Wanaba mwîra wa Nnâmahanga erhi wakaciha akasanzi kw’okumumanya n’okujira obulonza bwage. Erhi wakajira ntyo, Nnâmahanga naye “anakuyegera.” (Yakobo 4:8) Ebibliya erhubwizire ntya n’obwalagale okubiyerekire Nnâmahanga “ntaye ali kuli muli rhwe.”​—Ebijiro by’Entumwa 17:27.

•  Ebi wakajira ly’omanya Nnâmahanga

•  Enyigirizo z’obunywesi okubiyerekire Nnâmahanga

 Okasoma Ebibliya

•  Ebi Ebibliya edesire: “Amandiko goshi galongozibwê na Nnamahanaga.”​—2 Timoteyo 3:16, NWT.

•  Oko kw’okuderha gurhi: Nnâmahanga ye watungaga Ebibliya. Ly’ajira ntyo, agwasa entanya zage omu bwenge bw’aba akolesagya lyo bayandika Ebibliya. Mw’eco citabu mwo aba ayerekine bici ab’alongîze bene bantu. Kandi mw’eco citabu aba ayerekine oborhere bwage, nk’obuzigire, obushinganyanya, n’obonjo.​—Olubungo 34:6; Olushika 32:4.

•  Ebi wakajira ly’omanya Nnâmahanga: Okasoma Ebibliya ngasi mango. (Yozwe 1:8) Okarhanya kw’ebi oli wasoma wanacidosa ntya: ‘Bici ebi nsomire binyigirizize okubiyerekire oborhere bwa Nnâmahanga?’​—Ennanga 77:12.

   Kwa lwiganyo, osome Yeremiya 29:11, buzinda ocidose ntya: ‘Bici Nnâmahanga andongize​—ka murhûla erhi buhanya? Ka Nnâmahanga yeri wacihôla erhi andongîze akasanzi kinja omu nsiku zayisha?’

 Okalabiriza obulemi

•  Ebi Ebibliya edesire: “Amorhere ga [Nnâmahanga] garhabonekana ganabonekane n’obwalagale kurhôndera aha kulemwa kw’igulu, bulya ganabonekane kugerera ebintu alemire.”​—Abaroma 1:20, NWT.

•  Oko kw’okuderha gurhi: Ebi Nnâmahanga alemire binarhuyigirize oborhere bwage, nka kula akantu kinja abatuzi batulàga kakarhuyigiriza binji kuli owakatulaga. Kwa lwiganyo, obuhashe bw’obongo (cerveau) bw’omuntu bunayerekane oku Nnâmahanga ajira obwenge bunji bwenene. Izuba n’enyenyezi nabyo binarhuyigirize oku Nnâmahanga agwerhe misi minji bwenene.​—Ennanga 104:24; Izaya 40:26.

•  Ebi wakajira ly’omanya Nnâmahanga: Ocilongeze akasanzi kw’okulabiriza n’okuyiga binji okubiyerekire obulemi. Ocidose ntya: ‘Erhi mbona oku ebi byoshi byalemirwe bwinja, bici oko kunyigiriza kuli Nnâmahanga?’ a Okuderha okuli, obulemi burhakarhuyiriza byoshi lugenda Nnâmahanga. Oko ko kwarhumaga arhuha Ebibliya.

 Okakolesa izino lya Nnâmahanga

•  Ebi Ebibliya edesire: “Nàmulikûza kulya kuba aba amanyire izino lyani. Ampamagala mmuyumve.”​—Ennanga 91:14, 15.

•  Oko kw’okuderha gurhi: Nnâmahanga ohamagalwa okw’izino lya Yehova anashagalukire balya bayishi izino lyage n’okulikenga. b (Ennanga 83:18, NWT; Malakiya 3:16) Nnâmahanga acimanyisize kuli rhwe omu kurhufulûlira izino lyage. Adesire erhi, “Nie Yehova. Elyo lyo izino lyani.”​—Izaya 42:8, NWT.

•  Ebi wakajira ly’omanya Nnâmahanga: Okakolesa izino lyage amango oli waganira enyanya zage.

 Okasalira Yehova

•  Ebi Ebibliya edesire: “Yehova ali hofi na ngasi yeshi omusengera.”​—Ennanga 145:18, NWT.

