Liguma lyone Ebibliya eganirire lugenda okucishaka-shaka omubiri erhi tatuwaje, omu lwandiko lwa Bene-Levi 19:28, Mashi Bible; aha rhusomire ntya: “Murhakag’iheba enshâko oku mibiri yinyu.” Erhi Nnâmahanga aha Abaisraheli eri irhegeko, al’ilonzize babe lubero n’abantu b’amashanja gal’ibazungulusire bakag’icapa oku mibiri yabo amazino erhi ebimanyiso bya rhunnâmahanga rhwabo rhw’obunywesi. (Olushika 14:2) Ciru akaba Abakristu barhaciba idako ly’irhegeko Nnâmahanga ahâga Abaisraheli, banarhanya kwa buzibu-zibu akanuni karhenzire mw’er’irhegeko.

K’Omukristu anacishaka-shaka erhi kucihira cimanyiso cilebe oku mubiri?

 Amandiko g’Ebibliya gakulikire ganakurhabala orhôle omuhigo:

•   “Abakazi nabo bayambale emyambalo . . . n’olugero.” (1 Timoteyo 2:9) Ako kanuni kanarhabala abakazi n’abalume. Rhushinganine rhukakenga entanya z’abandi n’okuyaka okukaciyerekana.

•   Bantu baguma na baguma banakacishaka-shaka erhi kucihirako etatuwaje lyo bakayerekana bo bandi erhi lyo bayerekana oku bagwerhe oluhûma. N’abandi banajire ntyo lyo bayerekana oku bagwerhe oluhûma lw’okujira omubiri gwabo oku balonzize. Cikone Ebibliya ehânwire Abakristu ntya: “Muhâne emibiri yinyu nka nterekero y’obuzine, ntagatifu n’ey’okusimisa Nnâmahanga. Ntyola ko mukwanine okukolera Nnâmahanga n’omurhima [n’obuhashe bw’okurhanya].” (Abaroma 12:1) Okolese “obuhashe [bwawe] bw’okurhanya,” onacidose bulya gurhi olonzize okucishaka-shaka erhi kucihira etatuwaje oku mubiri. K’olonzize okuyiga bantu balebe? K’olonzize okuyerekana oku oli w’omu cikundi cilebe? Okengere oku wanashanja entanya zawe ci orhankahash’ikûla enshâko oku mubiri gwawe. Okurhanya bwenene lugenda ebikushumize, kwanakurhabala orhôle omuhigo gw’obwenge.​—Emigani 4:7.

•   “Engererezo z’omuntu w’obushiru zinarhume agala, cikwone nabiriduba buligo bumuyirha.” (Emigani 21:5, Mashi Bible) Bantu banji banakarhôla duba-duba omuhigo gw’okucishaka-shaka erhi kucihira etatuwaje oku mubiri, cikone banayibagire oku okujira ntyo kwanabalerhera amazibu haguma n’abandi, erhi kubalerhere amazibu ebwa kazi. Na kandi, okucishaka-shaka, erhi kucihira etatuwaje oku mubiri, kunahûne nsaranga nyinji, kunanalerhe amalumwa omu mubiri. Emyanzi n’ebyoburhunzi biyerekire okukûla enshâko oku mubiri eyerekine oku bantu banji bacihebire etatuwaje oku mubiri gwabo bahikire aha baciyunjuza ndi wababwiraga bajire ntyo.