“K’orhayumvirhi oku nkurhegesire nti: Ozibuhe onarhwalihe? Orhabaga na boba buci arhanabaga na ntemu nci, bulya Nyakasane [Yehova, NWT] Nyamuzinda wawe, ali nawe ngasi hoshi wankanaja.”—Yozwe 1:9.

 Kugerera ezo nderho, Yehova * Nnâmahanga ayemeza n’obwalagale omukozi wage mwishwekerezi Yozwe oku ‘akazibuhire n’okurhwaliha,’ ciru akarhimanine n’akanga kazibu erhi bihanzo bibonekine nk’arhakabihima. Erhi Yozwe akarhumikire amarhegeko ga Nnâmahanga, arhakabire n’ecirhumire c’okuyoboha amango gayisha, bulya Yehova akabire nk’oli aha burhambi bwage ly’amuha oburhabale al’ilagirireko. Nnâmahanga arhabire Yozwe omu kumuha obulongozi n’okumurhabala ehime abashombanyi bage.

 Gurhi Yozwe ‘akazibuhiremwo n’okurhwaliha’? Akazibuhire n’okuba n’oburhwali kugerera amandishi galongozibagwa n’iroho litagatifu Yehova al’ihânyire muli ago mango. Ago mandiko galihiziremo ‘amarhegeko goshi Musa mwambali [wa Yehova] arhegekaga [Yozwe].’ * (Yozwe 1:7) Yehova al’ibwizire Yozwe oku ‘akasoma n’izu lisungunu [“kurhanya bwenene kulico,” New International Version] budufu n’omûshi.’ (Yozwe 1:8, NWT) Oko kusoma n’okurhanya bwenene kwarhabire Yozwe azibuhye omuhigo gwage gw’okujira obulonza bwa Nnâmahanga. Buzinda bw’aho, Yozwe al’ishinganine akenge ebi akag’isoma ly’‘ahashijira bwinja nk’oku binayandisirwe.’ Erhi akajijire ntyo, akakozire n’obwenge n’okuyololoka. Na ntyo ko byanabire. Ciru akaba Yozwe arhimanine n’amazibu, alamire akalamo kinja na kakurhimusa ye nka mukozi wa Yehova.—Yozwe 23:14; 24:15.

 Enderho Yehova abwiraga Yozwe zicigendekire zarhuha omurhima ene. Ziyerekine kunganaci Yehova ashibirira abakozi bage boshi, bwenene amango bali barhimanana n’amazibu. Aba alonzize bahime amazibu nk’oku Yozwe agahimaga! N’aka Yozwe, ‘banazibuha n’okurhwaliha’ kugerera okusoma Ebibliya ngasi mango n’okurhanya bwenene kw’ebi bali basoma, n’okujira kushimbana n’obulongozi bwayo.

 Enyuma z’okufâ kwa Musa, Yehova abwira Yozwe oku alongoze ishanja ly’Abaisraheli. (Yozwe 1:1, 2) Ago mango, Abaisraheli balikola hofi baje omu Cihugo c’Amalaganyo, k’okuderha, cihugo c’e Kanani. Cikone bal’ishinganine balwise abashombanyi bal’igwerhe emisi bwenene. Kwa lwiganyo, Yozwe alishimganine alwise Abakanani, bali bantu babi bwenene. * (Olushika 9:5; 20:17, 18) Na kandi Abakanani bali banji banagwerhe ebikolanwa by’okulwa ivita kulusha Abaisraheli. (Yozwe 9:1, 2; 17:18) Cikone Yozwe akulikira n’oburhwali obulongozi bwa Yehova. Na Yehova amurhabala, bulya Abaisraheli bahimire bashombanyi babo banji omu myaka ndarhu yone.—Yozwe 21:43, 44.