirîre Obwami bwa nnâmahanga kulusha eyindi myanzi. Hakola hali myaka minji abantu basalira ly’Obwami bwa Nnâmahanga buyisha.
ENYIGIRIZO Z’EBIBLIYA
Ebikolanwa by’Okuyiga Ebibliya
Ocishoge ebi wayiga omu Ebibliya byakakurhabala ogendekere wayiga n’okushagalukira ebi oli wayiga.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.
