Neci, Bulya Nnâmahanga alonzize abantu bamuharamye haguma omu cinyabuguma. Ebibliya edesire ntya: “Rhurhabalane rhwêne na rhwêne, rhunahânane omurhima omu buzigire n’omukukola aminja. Rhurhalekaga okukaja haguma.”​—Abahabraniya 10:24, 25.

 Yezu ayerekine oku abanafunzi bage bakajijire ikubuliro ligwerhe ecinyabuguma erhi ababwira ntya: “Ecimanyiso abantu boshi babonerekwo oku muli baganda bani, bwo buzigire mwazigirane.” (Yowane 13:35) Enjira ntazi abanafunzi ba Yezu bakayerekinemwo obo buzigire, kwali kucilunga haguma n’ababo bemezi. Bakabire balungine omu bigamba bibuganana haguma ngasi mango lyo biharamya Nnâmahanga. (1 Abakorinti 16:19) ) Boshi haguma, bakajijire ecinyabuguma cilungine c’omw’igulu lyoshi.​—1 Petro 2:17.

Akantu k’obulagirire kahûnyirwe enyuma ly’okuba omw’idîni lilelebe

 Ciru akaba Ebibliya eyerekine oku abantu banacilunga haguma lyo baharamya Nnâmahanga, erhayigirizizi oku omuntu anashagalusa Nnâmahanga mpu bulya ali w’omw’idini lilebe kone. Ly’omuntu w’omw’idini lilebe ayemerwa na Nnâmahanga, lishinganine limurhabale akayerekana oborhere bwinja omu kalamo kage. Kwa lwiganyo, Ebibliya edesire ntya: “Idini licîre lirhanaliko ibala omu masu ga larha Nyamuzinda, muliyumvagye: okukarhandula enfuzi n’abakana omu malibuko gabo, n’okucilanga buzira izabyo en’igulu.”​—Yakobo 1:27.