Mazino Anga Nnâmahanga Ajira?

YEREKANA

Ishuzo ly’Ebibliya

Nnâmahanga ajira izino luguma lyone ly’okuli. Linayandikwe יהוה omu Cihabraniya na kanji kanji linahindulwe “Yehova” omu Mashi. a Kugerera omulêbi wage Izaya, Nnâmahanga aderha ntya: “Niè Yehova. Elyo lyo izino lyani.” (Izaya 42:8, NWT) Er’izino libonekine hofi kali 7 000 omu mandishi ga mîra g’Ebibliya, lyo libonekine kanji bwenene kulusha agandi mazino goshi bahamagalamwo Nnâmahanga, erhi kulusha agandi mazino goshi g’abantu. b

Ka Yehova ajira agandi mazino?

Ebibliya eyerekine oku Nnâmahanga ajira izino liguma lyone, cikone ekolesize agandi mazino manji g’obukulu na zindi nderho nyinji z’okumuhamagala. Eliste eri ah’idako eyerekine mazino maguma maguma g’obukulu ga Nnâmahanga na nderho nguma nguma z’okumuhamagala; ngasi luderho na ngasi izino ly’obukulu liyerekine cigabi ciguma c’oborhere bwage.

Izino ly’obukulu	Olwandiko	Amahugûlo
Allah	(Ntâlo)	Oluderho lw’Eciharabu “Allah” lirhali izino ly’okuli, cikone liri izino lya bukulu lihugwirwe “Nnâmahanga.” Abahindula Ebibliya omu Ciharabu n’omu zindi ndimi banakolese oluderho “Allah” aha nafasi ya “Nnâmahanga.”
Ogala-byoshi	Omurhondêro 17:1	Agwerhe obuhashe bulushire obwa ngasi muntu erhi ngasi kantu. Oluderho lw’Ecihabraniya ʼEl Shad·daiʼ, “nnâmahanga Ogala-byoshi,” luli kali nda omu Bibliya.
Alfa na Omega	Amafulûlo 1:8; 21:6; 22:13	‘Murhanzi na Muzinda’ erhi ‘Murhondêro na Buzinda,’ kw’okuderha oku nta wundi Nnâmahanga Ogala-byoshi wabireho embere za Yehova n’enyuma zage harhakaba wundi. (Izaya 43:10) Alfa na Omega eri herufi ya burhanzi n’enzinda y’olufabé lw’Ecigiriki.
Omushosi w’ensiku	Daniyeli 7:9, 13, 22	Arhagwerhi murhondêro; ayorha abaho ensiku n’amango embere za ngasi muntu erhi ngasi kantu.—Ennanga 90:2.
Mulemi	Izaya 40:28	Ye walemaga ebintu byoshi.
Larha	Mateyo 6:9	Ye Muhanyi w’Obuzine.
Nnâmahanga	Omurhondêro 1:1	Ngasi muntu erhi ngasi kantu bakaharamya; Olya w’emisi bwenene. Oluderho lw’Ecihabraniya ʼElo·himʼ luli omu obunji (pluriel), n’oko kuyerekine obukulu bwa Yehova, irenge lyage n’obwinja bwage.
Nyamuzinda wa banyamuzinda	Olushika 10:17	Ye Nnâmahanga mukulu bwenene, orhashushini na “banyamuzinda b’obwihambe” bantu baguma baguma baharamya.—Izaya 2:8.
Omwigiriza	Izaya 30:20, 21	Anahâne enyigirizo nyinja n’obulongozi bwinja.—Izaya 48:17, 18.
Mulemi	Ennanga 149:2	Ye wajiraga ebintu byoshi bibeho.—Amafulûlo 4:11.
Nnâmahanga w’Obushagaluke	1 Timoteyo 1:11, NWT	Aba wa mwishingo n’obushagaluke.—Ennanga 104:31.
Mumvirhiza w’amasala	Ennanga 65:2	Ye nnene anayumvirhize ngasi isala omuntu asalire n’obuyemere.
Oderhwa mpu Mba ho	Olubungo 3:14, Mashi Bible	Anabe ngasi kantu kahunyirwre ly’ahikiriza obulonza bwage. Kandi ezo nderho zahindwirwe ntya: “Naba ngasi kantu ndonzize okuba” erhi “Naba Ngasi Kantu Ncishozire Okuba.” Mpindulo ya Rotherham (The Emphasised Bible; Biblia—Tafsiri ya Ulimwengu Mupya) Ago mahugûlo garhurhabire okuhugûkwa izino Yehova liyerekinwe omu mulongo gukulikire.—Olubungo 3:15, NWT.
Bumvu	Olubungo 34:14, King James Version	Arhalembera enterekêro yage ehabwe owundi muntu erhi akandi kantu. Kandi olo luderho lwahindwirwe “arhalembera luhali” na “amanyikine oku anahûne abantu bacishwekere ko ye ye nnene.”—God’s Word Bible; Biblia—Tafsiri ya Ulimwengu Mupya.
Mwami w’ensiku n’amango	Amafulûlo 15:3	Oburhegesi bwage burhajira murhondêro na buzinda.
Nnawirhu	Ennanga 135:5	Murhegesi erhi patro, omu Cihabraniya ʼA·dhohnʼ na ʼAdho·nimʼ.
Nyamuzinda w’engabo	Izaya 1:9; Abaroma 9:29, Mashi Bible	Aba komanda w’emirhwe ya bamalahika. Kandi oluderho “Nyamuzinda w’engabo” lwanahindulwa “Nyakasane w’Emirhwe” na “Nnawirhu w’emirhwe y’Empingu.”—Abaroma 9:29, NET Bible, amahugûlo g’idako.
Nnâmahanga w’Enyanya-Bwenene	Ennanga 47:2, Mashi Bible	Y’eba enyanya za byoshi.
Mwimana	Emigani 9:10, Mashi Bible	Y’eba mwimana erhi mutagatifu bwenene kulusha ebindi biremwa byoshi (engeso zage zicîre zinaba nyinja).
Mubumbi	Izaya 64:8, NWT	Agwerhe obuhashe enyanya z’abantu n’amashanja nka kula omubumbi ajira obuhashe enyanya z’ibumba.—Abaroma 9:20, 21.
Cokola	Izaya 41:14	Ayokwire erhi kugula bene bantu kurhenga omu caha n’olufû kugerera engombôlo ya Yezu Kristu.—Yowane 3:16.
Lwala	Ennanga 18:2, 46	Aba lwakiro lw’okunali ye na nshôko y’obucire.
Muciza	Izaya 45:21	Anarhulikuze omu buhanya erhi bushereze.
Lungere	Ennanga 23:1	Anashibirire abakozi bage.
Nnawirhu Murhegesi Mukulu	Omurhondêro 15:2	Agwerhe obuhashe bunene bwenene; omu Cihabraniya ʼAdho·naiʼ.
Ow’Enyanya Bwenene	Daniyeli 7:18, 27	Ye murhegesi w’enyanya bwenene.