•  Oko kw’okuderha gurhi: Yehova anakayegerera balya bamusalira banagwerhe obuyemere. Isala ciba cijiro c’enterekêro ciyerekina kunganaci rhukenga Nnâmahanga.

•  Ebi wakajira ly’omanya Nnâmahanga: Okashenga oburhahusa. (1 Abatesalonika 5:17) Okamubwira ebikurhindibuzize n’oku oli waciyumva.​—Ennanga 62:8. c

 Oyubake obuyemere bwawe muli Nnâmahanga

•  Ebi Ebibliya edesire: “Nta muntu wakasimisa Nnâmahanga buzira bwemere.”​—Abahabraniya 11:6, Mashi Bible.

•  Oko kw’okuderha gurhi: Lyo rhuyegera Nnâmahanga bihûnyire rhube n’obuyemere muli ye. Ebibliya erhubwizire oku okuba n’obuyemere muli Nnâmahanga kurhali kuyemera kone oku ho aba. Cikoki kuli kumulangalira loshi, kw’okuderha kuyemera ebiragane byage n’okurhumikira amarhegeko gage. Okulangalirana ko kuzibuhya ngasi bwîra bwinja.

•  Ebi wakajira ly’omanya Nnâmahanga: Obuyemere bw’okunali buba buyimangire oku bumanye bw’okuli. (Abaroma 10:17) Co cirhumire ociyigirize Ebibliya onayerekane we nnene oku oyemire Nnâmahanga. Abahamirizi ba Yehovah bashagaluka okuyiga Ebibliya haguma na nawe. d

 Okajira ebishagalusa Nnâmahanga

•  Ebi Ebibliya edesire: “Bulya okuzigira Nyamuzinda kuba omu kushimba amarhegeko gage.”​—1 Yowane 5:3.

•  Oko kw’okuderha gurhi: Yehova aba mwîra wa balya bamuzigira erhi bajira okwabo koshi lyo barhumikira amarhegeko gage.

•  Ebi wakajira ly’omanya Nnâmahanga: Amango oli wayiga Ebibliya, ocihangane okumanya ebi Nnâmahanga asima n’ebi ashomba. Ocidose ntya: ‘Mpindulo nci nakajira lyo nsimisa Omulemi wani?’​—1 Abatesalonika 4:1.

 Osinze wabona oku Nnâmahanga anakushibirire erhi wakakolesa amahano gage

•  Ebi Ebibliya edesire: “Musinze mwabona oku Nyamuzinda aba mwinja bwenene.”​—Ennanga 34:8, Mashi Bible.

•  Oko kw’okuderha gurhi: Nnâmahanga akulalisire oku ocibonere wene obwinja bwage. Amango wamarhondera wabona oku Nnâmahanga anakuzigire ananakurhabale omu kalamo kawe, wanaba n’irala ly’okumuyegera.

•  Ebi wakajira ly’omanya Nnâmahanga: Amango oli wasoma Ebibliya, onakolese amahano galimwo na ntyo wacibonera obunguke oko kwakulerhera. (Izaya 48:17, 18) Na kandi wanabona gurhi abandi bantu bahikire aha bahima amazibu gabo kugerera oburhabale bwa Nnâmahanga, bahindwîre akalamo kabo n’aka omulala gwabo, na ntyo bahikira aha baba n’omwishingo gw’okunali. e

 Bunywesi: Mpu Namahanga aba ihwe.

 Okuli: Hali bintu biguma na biguma birhaba bilembu okuhugûkwa kuli Nnâmahanga. Kwa lwiganyo, Nnâmahanga liba Iroho lirhabonekana n’amasu. Ciru akaba ntyo, rhwanamumanya. Ebibliya erhubwizire oku bihûnyire rhumanye Nnâmahanga lyo rhuyishiba n’obuzine bw’ensiku n’amango. (Yowane 17:3) Kugerera enderho nembu, Ebibliya eganirire Lulema wirhu, amorhere gage, amarhegeko gage n’omuhigo gwage okubiyerekire bene bantu n’igulu. (Izaya 45:18, 19; 1 Timoteyo 2:4) Nk’oku rhwanaciderhaga aho nyanya, Ebibliya erhubwizire izino lya Nnâmahanga. (Ennanga 83:18) Rhuyumvirhe oku omuntu anahikira aha amanya Nnâmahanga, cikoki kandi anamuyegera.​—Yakobo 4:8.