AMAHUGÛLO G’AMANDIKO G’EBIBLIYA
Yowane 1:1—“Aha Murhondero, Erhi Luderho ho Âbâ”
“Aha murhondero, erhi Luderho ho âbâ, na Luderho âli haguma na Nyamuzinda, na Luderho âli nyamuzinda.”—Yowane 1:1, New World Translation.
“Aha murhondero, erhi Luderho ho âbâ, na Luderho âli haguma na Nyamuzinda, na Luderho âli Nyamuzinda.”—Yowane 1:1, New International Version.
Amahugûlo g’Olwandiko lwa Yowane 1:1
Olu lwandiko luyerekine binji okubiyerekire akalamo ka Yezu embere ayishe hanw’igulu. (Yowane 1:14-17) Omu mulongo gwa 14, izino “Luderho” (erhi “Logos,” omu Cigiriki, ho loʹgos) likolesibwe nk’izino lya ceyo. Izino ly’eceyo “Luderho” nkaba liyerekine omukolo gwa Yezu gw’okumanyisa abandi amarhegeko n’amahano ga Nnâmahanga. Yezu agendekire amanyisa akanwa ka Nnâmahanga amango g’omukolo gwage hanw’igulu n’enyuma z’okugaluka empingu.—Yowane 7:16; Amafulûlo 1:1.
Oluderho “Aha murhondero” luganirire amango Nnâmahanga arhonderaga omukolo g’obulemi n’okulema Luderho. Buzinda, Nnâmahanga akolesa Luderho omu kulema ebindi bintu byoshi. (Yowane 1:2, 3) Ebibliya edesire oku Yezu ye “Nfula omu biremwa byoshi” na byoshi kugerera “ye byalemagwa.”—Abakolosi 1:15, 16.
Ebinwa ‘Luderho ali nyamuzinda’ biyerekine oku embere Yezu ayishe hanw’igulu ali wa misi anagwerhe amorhere gali nk’aga Nyamuzinda. Anaderhwa ntyo bulya aba Luderho wa Nnâmahanga anaba Nfula ya Nnâmahanga na kugerera ye, Nnâmahanga alema ebindi biremwa byoshi.
Akanga Ebinwa Biri omu Yowane 1:1 Byaderhagwamwo
Ecitabu ca Yowane ciganirire akalamo ka Yezu n’omukolo gwage hanw’igulu. Omulongo gwa burhanzi guganirire okubaho kwa Yezu embere abe muntu, obwîra agwerhe haguma na Nnâmahanga n’omukolo g’obulagirire agwerhe omu lushangi Nnâmahanga ajira haguma n’abantu. (Yowane 1:1-18) Eyo myanzi erhurhabire rhuhugûkwe ebi Yezu aderhaga n’ebi ajijire amango g’omukolo gwage hanw’igulu.—Yowane 3:16; 6:38; 12:49, 50; 14:28; 17:5.
Entanya z’Obunywesi Okubiyerekire Olwandiko lwa Yowane 1:1
Entanya z’obunywesi: Ebinwa bizinda biri omu Yowane 1:1 bishinganine bihindûlwe “Luderho ali Nnâmahanga.”
Okuli: Ciru akaba bantu banji bahindula Ebibliya omu zindi ndimi banahindûle olo lwandiko ntyo, cikone abandi banaluhindule omu yindi njira. Omu mandishi ga mîra, enderho ibirhi “Nyamuzinda” (Cigiriki, the·osʹ) ziri omu Yowane 1:1 zanayandikwa lubero. Eartikle defini eri embere za “Nyamuzinda” murhanzi, cikone erhali embere za Nyamuzinda wa kabirhi. Basomi banji b’Ebibliya bayerekine oku, okubona embere za the·osʹ wa kabirhi erhali eartikle defini kudesire binji. Kwa lwiganyo, okubiyerekire okubula kw’eartikle k’oyo Nyamuzinda wa kabirhi, citabu ciguma (The Translator’s New Testament) cidesire ntya: “Oko kurhumire Theos (Nnâmahanga) wa kabirhi aba nka adjektife, co cirhumire ebyo binwa kuli kuderha oku ‘Luderho aligwerhe oborhere buli nk’obwa Nyamuzinda.’” Abandi basomi b’Ebibliya n’abandi bahindûla Ebibliya omu lundi lulimi nabo banahireho olubero lwa ntyo.
Entanya z’obunywesi: Olu lwandiko luyigirirzize oku Luderho ye na Nnâmahanga Ogola-Byoshi.
Okuli: Ebinwa “Luderho ali haguma na Nyamuzinda” biyerekine oku ogo mulongo guganirire bantu babirhi bali lubero. Birhakahashikana Luderho abe “haguma na Nyamuzinda” anacibiba ye Nnâmahanga Ogala-Byoshi. Emilongo eri enyanya n’idako eyerekine oku Luderho arhali ye Nnâmahanga Ogala-Byoshi. Yowane 1:18 adesire ntya: “Nta muntu ciru n’omuguma osag’ibona Nyamazinda.” Cikone, abantu babwine Luderho, Yezu, olwandiko lwa Yowane 1:14 ludesire oku “Luderho acijizire muntu, anabêra muli rhwe. Nirhu rhwabwine irenge lyage.”
