Ivita lya Armagedoni liyerekire ivita lizinda lyayish’iba egarhi k’eguvernema za bene bantu na Nnâmahanga. Ezo gurnema n’abazilunzire okuboko bali bahagalika Nnâmahanga ene omukurhayemera barhambulwa naye. (Ennanga 2:2) Ivita lya Armagedoni lyayish’ihererekeza oburhegesi bwa bene bantu.​—Daniyeli 2:44.

 Liguma lone oluderho “Armagedoni” luba omu Bibliya omu Amafulûlo 16:16. Ecitabu c’Amafulûlo cali erhi calebire “hantu haguma haderhwa omu ciebraniya Harmagedoni.” Cidesire oku “abami b’en’igulu lyoshi” bayish’icigusha haguma “batule entambala [ivita] omu lusiku lukulu lwa Nnâmahanga Mugala-Byoshi.”​—Amafulûlo 16:14, Mashi Bible.

 Bandi bayish’ilwa okw’ivita lya Armagedoni? Yezu ayish’ilongoza omurhwe gw’empingu lyo gulwisa n’okuhima abashombanyi ba Nnâmahanga. (Amafulûlo 19:11-​16, 19-​21) Abo bashombanyi bahiziremo abahagalika oburhegesi bwa Nnâmahanga n’okumubulira obukenge.​—Ezekiyeli 39:7.

 K’Ivita lya Armagedoni lyayish’ijirirwa e Moyen-Orient? Nanga. Ivita lya Armagedoni lirhakajirirwa omu ene nguma yone y’igulu, lubero n’oko, lyayish’ijirwa omw’igulu lyoshi.​—Yeremiya 25:32-34; Ezekiyeli 39:17-20.

 Hali amango oluderho Armagedoni luderhwa “Har–​Magedoni” (omu Cihabraniya Har Meghiddohnʹ), k’okuderha “Ntondo y’e Megido.” Megido yali vile yali omu eneo y’e Ishraheli ya mîra. E Histoire eganirire mavita maguma na maguma gakag’ijirirwa hofi n’eyo vile, gahiziremo ciru mavita maguma na maguma gaganirirwe omu Bibliya. (Abaciranuzi 5:19, 20; 2 Abami 9:27; 23:29) Cikone, ivita lya Armagedoni lirhayerekiri eneo ndebe eba hofi n’e Megido ya mîra. Eyo munda erhaba ntondo nene, ciru n’akabanda k’e Yezreheli karhakayeneramo abantu boshi bayish’ilwa na Nnâmahanga. Lubero n’oko, Armagedoni gali mango amarhegesi ga bene bantu gayish’icigusha haguma lyo galwisa oburhegesi bwa Nnâmahanga.

 Gurhi Byayish’iba? Rhurhamanyiri gurhi Nnâmahanga ayish’ikolesa emisi yage. Byanahashikana ayish’ikolesa ebikolanwa by’okulwa ivita akolesagya omu mango gagera. Kwa lwiganyo; enkuba y’amabuye, emisisi y’idaho, ecihonzi, omuliro, enkuba, n’endwala. (Ayubu 38:22, 23; Ezekiyeli 38:19, 22; Habakuki 3:10, 11; Zakariya 14:12) Bashombanyi ba Nnâmahanga baguma na baguma bayish’ihikira okurhondera okunigana. Cikone oku buzinda bayish’ihugûkwa oku Nnâmahanga oli walwa haguma nabo.​​—Ezekiyeli 38:21, 23; Zakariya 14:13.

 Ka Armagedoni bo bwayish’iba buzinda bw’igulu? Igulu lirhakasherezibwa okw’ivita lya Armagedoni bulya Yehova alihîre bene bantu lyo balilamako ensiku n’amango. (Ennanga 37:29; 96:10; Omuhanûzi 1:4) Abantu boshi barhakasherezibwa okw’ivita lya Armagedoni bulya “ehitû hy’abantu” bali bakolera Yehova bayish’iyokoka er’ivita.​—Amafulûlo 7:9, 14; Ennanga 37:34.

 Omu Bibliya oluderho “igulu” lunakaganirira eyi planete rhuba rhulamireko. Cikone kandi lunakaganirira abantu babi bahagalika Nnâmahanga. (1 Yowane 2:15-17) K’okuderha oku erhi Ebibliya eyerekana oku “okuhwa kw’igulu” kwayish’iba okw’ivita lya Armagedoni, enakaganirira okuhwa kw’abantu babi.​—Mateyo 24:3.

 Mangaci ivita lya Armagedono lyaba? Erhi Yezu ali aganirira “amalibuko madârhi” gayish’ihwa okw’ivita lya Armagedoni, aderha ntya: “Olwo lusiku n’ako kasanzi ntaye omanyire, ciru na bamalahika b’empingu, ciru n’Omugala, nta wundi aha nyuma ly’Ishe yenene.” (Mateyo 24:21, 36) Cikone, Ebibliya eyerekine oku ivita lya Armagedoni lyayish’iba omu mango g’okubaho kwa Yezu kurhabonekana kwarhoneraga omu mwaka gwa 1914.​—Mateyo 24:37-39.