Amazino g’Ahantu omu Mandiko g’Ecihabraniya

Hali mazino maguma maguma g’ahantu gali omu Bibliya gabamw’izino lya Nnâmahanga, cikone ago garhali gandi mazino ga Nnâmahanga.

Izino ly’ahantu	Olwandiko luli mwer’izino	Amahugûlo
Yehova-jire	Omurhondêro 22:13, 14	“Yehova Ahâna.”
Yehova-nisi	Olubungo 17:15	“Yehova ye Mutungo Gwani gw’Ecimanyiso,” erhi “Ibendera Lyani.” (Mashi Bible) Yehova ali Nnâmahanga abakozi bage bakalangalira oku abalanga n’okubarhabala.—Olubungo 17:13-16.
Yehova-shalomu	Abaciranuzi 6:23, 24	“Yehova Guba Murhûla.”
Yehova-shammah	Ezekiyeli 48:35, amahugûlo g’idaku, American Standard Version	“Yehova Ali Aho.”

Bulya gurhi rhushinganine okumanya n’okukolesa izino lya Nnâmahanga?

Nnâmahanga anabone oku izino lyage, Yehova, liri lya bulagirire; co carhumaga aliyandikisa kali bihumbi omu Bibliya.—Malakiya 1:11.
Yezu, Mugala wa Nnâmahanga, ayerekîne kanji kanji obulagirire bw’izino lya Nnâmahanga. Kwa lwiganyo, asengera Yehova ntya: “Izino lyawe likuzibwe [licesibwe, NWT].”—Mateyo 6:9; Yowane 17:6.
Okumanya izino lya Nnâmahanga n’okukalikolesa kali kantu ka burhanzi omuntu ashinganine okujira ly’aba mwîra wa Yehova. (Ennanga 9:10; Malakiya 3:16) Obo bwira bwanarhabala omuntu ayunguke n’eci ciragane ca Nnâmahanga: “Namulikuza kulya kuba acinyishwekirekwo, namucinga kulya kuba amanyire izino lyani.”—Ennanga 91:14.
Ebibliya edesire ntya: “Haba ba nnâmahanga bw’obwihambe emalunga n’en’igulu, neci kwo binali, hali ‘bannâmahanga’ banji b’obwihambe, hali na ‘ba nyakasane’ banji b’obwihambe.’” (1 Abakorinti 8:5,6, Mashi Bible) Cikone eyerekine n’obwalagale oku Nnâmahanga muguma w’okuli izino lyage ye Yehova.—Ennanga 83:18.

a Bantu baguma baguma basomire bwenene bahugûla enderho z’Ecihabraniya banaderhe mpu izino lya Nnâmahanga likwanine lidehwe “Yahweh.

b Obofofi “Yah” bw’izino lya Nnâmahanga bubonekine hofi kali 50 omu Bibliya, kwa lwiganyo, omu luderho “aleluya,” kw’okuderha “Mukuze Nnâmahanga.”—Amafulûlo 19:1.