Ecaha ciba cijiro erhi ntanya zipingine n’amarhegeko ga Nnâmahanga. Okujira ecaha kuhiziremo okuvuna amarhegeko ga Nnâmahanga omukujira ebintu bibi erhi ebirhashinganini omu masu ga Nnâmahanga. (1 Yowane 3:4; 5:17) Na kandi Ebibliya edesire oku ciri caha erhi rhwakayabirwa okujira ebintu bishinganine.​—Yakobo 4:17.

 Omu ndimi Ebibliya yayandikagwamo oburhanzi oluderho lwahindwîrwe caha, luba luhugwîre “okurhahikira kantu kalebe omuntu anal’ilonzize okuhikira.” Kwa lwiganyo, omu Israheli ya mîra, mwali ecigusho c’abasoda bagwerhe obulenga bw’okukweba amabuye, banakag’ikoza kantu kalebe “buzira kuhusha.” Erhi olo luderho lwakahindulwa luderho oku luderho, lwanasomwa “barhakajijire caha.” (Abaciranuzi 20:16) K’okuderha oku ecaha kuli kuvuna amarhegeko mashinganya ga Nnâmahanga.

 Ye nka mulemi, Nnâmahanga agwerhe ehaki y’okuheberaho bene bantu amarhegeko. (Amafulûlo 4:11) Rhwayish’imuha eraporo y’ebi rhwajijire.​—Abaroma 14:12.

Ka byanahashikana rhuyake ecaha loshi-loshi?

 Nanga. Ebibliya edesire oku “boshi bajizire ebyaha, baheza irenge lya Nyamuzinda.” (Abaroma 3:23; 1 Abami 8:46; Omuhanûzi 7:20; 1 Yowane 1:8) Bulya gurhi ntyo?

 Adamu na Eva, bantu barhanzi barhagwerhe caha oku murhonddero. Byahashikine ntyo bulya bali bimana banalemagwa oku nshusho ya Nnâmahanga. (Omurhondêro 1:27) Cikone, baheza obwimana bwabo erhi bagomera Nnâmahanga. (Omurhondêro 3:5, 6, 17-19) Erhi baburha abana babayahukiza ecaha, n’okurhaba kwabo bimana. (Abaroma 5:12) Ye nka Mwami w’e Israheli, Daudi aderha ntya: “Mba munyabyaha kurhenga okuburhwa.”​—Ennanga 51:5, Mashi Bible.

Ka hali ebyaha biba bibi kulusha ebindi?

 Neci. Kwa lwiganyo, Ebiblibliya edesire oku abantu b’omu Sodoma ya mîra bali “babî bwenene, na banyabyaha” n’ebyaha byabo byali “binji” bwenene. (Omurhondêro 13:13; 18:20) Rhuganiririre bintu bisharhu byakarhurhabala rhumanye erhi caha cilebe ciri cizibu.

1.   Obuzirho. Ebibliya erhurhonzire oku rhuyake ebyaha by’okujira eby’enshonyi, okuharamya ensanamu, okuzimba, endalwe, obushungu, obunizi n’obukurungu. (1 Abakorinti 6:9-11; Amafulûlo 21:8) Ebibliya edesire oku ebyo byaha biba lubero n’ebyaha omuntu akajira arhanarhanyizi, erhi arhanamanyiri. Kwa lwiganyo, nk’okujira erhi kuderha kantu kalebe kakarhuma abandi baciyumva kubi. (Emigani 12:18; Abefezi 4:31, 32) Ciru akaba ntyo, Ebibliya erhuhîre omurhima rhurhakag’inyihya obuzirho bw’ecaha, bulya okujira ntyo kwanarhuma rhwajira ecaha cizibu n’okuvuna amarhegeko ga Nnâmahanga.​—Mateyo 5:27, 28.

2.   Ebyashumyagya omuntu ajire ecaha. Hali ebyaha omuntu ajira omukurhamanya ebi Nnâmahanga arhuhûnyire. (Ebijiro by’Entumwa 17:30; 1 Timoteyo 1:13) Ciru akaba Ebibliya erhanyihizi obuzirho bwabyo, eyerekine oku hali olubero egarhi k’ebyo byaha n’omuntu okuvuna amarhegeko ga Nnâmahanga n’obulonza. (Emibalè 15:30, 31) Ebyaha omuntu ajira analonzize, omu “murhima mubi” birhenga​—Yeremiya 16:12.

3.   Kanga camakajirwa. Kandi Ebibliya ehizire olubero egarhi k’ecaha omuntu amajira liguma lyone n’ecaha amakajira kanji-kanji. (1 Yowane 3:4-8) Abajira “ebyaha n’oluhinzo,” ciru n’enyuma z’okumanya gurhi bakajiramwo aminja, Nnâmahanga anabatwire olubanja lukali.​—Abahabraniya 10:26, 27.

 Abakacitumuza enyanya z’ebyaha bizibu bajijire, banakaciyumva kubi bwenene enyanya z’amagosa gabo. Kwa lwiganyo Mwami Daudi ayandika ntya: “Ebyaha ngwerhe byanzonzire, bikola binzidohîre bwenene.” (Ennanga 38:4, Mashi Bible) Cikone Ebibliya erhuhîre obu bulangalire: “Omubi aleke okwage, na nyankola-maligo akabulire enkengêro zage, agaluke emwa Nyakasane [Yehova], naye amubabalira, agaluke emwa Nyamuzinda wirhu, bulya aba wa bwonjo bunji.”​—Izaya 55:7.