Entanya z’obunywesi: Luderho ho ayorhaga aba.
Okuli: “Omurhondero” guganirirwe mw’olo lwandiko gurhaganiriri “omurhondero” gwa Nnâmahanga, bulya Nnâmahanga arhajira murhondero. Yehova Nnâmahanga ali “wa kurhenga ensiku n’amango.” (Ennanga 90:1, 2) Cikone, Luderho, Yezu Kristu, agwerhe omurhondero. Ye “cisiki [murhondero] c’ebi Nnâmahanga alemaga byoshi.”—Amafulûlo 3:14.
Entanya z’obunywesi: Okuhamagala Luderho “nnâmahanga” kuli kuyigiriza abantu okuharamya bannâmahanga banji.
Okuli: Oluderho lw’Ecigiriki luhindwirwe “Nnâmahanga” erhi “nnâmahanga” (the·osʹ) kanji-kanji lunakalug’ishushana n’enderho z’Ecihabraniya ʼel na ʼelo·himʹ, zikolesibwa omu Ndagano ya Mîra. Ezo nderho z’Ecihabraniya z’omusingi zihugwîre “Wa Buhashe Bunji; Wa Misi Minji” zinakolesibwe omu kuganirira Nnâmahanga ogala-byoshi, abandi bannâmahanga, ciru n’abantu. (Ennanga 82:6; Yowane 10:34) Nnâmahanga alemire ebindi bintu byoshi kugerera Luderho, co cirhumire anahamagalwa wa buhashe bunji. (Yowane 1:3) Okuderha oku Luderho ali “nyamuzinda” kupatine n’obulebi buli omu Izaya 9:6, bwal’ilêbire oku oyo mwishogwa wa Nnâmahanga, Masiya erhi Kristu, anahamagalwa “Nnâmahanga w’obuhashe” (Cihabraniya, ʼEl Gib·bohrʹ), cikone arhali “Nyamuzinda Ogala-Byoshi” (ʼEl Shad·daiʹ, odesirwe omu Omurhondêro 17:1; 35:11; Olubungo 6:3; Ezekiyeli 10:5).
Ebibliya erhayigirizizi okuharamya bannâmahanga banji. Yezu aderha ntya: “Wakaz’iharâmya Nyakasane [Yehova, NWT] Nyamuzinda wawe, onakamukolera yenene.” (Mateyo 4:10) Ebibliya edesire ntya: “Bulyala ciru hakaba banyamuzinda b’obwihambe emalunga na hano nshi, -na ntyo hali banyamuzinda banji banji na banyakasane banji banji-, kwone kuli rhwe rhwene hali Nyamuzinda muguma yene, ye Larha, ye na cisisi c’ebintu byoshi, ye mwanalemeragwa, na Nyakasane muguma yene, ye Yezu Kristu, orhuma byoshi bihabâ, onarhuma rhuhabâ.”—1 Abakorinti 8:5, 6.
The Translator’s New Testament, bukurasa bwa 451.
Omusomi w’Ebibliya Jason David BeDuhn adesire oku okubula kw’eartikle defini kuyerekine oku abo ba “Nyamuzinda” bali lubero nk’oku “ziyerekine olubero egarhi ka ‘nyamuzinda’ na ‘Nyamuzinda’ w’omu lulimi lw’Ecingereza.” Ayushwire ntya: “Omu Yowane 1:1, Luderho arhali Nyamuzinda ye na nnene, cikone ali nyamuzinda ogwerhe oborhere bwa Nyamuzinda.”—Truth in Translation: Accuracy and Bias in English Translations of the New Testament, bukurasa 115, 122, na 123.
Yehova ly’izino lya Nnâmahanga.—Ennanga 83:18, NWT.
Olole n'Ebi Bikulikire
NYIGIRIZO Z’OMUSINGI
Ka Yezu aba Nnâmahanga?
Ka Yezu yeba Nnâmahanga Ogala Byoshi? Erhi ka baba bantu bali lubero?
AMASHUZO G’EBIBLIYA
Bulya Gurhi Yezu Ahamagalwa Mwene Nyamuzinda?
Erhi akaba Nyamuzinda arhaburhaga Yezu nka kula bene bantu baburha abana, gurhigi Yezu abamwo Mwene Nyamuzinda?
ENYIGIRIZO Z’EBIBLIYA
Ebikolanwa by’Okuyiga Ebibliya
Ocishoge ebi wayiga omu Ebibliya byakakurhabala ogendekere wayiga n’okushagalukira ebi oli wayiga.
ENYIGIRIZO Z’EBIBLIYA
Oyige Ebibliya Haguma na Nirhu
Oyige Ebibliya omukuganira buzira kulipa kantu koshi-koshi.
